30 may 2012

EL RECIBU LLÉTRICU DE AL GORE


Al Gore, que fuere vicepresidente n’USA y ganador d’un Oscar por un documental al rodiu’l calentamientu global, paez nun predicar col exemplu colo que na película dicía: potenciar l’aforru enerxéticu. Nel so xalecín de 20 habitaciones asitiáu en Nashville, a lo llargo de 2006 el consumu fo de 30.000 dólares, 12 vegaes más qu’una familia media yanki. ¿Nun fue a ésti al que-y dieron un premiu Príncipe d’Asturies pol llabor escontra’l calentamientu global? Home, vese que les nueses perres tán bien gastaes.


.

28 may 2012

DIBUXANDO LA NATURA


L’actividá que plantego güei tien tres pegoyos fundamentales nos que sofitase:
-El pallabreru de la natura: picu, llagu, ríu, cantil, islla…

-Preposiciones de llugar y dalgunes de les sos contraiciones: al rodiu, nel, nuna, enriba, baxo…

-La perífrasis verbal TAR+XERUNDIU: Iyán ta xugando, toi blincando, tan nalando,…


De mano sedría importante qu’estes tres coses fueren trabayaes enantes na clas (cursu anterior, trimestre anterior,…). Pa calentar, convién entamar dalgunes clases anteriores con dictaos onde tu dices la fras y ellos dibúxenla: tamos blincando nel prau, el cuélebre ta esnalando enriba’l picu,… Cada día fáense dos o tres dibuxos cenciellos, ensin complicación, ellos son a meyoralos na casa. Depués pues siguir la clas col tema que se te tratando.

Nuna segunda parte, tu enseñes el dibuxo y ellos tienen d’escribir la fras. De xuru qu’equí hai delles posibilidaes d’escritura, convién mirales toes y ver les que s’adauten al dibuxo. Neto a lo anterior, cada día vense dos o tres dibuxos.
Agora vien el xuegu, ye cenciellu. De mano, tu prepares una riestra de frases asemeyaes a les vistes en pedazos de papel. Separtes la clas en grupos de tres. Un neñu de cada grupu vien al par de la to mesa. Amuéses-yos un papel cola so fras y déxes-yos dos minutinos pa que seyan a pescanciala y decidir cómo dibuxala. Tornen al so grupu y ,ensin falar un rispiu, entamen a dibuxar la fras. El primer grupu qu’aldovine la fras correutamente lleva un puntu. Faese tantes vegaes como papelos tengas preparaos y tantos díes como xuzgues afayadizu. Covién nun pasase nin quedase curtios. Puen facese en díes saltiaos.

Aspero que vos prestare, toi preparando más actividaes y almítense suxerencies o necesidaes. El branu nun va aparar esta seición. Alón.




.

25 may 2012

AMOR DESGASTÁU





Mercar soledá na tienda de la compaña,
con airones y troníos
nel eternu albentestate del corazón.
Buscar señes d’amistaes enquivocaes,
con plazueles y siemprevives
na distancia alloñada del amor.
Goler l’arume de ropa gastao,
con sedes y perfumes
nel camín encerriscáu del cariñu.
Y ente toos ellos, sentite a ti,
alcordanza ferida de la tenrura
y
                del
                                         olvidu.




.

23 may 2012

SILENCIU, QUE NAMÁI FALÉ LA SALÚ

Angüaño, el ruíu arrodia tolo que facemos y déxanos cansos y esfechos. Cuidamos que son otros axentes los que nos estrocen pero'l ruíu, pasiquín a paso, ta acabando con nos. Too darréu voi espublizar una riestra de conseyos pa llevar una vida más sele, más sana. Vamos a ello:


-Poner procuru en nun facer los ruíos por rutina y respetar el drechu del nuesu vecín al silenciu y la tranquilidá.

-Emplegar l’equipu música, radio o televisión, nun volumen afayadizu y nun horariu que nun moleste a los demás.

-Llendar el tiempu d’emplegu diariu y el volumen del nuesu reproductor de música, protexéndonos asina de la perda d’audición.

-Evitar los llugares d’ociu al aire llibre onde haiga música amplificada a gran volumen o fechos deportivos multitudinarios.

-Protexer los oyíos si nun hai más aquello que dir a dalgún llugar públicu onde haiga altu nivel sonoru.

-Siempres que seya afayadizu, escoyer los desplazamientos a pie, en bici o transporte públicu, llogrando asina que se xenere menor ruíu.



-Nun facer usu del pitu’l coche al nun ser que se té en vraeru peligru.

-Nun vocinglar muncho cuando-yos falamos a los demás, sobre tou nos llocales zarraos.

-En casa: evitar andar con tacones, emplegar electrodomésticos silenciosos, nun facer xeres de casa pela nueche, a la hora’l pigazu,les mañanes de los díes festivos… Utilizar el sentíu común. Forrar con fieltros les pates de los muebles; nun pegar portazos nin golpes en suelu y les parees; emplegar sales insonorizaes pa la música; nun prender el televisor nes comides pa ser a entamar una charra tranquila…

-Si tenemos perru, enseña-y a nun lladrar nin correr mentanto ta na casa.

-Nun fadiar el descansu d’otra xente cuando salgamos a divertinos, amosando un comportamientu cívicu. Si facemos una fiesta, comunica-ylo a los vecinos.



.

21 may 2012

LA LLEI SIEMPRES VA PER DETRÁS


Los llexisladores nun-y dan un palu al agua sinon ye necesariu. L’escañu ye cómodu y nun ye cuestión que zambalíe. Por mor d’ello, siempres anden per detrás de la sociedá, que non de la ilesia, y asperen a que’l ruxir seya grandono pa facer una llei que recueya la vindicación de les mases pero, eso sí, ensin pasase.
Les comunidaes de vecinos son una caterma de problemes non llexislaos na so mayoría y que faen posible que xente que nun sabe’l significáu de la pallabra vergoña faiga de los portales la so guarida. Nin xueces, nin fiscales, nin abogaos, nin políticos,… nagüen porque’l problema desapaeza, dexen qu’esporpolle’l cáncanu pa ser a comer llueu.

Pero tamos delantre de dalgo mui serio. Hai auténticos malos tratos ente vecinos. L’abusu de dalgunes families, que cuíden que tienen drechu a facer tolo que-yos pete anque moleste a los demás, fae qu’haiga xente indefenso y con mieu a protestar yá que nun tienen nin el sofitu de la policía. Ruíos a cualquier hora, música o televisión a tou meter na madrugada, fiestes nocherniegues na casa,…, too ye pocu pa la xente incivilizao. Dende estes llinies voi intentar espeyar esti problema más d’una vez, porque me parez d’importancia y yá ye hora que llevantemos la voz y los que tienen que solucionar estos problemes trabayen y nun se rían de los problemes del ciudadán. Prestaríame que me ficiereis llegar situaciones avergoñantes que viváis o sepáis a cordobello@gmail.com onde van tener un requexu vindicativu.




Esta selmana  voi espublizar una nueva seición “Sabíes que…” y saldrá esti miércoles. Trátase d’un artículu al rodiu del silenciu y la salú que tien munchu que ver col Llinies de güei.





18 may 2012

LA SOLEDÁ D’UN CORREDOR DE BLOG N’ASTURIANU


Si mires pal mundiu de los blogs n’asturianu ye asomeyáu al de la política, la llingua, la música,… d’Asturies: probetayu a esgaya y d’una tristura descomanao. Nun camudamos nin un rispiu d’un añu a otru, nun tenemos idega de comuña y pensamos namái nos blogs del nuesu bandu, nun lluchando por dalgo que diba cambiar el mundiu la llingua, porque pue democratizala y facer d’ella un mundiu diversu pero amigu. Nun nos visitamos, nin dexamos la nuesa tarxeta de visita que ye’l comentariu, nin publicitamos conxuntamente’l mundiu blog ente los falantes… Dengún somos culpables d’ello pero tampoco somos inocentes. Somos tan desdexaos…

Namái echar una güeyada a los blogs n’otres llingües vese dalgo distintu y que tendríemos de cavilgar. En gallego hai más de 5000 blogs de faza distinto: noticies, lliterarios, políticos, deportivos,  musicales… Ente ellos hai conceutu de comuña, coméntense, intercámbiense coses, nun tán aisllaos como nós. En castellán, ai en castellán, hasta hai un mes tenía un blog lliterariu nel que tenía de 200 a 300 visites y ente 30 y 40 comentarios a una entrada (los comentarios fueron nos últimos tiempos, enantes taben ente 20 y 30 y enantes ente 10 y 20…). Decatábeste del cariñu que te teníen, unviábente e-mails, había un blog coleutivu de tolos microrrelatistes, había quedades,… Nun pido que n’asturianu seya idénticu, namái que se faiga comuña. Diréis: “Si yera tan guapo, ¿por qué nun  te quedasti ellí? Porqué soi asturianu y tengo señardá de la mio llingua, de les coses de mio. Fo una esperiencia perbona pero dalgo me faltaba.

Tán guapos los blogs de política o de llingua, pero fai falta más, más variao… Ónde tán aquellos blogs lliterarios de Pablo Antón Marín Estrada, de Berto Cobreros,… Fai falta esperimentar cola llingua, facer que los asturianos s’avecen a lleer nel ordenador lo que se-y niega nos llibros, televisiones, radios,… Hai poco tuve la suerte d’entrar nel blog de Skancia y ver coses afayadices, gocié como un verderón, imaxino qu’hai más esperiencies d’esa triba pero entá nun les conozo, pero fai falta dexar la tarxeta de visita, dexar el comentariu, dicir toi equí gallu, sígote y préstame lo que faes. Yá ta bien de falar l’asturianu del nuesu portal, de lleer el blog del nuesu café, de namái saludar a los nuesos amigos,… Asturies necesítanos a toos y la xente de los blogs tenemos de dexar de ser tan parciales.







.

16 may 2012

ENTAMANDO CON MAXA


Nestes primeres entregues de Nel Aula vamos rellacionar una carrapotada d’actividaes curties que van sirvir pa que los rapazos garren gustu pola Llingua Asturiana. Emprimamos con una que va llograr que se diviertan a esgaya y que garren soltura, vamos escribir Pócimes de Bruxa.
De mano, vamos escribir na pizarra’l nome de dellos animales: páxaru, gatu, sacavera, culiebra, araña,… Podemos facer un xuego nel que tu escueyes un animal y ellos tienen d’aldovinalu. Naide ye a falar, tienen de facer mimu pa entrugar qu’animal ye y tu solo yes a contestar si o non. D’esta mena, prautícase los animales. Depués, dependiendo del nivel de los rapazos, escribes al par de cada animal los ingredientes que puen incluyise nuna pócima de bruxa, esos ingredientes das-ylos tu o apórtenlos ellos. Sirva d’exemplu los ingredientes que ye aportanos l’araña: telaraña, velenu, pates,…

Los rapazos preparen una fueya con debuyos afayadizos y escriben nella la pócima: Bruxes de mal agüeru, face-y la maxa que vien darréu con: les plumes d’un páxaru mariellu, les garres d’un gatu fechu con mieu, los güeyos d'una sacavera esgañitada,…, llográi, llográi, que la clas nun se dexe amedranar y entame col pie de la fatalidá.

Feches les pócimes, cada día entamaríase la clas con ún de los rapazos diciendo la so pócima y el restu repitiéndola a coru. Nel aula o nos pasiellos fairíase la esposición de toles fueyes y nun taría mal facer un Muséu les Bruxes nos niveles superiores (fairíase col modelu del Muséu la Imaxinación).





.

14 may 2012

COSES DE CORDOBELLO

SEL


Hebio unos tiempos antiguos de los que malpenes tienen remembranza la xente d’anguaño de la isllalla de Cordobello. Son dómines de silenciu, d’oyíos enllenos de cerumen que nun son a ascuchar les estaciones pasar marmullando. Namái un llibru fo acabar con ello, el Llibru la Vida, que nació una nueche d’iviernu demientres les fogueres se dexaben acariñar pol fríu del desconocimientu. Una muyer, Sel, entamó a escribir histories del so pueblu con lletres tremeroses y enllenes de tropiezos. Faló de lo qu’oyera a sos güelos, siguió polos sos vecinos y acabó por viaxar por Cordobello recoyendo la sabencia que s’espardía pelos conceyos.
Nuno de tantos conceyos que yeren nomaos con xiblíos a la espera d’una pallabra que los denominaren, conoció a un home guapu guapu que rexía dellos pueblos de la degolada y que miró p’hacia ella cola visión del carbayu de les tierres altes. Nun tardaron en casase y desiguida tuvieron una fía que tamién se llamó Sel, como so ma, anque ella yera más piquiñina y , pa estremales, decidieron dici-y Selina. Quelo, l’home, día a día dexó ver el so calter fadiu y la so obsesión por guardar en casa les sos posesiones, la muyer y la fía tamién. Sel y Selina, asina y too, colaben ensin permisu a la busca d’histories qu’enllenaren el so Llibru de Vida. Una tarde, dieron con una casa que golía a Quelo, el so home y el so padre respeutivamente, nel aire oyíense les pallabres de  la so última visita y na percha colgaben ropes que cuntaben que les sos visites yeres diaries. Rexentaba’l domiciliu una muyer bien trabada y que nun duldó en cunta-y la visita de dambes muyeres en cuantes l'home entró pela puerta. Enfocicáu y firíu na so masculinidá, garró a Sel y metióla nuna xaula, prendió la ferrería y llantó-y un fierru ardiendo en tolos güeyos. El sol yá nun besó los sos iris d’amor y el cuartu fo l’xunicu llugar qu’apalpó dende entós. La so fía Selina tresformóse na única allegría na so vida y la voz dulce de la moza traía-y canciones qu’amatagaben la so tristura. Quelo dexóse llevar pola so envidia de costume y separtó a les dos muyeres, obligando a la so fía a canciar solo pa él.
Sel morrió de pena malpenes pasaos dellos meses. Enterráronla de nueche y en silenciu, el mesmu qu’ella frayó col so Llibru la Vida, el mesmu que la so fía sintió al dise so ma, el mesmu que rondaba a Quelo ensin ésti sabelo. Cada mañana, enantes que so pá se llevantare y el sol amosare los sos primeros rayos, averábase al cementeriu a cancia-y a so ma sones de señardá, y ésta peñába-y el pelo a Selina col vientu amorosiego. Dambes dos, afalagaben a la tristura con cantidaes de sentimientos d’ausencia y deseyo.
Nun tardó Quelo n’atopar a la so fía volviendo del cementeriu. Glayó, tronó, dexó salir tol odiu que taba dientro d’él y nun fue a evitar matala. Dende entós, toles mañanes suenen los sones de les dos muyeres en cementeriu, que ye visitáu por tol pueblu, y, lo que ye aínda más melgueru, peles tardes y nueches ascúchense ellí onde té Quelo. Condergáu a nun morrer hasta mui vieyu, l’home sufre la soledá que repartió y el dolor col qu’agasayó a les sos dos prisioneres. N’honor a dambes muyeres, punxéron-y el nome d’elles al conceyu y yá nun tuvieron de xiblalu enxamás.





.

11 may 2012

APIERTU GRANDE




Güei nun tengo ganes de salir a vivir la vida. L’orpín enllenó’l mio corazón de murnia y les persianes de la mio esperanza tán zarraes de puru cansanciu. La despensa de la mio confianza vacióse d’alimentos; la fame va correse una folixa na que la mio conciencia ruxirá como tripes espendolaes a sabiendes que se van rir d’ella. Nun tengo nin un rispiu d’amor propiu que repartir nel trabayu y el xefe llama axuste horariu a les hores estraordinaries. Asina que yá lo sabes: toi en crisis y ellos siguen gastando la mio vida.



El llunes que vien espublizaré de nueves la seición Coses de Cordobello y el miércoles sedrá'l turnu de Nel Aula. Pocoñín a poco esconsonarán les seiciones y de xuru que vendrá dalguna nueva.
.

9 may 2012

EL VOTU




Cuando inventaron aquello de “un home, un votu” escaeciéronse d’inyectar capital a les ganes de participar. Más aínda si la to opción anda xugando a la queda.




El llunes que vien espublizaré de nueves la seición Coses de Cordobello y el miércoles sedrá'l turnu de Nel Aula. Pocoñín a poco esconsonarán les seiciones y de xuru que vendrá dalguna nueva.




.



.

7 may 2012

VARA DE MIDIR




Allá una vezona, nel tiempu maricastaña, separtábase a la xente ente probes y ricos y acordies a ello tratábase-yos d’una manera o d’otra. La xusticia nun s’estremaba muncho d’ello y víase como los probes cargaben coles culpes de los ricos. Agora tamos en tiempos de democracia y munchos darán en cuntar que la cosa cambió. Pero en cuantes miramos a los periódicos, decatámonos que la diferencia ye d’apariencia: los aristócrates siguen metiendo la mano nes arques públiques ensin que se faiga muncho, los políticos salen llibres de delitos de corrupción,… Por embargu, una neña da-y un sopapu al expresidente d’Asturies, al elementu que desprecia y s’avergoña de la nuesa tierra, al fartón que mexa pela nuesa cultura y llingua, y a la probe moza cáen-y dos años de cárcele, en cuentes d’aplaudila por facer lo qu’a munchos nos prestaría facer. Miles de millones d’euros robaos son menos qu’un sopapu pa la xusticia. Vaya inxusticia. La vara de midir de los xueces continua cegata y si queremos que vea bien, tenemos de paga-y les gafes los probes.




.

4 may 2012

TÍTULU PRIMERU DEL ESTATUTU AUTONOMÍA



Asturies ye una unidá de destín no irreal.

Esti va ser l’entamu del futuru Estatutu d’Autonomía p’Asturies demientres los nacionalistes/asturianistes sigan exerciendo de residuu tóxicu pa col so país. Yá tán esfregándose les manes los partíos que se llamen mayoritarios, o parllamentarios, auténticos cementerios nucleares pa la nuesa tierra. La mocedá d’Asturies pue dir camentando en colar como bidones radioactivos, la única mena de colocase.


.

2 may 2012

ESCAÑU VACIU




Soledá. Nun hai pensamientos nel so respaldu. Una xuez, con familia nuna les partes, prevarica y naide nun diz nada. Asturies aguanta’l so lloru. El poder, los poderes, los que malpenes trabayen, siguen mandando.
Vacíu. Nun hai naide  que-y gorgute a la xusticia comprada. Vacíu de poder, vacíu de xusticia, vacíu de razón. Vacíu. Nun hai quien gobierne a los gobernantes.

Vergoña. Vergoña como sinónimu de poder. Vergoña como sinónimu de xusticia. Vergoña como sinónimu de gobiernu. Mentanto y non, los nacionalistes/asturianistes enfílense cola sidra de la engarradiella eterna.

Abluque. Población tomada del pitu serenu, tomada a xirigoncia, tomada del pelu. Población que ve como-y roben la so dignidá ensin que naide nun se sienta culpable. Demientres, el poder establecíu y los qu’anden na so rodiada nun dexen de celebrar llacuaes.



.