30 ago 2009

PIRATES DE TERCIOPELU


Nun albidro onde toi. Nun soi quien a albidrar. Escuridá. Nun veo. Ta too escuru. Aquellos cuatro homes volvieron. Sí, volvieron. Tamién lo ficieron los dos que s’engarraron con aquel xostrón na caleya trasera. Prindaron primero al mio fíu. Probetayu. De siguío, fo la mio muyer. Esgatuñólos ensin aparar. Na cocina garraron a los dos emplegaos. Esos namái que berraron. Y a min tuvieron de dir buscame al pisu d’enriba. Nun dexe que me coyeran de primeres. Tuvieron de percorrer tola casa. Hasta que sentí un golpe na cabeza.
-Hai dalguién nel cuartu.
-Toi yo, pá.
-¿Ónde mos truxeron?
-Al cuartelón, pá.
-¿Qué querrán de nos?
-Ficiéronme un interrogatoriu con hosties y too.
-Castrones.
-Falaben d’unos pirates, pá. Cuido qu’alloquecieron. Nun van tardar en venir por ti.
Pirates. Siguimos colos pirates. Mira que-yoslo dixi: nun xuguéis con esa xente, nun-yos presta qu’anden a fadialos. Y agora tócamos a nos arrecostinar coles tortes. Los que semos fatos, nun vamos dexar de selo. Muncha risada con aquel home, muncho cuntar que semos pirates, muncho facese’l gallu…, pa la riestra de forgaxa que trafiquen de contrabandu. Nun tuvi de dexar que me convencieren pa que los aidare colos correos. Quién me manda a min facer la babayada de los menús especiales.
-¡Home, espertasti! Yá yera hora. Venga que mos toca celebralo contigo.
Acerté los seyes númberos, el complementariu, la pedrea y el cupón d’infancia de regalu. Van cayeme per tolos llaos.
-Nun fai falta que me garréis. Yá voi yo.
Pal casu que me van facer.

27 ago 2009

DE NUEVES COL CONSEYERU


-Nun me va dicir que fuxo d’ellí pola dexadez d’aquellos homes. Otra cosa non, pero los pirates vixilen ensin descansu a los sos prisioneros.
-Too aquello yera raru a mamplén. La mayoría paecíen muyeres feches y dereches. Les dos coles que lluche tres del chigre…
-¡Yá t’oyí navaya! Aquelles muyeres yeren los nuesos axentes a los qu’usté atacó.
-¿Qué diz? Ta llocu. Aquelles walkiries teníen unos cuerponos que dexaben a ún ablucáu. ¡Homes, diz usté qu’homes! Pa min que ta un migayín cegaratu.
-Ehí ta la rempuesta, no cegaratu qu’usté taba. Nel chigre drogáronlu y esbarró tolo que quixo y más. Menos mal que nun-y cuntamos tola verdá como usté quería, porque sinón díbemos daos.
-Val que me drogaren, pero la fiesta que montaron enantes d’escapame foi tamién verdá. Yo nun vi nada porque taba a escures, pero oyí tol xaréu. Nun soi a dicir el tiempu que tuvieren de folixa, pero si soi a aldovinalu poles comides. Diéronme una cena y un almuerzu. Nel almuerzu viénome’l vixía tou enfiláu y escaeció pesllar la puerta. Entós, saqué la cabeza y eché una güeyada a aquel salón grandono. Taben toos dormiéndola y el vixía nun diba tardar nello. Asperé dellos minutucos y colé d’ellí. Cuála nun diba ser la mio sorpresa cuando escuqué unos papelos nos que se recoyíen los sos planes y la próxima xunta. Estudiélos y depués volví dexalos ellí.
-Eso tien bona pinta. Ye usté neto a Sherlock Holmes.
-A lo que paez nun lu fici tan mal.
-Vamos dexalo tranquilino. Una vegada mos desplique a tol gabinete como pintó la cosa, fairemos dalgo de lo que se van alcordar.

24 ago 2009

LES WALKIRIES


¿Ónde tán les walkiries que llucharon conmigo hai un cachín na parte trasera del chigre? Nun soi a alcordame de la so apariencia física, nin tampoco onde fueron tan escopetaes hai dalgunos minutucos. La verdá que nun hebio tiempu a esgaya pa ser a falar de nosotros, o eso me paez a min. Lo que nun remembro nin un rispiu ye onde me la espete pa que me doliere a espetaperru'l cuerpu ensin ser a aparar esi ruxe-rux que me fai nun escaecer tanta miseria. Pieguémela col coche hai unos meses y foi más suavino qu’esto. Si nun fuere por elles, nun sedría a arrecostinar con esta llaceria que nun me dexa descansar tranquilu. Eses qu’abren la puerta nun son les neñes d’enantes, aquelles taben muncho meyor qu’estes. Anque nun sedría a face-yos un feu a estes, tolo hai que dicir. Home, estes albídroles con barbes y bigote pero cualaquier tiempu ye bonu pa dar con una muyer con carnes pa coyer. Al nun ser que perdieres la chapeta, l'home acostuma decatase cuando ta delantre unes dames feches y dreches.
-Nun se si son a dicime a qu'hora’l día tamos, guapes rapaces.
-Guapes rapaces, vas cagate…
-Dexa que mos cortexe’l galan. Ten un migayín de consideranza col caballeru, nun esvaries ensin ascuchalu.
-Gracies rapaza, dios te lo pague.
-Nun sé si me lu pagara, pero’l mio amu tendría más aquello conmigo si llograre que me dixeres que ye lo qu'asocede.
Esta nueche de xuru qu’hai trabayu con estes dos, asina que voi cunta-yos tolo que seya quien a ello y tovía más, l'amu d’elles tien de quedar contentu pa qu’elles lo ten. Mialma qu’enxamás suañé facémelo con dos al mesmu tiempu. Nun perdamos el tiempu y entamemos a rellata-yos tolo que m’asocedió.
-Bones moces, equí onde me veis trabayo como deteutive priváu y de xemes en cuando faigo dalguna llabor pal gobiernu. Nun sé si me vieron na prensa, salgo too de siguío. Nun ye que faiga tanto, ye qu’ellos me paguen con artículos que me dan fama y depués poder cobrar a la xente rico los sos trabayos. Asina ye, nun hai más aquello. Pues aquel día llamáronme…

20 ago 2009

LOS XAREOS NUN APAREN


Esto ye l’acabóse. Entrar de nueves otru policía vistíu de pidigüeñu. Nun sé si faceme’l llocu o llantalu a mil kilómetros. Dende'l día d’autos, suaño que los tengo tol tiempu en chigre. Unos vienen a prindame por malfechor, mentanto otros entruguen per toa triba de pillastres. Entren y salen; entren y salen; nun aparen nin un minutu la nueche. Cafiantes, xostrones, pazguatos,… Podría tar abondos díes diciéndo-yos axetivos pero meyor voi atender a esti manguán.
-Güei nun ye día de menú especial. ¿Qué ye que nun sabes lleer?
-Usté perdone. Nun fui a ver el cartelu. Imaxiné que lo había tolos díes.
-Sí, ho. Ye lo que me faltaba. Salióme finu’l señor. Caberamente muncho probe nuevo hai. Pa min que vos paguen mal na policía.
-Ta un migayín confundíu. Yo nun soi policía.
-Entós ye un millonariu qu’oyó falar de los nuesos menús especiales y vien prebalos.
L’home remiróme, echó un funguíu y coló. Sentéme nuna banqueta la barra pa garrar dalgo d’aliendu que me permita siguir dando comides. Xuacu surdió de la cocina glayando. De primeres nun-y pescancié un res, pero depués atalanté que dalguién s’engarraba na caleya d’atrás. El xaréu va n’aumentu acordies m’averó a la cuelma. La xente atápame los contrincantes. Óyense unos disparos al aire. Dos homes cuerren. Nel suelu hai un home de capitón. Ta d’espaldes a min la so cabeza. Xírolu. Ye’l policía, o él que dicía que nun lu yera. Xuacu llánza-y agua d’un cubu. L’home espierta de la zurra. Ensin asperar un rispiu, dixo:
-¿Ónde tán?
-Lo menos nel centru ciudá.
-Esos sí que yeren policíes.
Nun aldovino si yeren ellos los raposos de la manada o él. Muncho mos tenía que desplicar p’aclarianos un pocoñín.

18 ago 2009

NUECHE DE TRUENA


El mio Xuan miróme díxome marrana que feína tas yo díxe-y Xua… Tan xugando conmigo. Xua… Más que xugar. Yo díxe-y Xuanucu nun tengo contigo ganes de follar… Anda que soi finu. Toi que lo echo. Esti güisqui pa min que ta vivo. Nun paez que ta nes últimes. Pa min qu’hai dos minutos taba enllena. Entós el mio Xuan ye burru que nun lu hai más…¡H.e!, como yo. Toi como un burru. Nin prau que nun tenga yerba nin mociquina d’a quince que seya… ¡Xuuuuuu!, nun voi dicilo. Nun vaiga ser. Nun hai carretera ensin barru nin prau que nun tenga yerba…Van detener al paisanu por traficar con estupefacientes. ¡H.a, h.a, h.a, h.a,!
-Riiiinnnnggggg.
Lo que me faltaba. El babayu del teléfonu. Va faceme llevantar. Anda que nun sé si voi ser a caminar. Equí ta. Voi garralu.
-¿Quién ye’l castrón?
-Nun-y da vergoña. Tien namái qu’una selmana pa investigar y usté pierde yá la primer nueche.
-Home, Pepito Grillo.
-Nin Pepito Grillo, nin la madre que lu parió. Yá me fizo soltar una pallabrona. El señor Conseyeru ta esmolecíu porque nun salió esta nueche a xixilar.
-¡Tán controlándome! Mañana como ten siguiéndome, nun voi a entamar col casu. ¡Esto ye la de dios! Vaya gandaya. ¿Qué se piensen que son?
¡H.a, h.a, h.a, h.a! Colgué-yos. Estos señoritingos. Danme’l casu namái pa xustificar depués l’Estáu de Sitiu. Camienten que soi babayu. Bueno, agora si que toi un migayín babayu. Deseyen que me piegue’l sapiazu. Sí, ho. Tán asperándolu. Nagüen por tener les manes llibres. Entamar armala bien armada. Meter na cárcele a los que-yos pete. Vaya, acabóse la botella. Voi por otra.
-¡Puuuuummmmmmm!

16 ago 2009

SECRETU ESTÁU


Llamáronme ayeri y güei diéronme la misión, asina lo gasten nes conseyeríes del gobiernu de Cordobello cuando tienen dalgo que facer ensin que la prensa investigue muncho. Esta vegada nun domino muncho del casu nin yo que se supón que voi poner les coses en claru nun tiempu record d’una selmana, o eso imaxinen ellos que voi facer. Nun me dexaron gorgutar nin un rispiu, aclariándome la realidá coles siguientes pallabres:
-Ficimos de ti un héroe. La prensa llamábate “Ventolín de los Criminales”. Agora tócate a ti devolvenos el favor. Nun mos cuntes películes de que necesites más información, apurrímoste tola que te podíemos dar.
-Señor Conseyeru, aspero qu’usté nun dulde de min nin un migayu. Si-y pido más información ye porque me fai falta pa descubrir a esa xente. Usté diz que son pirates que crucien la mar de Cordobello y qu’esfarrapen a tolos barcos del gobiernu, pero como voi dar con ellos si enxamás nun se faló d’ellos na prensa o nel so serviciu secretu. Ónde suelen atacar, cuánta xente son, cuála ye la forma qu’actuen…Son tantos furacos negros.
-Eso qu’usté quier saber ye Secretu Estáu y nun se me permite cunta-y nada. Namái puedo dici-y el chigre onde se supón qu’operen y al que tien de dir p’atopalos.
Nun albidraben lo testerón que yera, pero yo enxamás nun fui a camentar qu’ellos lo fueren más. Namái fui a llograr que me dixeren qu’intentaren garrar a los sos enllaces con un mensaxe cifráu falsu col sofitu d’un corréu que lo metió naquel chigre. Cola contraseña correuta y el llugar afayadizu nun fueron a pillalos. Torturaron al corréu una vuelta y otra naquella selmana ensin que nun se corrixere nunca y xixilaron el chigre nun moviéndose nin el gatu nél. Depués d’una selmana, asperaben que yo-yos ficiere’l milagru o entamaríen un toque queda que faería que la xente nun tuviere otra de falar. Nun detuvieren a los que trabayaben nel chigre pa que yo pudiere consiguir entrar naquel mureru y ser a aldovinar onde alcontrar aquella refugaya. Lo meyor ye beber güei pa entamar mañana, total ye perdifícil dar con ellos. Escaeceré per una nueche’l muertu que diba acabar cola mio bona fama.

13 ago 2009

LA RESACONA


Siempres zarapico cola lletra “p” de MENÚ ESPECIAL. Quiero facer tanto rebilicoque que nun soi a ello. La resacona apegúñala cola s. Borro l’ESPECIAL. Entamo a escribilo de nueves. Tal como toi güei, echaré abondo en facelo. Nun hai dulda dala que soi un migayín pexigueres, en cuentes de vivir la vida d’una forma cenciella, préstame búsca-y dificultaes. Paez qu’agora me sal la cosa como tien de ser, la “p” quedóme de lo más guapo en dellos meses. Mentanto nun seya a cruciáseme nenguna les lletres que falten, nun va tardar n’entrar na galería les pizarres de menús. Voi tener de dir pola cámara de fotos y saca-y unes semeyes, de xuru que m’escueyen pizarra del mes nos chigres de Cordobello. La “l” paez fácil pero siendo la cabera ponse un rispiu saltona. Ye lo mesmo. Abulta espontánea. Voi dicir a Xuacu que-y tire unes semeyes. Les perres del premiu nun ye que les tenga, pero si nun les mando de xuru que van pa otru bolsu.
-¡Xuacu, Xuacu…! Nun sé pa que se fai’l día folgueta pa ti. Tas tol día mangándola.
-¿Qué ye, ho? Nun dexes a ún preparase.
-Hai más d’una hora que teníes de tar preparáu. Tíra-y unes semeyes a esti cartelu.
Con suerte acabaráles pal domingu. Tar tarán de campeonatu, pero enantes de sacales va face-yos un estudiu. Si atopa la máquina y nun tien de dir buscala. Vaya rapaz que me tocó nel repartu, polo menos tiraríen-y el molde pa que fuere orixinal.
Entró’l primer famientu pela puerta. El menú especial va enllenar el chigre de pidigüeños como ye vezu nos díes de contraseña. El llantar precios baxos arrexunta a tola xente con ganes lloques por comer, ensin aparase a cavilgar que vas pone-yos en platu. Esi día ponemos “ropa vieyo” con tolo que mos queda na despensa ensin salir. La mio muyer especializóse nello depués d’iguar tantos menús especiales. Hai más de diez años que mos encargaron el pasa-yos la contraseña. Mialma que ye chollu. Pa ellos y pa los pidigüeños, porque lo que ye pa nosotros va tiempu que dexo de selo. Escomencipia’l baille de lleguen, sírvo-yos, fáense los remolones, llogro que paguen d’una vez y marchen. En cuantes dexen la mesa llibre, otros probes la ocupen. Hai tanta xente qu’hasta agora nun me decaté d’esi grupín de mendigos de diseñu. Nunca nun los viere. Amiren a los otros como si asperaren alcontrar a dalguién conocíu. Esos tienen más dineru que yo. Lo meyor sedrá que tire colos esperdicios d’esta mesa’l mensaxe y qu’albuerte la entrega. Pa min qu’esos son policíes y anden a la gueta. Va costame tiralo, enxamás lo ficiere enantes. Disimulemos. Nun tienen de decatase que los golí. Falaré-yos normal. A ver si nun tatexo.
-Tóca-yos a los señores.
-Gracies.
Fuxo pa la cocina. Zarapíquenme los platos. Doi-yos instrucciones a toos. Salgo de nueves. Empobínome pa ellos.
-¿Qué va ser?
-¿Qué quier que seya? Cuatro menús.
Xírome y amiro pal mostrador. Noto un home que crucia los güeyos conmigo. Los policíes nun dexen de fixase. Entós, dígo-y:
-Güei nun ponemos sidra, tamos qu’echamos fumu.
L’home nun dixo nada. Coyó’l so abrigu y coló. Pa que depués falen de la resaca de la mar o de la cabeza, toi acabante conocer la de la policía.

11 ago 2009

LA CONTRASEÑA


Nun hai xueves bonu. Llevantame depués d’un día descansu suel dexame baldáu. Nin afaitase, nin duchase y cuasi nin almorzar, neso consiste tola actividá que faigo enantes de dir pal chigre. Llamo “dir pal chigre” a baxar les escaleres y digo “quexame del trabayu” a doleme la cabeza de la resacona, porque lo que ye xente peles mañanes malpenes nun hai, dalgún repartidor qu’otru y los cafiantes de siempres. Hasta que llegó él.
-Pon sidra que fai fumu.
La contraseña. Yera la contraseña. Fai fumu. Más d’un mes de tranquilidá y tien de venir ésti depués del día de descansu. Nun soi atopar el llápiz. La llinterna, la llave inglesa, la goma, l'abrechapes,…, alcuentro de too nel caxón menos el llápiz. Toi xuru que tien de tar ehí. Antayeri finé la nueche dexándolu en caxón. Veolo como si fuere güei.
-Aspera rapaz, nun soi a dar col llápiz.
-Nun s’esmoleza, tengo yo ún.
Un marineru con llápiz nun pega muncho. Ún camienta que’l marín ye un home aventureru, lloñe de la ciencia o la escritura. Ta bien sabelo.
-Amás, ya traigo’l mensaxe escrito, nun vaiga ser que lu escaeza.
-Trai p’acá, nun vaigamos tenela si lu pierdes.
Nel papel arrexúntense númberos y lletres ensin xaciu, a lo que yá taba acostumao. Nun soi aldovinar el so significáu, pero imaxino que tanto’l que lu trai como’l que lu recueye nun lo saben. Asina nun hai dulda dala na seguridá. Si la xusticia mos garra pel mediu primero tienen de descubrinos como mensaxeros y depués llograr de nos el códigu que desconocemos. Nun lo tienen fácil los señoronos. Amás, la cárcele en Cordobello ta dirixida pola oposición, el gobiernu namái que manda puertes pa fuera.
Lo meyor ye que vaiga poner el menú na entrada. Hai un cliente que ta interesáu polo menos. Si nun m’enquivoco muncho, nun va tardar.

10 ago 2009

LA ISLLALLA DE CORDOBELLO



Toos oyimos falar d'islles, penínsules y continentes, pero cuasi naide sabe lo que ye una isllalla. De fechu, poca xente asitia nel mapa dalguna d'elles. Non, nun toi falando a lo xo cuando vos cunto esto, paezme que ye abondo serio la tema como pa tomala a xirigoncia. Voi desplicávoslo darréu. Nel nuesu planeta hai más mares arrodiaos de tierra per toles partes amás del conocíu mar Muertu. Yá sé que vos suena raro, abultarávos que sedrán llagos grandonos en llugar de mares, pero ye tan verdá como que la Lluna ye'l satélite la Tierra. Si conocemos la otra carauterística de les isllalles de xuru que sedremos a pescancialo. La isllalla tien forma circular y ta cercada por montes que l'atapen de cualaquier mirada esterior. Mialma qu'anguaño cuntamos colos satélites artificiales que saquen semeyes a tolo que se mueva, pero la isllalla nun apaez nelles . Diríemos que s'alcuentra n'otra dimensión y asina ye. Éntrase por dalgunos furacos averaos a zones desértiques y aisllaes. Depués d'avegoses caminaes salse per otros furacos a unos ermos, depués a unos praos escomanaos  y no últimu atopámonos con una borrina fonda. Tres d'esa borrina, tán les isllalles. Si lleéis esti blog , sedréis a deprender un migayín de lo qu'asocede nuna isllalla. Quiciabes dalgún día lleguéis ser unos especialistes.