28 oct 2010

TOLI


Nun ye difícil que dalgunos en casa tengan peluches, marionetes,… de monstruos. Pa introducir la historia sedría afayadizu que mandares que los truxeren al aula y que falen d’ellos. Falar, eso ye lo principal de l’asignatura y munches vegaes lo qu’escaecemos. Solemos copiar al castellán les sos metodoloxíes y formes, ensin camentar que tamos falando d’una les asignatures peor daes en dómines d’escuela pública (imaxínate entós el desatín na privada concertada). Una llingua ye pa espresar y non pa deprender gramática inútil y ortografía mal dao, con normes que naide nun ye alcordase d’elles, incluyíu’l profesor. ¿Naguamos por llograr que l’asturianu nun se pierda o seya una llingua muerta, talamente como deseyen nel gobiernu asturianu? ¿Vanos la comodidá o la eficiencia? Pa que los neños ten como llocos con nós tienen de ver que disfrutamos coles nueses clases. Faigámosles divertíes y llograremos que depriendan lo más importante, a amar la nuesa llingua. Por eso, tu yes el primeru que vas trayer un monstruu y cuntá-yos cosines d’él. Cosines cencielles, que seyan a dixeriles y facete entrugues, les mesmes que-yos faes tu cuando ellos falen de los sos monstruos. Esi ye bon momentu pa que-yos cuntes el cuentu de Toli. Prautica nun entamu col nome. ¿Cómo diríen el so nome distintos monstruos? El gayoleru, el murniu,…, y convién que-yos faigas repetir los distintos estaos d’ánimu pa que seyan a dicilos de siguío. Primero dícenlos tatexando; depués tán cansos de correr; malpenes finen, tienen la boca enllena comida;… Divertise, prauticar ya imaxinar. El cuentu cuntase de la manera que te seya más cómodo. La oreya ye la entrada pa una llingua y hasta agora entró-yos ensin decatase d’ello, la meyor forma de deprender.




Llectura

Vamos siguir xugando. Agora van prauticar la llectura selemente:

-Lleen el cuentu callandino.

-Toca facelo n’alto. Caún de los rapazos llee una ringlera. D’esta mena lleese’l testu enteru como si fuere una carrera de relevos. La primera, hasta la segunda, ye de preba. Depués entámase seliquín y va faciéndose cada vegada más apriesa. La señal dala’l maestru, llevantando’l brazu p’arriba. Párase cuando se tracamundien.

-¡Píllame! Lleo a tou meter y párome, ellos tienen de dicir ónde lo fici. Depués fáenlo en grupu, lleendo ún d’ellos y siguiéndolo los otros.

-Cronométrase-yos 30’ neto a les otres vegaes.



Gramática

La gramática tien de facese curtia y ensin da-y muncho al calletre. Tien de ser dalgo práuticu y que’l rapaz adquiera ensin decatase d’ello. Vamos falar de les contraiciones y los apóstrofos, que ye lo que más tiempu-yos lleva. En caúna les actividaes que faigan convién que tu revises los sos escritos y corrixas estos puntos. Al pasalo a llimpiu tienen de poner procuru nello y fixase nes tos correiciones.

Coles contraiciones pues faer un xuegu. Separtes en dos la clas: la metá das-yos papelos con oraciones y a la otra metá apúrres-yos papelos con contraiciones. Tienen d’andar pela clas hasta qu’atopen la parte que case con ellos. Imaxina que te tocó COLA, entames ascuchar a los que-yos tocó frases dicir la de so. Munchos nun van pegar contigo, pases d’ellos. De sópitu, atopes una que diz dafechu contigo, xuntáisvos los dos y sentáisvos. Depués convién camudar los papelos, a los que-yos disti contraiciones da-yos frases y viceversa. Una vegada finada esta parte, vien la de copiar na llibreta. Primero cópiense les contraiciones que tes dando y depués entamen a lleer les sos frases y les contraiciones coles que casaron. Cópiesles na pizarra en cuantes veas que tán bien y ellos apúntenles nos sos cuadernos.

Coles apostrofaciones pues entamar otru xuegu: la pesca. Xúnteslos en grupu de cuatro, pudiendo ser dalgún de tres. Nes meses onde ten los grupos suéltes-yos pallabres a esgaya en trozos de papel. Por turnos tienen de buscar pallabres qu’apostrofen con: EN LA DE EL PA QUE ME SE TE. Non, nun tienen de ser toes nel montón. La caña va poner una d’eses pallabres pa qu’apostrofen. Por exemplu, tola clas tien la caña de EL y tienen de pescar pallabres qu'apostrofen con EL, p’alantre o p’atrás. Caún pue tener una caña distinto, puen casar de dos en dos o ser toes iguales. Neto a les contraiciones, les llibretes vienen a trayer un migayín de trabayu. De mano la norma y depués caún llee la so pesca, el maestru ve que te bien pescao y cópiales na pizarra pa qu’ellos les pongan bien na llibreta.

Hai más xuegos, pero vamos dexalos pa otra llectura. Si tíes dalgún, nun duldes en compartilo con nos en cordobello@gmail.com, espublizaráse darréu nel blog poniendo’l to nome.



Trabayando la tema

Toli quier ser mélicu de monstruos. Pa ello tien de saber toles enfermedaes qu’hai nel mundiu monstruil. Ellos van aidalu. Lo primero ye formar el pallabru del nome. Pues facer un torbolín nel que te digan enfermedaes qu’ellos conozan, tu tíes de correxíles al asturianu nel casu que nun ten. Agora tenéis ente toos que dividiles en sílabes na pizarra. Xugando con eses sílabes, escueyen nueves enfermedaes. Repártesles ente ellos pa que seyan a escribir la so descripción y la forma curales. Escríbeles nes sos llibretes, pero tamién nuna fueya que se tien de colgar nel tablón o facer murales pa los pasiellos. Tamién sedría prestoso que les presentaren a los collacios de clas o hasta otres clases. Si quies facer el torbolín con otres pallabres, la clas ye tuya. Prestaríame que tamién les unviares al blog pa espublizales y que les conozan n’otros colexos, pa ello unviales a les siguientes señes cordobello@gmail.com.

25 oct 2010

LLENZU ESCRITU

PROCURU DIVÍN



Naciere pa ser infiel nel matrimoniu. El so home mercó aquel paxarracu pa que la xixilare. Malpenes s’averaba a la casa a la gueta la so muyer, el loru espetába-y les caberes pallabres del amante del día. Yá podía facer arroz con lleche, compota peres o tarta Xixonesa, el mui cuciu quitába-y les perres, llevábala pal pueblu y riñíala.

En dos años, el loru dexare de recitar la retafila a la que mos tenía avezaos. Namái suponía que la muyer camudare d’aptitú y entamare a endrechar. Fízose de misa diario. Peles tardes diba a la sacristía a coser ropa roto y a planchar pa los probes. Entró nes fileres d’adoración nocherniega y, depués de dexar la cena pal so home, colaba pa tan sagráu destín.

En señal de confianza, el maríu desfízose del loru y mercó-y un collar de diamantes. Sicasí, ella entamó a enflacar y a pesllase na casa. El so home entrugó-y:

-¿Qué te pasa cariñín?

Ella callaba y ascuchaba. A lo lloñe oyíase la voz de la lorina’l conventu que-y dicía:

-Si nun torna’l mio lorín del alma, tu nun reces con too dios.

 
Ilustrador: Miguel Jiménez

21 oct 2010

COSES DE CORDOBELLO

BELLOBELLO



De neñu yá yera un migayín resabiáu. Nel llugar nun s’alcontraba cosa de la qu’él nun supiere, nun falare o nun doblegare. Tenía malpenes diez años cuando so pá morrió d’una enfermedá raro. Les uñes quedaren moraes y el cuerpu mostiu. So ma gobernó nos primeros años enantes de colar del llugar. O eso dicíen les versiones oficiales. Depués, nun s’alcontró nengún conseyeru, magu o bruxu que-y diere cara y quisiere mandar na casa y los subditos. Bellobello dirixó’l Conceyu, al que-y punxo’l so nome, con corazón d’aviespa, siempres picando al so pueblu. La so cara engurrióse d’odiu y la so alma agrió más de deseyos. Nun había ayalga que nun poseyere, nin maldá que nun repartiere.

Llegó a los sos oyíos la esistencia nel Conceyu de Dana de la moza más guapa y melguera que naide conociere. Namái había un problema pequeñucu, diba casar col so señor. Bellobello dende entós nun durmió. La so tiesta refervía y los sos güeyos vixilaben. Una bruxa llegó al par del so palaciu. Xubió al so cuartu y faló-y:

-Con esti fechizu nun vas tener moza que se te resista.

-¿Ónde tá esa cosa maraviosa de la que fales?

-Nesti pergamín afuracáu y enllenu foroñu.

Bellobello quitó-ylu y clavó-y la espada na so carne vieyo. Mandó preparar el so caballu y partió. Galopió y galopió per biesques, picos y llanures. Buscó y buscó hasta qu’alcontró a la moza, fizó’l fechizu y diólu a la rapaza. Deseguida tornóse lloca por él: besándolu, amorosándolu y acariñándolu. Marcharon xuntos pa palaciu y casaron a la mañana siguiente. Namái tenela, perdió tol interés por ella. Entamó a face-y toa triba de maldaes, pero acordies ella sufría, él sufría. Probó tolo que se-y averó, col mesmu resultáu. Una nueche, nun suañu, apaecióse-y la bruxa:

-Esa yes tú y tú yes esa. Ella tien lo femenín y tú lo masculín. Pasu ente pasu, diréis meciendo los vuesos sexos, llogrando que ella seya tú y tú seyas ella. Ella gobernará con sabencia y amor lo que tú esfarrapaste col to odiu y envidia.

Naide nun yera desplicase porque Bellobello tornóse candial. El so pueblu nun lo yera creyer. La única nota tristaya taba na so muyer, tan lloca la probe qu’una nueche se llanzare de la cama a baxo y cayere na foguera. Morrió como si d’una bruxa se tratare.

18 oct 2010

COSES DE CORDOBELLO

ARIÑÁN



Tolos años xuntábense con gran estrueldu al par del ríu pa ver la salida de la carrera de trineos. Delantre de toos poníase’l ganador del añu anterior, tres d’él diben los más vieyos y resabiaos, dexando los últimos llugares pa los más mozos. Va dellos años que salía la primera Suncia, la muyer más aventurera de tola degolada. Los sos perros yeren afamaos porque malpenes lladraben y movíense como gaceles. La bandera taba preparada. Toos despedíen a los sos familiares y amigos. Xandra llevantó la bandera. Fízolo como tenía davezu. Al baxala saldríen corriendo y entraríen na biesca de la Faya’l Saber. Xandra dexólos marchar. Una borrina enllenó tolos árboles y los trineos nalaron naquella masa llechoso. Los aplausos aselaron. La xente coló pa xintar.

Pasaos dos díes, tornaron toos pa ver llegar al campeón. De mano hebio la xarana de siempres. Toos deseyaben que’l campeón tuviere ente los de so. Les griesques y los reburdios mecíense coles rises y bromes. Pronto´l silenciu y les miraes esmolecíes enlleno la llanada. Los trineos nun salíen de la biesca. Pasaron hores. Díes tuvieron de morrer. Al mes nadie nun los asperaba. Entós, la borrina tornó. Unes lluces dexáronse ver al par de los lladríos. Según pasaben, dalgún de los que los miraben xubíase a la lluz y baxábase’l tripulante del trinéu que pasaba. Los que baxaben nun remembraben nada, falaben como si nun dieren la salida a los trineos. Los que quedaben sentíen l’allegría del que vuelve y la murnia del que cola. Pero los que partíen, esos nun dexaben un rispiu d’esperanza.

Al mes, tornó de nueves la borrina. Los vecinos nun salíen de les sos cases, tremerosos de nun tornar. Más nada. Denguna señal.

Meses y meses ensin camudar.

Pasó un añu. Un rapazu de fuera qu’arrespondía’l nome d’Ariñán reñó con tolos llariegos. Nengún dellos yeren a llevantar la vista. Ariñán salió a la borrina. Nun se-y vio más. Les lluces y los lladríos nun sonaron. Nun hebio rempuesta.

Neso d’un mes, de la biesca salió de nueves la carrera de trineos. Agora pararon. La allegría al ver de nueves a los sos familiares dexo ensin voces el pobláu. La Faya´l Saber desapaeció del llugar nun estrueldu difícil d’escaecer. Nun s’oyó nueves d’Ariñán. Nel so honor púnxose-y el nome al Conceyu. La carrera nun se celebró enxamás. Los homes que regresaron vivieron más de doscientos años. Nesi tiempu escribieron el Llibru’l Saber, onde se recueye tola sabencia de Cordobello.

14 oct 2010

RUTINES PAL ENTAMU CLAS

Convién que los rapazos tengan una riestra vezos que-yos faigan escomencipiar la clas de llingua asturiana. Endréchalos nel idioma y nes téuniques a desendolcar nuna asignatura de triba llinguístico ye fundamental. Ehí ye onde tán les rutines. Hailes abondes y de xuru que tú conoces munches. Nel día de güei vamos ver namái que tres, tiempu a esgaya hai a desarrollar más.


EL TIEMPU METEREOLÓXICU


De mano convien llendar el pallabreru de la tema: soleyeru, nublu, orbayu, lluvia, xarriar, borrina, caín, truena, airón,… Acordies al cursu, les pallabres tienen de ser más. Una vegada tomada esa decisión, llega trabayar con ellos los símbolos que les van representar. L’enceráu ye bon sitiu onde asitiar el símbolu del día, pero sedría bono tamién qu’haiga una fueya onde se recueyan tolos díes del trimestre. Tamién ye bono que lu llanten tolos díes na so llibreta, neto a la fecha.

Nun entamu pue falase del tiempu que fai fuera, ye lo primero que los neños ven. De fechu, cuando son piquiñinos ye lo que menos problema-yos da. Namái entrar en clas, dibúxase’l simbolu del tiempu que fae. Pue falase de como tuvo los díes anteriores y como dicen que va tar.

Agora vamos da-y una vuelta tuerca. Cada mes pue ponese’l tiempu que fai nun cuentu que conozan. Cada día’l maestru decide que tiempu interesa qu’haiga o déxalu nes manes d’un de los neños. Agora compárase col que fai fuera, imaxinamos que tán a facer con esi tiempu, compárase colo que somos a facer nós, camúdase’l cuentu acordies tengan un tiempu o otru, cúntase lo que comen con esi tiempu,…

En cuentes d’un cuentu vamos trabayar el qu’hai pero n’otru pueblu o ciudá d’al llau, d’Europa, d’otru continente. Pa ello tenemos n’internet la páxina web http://espanol.weather.com/. Yes a comparar col tiempu nel hemisferiu nonte o sur, n’otru continente, nel pais d’al llau. Tamién s’abre la puerta pa que falemos de costumes, comides, relixones, creyencies vieyes, música,…

Lo que te pete ye posible. Pues dir a otros planetes y ver los partes metereolóxicos fechos polos rapazos; lloverá o faerá sol na mazana la merienda; visitarás la casa Colás y vera el tiempu que fae na alfombra;…

CUENTU RECUENTU


Vamos escribir un cuentu ente toos. De mano hai que facer delles escoyetes: tema, protagonistes, llugares,… Fálase cada parte nun torbolín d’idegues, anótense na pizarra y vótense.

Cada día de clas escribiráse una fras de la historia. Decídese pol neñu que va entamar a escribir la fras y darréu va’l restu n’orden de llista. Tienen de lleer n’alto tolo escrito enantes d’ellos y xuntar la so fras a les d’enantes. Pocoñín a poco va definiéndose’l cuentu y el maestru avisa díes enantes que la historia se tien de terminar. Escríbese nuna fueya y en terminando, caún prepara’l so cuentu: portada, dibuxos ya historia copiada de la pizarra (tamién val que seya elleutrónica).

Pero siempres yes a montar variantes. Cada rapazu trae de casa la so fras davezu, pero pue atopase col maestru canalla que-y fae meter una pallabra obligatoriamente. El canalla dexa que’l neñu meta otres tres pallabres más pa redondear la fras. Ye dicir, el rapazu vien con: “La pistola esmucióse na alcantariella”. Llegues tu y suéltes-y que tien d’incluyir la pallabra “beata”. El rapazu tien d’añadila darréu. Decide dicir: “La beata esmució la pistola na alcantariella”. Como ves, tamién pue cambiar pallabres de sitiu. D’esta mena, la historia garra dello surrealismu que va face-yos gociar.

El canalla ye a obligar al rapazu a camudar dos pallabres de llugar. Asina, la fras anterior:”La pistola esmucióse na alcantariella”, tresfórmase en: “La alcantariella esmucióse na pistola”, llogrando da-y al rellatu un toque de gracia.

El canalla mánda-y al rapaz camudar un nome por un verbu. ¿Cuála ye la situación? “La esmuciosa pistoleóse na alcantariella”. Yá tenemos dos pallabros pa definir y poner dalgún exemplu, poro que la rutina allárgase nel tiempu y pue mecese cola gramática. Lo qu’ensin dulda dala vas llograr ye que la to clas seya divertida y a la vegada deprendan.

LA PISTA



El maestru piensa en dalgo: un animal, una parte la casa, un mueble,… Cada día da-yos una pista y tienen d’intentar aldovinalu. Les pistes tienen de dir de lo xeneral a lo específicu, llogrando asina que les primeres malpenes-yos diga nada y les caberes seyan a dicir una bayura posibilidaes, hasta dar con ello.

¿Qué fácil, eh? Pero si faes un pocoñín de llabor d’investigación y lo que tienen d’aldovinar ye a ellos mesmos. Ye dicir, el tutor o los pas dante pistes de los neños, ensin qu’ellos lo sepian, pa que tu les emplegues na clas. De xuru que ye más prestoso.

Y si agora lo que busques ye’l xuguete que más-yos presta, la comida que nun son nin oyir falar d’ella, la película que más vieron,… De xuru que la cosa gana n’interés.

11 oct 2010

MENUDANCIES


La llamada fue sero. Na comisaría namái quedaben el reten de nueche. Garré’l teléfonu y la voz sonó callada, como amatagada. Un home llegare al so barriu. Na casa oyíense ruídos raros. Escuchare na radio lo del psicópata na ciudá y yera neto a la descripción d’aquel home. Colgó. Nun dixo nin barrio, nin cai, nin casa.


A la selmana taba de nueves de guardia. El teléfonu sonó machacón. La voz faló repetido. Afirmó que yéremos unos desdexaos, que nun mos esmolecimos nin un rispiu del psicópata. Remembré-y que nun dexare señes poro que taba difícil garralo. Pasóles y colgó.

Entamamos la investigación. Tratábase d’un home de pelo llaciu y castañu. La so cara tresllucía cansanciu. Sicasí, namái se-y vía salir a los enredos peles mañanes y tornar a piesllase na casa. En faciendo’l seguimientu, l’home actuaba neto a los psicópates. Preparamos un mecíu ente la policía llocal y la estatal, pero ensin batelo muncho, nun fueren a empatonase y dir pal suelu. Entramos pel teyáu, el portal y el club nocherniegu. La puerta cayó. L’home salió esposáu. Los gatos nun dexabes de miagar. Pedíen llechi y el so amu nun taba pa dá-yoslo. Cuando montábemos un operativu, dalguién lo pagaba. Con un migayín de suerte l’home namái saldría acusau de pederasta. Anque sólo fuere de gatos, pero pederasta. Menudancies.

Ilustrador: Miguel Jiménez

7 oct 2010

LA BALLENA LLORENA




De mano, cuntase’l cuentu seliquino, dexando que los rapazos lu tastien. Convién facelo entrugándo-yoslo too: ¿Préstente les ballenes? ¿Na to bañera hai ballenes? ¿Ónde les podemos atopar? ¿Cuala ye la estación meyor pa que una ballena vaiga canciar al Océanu del Hipu?... Hai que mecer entrugues normales con entrugues de color verde de mora y azul de naranxa. La imaxinación fae que la nuesa llingua seya dalgo que celebrar, dalgo qu’enllene d’amor dos hores a la selmana: amor a la llingua y amor a la creatividá.


Esi cuentu tien la so versión al reves. Non porque entame pel final, sinón porque ties de cunta-yos tolo contrario: “Ello nun yera una vez Ballena la Llorena, una vieya mui murnia que sentábase lloñe los mares asperando al carteru ensin cartes…” Esbarria tolo que te pete, que’esfruten de la historia y que seyan a rise como verderones.

Cuando más seles tan, cúnta-yos la historia “pundipán”. Cada diez pallabres ties de dicir el pallabro “pundipán”. Acabante facelo, ente toos hai de buscar un significáu de lo más lloco a “pundipán”: carta en formigano, la mar onde viaxen los llápices pel branu, un circu enllenu de payasos de bancu,… Nun t’escaezas d’unviános los resultaos al blog.

Depués, en dellos díes, pues cuntar el cuentu y que seyan ellos a inventar versiones o pallabros. Tamién sedría bono que me lo ficiereis llegar al blog, la idega puede dar idegues a otros collacios.

Llectura

-Ye’l tiempu nel que tienen de facer la llectura silenciosa.

-Voi lleendo y de sópitu paro. Ellos tienen de señalar onde pare. Depués pueden facelo en pareyes, tríos, cuartetos…

-Lleo’l testu de drecha a isquierda, cuando menos lo asperen camudo de renglón. Ellos busquen onde voi, el primeru que lo alcuentre sigue lleendo y salta de renglón,…

-Cronométrase los 30 segundos pol maestru y ellos controlen de dos en dos. D’esta mena namái hai falta cronometrar dos vegaes.



Trabayar la gramática

-Hai de trabayar la doble negación con: Enxamás nun … De mano tien de copiase la norma na llibreta. Depués fáese un torbolín de frases que se copien na llibreta de la pizarra. Pa finar, facemos unes etiquetes de productos alimentarios: chorizu de mazanes picantes, fabada de llimiagos y corcuspinos,… Siguiendo la estructura: Enxamás nun …, nin …, nin …

Enxamás nun dar a bolígrafos esfamiaos, nin coyer en bicicleta ensin pedal, nin falar como les foles de la mar Enchipada.

Tien de ponese’l nome, el logotipu del productu y les indicaciones en negativu. Enxamás nun tardéis muncho n’unvialo al blog, nin…



Trabayar les pallabres

-Nesta historia pue trabayase tolo que respeuta al corréu, dende l’electrónicu al normal. El torbolín d’idegues recueye toles posibilidaes, cópiales na pizarra y depués nes llibretes. Agora tienen d’escribir a la ballena Llorena una carta, un e-mail, …, lo que más-yos preste. Espónense nel tablón y nun tadría mal qu’unviareis al blog los sos escaners.




Trabayar la tema
-Les axencies de viaxes tán canses de los destinos de siempres. Deseyen llugares nuevos. Nun taría mal qu’individualmente, pareyes o grupu fueren quien a facer un prospeutu nel que despliquen a los viaxeros como ye una les islles escaecíes polos homes: monumentos, llugares, comides, música, tradiciones,… Depués despliquen el de so y péguenlu nel tablón, o nel pasiellu, o na entrada,… Home, equí vien el dicivos que lo unviéis al blog.

Pa finar:

A ti puede ocurrísete milenta idegues, compárteles con nós. Unvíanos les tos aportaciones a cordobello@gmail.com. Ente toos somos a facer que l’asignatura de Llingua Asturiana seya la más prestosa de tol colexu. Los neños tienen d’amar la nuesa llingua, sólo asina van ser a deprendela. Ente toos somos a facelo. Nos trabayos apaeceran los nomes de los que los ficieron.

Tamién sedría bono que mos mandares los trabayos de los rapacinos a la mesma direición de corréu. La so espublización va presta-yos y van deprender a compartir. Escanea les fueyes y apaecerán nel blog.

5 oct 2010

EL RAPAZU DE VENUS

Esti ye'l blog qu'entamé pa neños

Y esta la so aplicación didáutica

Esta primer historia’l blog sepártase en tres: Venus, Gasparín y La Lluna. Si miramos a les tres, toos alvertiremos que cada una d’elles estrémase de les otres pol nivel al que va dirixíu. De mano, el maestru llee los tres testos ensin dixebralos y los rapazos escúchenlos dafechu. Depués, namái llee’l del nivel. Les actividaes que vienen darréu son llibres de facer o non, acordies al to gustu.


Venus



Empobináu pa xente de nivel mediu, que son a lleer y entamen a tener della conocencia gramatical. Cuéntase’l testu y los rapazos faen l’ecu cada vegada que’l maestru para. D’esi ecu cenciellu pue aumentase la dificultá a ecos de dos, tres y cuatru repeticiones, organizando los neños por fileres y esperando que la anterior fine pa entamar la so repetición. ¡Que nun ye a esgaya! Cada grupu fáelu con voz más baxa, talamante como son los ecos. La historia pue repetise delles vegaes o dellos díes al entamu.

Llectura

-De mano faen una llectura silenciosa del testu.

-El maestru llee´l testu n´altu, saltándose pallabres. Los rapazos tienen de dar una palmada en cada pallabra saltada. Nuna segunda vuelta, cada neñu prepara un párrafu coles pallabres que va saltar y lléela cuando-y toque, los otros tienen de dar les palmaes.

-D’esta vuelta, el maestru camuda pallabres (puen añadise les d’un centru interes que se trabayare enantes) y los rapazos tienen de dicir la correuta.

-Acaben lleendo 30 segundos cronometraos pol maestru. Pa ser a facelo rápido, tienen de trabayar en pareyes: ún llee y l’otru cuenta’l númberu de pallabres y viceversa (asina namái fadría falta cronometrar dos vegaes). Al final el maestru toma nota los resultaos.


Grámatica

-Los rapazos tienen d’escribir tolos nomes qu’hai nel testu na llibreta (tienen de ponelos en singular). Tres dello, tienen de xuntalos a los artículos. Sólo apostrofa uno: l’aventura. ¿Cómo tendríen de ser les pallabres pa ser a apostrofales? Cópiense les normes de el y la na llibreta (el namai p’alantre). Depués tresfórmense en pallabros les pallabres pa que cumplan la norma: l’eneñu, l’asabiduría,… Pa finar, tienen de facer una oración con caún de los pallabros.

-La contraición “NO fondero” déxanos abierta la puerta p’averanos a EN + ARTÍCULU. Pónense na llibreta. El maestru fae exemplos con errores: Nel casa d’Andres hai dos pexes. Ellos tienen de correxilo y ponelo na llibreta bien. Agora escriben frases venusianes (con sentíu estraterrestre) con cada contraición y lléenles n’alto.



Trabayar les pallabres

-Escuéyense les pallabres que más interesen y el maestru llee les sos definiciones. Ellos tienen de buscales nel testu. Una vegada atopaes, escríbenles na llibreta xunto a la so definición.

-Facemos una escoyeta de pallabres que nomen a les persones acordies a la so edá: neñu, rapazu, chaval, mozu, …, vieyu. Pue facese aportaciones de los alumnos, del maestru o dambos. Tres d’ellos, escriben frases lloques coles pallabres na llibreta. Frases que nun tengan chapeta, que ten turulates. Lléenles toes y escríbenles nun foliu qu’ornien y coloquen na parede. Si te presta y ellos son a ello, escueyen una fras lloca (d’ellos o d’otros) de la parede y escriben una hestoria con ella. Tanto les frases lloques como les redaiciones puen unviase al blog (ye mui aconseyable) al travies de los comentarios o nel e-mail cordobello@gmail.com onde te los espublizamos.

Trabayar na tema

-¿Cómo ye la cueva? En grupos, en pareyes o individualmente desendolquen tola so teoría al rodiu la cueva. La imaxinación tien de referver y l’inxeniu surdir de les fueyes. Prestaríame tamién que mos les ficiereis llegar al blog pa espublizales.

-Agora hai que facer maxa. Fae falta escribir el conxuru pa entrar na cueva. Na pizarra faese un torbellín de pallabres rares qu’apaezan nel conxuru. Cuando tengamos una riestra d’elles, los rapazos escriben el so conxuru máxicu con elles y otres de verdá. Neto a enantes, prestaríame que me les ficiereis llegar.



Gasparín



Esti ye pa los mayoronos. El maestru cunta la historia. Torna de nueves a cuntala fras a fras, los rapazos tienen de repetiles al revés, parando nel intre que nun seyan alcordase de dalguna pallabra. Asina faen dellos díes pa entamar, pero cada día con dalgún cambiu: cuntalo al altu la lleva, facelo como si tuvieren hipu, tan acabantes finar una etepa nos Llagos y tán cansos,…

Llectura

-Lleen en silenciu’l testu.

-El mayestru forma grupos que preparen la llectura. Tienen de camudar pallabres y los otros tienen descubriles. El grupu que más pallabres descubra de los otros grupos tien d’escoyer a un miembru de caún de los otros grupos y que llean la historia como si fueren árabes: el renglón lléese d’isquierda a drecha y el párrafu d’arriba abaxo.

-El mayestru llee agora la historia con pallabres añadíes y ellos tienen de deciles n’alto en cuantes les descubran.

-Acaben lléendo 30 segundos, neto a como lo ficieron los otros. El maestru toma nota d’ello.

Gramática

-¿Qué pasaría si fuere una historia de negaciones? Repásase l’emplegu de NON y NUN. Escriben na llibreta les normes d’usu. Garren la fueya onde se recueye la historia y tienen de reescribila na llibreta negándolo too: Non, el Rapazu de Venus nun viaxa pelos…

-Repásase la contraición de CON + ARTÍCULU. Vese qu’apaez col delles vegaes nel testu. Escríbese la norma na llibreta. Tienen d’imaxinar a Gasparín viaxar con animales qu’haiga n’Asturies, emplegando col, cola, colos y coles: Gasparín viaxo col melandru, cola rapiega, colos merucos y coles aigles, colo difícil que ye facelo. Como ves, tamién emplegamos el neutru colo. Tamién puen facelo con frutes, árboles, llugares,…

Trabayar les pallabres

-Faen una llista d’alimentos y pónenla en común. Depués faen una escoyeta de 5 a 8, en grupos, en pareyes o individualmente, y escriben una definición de caún d’elles. Preséntenles a la clas y comparen aquelles nes que coincidan. Depués mírase la definición del diccionariu.

-El Cuélebre quema les pallabres. Ellos en grupu recueyen 10 pallabres d’animales quemaes y cámbienles con otru grupu que tienen de completales. Agora tienen de facer pallabres col restu de les quemaes nel so grupu y l’otru. Tienen de definiles y facer una illustración de les mesmes y esponeles na parede. Taría guapo que les ficiereis llegar al blog.

Trabayar cola tema

-Cada animal tien la so comida secreta: el xabaril come xerséis mariellos con golor a biesca azul. De mano, caún d’ellos tien d’escribir un animal y la so comida favorita. Los resultaos espónense delantre la clas. En pareyes escueyen ún que-yos preste (nun fae falta que seya d’ellos). Escriben como lo cacen y como lo preparen pa comer. Como tolos trabayos, tienen d’apaecer na llibreta y los que seyan creativos prepárense nuna fueya y péguense na parede. Tamién convién mandalos al nuesu blog.

-Hai llibros d’historia al ayu, d’aventures al pil pil,…, sí, sí, y vosotros vais preparar un llibru de recetes de llibros, talamente como lo oyíis. Hai que trabayar el maxín. Tien de sonar como d’alta cocina y goler a árbol del que se saquen les fueyes onde s’ornia la tinta, como si fueren de calamar. A trabayar. Nun escaezáis mandánosles.


La Lluna



Agora tóca-yos a los más chicos. Entamamos cola oralidá.

Oralidá

-Con una semeya, un debuxu, un muñecu, una marioneta… de la lluna presénteste a ella col siguiente diálogu:

Maestru: ¡Bonos díes!

Lluna: ¡Bonos díes!

Maestru: ¿Cómo te llames?

Lluna: Llámome Lluna.

Maestru: ¿Cómo tás, Lluna?

Lluna: Voi tirando.

Maestru: Ta llueu, Lluna.

Lluna: Ta llueu.

Convién facelo delles vegaes y dellos díes. Depués fáeslo, ellos repiten y la lluna contesta, pa xustificar la repetición dizse de la Lluna nun escucha’l maestru y ellos tienen d’aidalo. Hai que poner la lluna d’espaldes al maestru. Más tarde, en cuantes lo dominen, fáenlo ellos solos. Pa finar, puen facelo este ellos: moviéndose pel aula, en pareyes, …

-Fáese un árbol xenealóxicu de la familia na pizarra. Preséntense a los miembros de la familia. Díceslos con un filín de voz como si fueres una formiga y ellos repítenlos neto a lo que tu ficiste. Agora pues ser un osu, un coríu, una sacabera,… Entames a camentar nun familiar (por exemplu ma) y ellos tienen d’aldovinalu. Depués fáenlo en grupos. Copien na llibreta l’árbol xenealóxicu colos sos nomes correspondientes.

Cuntar la historia

-La primer vegada tien de ser seliquino.

-Agora fáeslo y cuando glayes un pallabra de la historia ellos tienen de glayala tamién.

-Cuéntesla xubiendo y baxando la voz y ellos tienen de dicir les pallabres que te salen más baxuques.

-De xemes en cuando escaéceste de dalgo y ellos tienen de remembrátelo.

-Cúntesla al reves, entamando pola última pallabra y finando pola primera.

-Dices la primer fras, depués la cabera. Tóca-y a la segunda y depués la penúltima...

-Usa’l maxín y fáelo d’otres formes. Repítelu dellos díes.

Trabayar cola tema

-¿Qué coses pue tener el Rapazu na Lluna? Cuyares, trubiecos,… Lo más estremao que seyas a imaxinar. Acordies tu vas diciéndolos ellos van debuxándolos y coloreándolos. Curiau, caún tien los colores, goma, llápiz, cachador…, del compañeru y el compañeru los de so. Pa emplegalos tienen de pidilos:

A.- Déxesme la goma.

B.- Tómala. Apúrreme’l mariellu.

A.- Toma.

¡Ah! Que nun s’escaezan de dar les gracies.

-Vamos viaxar a los llugares más inimaxinables. Vamos dir a una llaguna de esculibiertos, o a un volcán de chocolate y llimón,… Hai de facer mimu de coses que se faen ellí: llamber una xaronca, rascar una culiebra,… Depués vamos copiar los llugares en dos llistes: si mos prestaron o si nun mos prestaron.

Pa finar:

A ti puede ocurrísete milenta idegues, compárteles con nós. Unvíanos les tos aportaciones a cordobello@gmail.com. Ente toos somos a facer que l’asignatura de Llingua Asturiana seya la más prestosa de tol colexu. Los neños tienen d’amar la nuesa llingua, sólo asina van ser a deprendela. Ente toos somos a facelo. Nos trabayos apaeceran los nomes de los que los ficieron.

Tamién sedría bono que mos mandares los trabayos de los rapacinos a la mesma direición de corréu. La so espublización va presta-yos y van deprender a compartir. Escanea les fueyes y apaecerán nel blog.