28 sept 2012

VIRUS




Naz el virus asturianu: YE. Si ties un blog na nuesa llingua, ye necesariu que seyas solidariu y dexes que t’ataque de xemes en cuando YE. Hai que normalizar la nuesa llingua y facer que seya de toes toes como les otres. Ábrete al virus YE, lo más modernu na informática llariega.


.

20 sept 2012

RONTÓI: CUESTIÓN D’ALTURA


 
 
El conceyu más cerca’l cielu de tola *isllalla tien por nome Rontói, el llugar colos picos más pindios y cola cima de mayor altitú de Cordobello, 7.482 metros, y que respuende al topónimu de Vaxilón. Los isllalleños visitaben el llugar a cada poco, teníenlu como un iconu de conexón col cielu y cuidaben que non a muncho tardar ellí llegaríen xente d’otros llugares de la galaxa o más lloñe, por eso siempres había dalguíen na so rodiada asperando.

Col tiempu llegaron los *foriatos, pueblu de fuera la isllalla que pa murnia los *llariegos nun llegaben del cielu sinón de nenyures, de fuera la realidá, d’un llugar que naide nun conocía nin albidraba, dalgo asina como apaecieron por arte de maxa, la maxa que truxeron coles sos armes de matar cuerpos y almes, col so imperiu de la inorancia más simplaya, col so apodrecer de la dignidá más indigna, cola so relixón tan aforfugante y babaya…

Desiguida torgaron la entrada de llariegos a Vaxilón y a los picos más cercanos. Construyeron una murralla descomanada con una entrada única y ficieron l’altar d’oración al *Alma Eterna. Siguieron dafechu los mandaos de toa relixón que se precie: facer suyos tolos llugares de cultu del enemigu, anque ésti fuere’l ser más inocente la natura. Entamaron mitos qu’arrodiaben de verdá les sos mentires, mitos nos que se cuntaben que los foriatos yeren llamaos pol Alma Eterna dende’l cielu de Vaxilón, que viaxaren pel camín de la escuridá a la isllalla pa ser a rezá-y nel llugar señaláu pola so Sagrada Figura, qu’una palomba s’averare al llugar acompañada por un Alma Maestra pa que’esta-y ficiere un altar a la so Gran Persona, y asina taríemos con milenta xixilastraes más que falaben de la mesma cosa.

Cada orden relixosa escoyó onde llevantar la so basílica y el so conventu, tando más apegaes a la carretera xeneral, p’hacia les cercaníes del altar, aquelles con mayor dotación económica y nos pericuetos más alloñaos les más probetayes. Enllenaron de monxes, monxos y cures los sos llugares santos y les Almes Maestres dexábense convidar por una orden y otra hasta cansar, santificando la so vixilia d’estasis de los sentíos y los corazones.

 

El llugar necesitaba una seña d’identidá que lu punxere penriba de cualquier ranking relixosu. Naide nun lu pronunciaba pero toos taben pensando en dalgo asina como’l Llibru de la Verdá de Plistói, del que nenguna persona duldaba del so poder milagrosu y al que-y teníen una adoración absoluta. Falóse d’un concursu d’idees qu’arrexuntare a los celebros más valoratibles de tola foriatada, pero la recoyida de fondos nun dio pa tantu. Escoyóse ente aquellos artistes más granibles pa dar con ún que llevare p’alantre una xenialidá cola qu’ablucar a tol mundiu, pero naide nun quería trabayar en dalgo que diba ser secretu y nun brillaría nos so currículums. Obligóse a cada orden a buscar ente la so xente a aquellos con más orixinalidá, pero toles ordenes mandaron al mesmu tipu de prauticante d’anovación vieyo. Nun-yos quedaba más onde buscar y decidieron correr una folixa, como siempres. De sópitu, dalguién dixo:

-¡Necesito una virxen!

Toos arreguilaron los güeyos, abrieron les boques y llanzáronse a abrazar al noviciu que tuviere tan inesperada idea. La solución amosó que los milagros esistíen, nun faciendo falta da-y tantes vueltes a les coses y dexándose llevar por una lluxuria nel so términu xustu.

Nun tardaron n’alcordar que les vírxenes entregaríense a l’Alma Eterna nel monte Vaxilón y depués taríen cerca d’un añu hasta ser tomaes pola so Eminencia Altísima que dirixía’l mundiu los xustos cola so sapiencia tan reconocida. La so graciosa persona tomaría’l cuerpu de dalgún prior de les órdenes presentes nos montes de la rodiada pa representalu y ser a finar cola virxinidá del santu cuerpu de les moces escoyíes, nun aparando tan santa ufrienda hasta llograr descendencia. Los neños y les sos mas, yá non vírxenes, viviríen una vida de perfeición en conventos esperdigaos pela xeografía de Cordobello ya illuminaríalos l’espíritu de santidá.

 

Los años fueron pasando y los priores fueron faciendo’l so sacrificiu, hasta cuando les moces yeren d’una fermosura alloriante y un dulzor espampanante. Los donativos pa eses xanines y los sos fíos enllenaben cofres y cofres del santuario yá que na vida exemplar que diben vivir nun facía falta’l dineru nin otres coses valoratibles d’esti mundiu, al nun ser el contentar nesta esistencia de dolor a los servidores de l’alta fe.

Col tiempu, les families más fervoroses rezaben día y nueche pa qu’escoyeren a les sos fíes como vírxenes del Alma Eterna y les neñes suañaben con ello como si d’un príncipe azul se tratare. Un bon día, la fía fea del Presidente de la isllalla emperróse en ser escoyida como aspirante al títulu, col consiguiente malestar de les *Grandes Families que nun participaben en tan mundanes cuestiones, pero so probe pá nun fue a quitá-ylo de la cabeza y nun tuvo más aquello que sobornar a los sufridos padres priores col infiernu en vida si nun escoyíen al so enxendru. La neña llegó al so agospiamientu en Vaxilón el día que se facía un conseyu de priores d’urxencia. Alcordaron nun facer muyer a esi horror de la especie humana y torná-yla a so pá como la refugada del Alma Eterna.

 

Sola, nuna solitú amarguxa, sola día y nueche, ensin que naide se dirixere a ella anque fuere con un mal xestu, la neña entamó a refugar del so deséu. Tres meses tardó en ver persona, que fuxó a tou meter en cuantes se decató de la so ansia corporal. Otros tres meses más hasta velu a él, el gorrumbu del santuariu, que yera l’unicu que s’atrevía a lleva-y la comida.

-Vas teneme asina por muncho tiempu, Alma Eterna. Nun vas faceme tuya.

Copularon como llocos, xornada a xornada, hasta quedar cansos. Él volvía a les cocines pa ser asonsañáu polos otros. Ella a suañar cola suerte que tenía, fuere puesta a preba pol Alma Eterna que se presentó como un llastimeru gorrumbu indignu d’ella. Los dos entregaos dafechu al llabor. Los dos estelaos pola suerte. Los dos amiseriaos polos que los arrodiaben

Depués de tiempu, tuvieron un neñu col abluque de tola curada. Cuidaben que yera frutu del Alma Eterna que los castigaba pol viciu y la lluxuria. Mandaron al neñu y la ma al conventu más cercanu a la casa paterna y ordenáron-y al gorrumbu desinfectar toles estancies onde la virxen fea tuviere. Finaron cola historia de les vírxenes declarando que l’Alma Eterna tenía alcontrao al fíu deseyáu y dende entós dedicaríase a contemplar la vida de la criatura.

 

Los homes y muyeres del Alma Eterna siguieron copulando ensin frenu. El gorrumbu nun torno tomar cuerpu, anque namai fuere d’un allacrán. La virxen vivió na fe de ser una escoyida. Al neñu creció-y deseguida una gorrumba qu’a los padres priores-yos fizo cavilgar. Los creyentes pensaron que tolos gorrumbos taben beatificaos pola Gran Persona. Les Grandes Families siguieron viviendo d’espaldes al pueblu, tan fatu y contentu que nun se decataba de la gran engañifa a la que yera sometíu, y mangoniaben  tolo que yeren a ello a los homes y muyeres de l’Alma Eterna, más difíciles de torear. Vamos que vivíen meyor que cures los mui aristócrates.

 

*Cordobello ye una isllalla, un piazu tarrén cola mar nel centru d’él y nel so esterior unos picos pergrandes que finen nuna borrina qu’enxamás fo trespasada por dengún home la isllalla. Ver mapa de la isllalla espublizáu na primer entrega de Coses de Cordobello.

*Foriatos: invasores de fuera la isllalla.

*Llariegos.- Autoctonos de Cordobello, la isllalla onde se desarrollen los nuesos cuentos.

*Alma Eterna.- dios al qu’adoraben los foriatos y cuyo llibro sagráu ye’l Llibru de la Verdá que s’atopaba nel santuariu de Plistói.

*Grandes Families.- Los qu’entamaron el camín que los truxo a Cordobello. Yeren yá grandes na relixón del Alma Eterna, escoyíos pol Alma pa dirixir al so rebañu de creyentes enantes d’atopar la isllalla, pero depués amosaron un gran serviciu al Alma Eterna pagáu cola aristocracia de por vida.

 
.

17 sept 2012

¡QUÉ ANIMAL SOI!


Vamos facer discutinios por grupos nos que vamos trabayar:

-Axetivos pa persones que vamos da-yos a los animales.
-Emplegu de porque, asina que, d’esta miente,…

-Cuidar que…, tener de…., …
-Desplicar y xustificar les tos eleiciones: Cuido que …… y ……. tendríen de vivir xuntos porque….. / …… ye ……., asina que tendría de vivir con…. / …… nun ye mui ….., d’esta miente cuido que tendría de vivir con…. / ….

 
De mano hai qu’atrayelos pa esa idea tan espardida ente los neños de que los animales tienen carauterístiques humanes. Malpenes entamemos, vamos ver como s’empixen y nun  aparen de cuntar casos. El mundiu de los cuentos va ufiertanos abondes posibilidaes: llobos, gochos, xaronques,…. Nun taría del tou mal qu’empecipiemos cuntándo-yos dalguna fábula que los ponga bien.
Depués vamos facer un llistáu na pizarra nel que llantaremos una riestra de nomes d’animales a los qu’axuntaremos axetivos que describan como nos paecen a los homes. Esti llistáu tienen de copialu na so llibreta y bien pudiere emprimar:

Perru: candial, lleal,…
Tolina: llista, xuguetona,…

Curuxa: sabia, intelixente,…

…. a la que pudiere siguir una carrapotada de nomes y axetivos que-yos van facilitar la xera que vien darréu. En grupinos de 3 o 4 van iguar una riestra de frases nes qu’arrexunten a dos tipos d’animales que sedría ideái que vivieren xuntos: Cuido que la curuxa y la oveya tendríen de vivir xuntes porque la curuxa ye intelixente y la oveya simplaya. La curuxa podría aidar a la oveya nes coses que tendría de facer. Amás del llistáu, la pizarra tendría de recoyer les frases tipu que tendríen d’emplegar talamente como se recueye más p’arriba. Tócate a ti escoyer si les pones toes al mesmu tiempu o vas llantándoles d'una nuna y ellos vaigan usándoles acordies les pongas; l’exerciciu sedrá más llibre o más dirixíu escueyas una forma o otra de facelu.
Pa finar, ponse una puesta en común ente los grupos onde caún desplique y xustifique les sos eleiciones. Equí ye onde tienes de poner na pizarra les frases de los rapazos bien puestes y ellos tienen de correxíles en casu de que tengan dalgún fallu. Escueye ente que los demás copien o non les frases de los otros.

Nun taría mal que cada grupu ficiere un mural coles sos frases y s’espusiere nos pasiellos.

Y esta fo l’actividá, espérote na próxima. Alón.



.

13 sept 2012

EL SECRETU D’OROTA

¿QUIES ECHA-Y UNA GÜEYADA A CORDOBELLO? MIRA EQUÍ'L SO MAPA

POR SI QUIES RELLEER "LOS ELEFANTES DE CROSA"


Enantes que llegaren los foriatos a Cordobello, los llariegos amosaben gran desconocencia al rodiu del conceyu d’Orota. Falaben que yera un conceyu-viesca del que naide nun-y conocía población y nel que los árboles dexábense amorosar pol tiempu. Si despliegues el mapa de Cordobello enriba la mesa, y te fixes n’Orota, abulta ser un taragañu fechu a un llau de Crosa. Dalgunos vieyos de la rodiada aseguren que nes dómines del *entamu de la memoria, nos primeros mapes de la isllalla nun se recoyía’l conceyu d’Orota, Crosa taba consideráu ún de los conceyos grandonos que s’enanchaba hasta Narca. Sicasí, el tiempu pasa y naide nun s’alcuerda d’esi pasáu, siendo la única remembranza unos arbolones xigantescos que nun dexaben ver lo qu’había dientro la so rodiada.
Los foriatos, llistos como la fame, teníen dalgunes duldes de lo que-yos dicíen los llariegos: “Dexáilo pa prau”, sobre too depués de la esperiencia colos elefantes de Crosa. Aquello yera abondo sospechoso. De xuru qu’escondíen lo más granible de la isllalla dientro les sos llendes. De mano, los guardabosques del conceyu nun pisaben nin un rispiu de les sos viesques, manteníen les sos garites nos  finxos que Crosa tenía con Orota. N’otru sen, los aviones nun s’averaben nin por asomu a les sos tierres, de xuru que protexendo’l gran secretu que los llariegos ascondíen nel so interior.

El primer viaxe d’un avión tripuláu por foriatos diba romper aquel silenciu al rodiu d’un conceyu que paecía guardar lo más valiosu de la isllalla. Despegó ente himnos y flores al aire. La gayola dominaba nes comunicaciones ente l’avión y les torres de control peles que pasaba. Ente los pasaxeros diben dalgunos fíos y nietos de les *Grandes Families, confiaes elles en que’l futuru taba neses tierres y que nenguna lu quería perder.
-¡Vamos entrar nel conceyu! –informó’l comandante l’avión a los pasaxeros, a la radio y a la televisión de Cordobello.

La folixa esparramóse peles cais y cases de los foriatos. Taben engañifándolos pero eso diba finase naquel precisu momentu. Diben face-yos ver a los llariegos quién yeren y cómo les gastaben. Les voces de los ocupantes l’avión dexáronse oyer pela radio y la televisión, cuntaben que la viesca dexare pasu a una riestra valles que diben garrando pasu ente pasu altitú. Nun había dulda dala, en dalgún llugar teníen d’atopar el secretu de los llariegos y entós dominaríen dafechu la isllalla.

-Equí fai muncho calorón, ye como si…
La comunicación cortóse.



Pasaron los díes, les selmanes, los meses,… y los ocupantes del avión nun dieron señal de siguir con vida. En Bello-bello decidióse preparar un comandu qu’avanzare per tierra y fuere a descubrir l’amenaza que los llariegos-yos teníen preparada n’Orota. Diben entrar per Narca, nun fueren los elefantes de Crosa a esfarrapar los sos planes. Les Grandes Families dexaríen naquella ocasión l’honor de la llucha a la xente mas baxo de los foriatos, naguaben por facer una hermandá ente tolos homes escoyíos pol Alma Eterna, al fin de cuentes el pueblu siempres tuvo la gloria de dar la cara polos sos señores.
Oyóse de nueves los himnos pero esta vegada nun tiraron les flores al aire, al fin de cuentes nun diba nengún representante de postín. La caminada dexóse sentir col tiempu y los soldaos entamaron a rezungar en llegando al conceyu de Llagún. Les Grandes Families ufiertáron-yos una recompensa por participar na gran búsqueda que los dignificaría de por vida. Desiguida, les tiestes de los soldaos enllenáronse d’un supuestu oru y apandaron nes sos reivindicaciones. Por embargu, les tiestes de les Grandes Families alcordaron da-yos un diploma honoríficu, dexando pa más llueu’l dicí-yoslo a ellos pa que nun s’alteriaren con tan alta distinción.

La viesca amedranólos, reculando dafechu y dexando la búsqueda pa otra ocasión, pero los llariegos teníen-yos una sorpresuca ensin importancia: llevaron  a los elefantes de Crosa p’animalos. En viéndolos, fuxeron como llocos pa la viesca y nun fixaron la vista nenyures hasta pasada una hora. Los árboles de la sienda nun los dexaben respirar y el ruíu de los animales nun amazcaraben los sos fuertes llatidos de corazón. Nun dieron descansao hasta llegar a unos valles que s’asemeyaben a escaleres, caún taba a más altitú que l’anterior. Cimblaben de mieu a cada pasu que daben, l’alcordanza de les voces d’allegría que daben los ocupantes del avión al llegar a los valles nun-yos traía munchu aliendu. N’averándose a una zona enllena cueves, el calor dexóse sentir. Lo más seguru qu’ellí fo onde desapaeció l’avión. El secretu nun tenía de tar mui lloñe, de xuru qu’en dalgún d’aquellos furacones, o en toos ellos. Decidieron asperar a la nueche pa entrar a escures y ser a pillar a los llariegos con toles pates metíes nel secretu. Lo meyor sedría echar un pigazu pa ser a madrugar con fuerza.



Los ruxíos espertaron al comandu y dexaron desatapáu’l secretu. Llaparaes de fueu salíen d’aquelles boques volantes y enfilaben pa les espaldes de los foriatos. Les esnales d’aquellos bichos movíense de contino y llevaben a los soldaos a drecha ya esquierda pa safase del so ataque. Les prises y el mieu nun los dexó descubrir de qué animales se trataba. Les duldes facíense cada vegada más aforfugantes. Una voz más qu’arrañada glayó ensin aparar:
-¡Dragones, dragones,…!

Pocos fueron los que se salvaron. Aquel garapiellín d’allucinaos que se safaren fuxeron ensin dengún xeitu y tardaron selmanes en salir d’Orota. Cuando s’atoparon de nueves colos elefantes de Crosa echábense en suelu pa que los remataren. Los elefantes nun yeren a creyelo. Dexáronlos dir ensin llanzar a dengún cola trompa.



Les Grandes Families marcharon a correnderes a Xarca pa nun ser a recibir a aquellos llocos que falaben de dragones, de muerte y de fueu. Los mui pazguatos aseguraben que diben matar a les Grandes Families por engañalos. Dicíen que los mandaren a sabiendes a un llugar de tormentu y espantu, nun amosando nenguna preocupación. Los cures que quedaren en Bello-bello recibiéronlos con enoxu y glayáron-yos al pueblu qu’aquellos cara dures amosaren ser unos traidores a la so relixón y a la so xente.
Les Grandes Families viéronse forzaes a prindalos ya inaugurar la primer cárcele de foriatos. Coses de la vida.



*Entamu de la memoria.- La historia en Cordobello sepártase en Desmemoria y Memoria, lo que ye la prehistoria y la historia na Tierra.

*Grandes Families.- Alcordáivos qu’elles dirixíen la isllalla dende que llegaron los Foriatos.


.

10 sept 2012

6 sept 2012

EL BRANU FATU DE XARCA


La isllalla tenía un llugar onde diben los foriatos  a pasar les vacaciones: Talagate. Los recuerdos chorres, los chigres de playa, les ropes fuera tonu, les pallabres rinchantes, el sexu en cualquier requexu, les amistaes de cerca dos minutos,… engayolaben a lo llargo d’un mes, d’una quincena, d’una selmana a la xente de la clas media foriata. Si yeres de la clas alta o de les Grandes Families* nin t’averabes a Talagate; Xarca yera’l llugar afayadizu onde alcontrar la gran distinción y renome qu’arrodiaba a toos ellos: un conceyu de branu eternu, averáu al centru relixosu de Plistói y cerquina de la capital Bellobello. Axuntaba tol abolengu necesariu pa recoyer a tola xente con clase de la isllalla.

Xarca yera un conceyu de pescadores que vieron como les sos agües yeren atapaes polos palacios más axorizantes qu’un llariegu fuere a conocer. Namái dexaron dos espigones polos que salir a la mar y arrequexaron los sos pueblos y cases nel interior del conceyu, na llende que lu xuntaba al d’Or. Tolos díes yeren igual, al llegar cola pesca al puertu los carabineros arrampláben-yosla por dos euros y revendíenla a altos precios a los criaos de los foriatos. Les muyeres y fíos de los pescadores teníen de saca-y dalgo de miseria a la tierra p’arrexuntala a los dos mirlotos que llograben los sos paisanos pasar de contrabandu y ser a comer pa sobrevivir. Pasu ente pasu, la mayoría la xente coló pa Gamusín, la capital de los llariegos, y ellí entamaron de nueves la so vida na mar.

Cinco families negáronse a dexar el so llar y llucharon testeronamente escontra aquellos qu’esgonciaben la so forma de ganase la vida. Entamaron a dexar la mayoría de la so carga de pescáu nes dos ciudaes costeres de Log y llevar les perres en tacones falsos nes botes de pescar. A los carabineros aseguráben-yos qu’una maldición apoderárase de los sos barcos que malpenes yeren a garrar cuatro pexes que nun-yos daben nin p’alimentar a los fíos. Los carabineros tragaron cola cantinela y los foriatos viéronse na obligación de mercar el pescáu en Log.

Coles ganancies de la pesca, les muyeres de Xarca diben mercar a Or onde se-yos apegó un home consideráu un benditu, más que nada pola so cabeza a páxaros que pola so relixosidá, tan rara nél. Comía de lo que-y daben los llariegos del llugar, dormía al llau de los animales pa garra-yos el calor y repetía día y nueche la retafila que vien too darréu: “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”.* Respondía pol nome col qu’entamaba la retafila, Potaxe, y baillaba de la que soltaba les sos pallabres alloquecíes. Desiguida-y garraron gran ciñu y curiábense mui muncho que pasare pa la zona los foriatos, capaces de face-y cualquier cosa.

Una nueche al mes, la de lluna enllena, escapábase-yos y diba drechu pa la mar, onde se bañaba de la que repetía la retafila d’una mena más melguera: “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”. Los foriatos entamaron a llantar alarmes nos sos palacios y pagar a guardies de proteición privaos que xixilaren les sos pertenencies. Los llariegos trataben d’evitar que Potaxe fuxere cola lluna y organizaron fiestes que duraren tola nueche de la lluz máxica. Nun sabíen cómo, pero Potaxe llograba esfumase, metese peles tierres de dalgún señoritingu y bañase na mar que tantu lu amorosaba.

Aquella nueche la mar taba enrabietada. Namái se calmaba ellí per onde pasaba Potaxe. Una carrapotada mozos foriatos dexaron oyer les sos risotaes demientres illuminaben con potentes focos les orielles de la mar. “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”. Buscábenlu festivos, col alcohol percorriendo les sos venes acobardaes y cola valentía de sabese acompañaos por rifles de precisión mercaos polos sos padres, tan avariciosos de que los sos fíos los dexaren en paz. “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”. Potaxe nun s’amedranó. Repitió la so retafila al ritmu les bales: pallabra-bala, pallabra-bala, pallabra-bala,… El so culu quedó p’arriba, neto al de la pega de la so retafila. Los mui castrones intentaron garrar el so cuerpu muertu pa siguir la folixa, pero la mar nun los dexó.

D’entós p’acó, cada nueche de lluna enllena óyese la voz de Potaxe repetir la retafila nos requexos más inimaxinables de la costa de Xarca. “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”. Los sos vecinos, aquellos que lu queríen, faen llegar de la mar veles qu’illuminen la so alma y aselen la so razón. “Potaxe, Potaxe. Cascara ensin culu. Palancaneru. Vas morrer na mar de Cordobello col culu p’arriba como una pega”. Les nueches de lluna enllena, col mieu a la vengación, los foriatos dexaben a Xarca a soles colos llariegos y la remembranza de Potaxe. Ellos, por mui millonarios que fueren y muncha clase que gastaren, reculaben con un probe benditu que namái quería bañase na dulce mar de Cordobello.



*Grandes Families.- Los qu’entamaron el camín que los truxo a Cordobello. Yeren yá grandes na relixón del Alma Eterna, escoyíos pol Alma pa dirixir al so rebañu de creyentes enantes d’atopar la isllalla, pero depués amosaron un gran serviciu al Alma Eterna pagáu cola aristocracia de por vida.


*El personaxe y la retafila esistieron. Vivió nel mio pueblu en tiempos de Franco y prestaríame dedica-y el cuentu dafechu inventáu a la so memoria. Asturies tuvo enllena de personaxes d’estos que la ficieron máxica. Na retafila namái-y camudé’l llugar: la mar de Cordobello.




.

3 sept 2012

EPIGRAMA 1



El problema nun s’alcuentra en dar cola verdá sinón nel rosal d’espines col que nos la arrodien.


Al llegar los foriatos, en Cordobello entamó a escribise EPIGRAMES anónimos (anque se sabien mui bien quién yeren los autores) que falaben de les situaciones anómales ya inxustes qu'escomencipiaron a vivir los llariegos. Equí vamos espeyales pa que seyáis a saber más de la isllalla.


.