28 jun 2012

RÍOS D’OR


Na llingua antigua Or quier dicir ríu, agua que baxa de la borrina y va gayolera a la mar de Cordobello. Naide nun sabe onde nacen los Or, sicasí toos son a cuntar qu’en cuantes salen de la borrina esconsonen y dexen cayer el so ruíu pelos picos y valles de les altures. Ellí nacieron tamién Lluna y Xabel, dos pastores que curiaben les sos oveyes nos conceyos d’Emerói y Zila. Dambos nun se conocíen; dambos nun yeren aldovinar la fermosura que descansaba nel valle próximu; dambos tocaben les xiblates demientres les oveyes comíen ensin pausa la yerba; dambos dormíen de la que cuntaben estrelles en cielu; dambos suañaben.

Nel pueblu de Lluna, n’Emerói, vivía un xefe de tribu que tenía una fía qu’espeyaba la malura. Allampaba tolo que Lluna amirare, tolo que goliere, tolo qu’alendare, tolo qu’oyere, tolo que tocare, tolo qu’amare… Naciere guapa, pero non como Lluna que repartía bon xestu ellí onde s’alcontraba. La mui llaina, dende bien neña, procuraba que les otres rapaces nun falaren cola nuesa pastora so pena de cayer en desgracia.

Nel pueblu de Xabel, en Zila, el xefe de la tribu nun tenía una fía sinón un fíu arguyosu y enchipáu, que nun yera aguantar qu’otru rapaz fuere más polu que la so sosería, más valiente que la so cobardía, más cenciellu que la so babosería, más llistu que la so fatería, más tranquilu que la so celerina,… So pá dexare a les clares que naide nun yera a dexar al so fíu como babayu y Xabel, dende bien rapazu, nun fue a entendelo poro que la escuela quedó arrequexada pa la so intelixencia y tenía de tar abondo coles sos oveyes nos picos pa nun ofender a los superiores o cultivar el so celebru.

Los xefes de tribu de dambos pueblos tuvieron una xunta na llende de los conceyos d’Emerói y Zila pa falar serio y pausao.  A los sos oyíos llegaren nueves que-yos falaben de soluciones pa dalgún problema qu’otru: nel pueblu d’al llau atopaben casoriu pa los sos fíos y llibrábense d’un par d’engorrios de munchu curiáu.

Lluna y Xabel nun golifaben la que se-yos venía enriba, los dos xefes de tribu falaron coles sos families y llegaron a un alcuerdu que diba camudar les sos vides: los rapazos casaríen col fíu de la tribu d’al llau y a cambiu tolos miembros de les sos families diben recibir más dones que los qu’enxamás fueren a imaxinar. Pero teníen de llevalo en secretu con Lluna y Xabel, diben cunta-yos que-yos saliere un viaxe y que teníen de colar toos nel intre. Ropes, comida y xoyes enllenaron les alforxes de más pollinos qu’oveyes teníen. Salieron de nueche, ensin dici-yos alón a los vecinos. Los caminos nun s’alcontraben en dengún mapa y les cabres yeren los seres más intelixentes qu’atopaben. Hasta que dio una caravana con otra y decidieron compartir viandes. Lluna y Xabel desiguida se xuntaron. Enxamás conocieren persona tan prestosa, tan melguera, tan enllena de fermosura que l’otru. Namoráronse nun tris y quedaron en vese en cuantes volvieren del viaxe.

Nun hai que dicivos que les coses nun salieron como Lluna y Xabel asperaben. La traición de les sos families fo peor que los fedores d’esposu y esposa que se llevaren y la tristura caltrió les sos almes solitaries. Una nueche, a la mesma hora y col mesmu sen, Lluna y Xabel tiráronse a los ríos que pasaben baxo les sos cárceles-casa. Dengún punxo xestu de nalar, nin d’averase a la oriella, nin de pidir socorru,… L’agua de los dos ríos creció y llevó a los dos namoraos camín de la mar, cada vegada más rápido, cada vegada más curioso, cada vegada más candial, cada vegada con más ciñu. Nun los dexaba afogase llevantando los sos cuerpos penriba d’ella. De sópitu, dambos ríos abandonaron los sos cauces y enfilaron ún camín desconocíu hasta entós. Diben averando pasu ente pasu los sos cauces hasta vese nel horizonte. Al xuntase, dexaron que la pareya se besaren y salieren a la oriella mentanto nacía un nueu ríu: Or. Coles prieses y los amores nun fueron a decatase que yá nun taben nin n’Emerói nin en Zila, taben nun conceyu nueu que taba más cerquina a la mar. El so nome nun tien importancia, dende entós la xente del llugar camudáronlu pol del ríu recién nacíu, n’honor a aquella pareya que-yos remembró que la felicidá ye cosa de dos.




.ENLLAZA COL MAPA DE CORDOBELLO

25 jun 2012

CASA D’AIRE



Aire,
naguo por viaxar nuna casa d’aire,
que recueya los raigaños d’una vida argayada de sinceridá,
les nubes d’un amor amamantáu d’ausencies,
los picos d’una calma restolada d’agasayos,
los sones d’una virtú arguyosa d’esperances,
los llabios d’un arume formentáu de dulzor,
les miraes d’una fontasca albada dientro de ti,
dientro del aire,
dientro l’alma,
dientro’l sol,
dientro nós,
dientro mi,
dientro…





.

21 jun 2012

EL SANTUARIU DE PLISTÓI


Plistói, al par de la capital Bellobello, yera’l conceyu onde los foriatos llevantaron el santuariu a la so divinidá: L’ALMA ETENRA. Una vegada al añu van toos en peregrinaxe a la cueva onde los Primeros, aquellos que llegaron a la isllalla a poner l’orden y la decencia que nun teníen los llariegos, dexaron descansar al Llibru de la Verdá nel que se recueye la pallabra de L’Alma Etenra y que los acompañó nel so camín a la isllalla.

Na dómina del Presidente de Cordobello Arumbe, pertenecíente a les Grandes Families que gobernaben la isllalla, la ilesia nomó como Conseyeru del conceyu de L’Alma Etenra a Plistói, home qu’exercía como cardenal de la catedral de Bellobello. Abultó-y a tan relixosu señor qu’una cueva nun yera’l llugar afayadizu pal Llibru de la Verdá y entamó una pidida de dineru polos caminos y les ciudaes de los distintos conceyos. Les Grandes Families desiguida unviaron el so don, consistente nuna urna de cristal onde pondríen el Llibru de la Verdá una vegada finada la Catedral de Catedrales. Plistói convidólos a una fiesta de la pallabra onde les almes afalagaríen a la so gran señora y rogaríen porque tol dineru saliere de los llariegos nun actu d’hermandá colos foriatos. A les Grandes Families prestó-yos la idega y encamentaron a Plistói qu’unviare al exércitu casa per casa a allegrar a los llariegos con tan bona nueva.

Por primera vegada fízose un censu de llariegos, ensin utilidá hasta entós, siendo como yeren non votantes y pagando los impuestos al señor de zona que, depués de meter nel calcetu bona parte, unviába-ylu al Presidente a Bellobello. Xunto a los soldaos viaxaben dos sacerdotes, encargaos de llanzar la noticia a los llariegos y a condergalos al infiernu de la muerte si nun collaboraben con tan sagrada misión. La fame enllenó les cases de la xente del llugar y la muerte apropióse de dalgunes, anque enantes lleváronlos como mano d’obra pa construyir tan singular templu.

Plistói nun vio finada la so obra y como regalu a la so dignidá punxéron-y el so nome al conceyu. Pasó un sieglu de la so partida con L’Alma Etenra y los llariego siguíen morriendo. Nel segundo, un champán fízose cola nave central de la catedral y llantaron pexes de colores que glorificaren a la so divinidá y al so amáu Plistói. Nel tercero, les torres fundiéronse por mor d’un terremotu. Nel cuarto, daquella fartáronse de tanta catedral y montaron un casinu col que glorificar a L’Alma Etenra y al calcetu del Conseyeru de turnu. Tai tranquilinos, los Conseyeros de Plistói son toos cures.



.

18 jun 2012

LES MASCOTES DE DANA


Los conceyos de Cordobello estrémense nos vezos, caún guarda los suyos con ciñu y tenrura, nun faciendo de menos a los otros pero puxando más polos llariegos. Un exemplu tenémoslu nel conceyu de Dana onde, ente otres munches coses, tienen a les vaques como mascotes. Cada casa tien namái qu’una vaca a la que mimen y afalaguen neto a perros y gatos, nun dexando que s’avere a ella otres rumiantes de caseríes cercanos y refugando’l tratu con otres families que tengan al so llau los caldares familiares.

Cola llegada de los foriatos, viose la tradición como dalgo montuna y que podía atrayer a xente d’otros conceyos con ganes de riíse. Entamaron un concursu de vaques que diba ser renomáu en cada requexu de la isllalla y al qu’asperaben que se presentaren toles rumiantes del conceyu, el premiu merecíalu. Na oficina d’organización vieron acongoxaos que dengún llariegu presentaba la so vaca. El Conseyeru de Dana, dictador como tolos foriatos, mandó espropiar a toles mascotes y llevales pa unes cuadres al llau del prau de la fiesta. Los drames montaos polos llariegos fueron a esgaya desaxeraos pa los foriatos, que nun tuvieron otra qu’imponer la so llei poles males: prindar a tolos llariegos y metelos nos cuartonos.

El concursu viose siguío por foriatos de tola isllalla y tresmitío pol únicu canal televisivu qu’informaba de la verdá: Tele Foriatu. Dengún isllalleñu autóctonu de los conceyos vecinos s’averó a Dana lo qu’enfocicó al Conseyeru pero nun fue a enraxonalu y finar cola so felicidá. Fueron a correnderes a poles vaques a les cuadres y asina entamar el concursu. Atoparon qu’en cada cuadra namái que quedaba viva una rumiante, siendo lo otro una carrapotada güesos espardíos per tola corte. Dengún yera a desplicase que sucediere y a dengún se-y ocurrió entrugar a los llariegos del conceyu que taben apresaos cerca’l prau de la fiesta. El concursu llevóse p’alantre coles vaques que quedaben, amosando gran normalidá y pasando toles prebes iguaes pa la ocasión. L’ésitu fo descomanáu, enxamás la xente se carcaxeare tanto, y el xuráu xuntóse al final del eventu pa decidir la ganadora. Cuando diben entregar los premios namái que quedaba una vaca, les otres desapaecieren como toles anteriores. Dende entós nun se fala de les mascotes de Dana, esaniciaes por decretu del Conseyeru de Dana y lloraes polos llariegos que yeren los sos dueños. Sieglos curiando d’elles, separtándoles pa que nun se vieren con otres, y tuvieron de llegar los foriatos, tan llistos ellos, a xuntar la única raza de vaques caníbales de la historia. Pero nun hai mal que por bien nun venga, fras favorita de los foriatos, metieron a tolos llariegos de Dana nuna granxa nos picos y obligáronlos a facer les hamburgueses vexetarianes coles qu’alimentaben a les sos vaques. La so fama glayóse per tolos requexos de la isllalla y nun había familia de bon aquel que nun les mercare en supermercáu.





.

15 jun 2012

ABRÍI LES VENTANES, QU’ENTRE L’AIRE


Hai xente que llimpia la basura pa embaxo les alfombres de casa. Otros nun faen más que camudala d’un llau a otru. N’Asturies escaecimos de mercar la escoba y la casa tenémosla un migayín gocha. Dengún tien la culpa, toos facemos lo que podemos en cuantes xubimos del chigre. A too esto, ¿qué ficimos en volviendo del chigre? Abúltame que bebimos muncho y agora tamos de resacona. ¡Vaya la que garramos ayeri!
L’executivu que nos gobierna anduvo a xampán. Alcordáronse qu’había de barrer pero vaciar botelles nun ye un trabayu fácil y dexáronlo meyor pa mañana, o pasao mañana, o la selmana que vien, o l’añu que vien, o la lexislatura que vien,…

La oposición protestó abondo de la que finaben con botelles de cosecheru mercaes a les comunidaes gobernaes por ellos. Anque bebieron dalgo de xampán del gobiernu de la que combayaben con él na importancia d’organizar turnos a la hora de meter la mano na caxa de perres pública. Traíen tal cogorza que dengún faló d’escobes.

IU taba faciendo referemdums coles sos bases sobre si beber xampán o cosecheru, eso sí, cuando llegue la prensa hai de sacar dalgunes botellines de sidra.
Nacionalistes/asturianistes van facer dalgunos congresos pa decidir si la escoba ye pa facer el tradiocional baille de la subsodicha o non. Les duldes vienen cuando falen de la pureza d’un canciu o otru: les engarradielles, zancaníes y emburriones namái aparaben pa beber un culín de sidra.

Al final naide merca la escoba, abre les ventanes pa que s’airee la casa Asturies y escobia la basura. Siguimos viviendo nuna cuevona ensin aire na que malpenes somos a respirar lo mugoriento y a pidir les subenciones pa dir tirando. Nadie nun nos pisa’l callu pa que seyamos a esconsonar, abrir les ventanes pa qu’entre la lluz y reconocer la nuesa casa enllena mierda. Nun sé cuánto tiempu sedremos a vivir ensin aire, pero paez ser qu’eso nun-y importa a naide.


La selmana que vien entamo'l mio periodu vacacional poro que namái espublizaré'l blog llunes y xueves. Tamién dicivos que Cordobello, un blog mui aquello torna a los sos principios y namái va asoleyar bloglliteratura y dalgunes pingarates de didáutica: Coses de Cordobello, Sensaciones y Nel Aula. Esta pequeñeñesísima incursión nel llau de la realidá fízome decatame que la irrealidá faeme más feliz y ye más sincera. Toi en dalgún proyeutu qu'otru pero d'eso vais enteravos cuando asoceda.

.

13 jun 2012

EL FURACÁN TURULATU


Esta actividá sofítase en dos pegoyos:
-Imperativu plural: garrái, coyéi, dicíi,…

-Singular y plural nos nomes, acordies al grau de dificultá que-yos quieras pidir.

Va lleganos un furacán y Proteición Civil tien de llanzar un comunicáu aconseyando a la xente: Mercái delles piles pa les vueses radios y llinternes, asina como llates de comida. Enllenái dalgunes botelles d’agua potable. Nel furacán, escuchái la radio o la televisión pa mantenevos informaos. Díi a la zona la casa que sea más segura. Agora tienen de grabar el comunicáu, pa ello tienen d’ensayalu dalgunos minutinos y garrar confianza. Alcordáivos que’l furacán ye un migayín turulatu sicasí la llectura tien de facese igual de turulata: dir del final al entamu, como si fuereis camarones.
Preparái una llista de verbos que tengan poco que ver colos furacanes y ponéilos n’imperativu plural. Agora preparái nomes estremaos de los de catástrofes y ponéilos de singular a plural. En pareyes, preparái cartelos d’instrucciones pa un furacán turulatu emplegando los verbos y nomes trabayaos, escoyendo los que más vos peten y queden más llocos. Garrái la estructura del comunicáu y camudái los verbos y nomes, yá veréis que llocura montáis, o inventái vós el comunicáu acordies la capacidá vuesa de trabayar. D’esta vais volver turulatos a los compañeros. Los cartelos resultantes publicitáilos nos pasiellos y podéis grabar los comunicaos pa ponelos n’otres clases o camudalos con otros colexos.

Veis que cenciella. Vémonos na próxima. Alón.





.

11 jun 2012

0


Nes mios dómines de maestru, enantes que me xubilaren por enfermedá, enxamás nun punxi un cero. Camentaba que yá yera abondo con presentase, poner el nome y tar dimpuestu a gastar tinta pa merecese un dos. Sicasi, nunca nun punxi un dos, ye más, a mui pocos estudiantes suspendí, había que ganalos pa la causa faciendo que l’asignatura fuere prestosa y pagare la pena estudiala.

Prestaríame tornar a poder poner notes y decidir a quién-yosles ponía. Nun sedríen los neños, nin los pas, nin los trabayadores, nin los homosesuales, nin… Gastaría la mio paciencia colos políticos, xuzgando les sos capacidaes, los sos intereses, les sos habilidaes, los sos conocimientos y tola riestra de terminoloxía qu’ellos nos obliguen a emplegar pero que nun dominen. A munchos nun-yos diba a poner el dos porque nun se presenten al trabayu la mayoría los díes, cobrando una carrapotada perres qu’ellos mesmos se dan. Otros nun diben poner el nome porque sedría aforfugante’l ponelo. Y práuticamente toos nun diben gastar tinta si nun sacaben dalgo en provechu amás de la nota.

Nestos tiempos d’atadures curties pal trabayador, imaxina ún que los políticos sedríen a buscar soluciones más afayadices que les recetes de da-y lleña al probe. Qu’algamaríen finxos más fonderos de la cenciella xubida d’impuestos a los d’abaxu, recortar los drechos de los trabayadores, finar coles posibilidaes de los discapatcitaos, fundir la Escuela Pública, llaceriar la sanidá,… Que diben a xustificar el so salariu grande abondo. La rempuesta: tamos gobernaos por unos discapacitaos políticos qu’en cuantes-yos quites les manes de la caxa de les perres públiques berren como neños y nun son nin a cavilgar un rispiu. Esta gandaya ye de lo peor del estáu, de lo más rastreru y mentirosu, que nos engañen una y otra vegada ensin que reacionemos. Por eso, yo pondría-yos un 0, un 0 porque nun hai menos, porque siéntome xenerosu, porque …

¡Wert! Sal fuera clas. Nun faes más que dicir patochaes. Yes un abusón.




.

8 jun 2012

LES UNIDAES ANTIDISTURBIU NUN LES INVENTÓ’L PP


Anque paeza mentira, les unidaes antidisturbiu nun entamaron na dómina d’Aznar nin fueron perfeicionaes na de Rajoy. Los romanos, causantes del masoquismu asturianu na etapa Areces, fueron los sos creadores. Más que nada emplegábenles pa intervenir nes revueltes populares, onde sacaben los sos escudos descomanaos y una espadina piquiñuca a la que-y llamaben gladium. Tamién nos alcontramos con escuadrones a caballu que-yos llamaben turmas y que tamién facíen de les suyes. Esta guardia pretoriana taba formada por unos 500 homes pero col tiempu viéronse poca cosa y enancháronlos a 1000. Sicasí, los nuesos gobernantes tienen de tomar nota porque nun fue nin una nin dos, sinón una carrapotada, nes que los pretorianos se xuntaron al pueblu escontra los sos gobernantes. Nun taría mal que fueren a cursinos con Calígula pa deprender qué pasa cuando abusen del pueblu.



.

6 jun 2012

ESPAÑÍU EN GAMUSÍN


Nun había vida en Gamusín que nun trescurriere tres los llibros: espeyaben el so caminar, la so elegancia, el so gociu, la so soledá…, tolo que yera a enllenar d’airón el so mundiu conocíu yera recoyíu naquelles fueyes tan sagraes pa ellos. La so xente cuasi deprendía a lleer al par qu’a falar o dar los primeros pasos. La titularidá de los llibros yera pública, les biblioteques dexábense visitar en tolos requexos del conceyu y les persones de Gamusín nun emplegaben el conceutu de mercar pa con un llibru. Pero la llegada de los foriatos, invasores esteriores de la isllalla, finó con esta costume o pretendió facelo, por embargu, los sos habitantes nun taben pol llabor y llucharon como verderones pa esfarrapa-yos dafechu los planes. Los foriatos nun fueron a garrar nin un llibru pa quemalu, los habitantes de Gamusín xuntáronlos toos nuna cuevona al par d’un cantil y ficieron una biblioteca na que se guardaben toles sos ayalgues culturales.

Gamusín pieslló les sos llendes a los foriatos qu’intentaben entrar nel so territoriu poro que tuvieron d'entrar como espíes y llantar refuxos pa ser a desplazase naquella tierra. Ún de los finxos que teníen marcaos yera atopar la biblioteca secreta, non polos llibros qu’ellí hubiere sinón pola xirigoncia que facíen d’ellos nel restu la isllalla. Munchos fueron los pillaos na gueta del gran misteriu y otros munchos los que tuvieron de salir por pies, sicasí, siguíen unviando espíes que fueren a dar anque fuere con un solu llibru. A los Gamusinos ya-yos cafiaba que porfiaren tanto, asina que decidieron que los foriatos dieren con ello. En toles entraes al so conceyu pusieron xixilancia con orde d’empobinar a los espíes nel camín y na hora correchos. Aportaron tolos espíes xuntos, ensin nengún escrúpulu nin mieu a ser descubiertos por parte los gamusinos, y almiráronse de la so gran habilidá nel espionaxe, ensin dulda dala la xente que fuere unviada enantes qu’ellos yera fato. Atoparon un arsenal de dinamita por casualidá, d’ellos llibros perdíos pel suelu indicando el camín y dalgunos gamusinos fuxendo del llugar delantre la so inminente llegada. En dellos minutos españó’l sitiu y de milagru atoparon un barcu dexáu prendíu nuna playa baxo los cantiles. En Bellobello la fiesta duró delles selmanes.

En Gamusín malpenes hebio movimientu, asemeyaba un conceyu muertu. De xemes en cuando oyíase dalgo parecíu a música que venía de les profundidaes de la tierra.


.

4 jun 2012

ANUNCIU POR CANALLES


Véndise hipoteca n’estáu perfechu y ensin controlar pol BCE. Llánzala un bancu de postín, en llugar mui céntricu, vistes a fartar y personal non desagradable dafechu. Ufiértase hasta final de mes un 20% de descuentu sobre la parte pagada pol anterior propietariu d’hipoteca, que yera d'un 60%. L’otru 40% vien con plegaria a la Virxen del Robu Perpetuu enantes de dir a falar cola entidá financiera que-y la va avalar. Cola hipoteca va-y un xuegu de potes de regalu y un xalé na trena. Total discreción.


.

1 jun 2012

LA MIO PRIMA TA MUI P’ALLÁ


De siempres la familia tuvo muncho aquello y la ilesia nun  dexa que la xente la esmigaye. D’ente los parientes más afamáu anguaño ta la prima, sobre too pol riesgu que xenera. Acordies a lo que despliquen los llinguateros n’economía, la prima riesgu ye la diferencia en centésimes de rentabilidá de los bonos a 10 años d’un estáu en comparanza cola rentabilidá del bonu a 10 años del estáu que consideren cola economía con más puxu de la zona. ¿A que nun sabéis cuál ye l’estáu abusón de la nuesa zona? ¿Grecia? ¿Irlanda? ¿Portugal? ¿España? ¡Qué mal lo lleváis! Entama por A y fina con A. ¿Australia? Non, non, Australia ta n’otru continente. ¿Austria? Austria ta nel nuesu, ta nel mesmu mercáu y hasta fala la mesma llingua que nel estáu del que falamos. ¡Qué nun te decates! Voi dicítelo, ye Alemania. Nun lu paecía, non. ¡Vaya primes que tienen n’Alemania!

Esa prima tán vocinglera y qu’espatuxa tanto espeya’l nivel de confianza de los mercaos na economía y les instituciones d’un estáu como l’español. La nuesa prima paez que yá ta mui vista polos mercaos y nun la quieren nin regalada. Yá sé qu’Aznar punxo a España a vivir pero a lo que se ve coles perres d’otru y non coles suyes. Non, eso nun valía, paez ser. Y pa enriba agora tamos que lo regalamos, refiérome al nivel de corrupción, a una banca con más cara que clientes, un déficit fiscal de muncho aquello na xente bien y patriota suizera,… Paez ser qu’eso truxo dalgo de desconfianza y fizo xubir la prima riesgu del señor Rajoy, tán mayoritaria nel parllamentu enfañol y tán esmirriada n’Europa.  Vamos, que dalgún se ta tirando del pelo depués de les últimes eleiciones xenerales. Ala, yá ta desplicáu lo de la prima y el riesgu de ser trabayador nun país de caradures. Alón y hasta otra.





.