25 nov 2010

LLUZ

Lluz,

cerca de ti

l’escaecimientu de la vida

arreciende a trabayu.

Baxes escosa d’esperanza

les escaleres en paru,

dirixes los tos pasos

p’hacia’l sopliu d’abandonu

y llánceste al agua

enlleno de llantu.

Lluz,

cerca de ti

la tierra ascucha

un canciu de silenciu.




Toi escribiendo una novelina que ta viéndose retrasada polos blogs y que me fae dexalos por tres meses. Seguiré espublizando de xemes en cuando en El Rapazu de Venus, sacando nesti blog la parte didautica más tarde. Hasta'l mes de marzu.

22 nov 2010

LLENZU ESCRITU

RENOMBRANZA




Llegó callandino. Estendió la so toballa. Dexó la so bolsa nel sable. Amiró inalterable a la mar y alendó fondo. Caminó pensatible p’hacia l’agua y metióse. Al salir, un fotógrafu tiró-y unes semeyes. Toos esamináronla. Tumbóse na so toballa y dexóse afalagar pol sol.

Al día siguiente apaecía nel periódicu llocal. Nun yera famosa. Nin malpenes conocida. Nun se nomaba’l so estáu mental. Malpenes se dicía que se bañare vistida. Namái la fotografiaren pol so calzáu. Non pola marca, nin por nun ser acuáticos, o por nun tener muncho tacón. Lo único importante pal fotógrafu yera lo elegante del sable coles güelgues piquiñines y fondes: lo único que la xente de la playa remembraba d’ella al día siguiente.

Ilustración: Miguel Jiménez
 

18 nov 2010

FREDO


Pa principiar la tema falamos de Toli y los montruos. ¿Qué camentaben enantes de conocelu? ¿Teníen mieu de los monstruos? ¿Qué-yos paecen agora? ¿Conocen a dalgún más? Equí ye onde te toca falar de Fredo. Van averase a un nuevu monstruu que de xuru desendolca un papel que nun imaxines. Enantes de cuntar la historia convién ver les ilustraciones y que faigan les sos aldovinaciones. Amás, nun taría mal que se compararen les ilustraciones de Toli y Fredo. Agora ye la hora de dir lleéndo-yos pasiquín a pasu les coses d’esti monstruu. En lleéndo-yosla delles veces pues intentar meter dalgunes coses de Toli y ellos decatase d’elles.


Llectura

-Llegó’l momentu de que faigan la so llectura silenciosa.

-El xuegu que vien darréu pue facese en pareya, tríu o grupu. Caún va a la so velocidá llectora hasta que’l maestru mánda-yos parar. Agora tóca-y dicir a caún la pallabra na que diba y a los otros buscala. Continúen la llectura hasta que’l maestru los para otra vegada, y otra, y otra… En cuentes de dicir la pallabra, los neños tienen de buscala nel diccionariu y dicir la so definición, los otros tienen de descubrir qué pallabra ye (grau difícil).

-Agora vamos lleer como los árabes de la mandrecha a la manzorga. El maestru diz la pallabra TORNA y los rapazos tienen de lleer de manzorga a mandrecha. Y asina hasta que-y pete.

-Tienen de lleer cronometraos 30 segundos neto a les llectures anteriores.



Gramática

1.- Vamos escomencipiar con un xuegu de contraiciones. Escuéyese una: CON+ARTÍCULU (por exemplu). Los neños (en gran grupu o en grupu que non seya de cinco) van dicir les contraiciones de la siguiente mena:

-El primeru entama con: Col monstruu.

-El segundu: Col monstruu, cola saya.

-El terceru: Col monstruu, cola saya, colos xelaos.

-Siguen los otros hasta qu’un falle y toque entamar de nueves. Hai de remembrar que tamién se diz el neutru colo, de nun dicilo sedría fallo.

2.- 1, 2, 3 APOSTROFA OTRA VEZ. Ellos saquen una tarxeta col apóstrofu que tienen de facer (sepártase en grupos de 6 la clas y nellos concúrsase en pareyes). Tienen de dicir durante un minutu pallabres qu’apostrofen cola que diz la tarxeta. Cuando se tracamundien o repitan pallabra fínase. Cúntense les pallabres que se dixeron y gana la pareya que dixo más.



Trabayando la tema

En grupos preparen los sos armarios migratorios. Fáenlos en papel continuu y píntenlos con pintures de deos. Agora llega la parte en qu’hai qu’enllenalos de paisaxes estremaos ya inventar el llugar onde tán, describiendo’l llugar. Enantes d’escribir nel armariu tien de correxir el maestru. Cada grupu presenta a los otros l’armariu y los llugares que tán dientro d’él. Espónense na entrada, nos pasiellu,…, el casu ye que sepian los otros que se da asturianu. Nun sé si dicir que m’unviéis al blog de El Rapazu de Venus los vuesos trabayos, total nun lo facéis. Pues diben quedar mui guapos.

15 nov 2010

CAI LLUEVE NÚMBERU NUEVE

LA XUNTA’L PORTAL



Na cai Llueve númberu nueve tán poniendo colgadielles per tol portal. De mano truxeron unos globinos pa qu’orniaren un migayu. Entós aprovechó la del octavu C pa sacar tola puxarra que-y truxere’l so home pa fin d'añu. La del venti A, que siempres anda a la tema cola del octavu C, mercó nun chinu toles barres d’inciensu que teníen, hasta la que teníen prendida pa que nun goliere a la ufierta d’hai 3 años. La del quince B picóse y punxo vírxenes y santos per tolos requexos que quedaben llibres. La del dolce C dixo que nun se podía orniar el portal y dexar les escaleres ensin nada. Mandó buscar al neñu del portal d’enfrente que ta faciendo un cursu de decoración d’esteriores pa que buscare dalgo afayadizu pa les escaleres. Depués de munchu pensar punxo una alfombra roxa y cartelos del festival de cine que sobraren. Nin que dicir tien que la del dolce C pasó-y la cuenta a la comunidá. La presidenta de la comunidá fizo una xunta na que dixo:

-¿Qué coño pasa que ta esto peor que los adornos de navidá del ayuntamientu?

-Como se nota que yes nueva nel portal –respondió-y la del quince B-. ¡Bonoloto cumple 50 años y hai de celebralo!

-¿Bonoloto?

Nun hebio pregunta qu’ofendiere más a la xente. Armóse la de coyer. Entamaron a glayar, a pegase la del octavu C cola del venti A, a montase una timba pa la pelea, a llegar della xente vendiendo bebíes y comíes a fartar, acercáronse les vecines más aquello de los portales más averaos, nun faltó’l cura pa pasar el cepiellu y el dueñu la sala xuegos d’enfrente col chocolate del moru. Esa nun fo gorda, a la una yá taben toos na cama. Bueno, toos non, la presidenta taba n’urxencies asperando que-y tocare entrar. La vecina del dieciséis C, que yera enfermera, salió de cortines y atendióla. Ella desplico-y quién yera Bonoloto. Yera l’ascensor. Llamábeslu pa que te baxare o xubiere y siempres te dexaba onde-y petaba por aproximación.

11 nov 2010

EL FARU D’IYÁN (1)

Vamos ver un videu de la única seria de dibuxos animaos n’asturianu de tola televisión. Cada sesión de dibuxos cunta con dos episodios. Equí va trabayase namái’l primeru, poro que son los 10 minutos primeros los que vamos ver. De mano vamos visionalu en cuatro partes:


-Tira d’entrada.

-Iyán y los sos collacios.

-Cuentu de los barcos.

-Iyán y los sos collacios finando’l capítulu.

De la que lu miren, vamos dir faciendo que respuendan entrugues cencielles que-yos faiga atender a tolo que pasa. Van viéndolu nos cuatro cachos que puen repetise cuantes vegaes se xulguen necesaries, siendo tres les que se prefixen con normalidá.



TIRA D’ENTRADA

-¿Qué animales te paez que son los protagonistes?

Pulpu, amasueles, cangrexu y gaviluetes.

-¿Cómo s’entitula’l capítulu?

Qué se sienta la música.

IYÁN Y LOS SOS COLLACIOS

-¿Qué instrumentos trai la tía Aurina?

Una riestra d’oxetos que nun tienen nada que ver cola música.

-¿A quién nomen direutor de la bandina?

A Antón el cangrexu.

-¿Quién cunta la hestoria?

A Candela, la llámpara qu’alluma’l faru.

CUENTOS DE LOS BARCOS

-¿Cómo se llama’l puertu?

Chalana Feliz.

-¿Qué tipu barcu tienen de dirixir coles lluces?

Tresatlánticu.

-¿Cómo se nomen los barcos qu’apaecen nel capítulu?

Navia (tresatlánticu), Hércules, Llucía, Muselín, Migayina, Males Pulgues, Chisterona y Guerreru. (Hai ún que nun dicen el so nome)

IYÁN Y LOS SOS COLLACIOS FINANDO’L CAPÍTULU

-¿Qué oxetos usen d’instrumentos?

Peñes, vasos, cuyar, tabla llavar y pa facer la guitarra un cubu agua y una fregona.

DEPUÉS DE MIRAR EL VIDEU

Va entamase na clas d’asturianu los conciertos de dellos grupos, pa ello tien d’haber interdisciplinariedá cola de música. Nós fairemos tolo que respeuta a cartelos, entraes y los conciertos. Na otra clas tienen de preparar cancios de Xentiquina con instrumentos fechos por ellos (esi aspeutu trabayaráse en música, asina que nun figura equí).

CARTELOS

Cúntase-yos la idega de facer los conciertos y el trabayu qu’hai que facer enantes. Hai que tener los grupos formaos ente la clas d’asturianu y la de música, faciendo asina un amestáu ente xente bono y non tan bono en dambes clases. Lo primero ye escoyer un nome pa cada grupu. Cada miembru presenta unu y desplica que rellación tien col grupu. Una vegada falao tola xente del grupu, vótase per tola clas y escuéyese’l más afayadizu.

Agora tienen de llograr un eslogan pal grupu y facer los cartelos. L’eslogan tien de facese nun torbolín d’idegues en cada grupu tres lo que cada miembru tien de diseñar un cartelu.

ENTRAES

Cada grupu tien de preparar les sos entraes en cantidá suficiente pal restu la clas. Nelles, amás del nome, figurará tamién l’eslogan. Agora vien la venta. De mano prepárase'l diálogu:

A.-¿Qué deseya?

B.-Apúrrame una entrada pal conciertu de _______________.

A.-Equí tien.

B.-Munches gracies. ¿Cuánto ye?

A.-__________ euros.

B.-Ta bien.

A.-Correutu.

B.-Ta llueu.

A.-Ta llueu.

El maestru entamará l’ensayu del diálogu fras por fras. Diráles canciando y los neños tienen de repetiles. Tres d’ello, xuntaránse por pareyes y escenificaránlu nos dos papelos caún. Depués entamaráse la venta entraes de cada grupu, ún por ún, ensin mecelos. Los neños del grupu sedrán los vendeores y el restu los conpraores.

ACTUACIÓN

Cada grupu tien de presentase y dicir dalgo caún. Depués tienen de tocar el so canciu cola puesta n’escena qu’ellos faigan trabayao. Pue facese más enguedeyáu, acordies a caún, pero l’actividá ye asina de cenciella y prestosa y van trabayar dafechu cola nuesa llingua ensin llibros al usu y clases maxistrales.

8 nov 2010

COSES DE CORDOBELLO

TALAGATE




Na isllalla de Cordobello la vida sepártase en enantes y depués de la llegada de los foriatos. Eso refléxase tamién na creación d’un conceyu en dalguna tierra perteneciente a los otros dos. De mano taben Tala y Gate (Lluna y Sol na llingua los vieyos). Teníen costa y montañes, llibertá y cultura, amor y deseyu ensin atadures.

En llegando ellos, quitáron-yos la mar a los dos conceyos y creyaron Talagate (Eclipse nel idioma los vieyos), dexándo-yos a los otros namái les montañes. Nel nuevu Conceyu vivíen sólo los foriatos, nun pudiendo los llariegos más que dir trabayar.

Col tiempu, Talagate, tresformóse nel paraísu turísticu de los foriatos. Instalóse una doble moral qu’enxamas nun esistiere. Per una parte taba la moralina de la ilesia trayida de fuera de Cordobello y per otra la folixa nocherniega cobrada tamién polos mesmos. Namái s’almitía la pareya de home y muyer, anque na nueche se prauticare de too.

Agora, cuando se finare col gobiernu de los foriatos, siguía’l conceyu de Talagate. Tamién el velenu de la ilesia, qu’anque supuestamente quitada del so poder, siguía doblegando a la xente y mintiendo como’l primer día.

Nesti panorama apaeció un home: Sidro, el creyente na alma llibre. Cada vegada qu’intentaben primir a la xente nes creyencies foriates, Sidro entamaba una fiesta de vida, enllena de fe na lliberta, la cultura y el amor. Na ilesia namái entraben les beates y los moxigatos. El Conceyu d’Obispos apautóse dies y nueches a lo llargo de 23. Nel día falaben maldaes y na nueche amorosaben acordies a los sos gustos. Nel día 24 llamaron a Galton, el guerreru más valiente nel campu de batalla y más cobarde escoyendo señor. Mandáron-y acabar cola vida de Sidro y asina lo fizo. En preba d’ello trúxo-yos la so cabeza. Los Obispos, toos gayoleros, entamaron a intimidar al pueblu. Cuando taben nello, un cartelu anunciaba la fiesta de vida y firmábalu Sidro. Los Obispos llamaron de nueves a Galton y piediéron-y que finare con aquello. Diba’l guerreru salir escontra’l pueblu cuando del so cuerpu cayó la cabeza y de toles ilesies de Cordobello salió fueu. D’entós p’aca, los obispos, cures, monxes y monxos tuvieron de trabayar pa ser quien a vivir, talamente como dixere Sidro: Ganarás el pan col sudu del to cuerpu.

4 nov 2010

CAI LLUEVE, NÚMBERU NUEVE

Seliquín, vamos dir conociendo coses d'esti vecindariu tan particular. Nun tien de dicise que cualaquier parecíu cola realidá ye pura casualidá.

LA LLUZ



La lluz de les escaleres matábase. Un vecín zarapico con un escalón. La so muyer vase escontra él y esnidien camín del descansu. Los sos glayíos son inoraos pol restu’l vecindariu, como yá yera vezu nellos. Ella llogra averase a una puerta y mediu llevantase hasta’l timbre. Un ruíu dexa a les clares que taben mirando pela furaca. Sonó la voz disimulada nuna cercanía llonxana.

-¿Quién ye? –los glayíos del par de víctimes mécense col abrir de la puerta-. Nun quiero nada. Váiganse –l’home dexa los glayíos pa llanzar berríos-. Váiganse o llamo a la policía.

La muyer y l’home entamaron a dase más a les voces hasta la llegada de la policía. Entós, na cai Llueve númberu nueve decatáronse que yera de fatos aforrar cola lluz de les escaleres ensin enantes facer un seguru mélicu. Coses de la vida.

1 nov 2010

SENSACIONES

Corruptu d’amor

aspero polencu

la to comisión.

Suañu’l to cuerpu

estráu de duldes

enriba del de mio,

investigando

les cuentes del mio corazón.

Ataco

          y tu abellúgueste.

Busco

          y tu aseles.

Agora,

           reina’l baruyu

                                nel nuesu amor.