29 jun 2010

LOS AGOSPIAOS


El palacete de les afueres de Bellobello enllenóse de convidaos a la fiesta del Agospiáu. Amalio dába-yos la bienvenida col so movimientu solemne de cabeza. Enantes como Xefe de Gabinete y agora como Presidente de la isllalla, había más de diez años que nun se perdía una. Yera la celebración de remembranza de la llegada de los foriatos al llugar y nun permitíen l’asistencia de nengún llariego, al nun ser el serviciu. La orquesta de cámara tocaba la “Sinfonía del Nuevu Mundiu” cola partitura orixinal trayida por un de los foriatos. El xampán sirvíase en copes d’oru. 648 camareros nun aparaben de xubir y baxar, entrar y salir, amirar pal suelu y callar. Nun abultaba qu’hubiere una guerra qu’acabare coles diferencies sociales ente llariegos y foriatos. Charraben, reíen, canciaben, vociaben, talamente como nes bones dómines. Amalio faló callandino con un criáu. Salió per una puerta serviciu y dio coles pates en culu hasta la sala onde echaba’l pigazu.


-¿Qué ye tan perimportante pa interrumpime la fiesta l’Agospiáu?

-Señor, el Conseyeru de Talagate ta en Gamusín nun viaxe secretu.

-Abultábame raro qu’ési se perdiere una fiesta l’Agospiáu.

-Paez ser que’l Conseyeru ta amagostando col de Gamusín dalgo pa derribalu a usté y al blogpredicador.

-Vaya, vaya. La provincia más rica de Cordobello cola provincia más xabaz. Hai dalgo que me fai duldar de les sos bones intenciones. Manda a dos divisiones del exércitu pa Talagate, cuando torne’l so Conseyeru va recibir una sorpresuca.

Amalio salió de tas en tas, cavilgando idegues pa frayar dafechu a los insurxentes. Nel camín, una criada coyó-y la mano y atráxolo a un cuartu enllenu cames. Amalio nun cavilgó más. Bebió, rió y …

24 jun 2010

QUÉ ASOCEDERÍA SI SE DESANICIARE LA MAR

EL MARTES QUE VIEN TARÁ DE NUEVES CON VOS LA BLOGNOVELA DE CORDOBELLO.


A los rapazos hai qu'espolleta-yos la imaxinación pa que d’esta miente seyan a escribir ensin mieu. Dende bien neños, tenemos de trabayar con ellos sacando coses fantástiques de les sos cabeces. Cuando son piquiñinos, la fras col dibuxu lléga-yos, acordies van creciendo, los sos trabayos tamién. Rodari indicónos el camín y nosotros tenemos de desendolcalo. l'afamáu “qué asocedería si…” llévanos a mundios infinitos que de xuru ellos van ser poblar de seres sorprendentes que mos van allucinar.


Propóngovos QUÉ ASOCEDERÍA SI SE DESANICIARE LA MAR. De mano, un torbellín d’idegues pue alleganos a rempuestes interesantes. Fras y dibuxu ye’l primer camín. Ellos escueyen les idegues que más-yos pete y facemos una esposición na entrada la clas. Dalgunes rempuestes pueden ser:

Nel branu tomaríemos el sol en baños turcos.

Los ríos xubiríen al cielu y desembocaríen na lluna.

Fairíense foles de flores qu’escacharíen escontra les muries los praos.

Colos pequeños pararíemos ehí, pero colos medianos y grandonos pue facese una escolleta de la fras más… (según-yos digamos d’entamu: más vieya, más escura, más alloriante, más glamurosa,…). Una vegada sepamos cuála, en grupos, pareyes o individualmente, nel formatu más allegáu a la edá o nivel d’ellos, escríbese una hestoria prestosa que se pue desendolcar en comics o facer ilustraciones. Cada grupu espondrá les de so nun espaciu na entrada y entre toos escoyeráse les más afayaíces. Esta actividá pue facese por cursos, ciclos o colexu.

Tamién se pue facer un diccionariu de pallabres de les redaciones, dándo-yos significaos imaxinarios, con fiches que puen dir xuntándose a otres que se faigan a otros qué asocedería si… que se fueren desendolcando nel colexu.

20 jun 2010

19 jun 2010

QUEDEN NAMÁI QUE DOS DÍES

Gracies a Norberto, que tuvo la paciencia de lleer los microrrellatos y facer les veces del editor. Aconseyóme y animóme a dar esti pasu. Tamién a los otros 5 que lleeron los microrrellatos enantes de correxir: Lupe, Miguel, Cristina, Fermín y Robert. Pa ellos, les mios sinceres gracies.

LA TAPA L’AGUA



Salió de la so casa a pol pan. Paecía que diba xugando. Cada vegada que s’atopaba con una tapa del agua, la neña blincaba a la pata coxa. Cualesquier que la viere, diría que yeren coses de neñes. Sicasí, ella sabía va tiempu que lu tenía de facer si nun quería que la so ma morriere. Diba concentrada. Dando saltiquinos una vuelta y otra. Nuna d’eses, vio qu’otra neña facía lo mesmo qu’ella. Dambes corrieron pa la tapa siguiente. Chocaron y cayeron al suelu. Les dos lloraron ensin xacíu. Una paisanina que diba pellí diz-yos:

-Nun ye nada, fíes. Nun vos ficisteis dañu nenguna de les dos.

Lo que nun pescanció la vieya yera que les dos taben de llutu.

18 jun 2010

3 DÍES PA QUE TEN TOLOS MICRORRELLATOS ESPUBLIZAOS

HAI YA TIEMPU QUE CUNTAMOS CON XENTE TRABAYANDO PELOS BLOGS NA NUESA LLINGUA, PA ELLOS, PA TOOS ELLOS, VAN ESTOS MICRORRELLATOS. ASPERO QU'ATOPÉIS NELLOS TANTO AMOR COMO VOS ECHAIS PA LA LLINGUA ASTURIANA NOS VUESOAS BLOGS. SIÉNTOME ARGUYOSU DE PODER COMPARTIR ESPACIU CON VÓS.

RÉQUIEM PEL AMOR



Nun aparaba de llorar. Siempres tuviere al so llau y agora díbase pali que pali, en silenciu. Aquella xente mirábenla raro y dicíen aquello de: “Acompáñote nel sentimientu” como si fueren quien a averase un rispiu al so dolor. Cuasi toos presentárense ellí polo guapo que quedaba, ensin malpenes tener conocencia del muertu. Abultaba una folixa de xente fino más qu’un funeral por un fináu.

¡Qué intres más gayasperos pasaren xuntos! ¡Qué amor más llimpiu y xenuín vivieren los dos a la par! Naide nun yera a decatáse d’esta realidá.

¿Cómo diba ser quien a siguir viva ensin él? ¿Cómo llevantase toles mañanes ensin recibir el so allegre saludu? ¿En qué echaría’l tiempu si yá nun tenía que prepara-y la so comida, nin face-y la so cama, nin pasiar toles mañanes o tardes?

Aquella nueche suañó que lu tenía al so llau, cola so dulce compañía, cola so gociosa vida en común. Onde realmente lo diba echar en falta yera na cama, col so ciñu aposentáu. Fue toa una vida xuntos, los dos a la par, colos sos lladríos y llámbides. Siempres sedría a remembrase d’él, naide nun la quixo asina, nin los sos fíos, nin el so exmaríu fueron a sentir por ella tanto.

17 jun 2010

EN 4 DÍES VA TAR "ORBAYU SECO" DE BALDRE EQUÍ

Decidí espublizar el llibru nel blog porque ye una mena nueva de que los llibros lleguen a los llectores.

QUERÍU AMIGU



Queríu amigu:

Diríxome a ti col mayor de los ciños. Van yá munchu tiempu que nun te veo, sicasí paezme como si tuvieres al mio llau. Nun hai día que nun trescurra ensin que piense un migayín en ti. La vida equí abúltaseme un rispiu murnia. Podíen organizar les coses d’otra forma meyor. Anque nun me quexo, nun vaiga ser que tiren pa peor.

Saludos de tolos rapazos, que nun t’escaecen, n’especial Xicu. Atópase cuasi tol tiempu lloramiquiando y nun hai quien seya a facelu entretenese nin un segundu. La to marcha dexólu estrozáu. Alcuérdase de ti más de la cuenta. Nun hai dulda qu’unes lletres tuyes sedrán allegralu.

Lo que supón dalgo nuevo pa ti ye la carpintería. Ellí pasamos muncho del nuesu tiempu, deprendiendo abondo y matando les hores. Apuntámonos toos, d’esta mena somos arrecostinar cola monotonía. Nestos momentos toi faciendo un almariu tou orniáu que m’enllena les mañanes.

Esti mes nun salimos muncho al patiu porque llueve enforma. Asina que tamos el restu del tiempu echando les cartes. De xuru que remembres les trampes de Pachu. Nun hai partida na que mos dexe ablucaos con dalgo nuevo. ¡Qué-y vas facer, o lo dexes dir o acabes con él!

Bueno, Xandro, escribiréte de nueves la selmana que vien. Equí taremos toos xuntos na cárcele. Aspero que nun te garren. Ta llueín y esfruta de la llibertá.

16 jun 2010

5, sólu 5 díes

Prestaríame que si tuvieres dalgo qu'espublizar supieres qu'ésti ye'l to blog.

PASU ENTE PASU




Xana, cansa del obligáu trabayu, xuntóse a les sos compañeres d’empresa en Ca Beleño, que quedaba averáu a la oficina. Aquella tarde nun foi mui normal, tomaron una cerveza tres otra hasta facese de nueche. La situación pagaba la pena, la charra yera del rapaz que conociere una d’elles el sábadu pasáu. Tenía un culín tan alloriante que toes nun vien la hora de veilu. Riseríu pequí, bebida pellá, cuasi s’enfilen. Pocoñín a poco-yos tocó pagar y dise pa casa. Na puerta’l café tuvieren paraes un migayín más. Al final, como siempres, namái que quedaben Xana y la lligona nes parolaes caberes.

Tres espidise, escomencipió a andar pa la so casa. Yera una nueche d’éses nes que s’esfruta caminando pal llar. Xana notó como si dalguién la siguiere. Nun aparó nin un rispiu. Dos rapazos emprimaron a escorrela. Ella allargó’l pasu. Escalzóse pa dir más cómoda. Aquel par d’homes paecíen llamala. La parada taxis atopábase cerca. Aportó ellí llorando. Xubió apriesa y dixo les señes. Una vegada qu’ella-y cuntare al taxista lo que-y pasaba, él coló a toa mecha. Ellos garraron otru taxi. Xana tremaba como una rapacina. El so conductor pasó un semáforu en roxu. Sicasí, l'otru coche echó la galga. Xana alendó fondo y emprimó a rise. La so casa nun quedaba mui lloñe. Al llegar, dio-y una bona propina al conductor y baxóse.

Buscó pel bolsu les llaves. Nun yera a dar con elles. Entós llegó l’otru taxi y ella entamó a picar tolos timbres. Ún de los homes díxo-y:

-Nun faiga eso. Namás queremos que da-y les sos llaves. Cayéron-y na cai, al par del café.

15 jun 2010

6 DÍES PA LLEER "OBAYU SECO"

Prestóme muncho facer estos microrrellatos porque depués del derrame celebral sirviéronme pa enllazame de nueves a la vida.

L’HONOR D’UN YAKUZA



Nun quería fracasar. Lluche por facer les coses bien. Sicasí, nun cumplí los sos mandaos. Aquella xente nun diba pagame los emprestos. Agora tocábame la conderga lóxica al nun facer el trabayu. Alcordaron anavayame un deín, talamente como dicten les nueses normes.

-Esperái, esperái…, que se me desapegó la calcomanía –glayé de la que los otros paecíen querer siguir col xuegu.

14 jun 2010

QUEDEN 7 DÍES PA LA ESPUBLIZACIÓN DE "ORBAYU SECO"

SI DALGUIÉN M'ENTRUGA POL MICRORRELLATU QUE MÁS ME PRESTA, LA MIO REMPUESTA VA SER CENCIELLA: TOOS.

LA SITUACIÓN



En cuantes la conocí, dalgo camudó na mio vida. Nun me dexaba nin de nueche nin de día. Los mios collacios teníen de curiar les formes, nun fuere a enfocicase. Nesi intre cayíen en mala consideranza y yo nun podía tar cerca d’ellos. Asina y too, queríala y allampiaba tar al so llau como la cosa meyor d’esti mundiu.

Entamó la preparación pal casoriu, siendo les primeres diferencies abegoses de la pareya. De diez convidaos pasamos a doscientos noventa y cinco, cuasi toos de la so parte. La neña nun yera a cunta-y a la xente que nun taba na llista. El casase nel ayuntamientu finó siendo na ilesia los sos suaños, la de Deva, onde lo ficieren sos pás. El dir vistíos informales camudóse en dir de blancu ella y de xaqué yo. De dir a un llagar nin cuntalo, tenía de ser onde foi siempres la so familia, al Marieva. Tresformóse nel so matrimoniu, porque del míu malpenes quedaba el “sí quiero”.

El neñu nun tardó en llegar y ella dexó de trabayar pa nun estresase muncho cola so crianza, porque lo que ye la casa facía-yla una neña que-y aconseyare so ma. De la que yo diba al trabayu, ella quedaba na cama viendo dalgún culebrón. Llevantábase tres hores más tarde, cuando salía’l neñu al recréu nel xardín d’infancia. Non pa velu, sinón pa solidarizase con él. La tarde yera la hora del día que más facía, quedaba coles sos amigues. Más tarde recoyía al rapacín de dalguna actividá extraescolar, que cuantes primero entamare a faceles acostumaríase meyor a elles. Cuando yo tornaba, nun atopaba más que problemes. La cosa yera qu'ella nun sabía mas que marafundiar les perres y yo facer hores estra.

Nun yera a pidi-y el divorciu por mieu. Hubo un momentu en que namái diba a dormir. Pocoñín a poco foi surdiendo na mio tiesta la idea del asesinatu. ¿ Cómo matala ensin que me culparen? ¿ Cuála yera la forma na que los mios escrúpulos podíen actuar nun asesinatu? La rempuesta diómela ella. Una riestra de mures invadieron el solláu, poro que mercó velenu pa finar con ellos. Foi feliz. El pensamientu de la so muerte tuvo al mio rodiu a lo llargo de selmanes, pero enxamás me ponía a ello. El mio celebru tarrecía pensar en facer dalgo qu’ella nun diba tar d’alcuerdu. Yera un verdaderu calzonazos.

Por fin yá sé lo que voi facer. Ella quiciabes nun tea mui contenta cola mio decisión, pero cuando s’entere yá va ser tarde. Voi envelename yo.

13 jun 2010

NAMÁI FALTEN 8 DÍES PA ESPUBLIZAR "ORBAYUN SECO"

INTERNET FRAYARÁ LA DICTADURA DE LA SUBVENCIÓN. LOS ESCRITORES N'ASTURIANU MALPENES COBRAMOS UNES PERRUQUES POR HORES DE TRABAYU, ASINA QUE SOMOS A RENUNCIAR A ELLES Y FACER QUE LOS LLECTORES APORTEN A LES OBRES N'ASTURIANU DE BALDRE.


GÜELU BOMBA



-Güelu, bomba.

Con aquelles pallabres máxiques cuntóme cosadielles, refranes, cuentos,… Alcontréme feliz al so llau y él amosóse tolerante conmigo. Nun asperaba más qu’aportare’l branu pa dir pa la so casa. Ellí s’asitió’l mio reinu y él yera'l mio sirvidor. Cualesquier cosa que deseare, él llograba apurrímela. Un día glayé-y:

- Güelu, bomba.

Y españó-y al par d’él.

12 jun 2010

EN 9 DÍES ESPUBLIZARÁSE NEL BLOG "ORBAYU SECO"

UN COLLACIU ENTRUGÓME: ¿NUN TE PRESTARÍA ESPUBLIZALO EN PAPEL? LA REMPUESTA FUE NON. ESPUBLICÉ COMPARTÍU CON MAITE LOS CUENTOS DE LA ÑUBINA, LES COSES D'IYÁN Y DOS GUÍES DIDÁUTIQUES, AGORA TENGO DE DIR AL NUEVU RETU, ESPUBLIZAR NUN BLOG. D'ESTA MENA VA SER DE BALDRE Y VAIS SER A IMPRIMILO TOO DARRÉU. ACABÓSE LA DICTADURA DE LA SUBVENCIÓN.

EL CAMBIU



Dende hai tres díes que nun para quietu. Camina y camina ensin un segundu p’aparar. Agora mira equí, agora güel allá. Guetaba’l coche ensin cesar. Diben de viaxe y dábase per cuntao qu’él taba dientro’l vehículu, dormiendo. Salióse de la so cesta y estiróse un migayín. L’otru gatu allugábase nel requexu, tan guapu, tan gayoleru. Demientres un bon cachu xugaron los dos y el tiempu nun cuntó. Decatóse depués d’un bon ratu que’l coche marchare.

Ellí taba, solu y a la busca los sos dueños. D’un llau pa otru, malpenes ensin echar un pigazu. Cola esmolición de nun atopalos.

Arreguiló los güeyos pa onde taba ella. Col so rau nerviosu y el so miagar cantarín. Yera la cosa más guapa que viere enxamás. Al fin de cuentes, coches había munchos, pero gatines tan gayasperes como aquella non.

11 jun 2010

10 DÍES, 10, Y ESPUBLIZARÁSE "ORBAYU SECO" NEL BLOG

LES ILUSTRACIONES FÉXOLES UN COLLACIU, MIGUEL JIMÉNEZ JIMÉNEZ, GRAN PINTOR Y MEYOR PERSONA. PAGA LA PENA VISITAR EL SO BLOG ONDE ESPÓN LOS CUADROS QUE VA PINTANDO, http://desdemiventana-elwatio.blogspot.com/, PASÁI PER ENDE.

EL CAFÉ



Hai más de trenta años que voi per aquel café. Escoyílu a suertes. Na cai había tres cafés, pero namái él tenía gatos. La serenidá yera fundamental pa preparar los mios exámenes. Pidí té y un pinchu tortiella, abondo pa un esfamiáu como yo. Aquello tornóse nuna costume.

Un día fixéme nuna moza que pidió agua con gas. De mano rime del so pidíu, pero depués decatéme la so fermosura. Escomencipié a saludala a los dos meses y al cuarto yá taba falando con ella. Col tiempu tresformóse na mio muyer.

Pali que pali, les mañanes ficiéronse tardes y el santuariu enllenóse de veceros. El mio primer trabayu llegó como periodista d’un rotativu llariegu. Al mes, ella emprimó a facelo nel hospital de la Seguridá Social. Darréu, casámonos y traximos a esti mundiu a tres neños, mentanto’l café facíamonos compaña y curiaba de los nuesos fíos.

Torné de nueves a les mañanes y a emplegar el mio tiempu n’escribir noveles prietes. Vi como me convertía nun escritor de Best Sellers afamáu y los camareros entamaron a tratame de señor Riquelme, por muncho que-yos dixere que nun me prestaba nin un rispiu. Vieno’l premiu Planeta y tar denomáu pal Nobel, y el don xuntóse al señor y al apellíu. La xente presumía de saludame y dicir que me conocíen enantes que los otros.

Agora la mio vida camudó un migayín, dexando tres d’ella la so calma. Esi café, al que-y dediqué parte de la mio vida, va zarrar les sos puertes. Unos apartamentos llucirán la so fechura tres la so muerte.

10 jun 2010

QUEDEN 11 DÍES PA QU'ESPUBLICE "ORBAYU SECO" NEL BLOG

Facer esti llibru de baldre préstame a esgaya porque avero a la llectura a xente que nun lo ta y conocen los blogs persones qu'enxamás los vieren. Escribir los 101 microrrellatos fue pa min tamién un retu porque aidóme a superar el derrame celebral que sufrí.

DIR P’ATRÁS



Aquel día asperamos a Xandro, qu’entamó’l so llabor de molacín, pa dir xugar. Xuacu llevó’l balón y echamos un partidazu. La pelota cayó na cuevona. Xuacu coló tres d’ella. Oyóse un glayíu per dientro. Nos amiramos. Nun yéremos a ver nada. Enol foi a correnderes a llamar al cura. Armóse una buena. Cuasi tol pueblu s’averó al llugar. Naide quería perdese’l socesu‘l sieglu na llocalidá. Nunes dos hores, el nuesu collaciu apaeció pela entrada’l furacón.

-¡Siarim euq!

Faló raro. Naide nun lo pescanció. Cuasi toos albidraron que'l golpe lu dexare un migayín alloriáu. Importantes científicos aportaron a estudialu. Los llingüistes axuntáronse na opinión de que falaba al revés y el restu cuntaron que’l rapaz diba pa neñín. El casu llogró fama mundial. La prensa enllenó’l pueblu y los turistes nun dexaben de llegar. Hebo quien dixo que, en cuentes de la piedrona filosofal, lo científicu yera nomala cuevona filosofal. Xente con munches perres pagó pa tirase pel furacón. Enxamás se volvió velos. El casu de Xuacu cuntóse como únicu. L’interés perdióse y la xente dexó de dir al pueblu. Namái que yo lo siguía visitando.

Un día topé a la güela llorando. De mano, nun atalanté la causa. D’esmenu, quedóme tou claro. Xuacu tenía dos díes y yera güérfanu. Nun había placenta onde’l mio collaciu descansare.

9 jun 2010

QUEDEN 12 DÍES PA LA ESPUBLIZACIÓN NEL BLOG DE "ORBAYU SECO"

Pola presente, convídote a la espublización nel blog d’un llibru que va podese lleer de baldre. Trátase de “Orbayu Seco”, un llibru de 101 microrrellatos, dos d’ellos espublizaos pola Acadamia de la Llingua Asturiana na so revista Lliteratura, y va facese’l 21 de xunu. Hasta entós, fáese una cuenta atrás espublizando un microrrellatu por día nel blog. Espero que te preste y que lo espardas.


SOLU DELANTRE’L PELIGRU



Mio güelu taba acabante morrer. El so vacíu enllenó de silenciu’l llar. Ellí diba yo, a un pueblu formáu per dos cases vacíes. Pocoñín a pocu diba frenando’l coche, aparcándolu al par de la portiella y entrando na so antoxana.

Tovía m’alcuerdo de llegar la Pascua col bollu. Nós arrexuntamos la mesa cola siella y agarramos el bollu. Picamos hasta fartar. Tornámoslu de nueves p’arriba la despensa. Salíemos a xugar. Mio güela, que yera cucia como ella sola, dicía-y al mio güelu:

-¡Ah Colás! Porque ta ellí enriba, sinón diría que los neños comieron del bollu.

-¡Tas lloca, María! Como van algamar ehí los neños.

Les sos voces tán na mio tiesta como si fuere agora cuando lo taben diciendo. Percorrí la casa, axuntándose les alcordances en cada cuartu y cada requexu. Les llárimes esnidien pelos mios papos. Esto pásame por ser el más babayu de la familia. A tol mundiu-y salieron milenta coses de facer menos a min. Asina que tocárame matar a la perrina Lluna. La única cosa viva que me traía alcordances de Colas. Ellí taba, na cama del güelu, glayando pola so muerte. Yo garré la escopeta, apunté y disparé.

Agora, el mio matrimoniu taba formáu por tres. Col aquello que la que más allegríes me daba yera la que más me llambía.

8 jun 2010

XUEGOS PA DEPRENDER PALLABRERU


De mano, trabayamos el pallabreru que los rapazos conocen, poro que ponémoslos en grupos y tienen d’escribir nuna fueya cuantes pallabres seyan a alcordase d’elles, nun tiempu de dos minutos. N’acabando, cada grupu pása-y la fueya al de la drecha, que llee lo que punxeren l’otru grupu y añáde-y aquelles que sepian ellos. Síguese dando vueltes polos grupos hasta que la fueya fine nel de partida. El profesor mánda-y a un grupu que las llea y él escribe na pizarra aquelles que ten correutes. Faelo neto n’otros grupos y presénta-yos aquelles pallabres que deseya que deprendan y ellos nun conozan.


Seleiciona aquelles pallabres que xulgue más afayaíces y tienen de facer cartes en cada grupu. Fáese un par por cada pallabra, escribiendo la mesma y debuxándola.

Xuegos:

EL MATRIMONIU VOCAL

Les cartes repártense ente los xugadores y cásense les que seyan iguales. Tres d’ello, entamando pol que menos-y queden, entama a roba-y al de la drecha. Si casa, garra les dos pa si y pronuncia la pallabra, sinón, pon la carta al par de les otres. Tien d’asitiar les cartes pa que-y robe’l de la drecha, y asina hasta qu’ún les case toes y gane.

EL XUEGU LA MAXA

Asítiense toles cartes pámpana abaxo y en fileres. Un rapaz, a suertes, tien de tien de coyer dos cartes. Si tán empareyaes, quédase con elles depués de pronunciar la pallabra y dicir MAXA. Si nun tán, pónense otra vuelta pámpana abaxo y nel mesmu llugar. Fínase cuando queden toles cartes empareyaes y gana’l que más tenga.

3 jun 2010

LA ENGAÑIFA


Naquella fortaleza escondíase una cárcele que de mano asemeyaba vacía. Rexistraron celda a celda ensin atopar otra xente que nun fueren los vixilantes. Nun había tampoco cocineros, nin llimpiadores, nin dengún que ficiere’l llabor d’iguar lo escacharráu. Sicasí, el llugar nun tenía pinta de desdexáu. Xuacu fízo-yos interrogatorios a toos ellos, nos qu’aseguraron nun saber nada, que’l xefe yera l’únicu que conocía los secretos d’aquelles parés, al suicidase llevólos toos con él. Xuacu nun les tenía toes consigo, mandó pesllar a los carceleros y ordenó revolver de nueves too, dalgo nun se dexaba ver y teníen d’alcontralo. Ún, dos, tres y cuatro pasaes, onde dieron con más de lo mesmo. Asur dixo entós:


-Ehí fuera, esto paez más grande.

-Vas tener razón, rapaz –contestó-y Xuacu-. Lo meyor ye dir fuera y pescudar.

La xera nun-yos llevó muncho. Nun yera cosa de suétanos o cuartos tapaos, naquella fortaleza había otru pisu, más pequeñu, pero construyíu nes mesmes muries, un segundo pisu, y les escaleres atopábense en dalguna les esquines. Ficieron grupos y buscaron. Xuacu coló pal cuartu mandu y vio un cuadráu de muries en metanes la construción. Glayó a la xente pa que fuere. En llegando, garraron maces y entamaron da-y a la muria. De sópitu, una entrada encomencipió abrise y apaeció una subidoria. Nel segundo pisu arrexuntábense nanos con gorros de cocina, mandiles de serviciu y monos colos que facer igües ensin emporcase. Xuacu mandó-yos baxar. Una puerta escondió’l ruíu d’una llave. Fata aición, nun periquete echáronla abaxo. El xefe la fortaleza amosó la so valentía garrando a la prisionera, asina se sabía pol so uniforme, y llantó-y una pistola en pescuezu. La prisionera plantó-y una patada correutamente dirixida y echó a correr pa les escaleres. L’asesín nun miraba nada, mató al so soldáu y quinxo facelo cola so prisionera, nun había dulda dala, yera un foriatu.