2 jul 2012

TORNÁRONME EN CONEYU


Nesta actividá va trabayase:

-Presente d’indicativu nes tres conxugaciones.

-Pronomes d’interrogación.

-Alverbios de cantidá.

N’otru sen de coses, trabayaremos la descripción con abondes dosis d’imaxinación y afondaremos na escritura.

Alcuérdeste que nun hai muncho tuvimos una bruxina pequí, pues paez que-y prestó abondo y tornó güei p’armala de nueves. De mano vamos prauticar los verbos en bruxilandia pa ser a sigui-yos la comba. Los conxuros en bruxilandia fáense con una carrapotada verbos dichos en presente. Entámase con ún de la primer conxugación, siguío d’otru de la segunda y depués ún de la tercera. Esta rellación tien de facese con toles persones, de yo a ellos, asina tenemos: entamo, bebo, sigo, garres, güeles, vives, fala, arreciende, tiñe,… Cada rapaz tien de preparar la so cadena de verbos y tien de prauticar a dicilo siguío y a tou meter. Conxúrense unos a otros tornándose en coneyos.

Nesti intre tenemos una clas de coneyos que nos tienen muncho de cuntar y por eso vieno TeleConeyu a grabalos coles sos esperiencies. De mano, vamos grabar espontáneo qué ye lo que sienten como coneyos, ensin dengún tipu preparación y cola so imaxinación. De xuru que los resultaos van ser curiosos a manta.

Tóca-yos preparar el programa de los sábados pela nueche pa TeleConeyu y van ser entrevistes a una carrapotada neños tresformaos en coneyos. Van formar pareyes nes qu’ún sedrá l’entrevistador y l’otru’l coneyu. Enantes d’entamar convién repasar los pronomes d’interrogación y los alverbios de cantidá na pizarra que se van emplegar na entrevista. Tamién se pue repasar los verbos en presente. Tres ello vamos tresnar preguntes que seyan a sirvi-yos de modelu pa la entrevista o pa qu’escueyan ente elles a la hora facela. Escribimos na pizarra les sos idegues o cenciellamente les tuyes si son mui nuevinos.

¿Cuála ye la to apariencia de coneyu?

¿Ónde vives?

¿Qué tamañu tienes?

¿Quién escueye les cenahories na to madriguera?

¿Cómo fales colos otros animales? ...

Dámos-yos agora tiempu a esgaya pa que preparen les entrevistes y dicímos-yos que nes rempuestes tienen d’emplegar alverbios de cantidá siempres que seyan a ello. Nun pares de pasar peles sos meses y correxir tolo que tengan trabayao, desplíca-yos toles duldes y facer que se sientan perbien nel aula. Una vegada preparaes y correxíes les entrevistes convién dexar qu’ensayen en casa y dalgo nel aula. Puen facelo de memoria o col papel cerquina. Grábense les sos intervenciones y depués vense. Tamién se puen ver les d’otres aules o otros años, van sete un material impagable.

Pa finar, tienen d’escribir nuna fueya la so esperiencia como coneyos y poneles nel aula o nel pasillo. Pues facelo con otros animales: xaronques, mures, sanxuaninos, melandros… Cada aula pue facer un animal, o cada pareya,…

Más nada per agora, alón.




.

2 comentarios:

Anónimo dijo...

Ta muy prestosa l'actividá de los coneyos. Quiciaves pueda ponela en práutica Techurrina

Nel Morán dijo...

Techurrina, munches gracies poles tos pallabres.