30 mar 2010

GRANDES DESCUBRIMIENTOS

Abeyaba de picu a picu, a la gueta d’una entrada d’esi mundiu dende’l que vinieren los foriatos. Xuacu diére-y les instrucciones y él organizare la búsqueda. Conocía aquelles tierres de pe a pa. De rapazu fuxere de los foriatos y tirare pal monte colos fugaos. Nos primeros tiempos nun tuvo descansu, d’un llau a otru, escondiéndose de les partíes. Deprendió cada requexu d’aquella tierra; cada persona que-y fuere a aidar; cada mayada nel que s’abellugar; cada pericuetu onde cuasi naide yera a llegar. Asur sintió aquel suelu como amigu.


Cuidaren que la borrina llendaba la isllalla. Nos díes soleyeros amiraben pa ella y semeyaba la fin d’aquel mundiu. Agora duldaben. Si tien d’haber un furacu pel que la xente pudiere colar, tien de tar nella. N’almorzando partieron pente ella, ataos con sogues pa nun perdese. Nun víen nada. De xemes en cuando sentíen tirones na soga que-yos remembraben qu’otros cuatro viaxaben xunto a ellos. Una hora, dos, dos y media, la voz d’Asur mandó averase los cinco. Sabíen que taben a la par más pol palpu que pola vista. Alcordaron siguir otra media hora y sinón atopaben salida, colar pa onde entraren dirixíos pola brúxula. Al poco, la borrina esfízose. La ñeve enlleno tola tierra.

-Vamos arrodiar per metanes de la ñeve y la borrina. Dexo esta vara indicando ónde salimos.

-¿Pa ónde vamos dir, pal este o pal oeste?

-Pal oeste.

En dellos sitios la ñeve llegó-yos a la cintura, dificultándo-yos la caminada. De sópitu, baxó-yos a los calcaños. Aprovecharon pa xintar. Sacaron les fiambreres. El pan taba arroxáu de dos díes y tovía taba blandiu. Diéron-y con ganes. Tando nello, un fumu xubía de la otra mayada. Dexaron la llacuada y metieron los sobrantes nes mochiles. Mansulinos averáronse a la fumareda. Una murallona dexóse ver. La ñeve cuasi nun se dexaba notar. Una carretera surdía de la borrina y metíase nel cercáu. Lo más raro yera que depués siguía monte p’arriba. Lo meyor yera dir pa la borrina y ver ónde daba la carretera. Amás, teníen órdenes d’avisar en cuantes descubrieren dalgo.



Amalio quedó col Blogpredicador pa falar de les últimes. Los sos espíes nun se movieren un rispiu, aparaos por una burocracia que nun facia más que pidi-yos papelos d’una triba o d’otra. Malpenes sacaben la pata del so cuartel xeneral, llegáben-yos con nueves de dalgún trámite. Si nun fueren tan primarios los llariegos, talamente paecía que tuvieren riéndose d’ellos. La so secretaria avisó-y de la llegada del Blogpredicador.

-Hola Amalio. Aspero que seya d’importancia lo que me tengas de cuntar. Toi enllenu trabayu.

-Si nun te conociere, diría que la que ta enllena ye la to cama.

-¡Yá tamos! Tenéisme fartu con tanta fatada.

-Nun t’enfurruñes. Namái quería dicite que les provincies en manes de los xabaces tán yá enllenes d’esos llibros que tanto buscamos. Pa min que lo meyor ye dexar pa prau l’hotel en Gamusín y dedicanos a otres xeres.

-¿A ti qué te paez? Paezme que nun hai dulda dala.

Amalio convidó al Blogpredicador a cenar nos sos aposentos. Al entrar, el blogpredicador decatóse que taba enllena de criaes llixeres de ropa y de decoración erótica. Nun cambiare nin un migayín la política de Cordobello, tán serio en temes carnales.

28 mar 2010

DESCRIBIENDO UN PAISAXE

Tenemos seis semeyes parecíes d’unos paisaxes de ríos. Fáense fotocopies acordies al númberu d’alumnos: d’una faese sólo una, otres dos faeranse de dos, …Repártese una a caún de los neños. Tienen de dir pela clas cuntando como son les sos semeyes y ascuchando como son les de los demás. Apunten les que son iguales a les de so, ensin amirales nunca, sólo cola desplicación de los collacios. Neses desplicaciones nun puen emplegar alverbios de llugar y les pallabres ríu, catarata, árbol, biesca o bosque, monte y picu. Si tienen qu’utilizar una d’elles, nun la nomen sinón que faen una desplicación de la mesma. Hai d’avisalos que n’asturianu nun esiste la pallabra montaña. Como se ve, el parecíu ye pergrande ente les semeyes poro que de mano van pensar que son toes igual. Amuésenles unos a otros y al ver la cuestión del parecíu, vuélvense repartir pa facer otra vuelta l'actividá. Agora tienen de detallar más p’aldovinales.



Una vegada arrexuntaes más o menos, tienen de pegar la so semeya na llibreta y tienen describir como lleguen al llugar y dalgo raru que-yos pasare nél. Ún a ún salen y lleen la so hestoria.

23 mar 2010

VAMOS DEPRENDER PALLABRERU

Aldovinar una pallabra ye dalgo milagrosu, fae que garre un llugar na tiesta y nun lo dexe asina como asina. Emprimamos asitiando na pizarra les pallabres: semeyes, debuxos o pallabres escrites. Depués tenemos de diciles una riestra de vegaes, asina que ye bono qu’acudamos a xuegos sonoros que nun los aburra (si son pallabres d’animales puen nomase col soniu que faen ellos, si ye los colores pue emplegase la música imaxinaria d’esi color,…). Ye la hora d’entamar:


a) En grupos deciden una pallabra. Tú, que yes un adivín recién, vas intentar acertar les pallabres que camentaron los distintos equipos. Convién dicir de mano pallabres que deprendieron hai un tiempu, eso va da-yos muncha risa y va permitite comprobar el so deprendizaxe.

b) Agora vas prauticar la to vena telépata, vas dici-yos mentalmente la pallabra que tu camientes. Ún a ún van intentar aldovinala.

c) Yá ye hora de qu’ellos xueguen solos. Formes grupos y das-yos un diálogu que prautiquen col pallabreru. Por exemplu, si trabayes aiciones que faes en colexu pues facer el siguiente diálogu:

-Voi dir pa clas.

-¿Vas lleer?

-Non, nun voi lleer.

-¿Vas cuntar?

-Sí, voi cuntar.

d) En pareyes, tienen d’aldovinar l’orden nel que colocó’l so collaciu les pallabres. Pa ello, tienen de mano que dicir qué cinco pallabres escueyen pa xugar. Imaxiná-y que son: cascoxu, pita, gochu, páxaru y caballu, nesi orden. L’otru diz el so orden: pita, gochu, cascoxu, páxaru y caballu. Dos taríen bien colocaes, pero tres tovía non. Diríen: cascoxu, paxaru, gochu, pita y caballu. Tres taríen colocaes, pero dos non. Asina hasta aldovinalu.

e) Toca’l dictáu llocu. El maestru diz una fras turulata, diciendo CALDU GORDU en cuentes de la pallabra’l pallabreru. Los neños tienen d’aldovinala y copiala dafechu. La siguiente fras tien de dicila’l neñu qu’acertó l’anterior, y asina hasta’l que maestru diga EL CALDU GORDU TA FERVIO.

f) En gran grupu, tienen de facer la quiniela les pallabres. Primero’l maestru ponles como si fuere partíos de fútbol, enfrentaes al pallabreru estudiáu otru día. Depués pónen-y el 1X2, acordies sepian meyor una, otra o les dos igual. Al día siguiente el maestru saca una quiniela echada a suertes y compruébenla cola d’ellos, si coincide, el maestru tien de facer el xuegu qu’ellos quieran. Hai de procurar facer qu’acierten.

16 mar 2010

EL NEGOCIU LA CONSTRUCCIÓN

Colás taba espiertu, lleendo ún de los llibros que copiaben en Gamusín, cuando Mingo abrió la puerta. Diez díes pasó na capital, los siete caberos falando colos conseyeros que fueren de la so parroquia. Nengún d’ellos diba recular de la so votación. Otru cantar yera fala-yos d’activismu, ehí surdía dalgún que dicía querer una vida tranquilo. Nun yeren munchos, imaxinaron mayor el númberu. Colás ascuchábalu esteláu.


-Tuvo de ser prestoso.

-Nun creyas. Lo interesante ta equí, en Gamusín.

-Nun digas fataes.

-Dientro poco, Gamusín va ser el centru les intrigues.

Colás amirábalu con espresión de dulda. Mingo, por embargu, cuidaba qu'en Bellobello taríen aforoñando efeutivos pa ser a mandar más a Gamusín. Pola so esperiencia, nun diben dexar nengún furacu ensin airar hasta qu’atoparen los llibros que-yos amenazaben la so esistencia. Trabayare pa ellos y nun perdió’l tiempu. Nun dexaben nin un rispiu de yerba pa que se moviere col vientu. La so dictadura tovía nun se finare.

-Yá se m’escaecía. Hai unos homes que vinieron a pidir permisu pa contruyir un hotel de cinco estrelles na playa’l Sablón.

-Ehí tán. Vamos da-yos los permisos, pero enantes d’ello van sufrir como gochos.

-Lo meyor ye dici-yos que non.

-Pa que dempués unvien otra xente per otru llau. Non, home non. A éstos yá los conocemos. Vamos dexa-yos pasu y llevalos onde queramos.



-Pidíeronmos el permisu’l mélicu’l centru salú.

-Con saca-y una riestra semeyes de 1000 bellos, asuntu resueltu.

-Nun ye tan fácil. A lo que se ve, caberamente hai una epidemia pioyos mui correosa.

-Vamos si ye mala suerte. Tien d’haber una epidemia na zona onde nós llantamos l'hotel.

-Amás, la epidemia entamó de la que llegamos.

Pa salir de duldes colaron pal doctor, albidrando que los billetes sedríen a esgaya pa que-yos firmare’l permisu y asina entamar la espedición a la gueta de piedres afayaíces. D’esta mena sedríen a controlar les distintes fasteres de la provincia, xixilando’l mínimu movimientu sospechosu y avisando darréu al cuartel xeneral. Falando de cuartel xeneral, teníen de mercar muebles que fueren pal llabor que teníen de desendolcar: meses pa ordenadores nos que descargar les semeyes, armarios onde esconder informes y unos sillones cómodos pa folixar. Ente charra y charra aportaron al consultoriu. La cosa nun pintaba tan cenciella como pensaren.

-¿Camentaben qu’unos billetucos tán penriba la salú de los mios vecinos? Firmaré en cuantes que nun haiga plaga na zona.

-Podemos colar pa otra provincia a facelo y los sos vecinos quedarán ensin trabayu.

-Señores, equí en Gamusín nun hai paru. La xente necesita poco pa salir alantre.

-Ta bien. ¿Cuándo camienta que sedrá bon día pa volver?

-Dientro una selmana.

En saliendo del consultoriu, Mingo entró pela puerta atrás. Saludó a Gaspar y entrugó-y lo que-y cuntaren. Darréu, hebio una xunta de tola comunidá pa tomar decisiones.

14 mar 2010

DICTÁU GRAMATICAL

(CORDOBELLEANDO 12)


Nota: Tolos trabayos espublizaos hasta agora tán abiertos a que vosotros mos despliquéis les vueses esperiencies y les meyores de los mesmos. Asina como sacar semeyes d’esposiciones, trabayos d’ellos,…)

Hai abondes menes de facer un dictáu. Nestes páxines vamos espublizar delles. La primera ta nun dictáu gramatical. Nun camentéis que vamos enllenar la pizarra de desplicaciones y los chavales van copiar lo que tamos a dicir. Facemos tres llistes de clases de pallabres, por exemplu: nombre, axetivu y verbu. Pa entamar, a cada neñu dáse-y un papel por cada llista, o dos, o tres… y tienen de poner una pallabra en cada una delles que s’adaute a la carauterística gramatical. Agora baráxase cada llista y tienen de sacar una pallabra por cada una. Con eses tres pallabres tienen d’inventar una fras y dictá-yla a los otros. Pue facese de frases sueltes, que tengan sentíu, que traten d’un tema,… Al final fáese un dictau col que van identificase, que-yos va prestar, que repasen gramática ensin querelo y que van trabayar didáuticamente.

L’INVENTOR CIBERNÉTICU

(CORDOBELLEANDO 11)

Nota: Tolos trabayos espublizaos hasta agora tán abiertos a que vosotros mos despliquéis les vueses esperiencies y les meyores de los mesmos. Asina como sacar semeyes d’esposiciones, trabayos d’ellos,…

Un bon día entres na clas y entames a cunta-yos que los inventos ficieron que la vida cambiare abondo dende hai munchos sieglos. Entrúgues-yos qué inventos conocen, los nomes de dalgunos inventores, qué inventos podíen facer angüañu,… Ye un bon momentu pa falar del INVENTOR CIBERNÉTICU. En cada casa van tener ún. Un robot que va ser a face-yos que toles sos necesidaes xeneren inventos. Hai un problemín, esi robot va entruga-yos datos al rodiu la so vida y tiene de contesta-yos o va tornase llocu. Ente toos imaxinen lo que-yos puede preguntar y el profesor cópialu na pizarra. Depués tienen de dibuxar el so robot y facer una biografía del mesmu. Caún presenta al so robot, grabando en videu o magnetófonu les sos intervenciones pa que les xuzguen depués o pa que vean a collacios d’otres clases o años.

Na segunda estaya l’inventor cibernéticu llánzase a trabayar nos sos descubrimientos.

 
-Con semeyes: sacaes por ellos n’internet o que-yos les da’l profesor. Equi vos va una riestra d’elles.

-Con debuxos: ellos faen un diseñu dibuxáu, que pue ser en dellos planos.

-Con maquetes: emplegando coses pa tirar tienen de facer un diseñu.

La cosa pue facese en grupos, pareya o individual, acordies se quiera desendolcar el trabayu. Una vegada fechu’l diseñu, toca desplicar cómo funciona y pa qué sirve. Neto a lo anterior, tienen de salir na clas y esponer el so inventu. Nun hai que cuntar la so grabación de les desplicaciones, asina como un futuru muséu los inventos a preparar nos pasiellos. Ye fundamental facer que l’asturianu enllene d’imaxinación y creatividá tol centru, poro que munchos trabayos tienen de dexase ver en tolos requexos del centru, sirviendo de propaganda pa la llingua y de puxu pa l’asignatura.

Nun hai de desplicar que se va evaluar los trabayos fechos por ellos en clas y con ellos vamos saber el grau de dominiu que los rapazos tienen de la llingua.


7 mar 2010

CORDOBELLEANDO 10

A.- LA ROCA ROXA Y LOS ROMBOS ROTOS:


Güei vamos xugar al rodiu d’una fras. Son abondos los que camienten que’l deprendizaxe d’una llingua (castellán, catalán, inglés,… o l’asturianu) tien de facese con exercicios serios y dándo-y muncho a la gramática. Asina va’l deprendizaxe del llinguax na escuela, la mayoría los neños salen d’ella asemeyao a como entraren. La mio forma ver la enseñanza ye d’otra mena, hai qu’emplegar la llingua en produciones constantes y ensin malpenes teorizar la gramática, que se toca seliquino. Esos aspeutos “serios” déxovoslos a vosotros, dalos más o menos y qué ye lo que se da. Vamos agora coles actividaes que se desendolquen en delles sesiones, acordies afondes más o non.

1.- Vamos emplegar una “nonsense” pa que los neños llean, opinen, creen, dibuxen… Vien darréu: “Los ronquíos d’una roca roxa rodaben pente unos roceanos rombos rotos”. En cuantes la lleísti decatástete de la repetición del soníu “ro”, esi va ser el ritmu. De mano, escríbese na pizarra y los neños tienen de lleela a tou meter y ún tres d’otru. Depués xugamos colos acentos de la fras, camudándolos de sitiu. Pa finar, lleémosla d’atrás p’alantre.

2.- Tovía somos a facer más coses lleendo y amás que-yos preste. Sustituyimos el soníu “ro” por otros: “ta”, “yi”, “vu”, … Tenemos d’escribilo na pizarra y ellos dir lleéndolos. Una vegada finao, sacamos una llista de les pallabres que salieron nueves, de la qu’ellos tienen d’escoyer cuatro y definiles y dibuxales. Por exemplu: “tambos” que son animalinos que salen del agua p’asoleyase les nueches de lluvia. Depués fairíase’l dibuxu. Caún d’ellos tien de presentar les pallabres delantre los sos collacios.

3.- La seleición de cuatro tien de finar nuna. Con esa pallabra tienen d’escribir un microrrellatu y dailo al maestru. En cuantes se baraxa, reparte les hestories a suertes. Caún llee la que-y toca y los otros tienen d’aldovinar de quién ye. El maestru pue meter redaiciones d’otra clas, d’otru nivel, d’otru colexu pa tracamundialos.

4.- Faese una esposición de los trabayos.

B.- QUÉ ASOCEDERÍA SI…

Xuegu fechu col supuestu de Rodari "QUÉ ASOCEDERÍA SI…", siendo les dos primeres casielles adautaes d’otros supuestos fechos por él y puestes ehí n’homenaxe a la so persona. Cola “Gramática de la Fantasía” fexo que la enseñanza de les llingües cambiare la so mentalidá, trabayando la gramática al traviés de la creatividá. Llegué a él gracies a Arsenio Manuel González y un cursín que dio nel CPR de Llanes que fexo de min un maestru dafechu.

Cada vegada que se tire’l dadu, el neñu tien de contestar a la pregunta de la so casiella con imaxinación y entós pue quedase nella, si nun lu fai asina tien de tornar a onde taba. Si cai nuna casiella d’una llocalidá asturiana, depués de contestala, tien de tirar otra vuelta. Gana’l primeru en llegar.

2 mar 2010

QUÉ ENTAMA L’ESPIONAXE

Al salir de la xunta que restaurare’l parllamentu de Cordobello, Ánxel convidó a Mingo y Xuacu a la so antigua casa na capital. Probe y cuasi callendo, recoyía ferramientes pa iguala y da-yos a los sos pas una bona vida. Dientro la llinia los sos ancestros, nun facíen gastos mayores a los que podíen arrecostinar los sos vecinos. Pa ellos, gobernar nun ye sinónimu de riqueza y marafundiu, sinón de sabencia y cordura. Pero a lo que se ve, va tardar en llegar eses dómines.


-Los mui castrones, intenten perpetuar los sos vezos corrompíos de facer política –apuntó Xuacu de la qu’entraba na casa-. Lo más tristayo ye qu’hai xente de nós que se va dexar corronper.

-Hai que trabayar xuntos. Los que votamos a la escontra tenemos de facer una xunta –siguió Ánxel- na que tien de surdir la nueva fuercia que dirixa al nuesu pueblu.

-Van facer una constitución a la so medida –atayólu Xuacu-, de tala miente que nun mos van dexar xubir al poder na vida.

-A lo meyor sí –retrucó-y Mingo-. Nel llibru de llibros recuéyense munches recetes por si les coses veníen mal daes. En Gamusín, amás de copies de los llibros importantes, tamos preparando fueyes pa que la xente conoza’l llibru de llibros.

-Eso va ser pa la dómina los nuesos fíos –aseguró Xuacu.

-Dúldolo. Lleva faciéndose hai sieglu y mediu. Parez que los antiguos yá lo sabíen. Salieron trenes urxentes pa les vueses provincies con copies de los llibros más importantes y fueyes a esgaya del llibru de llibros.

-Tas en too Mingo. Pero pasa-y pa la cocina, mio ma preparó una llacuada pa la ocasión. Tenemos de falar de ónde tara’l llugar per onde entraron los foriatos. Si lo atopamos, la so rendición nun se va dexar esperar.

-Acordies al llibru de llibros, los foriatos llegaron pente los picos d’Ariñán y de la so provincia vecina de Fartos. Convién que xixilemos la zona p’atopar el llugar.

-De xuru que ye en Fartos onde ta. Nun diben ser tan fatos como pa dexame la provincia onde ta la entrada.

-Escuende les coses onde ten más cerca l’enemigu, esi ye’l títulu d’un capítulu’l llibru.

-Coméi. Mio ma va enfurruñase si queda too esto equí.



Nel otru llau de la ciudá, nun palacete enllenu d’estatues, muebles y xarrones, sentaos en dos sofás desconxuntaos cola mesina centru, la biblioteca y el llombu los llibros, Amalio y el Blogpredicador celebraben la so victoria sobre los cafiantes que se llamen unos a otros llariegos. Albidraben que los sos celebros llucíen la so probitú más abondosa, qu’amosaben la so simpleza pa ser a trabayar en política, entraben nes llendes qu’ellos esperaben cuando-yos dieren aquelles provincies nel repartu del botín de guerra. Dieren de mano dalguna batalla, pero consiguieron llevalos onde ellos queríen. Convién tener una oposición pa depués fundila nes urnes, eso sí, una oposición pequeñuca, ensin fondures. Depués s’ocuparíen de la xente que s’esfarrapó na primer vuelta, van ser bonos aliaos hasta finar colos más montunos. Lo que nun asperaben fue lo de los llibros, tendríen de tener curiáu y descubrir ónde taben.

-Amalio, nun t’esmolezas. El M3M ta con toles sos fuerces. Llogré que nun participaren de la guerra y tenémoslos en plena forma.

-Nun me prestó enxamás el serviciu secretu y nun voi camudar agora. Sé que ye necesario, pero xixilándolos y nun cuntándo-yos tolo qu’asocede.

-¿Tengo cara fatu? Abúltame que non.

-Ta bien. Hai qu’unvialos a Gamusín p’alcontrar esos llibros.

-Paezme que va ser la nueva zona turística. Vamos tener de montar un hotel dende’l que movese p’atopar esa biblioteca.