23 dic 2012

OFICIALIDÁ




La conseyera d’Educación y Cultura, Ana González, torna de nueves a los oríxenes: “nun ve la oficialidá como una opción al nun la considerar como una demanda unánime de la sociedá”. Mialma que n’Asturies hai muncho adivín qu’enquivocó la so carrera y metióse a políticu. Enxamás nun dexaron espresase al pueblu asturianu al rodiu la llingua. Sábese qu’en dellos despachos tán pesllaes baxo llave delles encuestes onde se recueye que más d’un 70% la población ta d’alcuerdo cola oficialidá. ¿Eso nun ye una demanda unánime? ¿Quiciabes seya que la xente que nun ta d’alcuerdo seya de más categoría que’l restu? ¿Cómo s’aprobó la oficialidá nes otres comunidaes autónomes con llingua propia? ¿Hai dos vares de midir?

Señora González, nun nos faiga fatos, qu’hai una indignación pergrande col so partíu que quiciabes s’entame a espeyar n’Asturies. Les Xuventúes Socialistes piden la oficialidá y muncha xente del PSOE tamién. Quiciabes esa xente se farte de los sos dirixentes y los escuerran fuera’l Payares, con usté na cabeza.

Tán amosando que n’España nun  hai democracia, tanto'l PSOE como’l PP, y el pueblu yá ta fartu d’ustedes. Cambien les fataes que cuenten, que yá ta bien, que tamos asquiaos de tanta engañifa. ¡Qué tán traicionando al so pueblu cuando se dicen vacallories de tal altor como lo de la “demanda unánime”! ¡Qué ustedes tienen mayoríes absolutes col votu del 20% de los votantes! ¡Yá ta bien!

Nós, siguiremos nel 2013 glayando al altu la lleva lo del Asturianu, Llingua Oficial.
 
 
 
Güei quedamos de vacaciones nesti blog.Taráse dos selmanes folgando, volviéndo a espublizar el 6 de xineru, domingu, por parte d'esti'l to virus Ye. El restu'l blog faerálo'l martes 8 de xineru. Mentanto y non, podéis relleer de nueves tolos cuentos que se tien espublizáu hasta agora nesti blog, n'especial el d'esti xueves Tala, el Fogar de los Discapacitaos. Nun taría mal que visitareis el blog hermanu chiquitín d'esti El Rapazu de Venus, tien coses que vos diba prestar a esgaya.
.

22 dic 2012

SANTOS INOCENTES




Asturies ye un país onde tou asocede al revés. Siendo la comunidá con más historia y más raigañu de tol estáu, ye la que menos pesu tien pa los políticos centralistes. Tando afitada la so condición de nacionalidá, los partíos centralistes que la gobiernen cuasi que la noman como provincia, el programa que TVE tien n’Asturies entitúlase “Panorama Regional” y los partíos nacionalistes/asturianistes namái faen qu’engarrase ente ellos en cuentes de facer país y sacar Asturies p’alantre. Creando lo del turismu rural como dalgo nuevu, agora ye la comunidá que menos saca d’él. Pa entrar nel Mercáu Común l’estáu español, tuvieron de frayar dafechu los pegoyos que sofitaben la economía asturiana, dexándola en crisis permanente y en manes d’unos políticos de poco valir que nun creen nella…

Por eso, el 28 d’avientu ye l’únicu día que n’Asturies nun ye los Santos Inocentes. Sonlo los 364 díes restantes.
 

Mañana va quedase de vacaciones nesti blog.Taráse dos selmanes folgando, volviéndo a espublizar el 6 de xineru, domingu, por parte d'esti'l to virus Ye, y el restu'l blog faerálo'l martes 8 de xineru. Mentanto y non, podéis relleer de nueves tolos cuentos que se tien espublizáu hasta agora nesti blog, n'especial el d'esti xueves Tala, el Fogar de los Discapacitaos. Nun taría mal que visitareis el blog hermanu chiquitín d'esti El Rapazu de Venus, tien coses que vos diba prestar a esgaya.
 
.

20 dic 2012

TALA, EL FOGAR DE LOS DISCAPACITAOS

EL GLOSARIU SACARÁTE DE MUNCHES DULDES


Allá una vezona, nos tiempos la Desmemoria, la Lluna y el Sol axuntáronse na isllalla de Cordobello y vivieron una auténtica historia d’amor. Enantes de tornar al universu, dambos amantes tuvieron dos fíos que nomaron como ellos: Tala y Gate, na llingua de los antiguos Lluna y Sol. Tala y Gate esporpollaron al par de los otros conceyos de la isllalla y pasu ente pasu medraron como los más guapos de tou Cordobello. Nacíen xunto a la mar, nuna llanada ablucante; pocoñín a poco, un cuestu diba adueñándose d’ellos; a la fin, llogren formar el cordal más pindiu de cerquina la mar. Hermanos del alma. Hermanaos na vida. Neto’l mesmu destín. Neto los mesmos sentimientos. Caún desendolcó la so xenda de futuru. Caún trazó la esistencia al so gustu. Adulces, caún miraba pal otru de la que caminaben. Y yeren tan distintos los sos andares que yeren iguales.
 
Tala espoxigó con una industria de productos pa discapacitaos. Recibíense a diariu pidíos de tola isllalla y Tala unviába-yos el so saber endolcáu nel so amor candial. De lo artesanu pasóse a lo industrial pero conservando‘l primeru. La so capital, Tagala, convertióse nel llugar más adautáu pa la xente con discapacidá de tou Cordobello. La so costa y el so interior tresformáronse nel centru del turismu pa persones con dalguna necesidá especial. Tolos años, la primer fin de selmana d’ochobre, celebrábase un alcuentru d’hermanamientu de tolos discapacitaos de la isllalla. L’allegría enllenaba un espaciu de necesidá. El modelu de conceyu sirvía pa que los otros avanzaren nel so diseñu.

 
Too diba bien. Too marchaba como nun suañu. Hasta que llegaron ellos, los foriatos. Vieron na costa de Tala y Gate un negociu escomanáu y crearon un nuevu conceyu: Talagate, que na llingua de los antiguos significaba eclipse. Axuntaron tola zona llana de la costa y dexáron-yos la pindia pa Tala y Gate. Na primer llinia de playa entamaron a construyir torres y torres de pisos; diben a allugar a tolos turistes arrascaos que vendríen atrayíos pol cartel d’un turismu pa una clas media foriata. Na segunda llinia de costa llevantaron hoteles coles sos piscines, campos de golf, discoteques, pubs,…, auténtiques ciudaes fortificaes de les que nun teníen de salir si nun-yos petaba; dedicaríenlos a los que naguaben por facer más desembolsu monetariu que l’alpargateru de les torres. Los xalés espardíense na tercer llinia, onde la clas media-alta fardaba del so poder; ellí llevantábense clubs de lo más seleutu no deportivu, no social y no sexual pa que los sos miembros se pensaren lo más fino de la rodiada.

Mentanto y non, vallaron tol conceyu de Talagate pa que naide nun cafiare a los turistes nel so descansu y dexaron a Tala y Gate arrequexaos nos últimos cuestos enantes del cordal. Los sos habitantes entamaron a malvivir nunos barracones fechos namái pa dormir un pocoñín enantes de dir trabayar al complexu turísticu del gran conceyu vecín. Na valla había tres entraes en caún de los conceyos pa que pasaren les carreteres, los trenes y los trabayadores. La xixilancia asomeyábase a la d’una aduana de La Tierra, pero con más policíes y munches más armes desplegaes nella. Too entamó a dir mal. Too marchaba como nuna velea.

Tuvieron de pasar dellos años enantes que dalgunes cases sustituyeren mansulinamente a los barracones. L’artesanía de productos pa discapacitaos tornó a fabricase d’una mena clandestín. La industria pa discapacitaos foriata treslladóse a Bellobello, la capital, y los sos precios xubieron de tala manera que se facíen imposibles pa cualquier llariegu. Los industriales especuladores cuidaben que naide nun yera a face-yos la competencia, pero la so baxa calidá y la tardanza a la hora mandar los encargos facía qu’hasta los foriatos d’alta cuna buscaren los productos artesanales llariegos.

Col tiempu, entamó a falase d’aquellos primeros fines de selmana d’ochobre. Dellos discapacitaos tornaron gociar del requexín de cuestos nel que los foriatos dexaren a Tala. Aconceyábense y trazaben proyeutos a curtiu plazu. Les nueves idees espardiéronse per tola isllalla. Les mentes llibres d’aquellos homes, ataos a la tierra poles atadures de los sos cuerpos, emprimaron a viaxar a Nueva Tagala a suañar xuntos nes vieyes époques. Aquella nueva capital dio-yos abondu aliendu y cuando se decataron taben organizando una marcha pola discapacidá. Coles prieses, alcordaron que fuere pal ochobre siguiente. Cuidaben que’l so oxetivu nun sedría otru que la vieya capital Tagala, llamada polos foriatos Suañu Feliz. Escomencipiaron a charrar en tonu quedo, nun  fuere a oyelos l’enemigu. Proyeutaron el camín de la marcha, amatagáu de les fieres policiales. Escoyeron el llugar onde furar una entrada en Talagate. Suañaron cola mar de Cordobello, pero ensin la llocura de construciones na so costa.

 
Un añu desiguida pasa. Nueva Tagala taba toa engalanada pa la ocasión. Les sos cais, cada día más y más asemeyaes a les vieyes, destilaben ilusiones nel futuru. Nos sos hoteles arrecoyíase xente discapacitao de toles fasteres de Cordobello. El nuevu centru de congresos, construyíu pa la ocasión, dexábase acariñar poles pallabres de llibertá. La policía siguía ensin poder pasar per Tala y Gate ensin pagar por ello, poro que’l Congresu por una Nueva Sienda Discapacitada trescurría nuna felicidá escomanada.

El sábadu llegó y con él l’aniciu de la marcha. Nes cais y carreteres de Tala los sos habitantes españaben n’aplausos cuando pasaben los lluchadores. Sielles de ruedes, bastones afincadores, gafes que nun veíen, coxeres espasmódiques, ortopedies de cuerpos necesitaos,… glayaben y cantaben hasta cuasi llegar a la frontera. Entós fízose un silenciu hasta nel chorriar de les idees. Pasu ente pasu la valla primía la lliberación y había qu’echala abaxo. Pales, alicates, martiellos,… salieron xabaces a frayar la opresión. La vida esmigayábase pente les muries llevantaes pol home ensin razón.
Llograron finar cola verxa y la caminada entamó de nueves. Silenciu. Sele marchar d’un avanzar paráu hai tiempu. Nel otru llau de la valla nun había policía aguardándolos.

Esperanza de que tou nun fuere malu.
Amor a la vida.

El cuestu dio’l testigu a la llanada. Les sorrises trescalaben los llabios del mieu. Pasu firme. Llucha segura. Una arbolada atapaba la carretera.
Manes, brazos, miraes, confiances cruzaes.

La solombra d’aquella viesca aseló'l calor. Nun había dulda. Nun había marcha atrás.
Nin alantre.

Nin al mediu.

Taben arrodiaos. Too yeren uniformes en cuentes d’árboles. Porres qu’azotaben d’aire los cuerpos. Pelotes de goma que zarraben aínda más los güeyos de los policíes, ciegos d’odiu. Tiros cobardes de pistoles ausentes de paz. Y sangre. Muncha sangre vocinglando dolor. Vocinglando desconciertu. Vocinglando desesperación. Sangre esvariando per cuerpos ausentes.

Encarnao.
Llandio.

Firíos perdíos na inxusticia. Presos de l’ausencia de llei pa los probes. Muerte infernal. Aporraos por déspotes que s’abelluguen na razón de la seguridá. De la paz social.
Del poder.

Del nepotismu.

Del amor a la sangre. Al dineru. A la doctrina que los escuende tres d’una fe sorda. Vengativa. Beata.



Silenciu. Silenciu tres la guerra. Tres la llucha. Tres el lloru pola falta de llibertá. De paz.

 
En Cordobello entamóse una güelgona qu’enxamás s’escaecerá. Los foriatos entamaron a tremar. A conocer el mieu qu’asomeyaba tar siempre del llau llariegu. A saber que la llucha nun entamaba namái qu’a esconsonar. A esperezase. A lladrar.

 
 
 
 Esti blog cola de vacaciones. Tanta lluz y tantes llámpares pónenme fritu. Tornare'l 8 de xineru con una nueva parrilla de programación. Hasta entós, alón.
 
¡Ah! Esta vez paez ser que'l virus va mediu coordinase conmigo.
 
 
 
.

19 dic 2012

COSADIELLA




¿Qué cosa cosadiella ye, qu’en siendo “llideresa”, tien más bótox na cara qu’una barby de la tercera edá y más trapu nel celebru que la muñeca chochona?

 
Solución: nes próximes eleiciones autonómiques.


Nun t'escaezas que nesti blog trabáyense más coses. Lléeles. Esta selmana ties Nel Aula cola so aplicación didáutica n'asturianu y Marxinación nel Corazón, un microrrellatu que nun pues perder.



.

17 dic 2012

VIAXES IMAXINARIOS


L’aula va tresformase nuna axencia de viaxes onde los llugares a visitar van ser de cuentu: la viesca pela que camina Capiellín Colloráu a casa la güelita, el castiellu del príncipe de Cenicienta, el país de los hobbits, Rivendel y los elfos,… o llugares inventaos polos rapazos que seyan de fábula. Nesta axencia vamos intentar cubrir los oxetivos que vienen darréu:

-Perífrasis DIR + Infinitivu.

-Perífrasis TENER QUE + Infinitivu.

-Perífrasis VENIR A + Infinitivu.

-Pallabreru de llugares: viesca, quintana, castiellu,…

Vamos entamar una esposición de cartelos y dípticos de destinos onde dir el próximu branu de vacaciones. Los llugares qu’hai de publicitar son esos sitios qu’un día lleeron nos cuentos o noveles que tánto-yos prestaron. Acordies a la edá de los rapazos, asina sedrán les propuestes como llugares turísticos.

Enantes d’entamar el llabor, convién que-yos afondes nes perífrasis y nel pallabreru de llugares. Failo como tengas vezu: más gramatical o más creativu.

Pregúnta-yos que llugar de cuentu/novela-yos prestaría visitar. Abre un turnu onde tienen de falar toos y tienen de facelo con llibertá. Tres d’ello, tienen de cuntate que fairíen ellos nos llugares pa tresformalos en zones afayadices pa recibir al turismu.

 
 
Xúntalos en pareyes y agrupa los dos destinos nun paquete turísticu difícil d’escaecer. La primer xera sedrá’l facer el dípticu que puen trabayalu llibremente o pone-y un esquema como’l que vien darréu:

-Ven a conocer __________ y __________. Los llugares de los tos suaños.

-Prestaráte dir visitar tolos sitios que suañasti dalguna vez na vida. ____________________ (nomen los sitios a visitar).

-Tienes que sacar les tos reserves pa_________________________.

-Siempre te prestará____________________.

-Vendrás a vivir_____________________.

-__________________________________.

El dípticu tendrá los dibuxos de los rapazos y espondránse oralmente por parte d’ellos nel aula. Depués convién preparar un requexu nos pasiellos onde tol colexu o institutu seya a conocer los trabayos.

El trabayu complétase con cartelos onde tienen de dibuxar los llugares y resumir nuna fras les razones pa visitalos. Pegaránse al par de los dípticos y faerase visites a los fechos por otres aules. Nun taría mal facer una feria turística a nivel de tol centru, pero eso nun ta na to mano nin la mía, depende de la implicación del centru.

Siguimos dando posibilidaes de comunicación n’asturianu. La clas d’una llingua nun se  fai namái escribiendo y trabayando gramática. Nun sigamos l’exemplu del castellán, la llingua peor dada nes aules d’Asturies. Los rapazos tienen d’emplegar l’asturianu en situaciones de comunicación y per esi llau saldrá la gramática. Empleguemos la imaxinación y les nueses clases d’asturianu nun sedrán olvidaes na vida. Aspero que vos prestare la propuesta de güei. La próxima vez, más. Alón.


.

16 dic 2012

TOC, TOC 7




-Toc, toc.

-¿Quién ye?

-Javier Fernández.

-¿Quién, ho?



Fae dalgo pola to llingua, utilízala. Llee l'Epigrama 6 y el microrrellatu Marxinación nel Corazón. Conseyu de virus.


.
 

15 dic 2012

ANDRÉS SOLAR


Güei ye un día con nome y apellíu. Pertenecen a un home, a un rapaz, qu’anduvo peles nueses cais y caleyes. A dalguién que faló la nuesa llingua y escribió dafechu nella. Una persona que sintió la so tierra penriba d’engarradielles o arguyos fatos. A un campesín que deprendió a ser corazón en Deva. Andrés ye’l nome y Solar l’apellíu. La vida nun lo dexó ser vieyu pero sí queríu. Güei ye un día qu’ún nun tien mieu a vindicase asturianu. A vindicar conocer una persona cenciella. Una persona amiga. A pidir cola so voz y cola nuesa una oficialidá que nun llega.

Andrés, tovía tamos asina. Arrodiaos de fatos que se piensen superiores. Nun sé a quién nin a qué, pero superiores. Quiciabes desapaezan dalgún día, pero curiu que yo tampoco lo veré.

Güei vas tar ehí. A les 19,30. Nesi Xixón que te vio medrar na to parroquia de Deva. La Xunta pola Defensa la Llingua va entregar los tos premios nel Salón d’Actos Antiguu Institutu Xovellanos. Verémonos ellí. Collaciu. Lluchador. Asturianu.

Firma: un virus que t’almira.
 
 
Fae dalgo pola to llingua, utilízala. Llee l'Epigrama 6 y el microrrellatu Marxinación nel Corazón. Conseyu de virus.
 
 
.

13 dic 2012

MARXINACIÓN NEL CORAZÓN

 
 



Namái nuna maleta mugorienta coyíen-y toles sos pertenencies. Probe vieno y probe diba marchar. Llegó-y l’avisu una mañana fría de branu. Les Almes Maestres cabezaleres cambiáben-y el destín. Tenía de dexar venti años de gociosa penuria. Venti años de rica convivencia nel conceyu más probe de Cordobello. Venti años ensin rindise a les Almes Maestres más poderoses.

Nel e-mail agasayábenlu con un puestín na capital Bellobello. Aseguránben-y que namái la so delicada salú obligábalos a dir escontra la so voluntá. Sabíen que la envidia diba apoderase de dalgún alma probe d’espíritu.

Él sabía qu’ellos nun teníen l’espíritu rico.

Un Alma Maestra mozu llegó pa sustituyílu. El so primer llabor fo escribir un fondu e-mail nel que pidía’l so cambiu de destín por otru más a la so altura.

Él, enxamás nun lu pidiere.

 
.

12 dic 2012

FUTURU




Esi ye un tiempu verbal que los asturianos tenemos d’apurar si nun queremos esapaecer como pueblu, como cultura, como llingua. Tenemos de ponenos en comuña a lluchar polo de nós. Ensin aparar a pensar.

Naide lo va facer por nós: nin los partíos asturianistes/nacionalistes y la so inactividá permanente, nin los nuesos representantes que representen a los sos partíos de Madrí, nin la xente entregao por un puestín, nin los distrayíos que pasaben perillí,…

Primer llucha (ye fácil, mui fácil): la Sexta namái paez reconocer a Valencia, Cataluña, Euzkadi, Galicia, Andalucía y Madrí. ¿Por qué nun-yos enseñamos quiénes somos? ¿Cómo? Nes redes sociales tienen páxines nes que podemos escribir que tamos equí, que fuimos el primer reinu peninsular, qu’haber si estudien un migayín más. ¿Fácil? ¿Entós cómo nun lo faes? A pola Sexta en Facebook, Google, Twiter,…

Esti sedría un primer pasín. Amosemos a los nuesos políticos qu’al pueblu nun-yos fai falta vagos. Lluchemos como asturianos.



Ente qu'escribes los mensaxes y descanses, pues lleer los microrrellatos Marxinación Amatagada y Marxinación de Nacencia o quiciabes el Epigrama 6. Fae dalgo pola to llingua, utilízala.




.

10 dic 2012

9 dic 2012

FILOSOFÍES D’ANGUAÑU



Depués que la filosofía baxare a l’altura de Gran Hermano, dalguna xente llama a esti movimientu Cretinismu. Y cuando hai que nomar a los sos discípulos, emplégase la pallabra Entreguismu. La gran aportación d’estes doctrines fo’l “Cierre Fachacional”.



.

8 dic 2012

DECRETU




Faise saber que,  per orden del Señor Xefe y Rei de La Tierra, l’Universu y tol mundiu mundial, ye d’obligáu cumplimientu el ser feliz nestos díes y hasta que quiten les lluces de navidá. Asina que: desauciaos, paraos, discapacitaos, …, nun nos amarguéis les fiestes navideñes a tola xente de pro que roba pero con clas, que depués hasta naguais porque vaigamos a la cárcele.




.

2 dic 2012

MONARQUÍA BANANERA




¡Ves qué guapu ye! Pues ta ehí pola gracia de Dios. Estudiar como un fatu, facer oposiciones o buscar un trabayu, sacar alantre a la to familia, nun dir de vacaciones p’aforrar dos duros,… Por fatos como tu y como yo, ta ésti comiendo como un fartón. Y lo que ye peor, el so palaciu güel a muertu de toles comisiones, chanchullos, corrupteles,… que s’axencia la so familia. Bueno, y él nun ta mancu.

Vives na Monarquía Bananera d’Enfaña y tu ensin enterate. Espierta.



Esti virus nun te va cobrar porque lleas Nel Aula o'l microrrellatu Marxinación de Nacencia. Si trabayes la cabeza lleendo esti blog nun te va dar un patatús.

Falando d'esi señor, esti virus va vivir como un rei dalgunos díes asina que nun contéis conmigo hasta l'ocho d'avientu. Alón.


.

1 dic 2012

MAQUINES RECAUDADORES




Nun lo duldes, tu echa, echa. Esta va ser la máquina que’l FMI y la OCDE va obligar al desgobiernu de Rajoy a instalar en cada casa. ¿Qué pa qué? Home, tas un migayín fuera bolos. La nueva moda va ser recaudar por cada día que vivamos.

Suena l’espertador. Apágueslu y tou darréu vas echar monedina pol nuevu día que nos tocó vivir. Si tardes una boquiada más, tíes de pagar l’impuestu con recargo.


Esti virus nun te va cobrar porque lleas Nel Aula o'l microrrellatu Marxinación de Nacencia. Si trabayes la cabeza lleendo esti blog nun te va dar un patatús.

.

29 nov 2012

MARXINACIÓN DE NACENCIA




El primer casoriu ente un foriatu y una llariega truxo como consecuencia la nacencia de tres llarieguinos. El deu acusador espardióse per tolos púlpitos.



Si tienes dalguna dulda en pallabres de Cordobello nun dúldes consultar el Glosariu. Pasu a pasu dirá creciendo.

La selmana que vien hai ponte. Esti manguan, cansu de la crisis de la construcción, va sofitalos faciendo un acueductu. En tola selmana voi descansar. Hasta'l 10 d'avientu, alón.

Demientres y non, nun taría mal que lleeres la blognovela Cordobello si nun lo ficiste. O quiciabes seyas a lleer los microrrellatos Orbayu Seco. Decidas lo que decidas, ¡qué te preste!
.

28 nov 2012

DULDA 7




¿Dalgún día saldremos de la crisis que se produxo cuando los ricos robaron a los probes?

Adán y Eva aseguren que va ser difícil. Yá cuando yeren mozos, los ánxeles facíen de les suyes.

Robin Hood diz que los royaltis son los royaltis. El que quiera quita-y la plusvalía que faiga cola.

Lo que venía darréu ta censuráu pol Señor. D’eso nun tamos llibres nin los virus. Que-y vamos facer, la censura ye la censura.
 
 
 
¿Lleíste el microrrellatu Marxinación Amatagada? ¿A que tas asperando? Y de la que lo faes, nun t'escaezas de Policies y Lladrones.
 
 
.

26 nov 2012

POLICÍES Y LLADRONES


El xueves, a les 9 la mañana, un garapiellu lladrones xuntáronse ensin querelo na sucursal bancaria de CaxaAmiguina. Nun había perres pa toos. Nun había clientes abondo. La caxa enllenóse de policíes nun periquete. El xefe la sucursal esfregábase les manes.

Como ves, esta selmana l’aula camúdase nuna comisaría. Más que nada pa trabayar:
-Pronomes interrogativos.

-El verbu en pasáu.

-Creatividá nes preguntes y respuestes.

La primer parte l’actividá consiste en facer preguntes pa los policíes que van interrogar a los lladrones. Acordies al nivel, en ti ta l’afondar más o menos nos exercicios de gramática al rodiu los pronomes interrogativos y los tiempos qu’espresen pasao. Cuando los alumnos se sienten a facer les preguntes tienen de dominalos. Separta la clas en grupos de tres (quiciabes ún tien de ser de cuatro): un policía que va de buenu, ún que va de malu y un lladrón. Los tres tienen de facer preguntes buenes y males al lladrón. Preguntes pa que-y faigan un policía o l’otru. Tienes que tar tol tiempu sollerte pa que s’emplegue bien les pallabres y la gramática. Los rapazos nun tienen de decatase que los tas controlando, namái quies ameyorar les sos preguntes.

Agora tienen de rifar los personaxes ente los tres componentes del grupu, anque quiciabes tuviere bien que’l lladrón fuere la persona que más dominare la llingua. Entamen a salir a facer los interrogatorios. Acordies vaigan saliendo los equipos, los lladrones tienen de sacar una bola d’una bolsa (la bolsa tien dos boles de colores distintos: una quier dicir que’l lladrón ye culpable y otra inocente). Los policíes traten de saber la solución coles sos preguntes. Tienen de faceles d’una mena intelixente. Los lladrones si son inocentes tienen de negar toa culpa y si son culpables tamién. Namái hai una cosina que los estrema: los culpables tienen de dicir la verdá en dos preguntes. Tienen de tar atentos. Fina l’interrogatoriu cuando los unvíen al xulgáu si piensen que son culpables o los lliberen si piensen que son inocentes. ¿Acertarán? Tienen d’asperar al final, onde tu dices los resultaos.

Nun taría mal que ficieren la crónica del robu. El Felpeyu Times anda tres la noticia y ellos tienen d’escribila. Ye bona práutica del pasáu y de xuru que-yos va prestar a esgaya.

Collacios, el robu ta sirvíu. Trata de que lo descubran. Vémonos. Alón.


El xueves espublízase otru microrrellatu, yo que tu nun lu perdía. Demientres y non, aconséyote que relleas La Contraseña, ún de los capítulos de la blognovela Cordobello. ¡Qué tovía nun lleiste la blognovela! Vamos collaciu, ¿a qué tas asperando?

.

25 nov 2012

MALTRATADORES




Dende les cueves prehistóriques qu’hai persones que maltraten a otres. Les razones son munches: sexu, edá, poder, relixón… Sicasí, los gobiernos sofiten a los maltratadores o faen que los combaten pero ensin munchu empeñu. La supremacía del que daña ta penriba del que ye golpiáu, faelu cuasi intocable y eso présta-y al gobernante.

Namái qu’un cambéu na mentalidá del poderosu va ser a tresformar dafechu la situación. O eso, o un estrozu enrabietáu de poltrones que faigan que la xente lloñe del poder se puea autodeterminar de los políticos.

¿Imaxináisvos un referéndum nel que se pregunte: “Tas d’alcuerdu que los políticos y los maltratadores salgan en barcu a un paraísu dictatorial”? ¿Ónde hai de firmar?

Equí n’Asturies, los mesmos políticos son maltratadores del pueblu, de la so cultura y la so llingua. Despréciennos y xueguen con nosotros. Da-yos igual, total votámoslos otra vuelta.

Llevamos años de gobiernos llamaos “progresistes”. El pueblu lo únicu que ve ye’l progresu personal d’ellos. La nuesa cultura y la nuesa llingua tán a puntu esaniciase y ellos písenla cola so indiferencia “progresista”.

Pol verdaderu progresu d’Asturies, entama a esconsonar y písalos enantes que te pisen.

Gracies poles 185 visites al blog el xueves y el vienres, eso dame aliendu pa siguir colos microrrellatos. Nun sabéis como me presta'l vuesu sofitu al blog cola so llectura. Alcordáivos que podéis lleer más microrrellatos visitando Orbayu Seco (101 microrrellatos) y convidando a facelo a les vueses amistaes.
 
¿Lleíste el microrrellatu Marxinación Amatagada? ¿A que tas asperando? Y de la que lo faes, nun t'escaezas de Epigrama 5.
.

 

24 nov 2012

EMPOBRECIMIENTU DEL LLINGUAX


Hai tiempu que se ta detectando la pérdida del presente de dalgunos verbos, por exemplu: comer. Y en munches families entama a perdese hasta l’usu del futuru. Quiciabes faiga falta conxugar n’altu’l verbu “fartar”  en toles sos conxugaciones, pa que los políticos se den por enteraos.



¿Lleíste el microrrellatu Marxinación Amatagada? ¿A que tas asperando? Y de la que lo faes, nun t'escaezas de Epigrama 5.
.

22 nov 2012

MARXINACIÓN AMATAGADA




Llegó a la catedral de Plistói nuna xarré tirada por diez caballos blancos. Tola xente arrexuntao na esplanada d’entrada al templu taba vistío de blanco. La madre, que lu diba acompañar dientro la casa del Alma Eterna, llevaba’l traxe de la so Gran Familia pa les bodes, blancu como una palomba virxen. Por embargu, nel so interior, dalgo prieto lu acongoxaba. ¿Sedría’l so corazón? ¿Sedría la so esperanza? ¿Sedría él?

Al entrar la novia na catedral, los sos güeyos fuéronse pal so amor verdaderu. Aquel casoriu taba frayando los sos sentimientos. La so realidá. Él.

Pasó la ceremonia cola mirada na gran estatua del Alma Eterna. Como si la novia nun esistiere. Como si’l cura nun falare. Como si sólo tuviere él.

-¿Quies a esta muyer como lexítima esposa pal viaxe p’hacia l’Alma Eterna?

El sí salió-y con mieu. Amatagáu pola so fe nel amor sinceru. Nel amor. Nél.


La espublización del próximu microrrellatu d'esti triu inicial sedrá'l 29 de payares. Nun te lo pierdas.

Si tienes dalguna dulda en pallabres de Cordobello nun dúldes consultar el Glosariu. Pasu a pasu dirá creciendo.
.

21 nov 2012

TABLA DE MULTIPLICAR D’UN POLÍTICU PA FACER PROYEUTOS


9 x 9 = 91

9 x 9 = 101

9 x 9 = 481

9 x 9 = 851

9 x 9 = 1451

9 x 9 = 3651

9 x 9 = 9991

9 x 9 = 99991

9 x 9 = 999999999999999999991 €


Esti xueves va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.


Tovía nun lleíste el Epigrama 5 o'l cuentu La Cuevona de Llagún, pues aconséyotelo. Pallabra de virus.


.


19 nov 2012

EPIGRAMA 5




Los regalos viénente abondes veces tan bien envueltos que namái t’atopes con papel.



Esti xueves va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.


.

18 nov 2012

SIEGLU XXI




Muncho xugó’l cine con esi entamu del sieglu en que tamos. A la Tierra asocedía-y inimaxinables invasiones y odisees a milenta planetes. Muncho d’ello sacao de la lliteratura de Ciencia Ficción.

Sicasí, el cómic garró-y más xugu a esti filón de la creación. En tires dibuxaes nun solo nos invadíen o viaxábemos, munches veces namái nos cuntaben la vida cotidiana. Esa ciudá del futuru onde se tornaba a la esclavitú, a la probeza de fame diario, a la prostitución por un platu de farrapes,…

El cómic fo muncho más real que’l cine. Namái retrató nel tiempu lo que diba asoceder anguaño. Solo-y faltó imaxinar un gobiernu torpe. Y ye qu’hai de reconocelo. Yera difícil imaxinar los desastres del gobiernu de Rajoy.


Voi dicitelo, ties de lleer el Nel Aula y el cuentu La Cuevona de Llagún. Nun lo pienses muncho, ye de baldre.

El xueves que vien entamen Los Microrrellatos de Cordobello, vas allucinar. Los próximos tres xueves (el 22 y 29 del 10 y el 13 del 11) van siguios darréu pa qu'esfrutes d'ellos. Depués van alternase colos cuentos y les sensaciones. Nun te los pierdas.


.

17 nov 2012

TOC, TOC 6




-Toc, toc.

-¿Quién ye?

-La riqueza, que vien arrampuñate bona parte del to bienestar social.

-Non, si lo que más me fadia a min ye que tenéis acutáu’l Bancu na ilesia.



Voi dicitelo, ties de lleer el Nel Aula y el cuentu La Cuevona de Llagún. Nun lo pienses muncho, ye de baldre.

El xueves que vien entamen Los Microrrellatos de Cordobello, vas allucinar. Los próximos tres xueves (el 22 y 29 del 10 y el 13 del 11) van siguios darréu pa qu'esfrutes d'ellos. Depués van alternase colos cuentos y les sensaciones. Nun te los pierdas.


.

15 nov 2012

LA CUEVONA DE LLAGÚN

¿NUN QUIES VER EL MAPA DE CORDOBELLO? ANDA, ÉCHA-Y UNA GÜEYAÚCA

GLOSARIU PA RESOLVER LES TOS DULDES

Máxicu, esi yera’l vocablu que describía’l llugar del que vos toi a falar y que carrapotaes de xente, veníos dende tolos requexos de Cordobello, visitaben ensin aparar. Alcontrábase nun recuestu, atapáu por árboles del llugar y una fondigonada que lu empozaba ente tanta cuesta arriba que lu arrodiaba. Entrábase a una cueva como otres munches na isllalla, pero ésta taba enllena de runes perantigües que cuntaben histories sobre l’universu y los sos misterios. Quiciabes nun se fuere a saber lo que naquella escritura vieyo se recoyía si nun fuere polos milenta dibuxos que l’acompañaben: naves viaxando pel universu, homes con traxes espaciales estrambólicos, faunes y flores enxamás vistes, llugares que nun s’averaben nin por asomu a lo qu’había na isllalla… Nun teníen conocencia dala de quien pudiere tener fecho aquella maravía de la información (nin lo imaxinaben, nin-yos preocupaba), namái barruntaben que yeren de les dómines d’enantes del entamu la memoria, d’enantes que s’emplegare la escritura en Cordobello. Por embargu, na entrada taba escrito la pallabra LLAGÚN, con lletres como les d’anguañu pero que téunicos, afamaos na búsqueda de la vieyez nos oxetos, dicíen que taben escrites al empar que les runes. Llagún, nadie aldovinaba’l so significáu; nengún yera a falar del llugar onde naciere’l términu; dalgún llocu cuntaba que na isllalla hubiere una lluna que se nomaba asina y qu’esapaeciere ensin que naide fuere alcontrala; la única verdá yera que los más vieyos decidieren llamar d’esa forma al conceyu n’honor a los facedores de tanta riqueza cultural.

Llagún, neto a Ñaña, fueron los conceyos onde más tarde entraron los foriatos. Les sos orografíes emprunes y la so xente xabaz, acordies al gustu los foriatos, ficieron d’ellos los bastiones caberos que cayeren nes manes de los invasores. El despreciu que los conquistadores teníen pa con tolo qu’ufrieren aquellos llariegos, guardaron les sos ayalgues en secretu a lo llargo de munchos años. La cueva nun fo distinto. Tuvieron de pasar dómines enteres enantes que los foriatos fixaren la so cobicia nella. La multitú significaba perres a esgaya y nun podíen dexar de cobrar entraes naquella cueva del pastón de xente. Pesllaron la so entrada, cortaren los árboles que la vixilaben, amurallaron el so contornu y nun gastaron nin un rispiu nel so interior; yera más, nengún de los dirixentes qu’entamaron la esplotación de la cueva se molestó n’entrar dientro d’ella.

Al rodiu la caverna construyeron hoteles, restoranes y llugares de diversión que ficieren de la visita dalgo difícil d’olvidar na mente y nel bolsillu. Trazaron una autovía que coneutare’l centru antropolóxicu cola capital demagóxica. Llevantaron una xigantesca catedral que-yos sirviere pa orar a la riqueza por llegar. Montaron el casinu más escomanal de tola isllalla, qu’aprovechaba’l tirón de la cueva pa esplumar a cuanto viaxeru s’averare y nun fuere pa orar muncho. Ficieron souvenirs espampanantes del esterior modernu de la cueva pa que la xente remembrare’l llugar futurista y non l’anticuáu. Y echaron a tolos llariegos a una distancia prudencial, ensin que s’alloñaren muncho pa tresformase nuna manu obra barato, pero arrequexándolos un migayín pa evitar visites desagradables.

Televisiones, periódicos y radios unviaron a los sos meyores reporteros. Lo más granible de les Grandes Families recibieron la so tarxeta de convite. El gobiernu de Cordobello en plenu averóse al acontecimientu. La inauguración del complexu diba facese por tolo alto. Hebio celebraciones en tolos llocales, hasta na catedral, a lo llargo de díes; viaxeros de toles categoríes llegaron al llugar, al fin de cuentes el dineru nun tenía distinción demientres fuere llegal y se pudiere arrampuñar; los empresarios de la venta fácil esfregáronse les manes malpenes aportaron los primeros visitantes a los qu’engañifar; la probeza d’espíritu curábase con mises y billetes pa pagar lo carnal.

Les autoridaes averáronse a la cueva. Los dirixentes mandaron a los llariegos a los sos puestos. Les autoridaes vieron con abluque la modernidá d’aquella entrada orniada con lluces qu’imitaben les de les naves espaciales. Cruciaron el chocar de manes ente autoridaes y dirixentes. Avanzaron p’hacia la caverna con cara d’homes de mundiu. Los porteros apartáronse mansulinos. La comitiva entró por primer vez nel llugar. Fuera los flashes, aplausos y glayíos de la multitú aselaron. De la cueva salieron tolos trabayadores llariegos dándose a les voces. Dicíen que la comitiva esmigayárase nel aire malpenes llegaren a la primer runa. La policía foriata detúvolos y entró a mirar la que montaren. Segundos, minutos, hasta un cuartu d’hora llegó a pasar ensin que naide  del interior saliere.

Llamaron al exércitu pa que fuere a controlar aquel despropósitu. Miles de soldaos formaron n’antoxana y prenetraron na cueva a les carreres. Unos pocos tornaron vocinglando que’l llugar taba malditu, que los collacios que diben delantre esaniciárense malpenes llegaren a unes formes rares que taben na parede. Dalgún llegó dicir que les formes rares s’illuminaren y tresformaren en lletres. Ún que sabía lleer aseguraba qu’ellí traía: “Bienveníos al aeropuertu interestelar de Cordobello. La so nave saldrá en dellos segundos”.

El complexu quedó ensin foriatos de por siempre. Los llariegos tornaron de nueves a visitar la cueva. Nengún llugareñu entró nes edificaciones feches polos desapaecíos dirixentes, que fueron esmigayándose de poco a poco. La cultura taba lloñe de la cobicia anque la distancia se midiere en centímetros.

Nengún de los llariegos quiso nin quier marchar de Cordobello.


La selmana que vien va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.

.

14 nov 2012

DULDA 6




¿Por qué la xente ye tan aquello que diz que’l ministru d’educación ye un amalucáu?

¿Y el de cultura un incultu?

Wert, nun faigas caso,  ye tou rensía porque malpenes tienen mala uva como tu.


Voi date un conseyu que ye de baldre: llee el cuentu Esploradores de Lan o la seición didáutica Nel Aula, va pagate la pena facelo.


.

12 nov 2012

UNA DE LLIMPIEZA


Esta ye una actividá cenciella y mui prestosa. Al desendolcala vamos trabayar:

-Pallabreru de ropa y partes del cuerpu.
-Emplegu del imperativu.

-Remembrar llistaos.

De mano entámase preparando murales por grupos nos que se llanten les partes del cuerpu y les ropes. Cada grupu escueye el númberu murales que va facer y la so presentación. Al final péguense peles parees de clas.
El maestru tien de tener una riestra d’instruciones escrites nun papel pa que los rapazos les escenifiquen. Por exemplu:

-Llava o llavái la cara.
-Peña o peñái’l pelo.

-Llimpia o llimpiái la dentamen.

-Plancha o planchái los calcetos.
-….

Nun tienen de ser poques pero ensin pasase tampoco. Too dependera del nivel de los rapazos. Con esa llista déxase a los alumnos salir d’ún en ún, escoyer una orden y escenificala. Los otros tienen d’aldovinala. D’esta mena prautiquen los mandaos enantes qu’entame la diversión.
Agora entama’l xuegu. Pue facese individual o n’equipos de dos o tres, depende si quies prauticar el singular o’l plural del imperativu. Van salir dos equipos de cada vez a xugar. Primero díces-y a un equipu dos ordenes que tienen d’escenificar y más tarde díces-ylo al otru. Si lo faen bien o empaten a un fallu pasen los dos equipos. Si los dos fallen les dos órdenes, queden eliminaos dambos. Agora, si pasaron, díces-yos tres ordenes siguíes pa que les faigan. Depués cuatro, cinco,… hasta qu’un equipu tien más fallos que l’otru y queda fuera’l xuegu. Tienen de tener muncha memoria p’alcordase de toles órdenes y la colocación en que se dicen, que ye perimportante. Nun val faceles desordenaes, como al equipu-y pete, eso acabaría eliminándolos. La cosa fina cuando namái un equipu o persona queda-en ensin fallar nunca y gana-en l’aplausu los otros.

Más tarde pues manda-yos que faigan les órdenes en cartesde baraxa col mesmu tamañu en toes. D’esa forma tán siempre preparaes pa cuando queda un ratín ser quien a xugar.

Aspero que vos prestare. Hasta la siguiente, alón.


La selmana que vien va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.

.