GLOSARIU DE CORDOBELLO






*Alma Eterna.- Dios al qu’adoraben los foriatos y cuyo llibro sagráu ye’l Llibru de la Verdá que s’atopaba nel santuariu de Plistói.

* Almes Maestres.- Yeren la ponte ente los Foriatos y L’Alma Eterna. Nun se casaben, nin facíen dengún ritu, veníen a la tierra como almes de los muertos más consideraos a facilitar el camín a los vivos. Los sos fíos, que teníen coles criaes de les muyeres de les Grandes Families (yá qu’éstes taben llibres d’ello), sedríen les futures Almes Maestres.

*Aristoclásica.- Seudociencia foriata que trataba del camín de meyoranza na raza superior de les Grandes Families. 
*Atar dos Rames del Árbol.- Ye la forma que tienen los llariegos de pidir el divorciu. Pa facelu efeutivu tienen de desatar les dos rames del árbol xuntos.

*Borrina.- Nun escaezamos qu’una isllalla tien nel centru d’ella la mar y a los llaos los picos que finen nuna borrina que los llariegos enxamás nun trespasaron y a la que-y tienen dello respetu
* Carbayu del Amor.- El casoriu ente llariegos faese nun llugar mui especial de la población. Ye nuna plazoletina onde hai llantáu un carbayu. Ellí va sola la pareya y, cauna d'elles coles sos pallabres, xúrense amor. Entós van vivir xuntos y entamen la vida en pareya.
* Cases embalsamaes.- Les cases llariegues pertenecíen siempre a la mesma familia y cuando ésta dexaba d’esistir elles teníen de ser embalsamaes. Dábase-yos los llíquidos afayadizos a muries y muebles pa que fueren a guardar les histories, tradiciones y costumes de los sos ancestros. Poníase-yos les teles del suañu del recuerdu col que finaben el procesu y quedaben preparaes pa ésti otru mundiu.

*Conceyos.- División alministrativa de Cordobello que taba enraigonada cola so división cultural si quitamos el conceyu de Talagate (Eclipse nel cordobellés antiguu), inventu de los foriatos pa facer la so zona de vacaciones. Esta invención garró tarrén de los conceyos de Tala y Gate (Lluna y Sol na llingua los vieyos), quitándo-yos la mar y dexándo-yos les tierres más probes. Angüañu ficieron d’elles auténtiques maravíes.

* Conseyeru.- Persona que dirixía el Conceyu o lo que los foriatos llamen provincia. Na dómina foriata yera una figura decorativa que malpenes facía nada. Na llariega amosaba'l deseyu del pueblu y debíase a él.


*Cordobello.- Ye una isllalla, un piazu tarrén cola mar nel centru d’él y nel so esterior unos picos pergrandes que finen nuna borrina qu’enxamás fo trespasada por dengún home la isllalla. Ver mapa de la isllalla espublizáu na primer entrega de Coses de Cordobello.
* Embalsamador de Cases: Oficiu que se da en Cordobello consistente en facer que les cases pasen a meyor vida. Les cases llariegues pertenecíen siempre a la mesma familia y cuando ésta dexaba d’esistir elles teníen de ser embalsamaes. Dábase-yos los llíquidos afayadizos a muries y muebles pa que fueren a guardar les histories, tradiciones y costumes de los sos ancestros. Poníase-yos les teles del suañu del recuerdu col que finaben el procesu y quedaben preparaes pa ésti otru mundiu.

*Entamu de la memoria.- La historia en Cordobello sepártase en Desmemoria y Memoria, lo que ye la prehistoria y la historia na Tierra.

*Fiesta del Agospiáu.-  Yera la celebración de remembranza de la llegada de los foriatos al llugar y nun permitíen l’asistencia de nengún llariegu, al nun ser el serviciu. Entamaba la fiesta cola orquesta de cámara tocando la “Sinfonía del Nuevu Mundiu” cola partitura orixinal trayida por un de los foriatos.

 


*Foriatos.- Invasores de fuera la isllalla, que s'apoderaron d'ella nun suspiru y que camudaron dafechu les sos costumes y tradiciones. Naide nun sabe cómo llegaron pero toos saben cómo quedaron.

*Formes de gobiernu.- Na vida política de Cordobello hai dos formes de gobiernu: la familiarquía y la opodemocracia. Estrémase en que na opodemocracia escuéyense los Conseyeros ente dos seleicionaos poles grandes families, mentanto que na familiarquía son les families les qu’escueyen a los Conseyeros direutamente. El Presidente nómase neto nes dos formes de gobiernu: a deu.

* Gobiernu.-  La isllalla de Cordobello sepártase en 32 provincies, gobernaes per 32 Conseyeros, que xuntos faen el gobiernu y el parllamentu del país. A esos 32 homes, porque tienen de ser masculinos, tienen d'añader al Presidente, escoyíu ente les families de más postín.

*Grandes Families.- Los qu’entamaron el camín que los truxo a Cordobello. Yeren yá grandes na relixón del Alma Eterna, escoyíos pol Alma pa dirixir al so rebañu de creyentes enantes d’atopar la isllalla, pero depués amosaron un gran serviciu al Alma Eterna pagáu cola aristocracia de por vida.
*Isllalla.- La isllalla tien forma circular cola mar nel centru y rodiada per montes y d'una borrina que l'atapa de cualquier mirada esterior.
*LA FAMILIA LLOGRADORES.- Familia que tenía'l vezu de tar cuasi siempre durmiendo: si quitamos el tiempu de comer y reproducise. Peles sos cabeces pasaben los suaños que facíen realidá los deseos de los otros llariegos. Nun facía falta pidilos per catálogu, nin pidilos a dalgún ser máxicu,…, nin siquiera dir rezar a una ilesia, con que pasaren pel maxín de la persona yera a esgaya pa que se tresmitiere a los sos suaños de la familia. Cuando aportaron los foriatos a la isllalla, alcontráronse de sopetón cola familia Llogradora y nun fueron almitir que dalgún llariegu viviere en Cordobello ensin trabayar. Espertaron a los sos miembros y unviáronlos a la fábrica más cercana pa que fueren xente de provecho.

*Llariegos.- Autóctonos de Cordobello, la isllalla onde se desarrollen les nueses histories. La vida cambió-yos muncho cola llegada de los foriatos.


*Llegada de los foriatos.- Nesti tarrén espárdese una dulda pergrande de cómo llegaron y per ónde. Namái se conoz la so xubida al poder meteórica debida a que metieron armes na isllalla, onde nun se conocíen.

* Nueche de les Cases Embalsamaes.- Celebración que s'entamaba tolos años el 8 de setiembre asomeyada al nuesu 1 de payares pero nesti casu les muertes yeren les cases. Les cases llariegues pertenecíen siempre a la mesma familia y cuando ésta dexaba d’esistir elles teníen de ser embalsamaes. Dábase-yos los llíquidos afayadizos a muries y muebles pa que fueren a guardar les histories, tradiciones y costumes de los sos ancestros. Poníase-yos les teles del suañu del recuerdu col que finaben el procesu y quedaben preparaes pa ésti otru mundiu.  

* Poldo de Banzo.- Poeta llariego datáu nes dómines del Entamu la Memoria que destacó pola musicalidá de los sos poemes y el carauter pastoril de les sos temátiques. Un llocu destruyó'l so rastru en toles actividaes foriates pero escaecióse que los llariegos teníen les sos biblioteques, llibros de testu,... propios. El trabayu de desaniciu de la so obra fo de baldre y agora ye más heroica la so poesía.

* Provincia.- La isllalla de Cordobello dividíase en 32 provincies con lo Conseyeru al frente. Cada provincia yera autónoma y desendolcaba la so política, anque depués formare parte d'una globalidá política. Na organización de los llariegos llámenla Conceyu en cuentes de Provincia. Na realidá yera que la provincia nun tenía dengún pesu, siendo centralismu dalgo xeneral.

*Resistencia.- Asina se-y llamó a la xente llariega qu’entamó a sublevase escontra los foriatos.

*Viaxe Cabero.- L'ultimu añu que pasaben xuntos l'Alma Maestra y el so discípulu facíen un viaxe per tola isllalla. Nesi viaxe ye onde se facía'l deprendizaxe direutu de munches coses que deprendieren na teoría. 
. 

No hay comentarios: