LLEVÁNTATE NUBE

Llevántate nube,

que l’aire cañica’l sele deséu

de peñerate pente’l mio cuerpu.

Nun esprecetes,

nun crucies el fumu del olvidu,

que l’alcordanza trai canciones d’amor.

Toca’l silenciu,

mansulín testigu del nuesu querer,

de la nuesa infinita indiferencia finxida.

Y gocia,

gocia de la vida,

del camín,

del besu sorprendíu,

de la mirada sentida,

del abrazu queríu,

del destín,

y nun escaezas tastiar la mio solombra,

siempres allampiándote na lluz,

na fola perdida,

nel sollutu,

nel fin.

La selmana que vien entamo a espublizar de nueves llunes y xueves. El branu ta finando y too torna al so ciclu.

.

LES CUEVES DE LOG

ENLLAZA EQUÍ COL MAPA DE CORDOBELLO SI LO QUIES VISITAR

La natura, nel conceyu de Log, paez pasar de callao. L’ermu enánchase pol so territoriu onde namái cunta con tres oasis y dos ciudaes de costa. Hasta los allacranes fuxen a tou meter de les arenes pa nun ser a entrar nos sos censos de población. Sicasí, baxo tierra hai una carrapotada de cueves xuníes por ríos soterraños que salen a la mar per fondigonaes somarines. Ente elles, fálase dende bien de tiempu de la Cueva la Sapiencia, buscada por toa triba de personaxes que podíen enllenar per años les páxines de socesos del periódicu de Log.

Cloyu fo l’únicu personax que sacó provechu d’aquella esperiencia. Psicólogu de profesión, de siempres tuvo un espíritu aventureru que lu alloñaba de la Universidá onde so padre s’encargó de colocalu y na cuala asperaba que lu acoyere hasta’l final de los sos díes. Taba mui enquivocáu, aquel rapaz tenía planes irretrucables nos qu’echaba les tardes, dexando moces, folixes y emponderaos a caderalgos pa xente más aburrío. Investigaba en tolos llibros escritos al rodiu de Log col aquello qu’en dalgún atoparía pistes que lu llevaren a la Cueva la Sapiencia. Nun yera a albidrar mui bien porque aquellos estudiosos escribíen llibros tan gordos, si con una tercera parte del so tamañu tovía se fairía pan cola paya que se podía recoyer. Fo nun llibru de xeografía de dómines mui antigües onde alcontró un mapa con toles cueves de Log,  anque a denguna d’elles se nomaba como de la Sapiencia.

Estudiólu a fartar y entamó a planificar una espedición na que diba percorrer toles cueves hasta dar cola deseada. Punxo anuncios nos abondosos periódicos de Cordobello buscando compañeros de viaxe. Nun hebio rempuesta a les sos insistentes búsquedes. Cloyu, asina y too, nun se desanimó, a vegaes la soledá yera la mayor acompañante nes grandes aventures. O eso dicía él. Mandó a la so hermana preparar viandes pa un mes y dexó-y un mapa onde señalaba los llugares nos que diría a recoyelos nos meses siguientes. Na so ciudá abrióse una casa apuestes pa ver cuánto duraría’l viaxe. So padre fo’l primeru n’apostar y en dicir que l’aventura nun aguantaría nin una hora. Cloyo, conocedor d’ello, nun se despidió de naide, nin siquiera de la so hermana.

El tiempu paso y naide  s’alcordaba d’aquel tolondru: nin na universidá, nin nel barriu, nin nel vecindariu, nin na familia, nin so padre, nin so hermana y muncho menos la muyer que-y enseñó tolos secretos la vida, so madre. Tampoco en Log yera que supieren muncho d’un home que respondiere a Cloyu. Apaeció un illumináu que se facía llamar el Xamán de la Sapiencia qu’aseguraba que tuviere perbaxo de Log, el conceyu les mil cueves acordies a les sos cuentes, y que dicía tener atopáu un llugar onde s’ascondía tola sabiduría de los ancestros de la isllalla*. Punxo una consulta sicolóxica en Alkazán, la capital de Log y una les dos ciudaes, invirtió nel so escalabráu periódicu y espublizó na so imprenta abondos llibros d’autoayuda que se vendieron a tutiplén en tou Cordobello. Yera más, yeren llibros de consulta na Universidá de Cloyu y la so coleición completa enllenaba les estanteríes del so barriu, del so vecindariu, de la so familia, de so padre y la so hermana. A la que nun engañaba yera a so madre, enxamás nun se lliga con llibros.

*Isllalla: La isllalla tien forma circular cola mar nel centru y rodiada per montes y d’una borrina que l'atapa de cualquier mirada esterior.

EL 3 DE SETIEMBRE TÓRNASE A ESPUBLIZAR LLUNES Y XUEVES. ACABÓSE LO BUENO.
.

ESANICIU DEL AGUA

 

 

La nuesa mar perdió l’agua

nuna primavera ensin lluvia,

nuna señardá ensin tristura,

nun apegu apalpayáu,

nun abandonu.

La nuesa mar perdió l’agua

nuna cadena ensin esllabones,

nuna reña ensin voces,

nun agasayu agrín,

nun escaezu.

La nuesa mar perdió l’agua

nuna ama ensin quintana,

nuna oración ensin rezu,

nun cariñu canaya,

nun desamor.

.

LOS XUGUETONES D’AXÁ

ENLLAZA COL MAPA DE CORDOBELLO SI LO QUIES VISITAR

“Arguyosos” fo la primer pallabra que salió de la boca de los foriatos pa definir a los llariegos d’Axá. Al llegar al conceyu nin los miraron, nin-yos falaron y, lo que tovía yera peor, nin los criticaron. Teníen la sensación de ser bisarmes qu’andaben penando per metanes d’un mundiu ayenu a ellos, un mundiu que nun los quería y que nun-yos perdonaba que tuvieren nél.

De mano, nun gorgutaron. Pasu ente pasu, entamaron a dictar normes que nun yeren ascuchaes polos llariegos. Siguió l’intentu de poneles en práutica. Llegaron a llantar multes a los que nun les cumplieren. Pa lo que sirvió, tratáronlos como bisarmes. Los llariegos nun camudaron nin un migayu la so actitú. Auténtiques bisarmes. Movíense pel conceyu como si nun tuvieren los foriatos. Bisarmes que nun metíen mieu. Reíense, charraben, folixaben… ensin cuntar con ellos; nin pa bien, nin pa mal. Bisarmes coles ñarres encarnaes de payasu.

Llamaron a los sos xefes na capital de la isllalla. Pensáronlo muncho enantes de facelo, decidiéronse porque sedría más fatu permitió-yos que se salieren cola suya y les coses llegaren a un puntu nel que malpenes hubiere retornu. Dende Bellobello unviaron la policía. Los llariegos d’otres zones teníen muncho mieu a la policía, llevaben armes y ellos nun les conocíen; el primer disparu en Cordobello fízolo un foriatu. En Axá les armes nun amedrantaben a los llariegos. Los policíes asemeyaben llevar unes ñarres de payasu más grandones que los demás foriatos. Nin miraben pa ellos.

Una mañana, un policía alloqueció y salió de la comisaría col arma cargada. Entamó a disparar al aire. Como si cantare un carru, aquello nun diba con ellos. Apuntó a los perros y gatos que pasaben pel so llau. Los mui castrones nun movieron nin una niñina. Llanzó una rabasera pa onde más llariegos había. Ún d’ellos escomencipió a cayer cuando s’esaniciaron toos, desapaecieron, nun había nengún llariegu na llocalidá.

Tardamos en decatanos qu’aquello yera un xuegu. Agora tocába-yos a ellos ser invisibles. A nosotros tocábanos el papelón peor. Yeren tan amables que nos dexaron ser invisibles primero y nós nun lo supimos valorar. Nun sabíemos la razón, pero abultábanos qu’ellos taben mui avezaos a xugalu y díbemos a tardar en ser de nueves invisibles.

.

ALDOVÍNALU

Güei vamos tocar una actividá curtia que tien grandes dosis de motivación: vamos aldovinar animales faciendo 20 preguntes de Sí o Non. Pa ello vamos trabayar estes perífrasis verbales:

-          Ser a + infinitivu

-          Tener (de) + infinitivu

-          Dexar de + infinitivu

De mano taría vien que-yos punxeres na pizarra exemplos de les perífrasis verbales en preguntes:

¿Yes a xubir a un árbol?

¿Tienes de comer pela tarde?

¿Dexes de dormir al oyer peligru?

En cuantes les garren bien tienen de xuntase en grupos y preparar bateríes de preguntes pal xuegu. Tu deberíes de pasar por cada grupu y dir corrixendo los posibles fallos. Entama’l xuegu nel que nun taría mal que los grupos copiaren les preguntes que faen los otros p’asina guardales pa otra ocasión. Sortéase un grupu que sal y escueye un animal pa que los otros seyan a acertalu. Depués de la rempuesta de Si o Non, el grupu que fizo la pregunta tien turnu de rempuesta. Si depués de venti preguntes nun se ye a contestar, el puntu d’acertar l'animal queda pal grupu que lo propunxo. Si dalgún lu acierta, el puntu va pa esi grupu. Gana l’equipu que más puntos tien.

Nin que dicir tien que se puen emplegar otres perífrasis o otros grupos de pallabres. Al gustu del consumidor.

Pa finar, cada neñu tien de facer un animal de los que salieron na clas nuna cuartiya: faen el so dibuxu,  falen del animal emplegando les perífrasis verbales, órniase curioso’l trabayu y pónse na paré col restu. Nin que dicir tien qu’estos trabayos caberos sirven pa evaluar a los rapazos.

Güei fo cenciellu, la próxima quiciabes nun lo seya tanto. Yá veremos. Alón.

.

EL MAGU DE GOLTÓI

ENLLAZA COL MAPA DE CORDOBELLO SI LO QUIES VISITAR

Nun se yera a desplicar si se cuntaba namái con un magu que vivía la carrapotada d’años o yeren dellos los que s’espardíen nel tiempu, el casu yera que dende hai muncho se falaba del magu de Goltói. La so fama enanchábase per tolos conceyos* de Cordobello y la so maxa dexaba clisáu hasta’l competidor más gallu. Sicasí, hebio d’asperar a la llegada de los foriatos* pa saber de la so sapiencia más ablucante y que naide nun fo a superar.

La maxa siempres emprimaba asina, con aquello de qu’en delles cases de foriatos apaecía un escritu que deseguida llamaba l’atención de dalgún de los sos habitantes. A ésti presentábase-y el conteníu de la forma más afayadiza pa la so llectura: lletres grandes o pequeñes, a papel o informatizáu, con ilustraciones o non, a ún o dos o tres espacios,… El casu yera que quedaba empapiroláu col testu y nun yera a dexalu nin anque viniere una plaga de sacaveres dulzayes que nun-y ficieren más que rebelguinos per tol cuerpu. Entós cayía nel fechizu: él nun albidraba lo que-y taba a pasar pero nel so interior ruxía un burbús que diba de les tripes al fégadu, d’ésti pa los pulmones y d’ellos pal reñón, y otra vuelta a entamar. Cada sílaba, cada pallabra, cada fras de la historia camudaba dalgo nel interior del foriatu ensin qu’ésti sintiere un rispiu d’ello, yera l’espíritu de les lletres qu’invadía’l so cuerpu. En tres díes tresformábase dafechu en vacalloria  con complexu d’esculibiertu tuertu, anque más cegatu taba’l foriatu que nun yera a decatase de nada y continuaba pensando que yera la mesma persona: un humán de gran consideranza y perimportante postín. Namái los llariegos veíen los efeutos del fechizu acordies diben asocediendo y riín la fazaña a fartar.

Home, saliéronte les patuques. Esta tardi, o quiciabes mañana pela mañana, saldrante les ales. Vas vien, foriatu. Anque dexes de lleer la historia el fechizu yá fizo’l so efeutu. Nun apartes los güe…

*Conceyos: división alministrativa de Cordobello que taba enraigonada cola so división cultural si quitamos el conceyu de Talagate (Eclipse nel cordobellés antiguu), inventu de los foriatos pa facer la so zona de vacaciones. Esta invención garró tarrén de los conceyos de Tala y Gate  (Lluna y Sol na llingua los vieyos), quitándo-yos la mar y dexándo-yos les tierres más probes. Angüañu ficieron d’elles auténtiques maravíes.

*Llegada de los foriatos: Nesti tarrén espárdese una dulda pergrande de cómo llegaron y per ónde. Namái se conoz la so xubida al poder meteórica debida a que metieron armes na isllalla, onde nun se conocíen.

A partir de la selmana que vien, y a lo llargo de tou agostu, esti blog va espublizase namái que los xueves. Nun hai como'l branu pa vaguear.

.

CÓPULA

Albidraba la so presencia

ente’l silenciu l’amor.

Dos.

Dos cuerpos.

Dos sentimientos.

Dos llabios zarrando los espacios

d’abiertos caxellos.

Dos miraes buscando a estayu

los panales del cariñu.

Dos,

el zánganu y la reina,

copulando a escondíes

de la

xixi-

lan-

te

c

o

l

m

e

n

a

.

LOS ELEFANTES DE CROSA

ENLLAZA COL MAPA DE CORDOBELLO SI LO QUIES VISITAR

L’elefante en Cordobello yera un animal raro que namái s’atopaba nel conceyu de Crosa. Pa los sos vecinos yera como un animal sagráu: respetábenlu abondo, dáben-y de comer lo meyor de la casa y agradecíen-y tola ayuda que-yos prestaren. La so costume de nomadismu faíalo desapaecer tres meses al añu nos territorios que taben al otru llau de la borrina*, fechu que los enllenaba de misteriu y daben pie a la mayor fiesta de Crosa.

La primavera taba pa finar y los elefantes preparaben el so viaxe p’alló la borrina. Los llariegos* taben atristayaos y preferíen nun velos colar poro que baxaben de los picos de Crosa y diben llevar les primeres frutes pa la mar, nel conceyu de Lan. La folixa que montaben yera sonada como tolos años pero nun-yos salía del alma. Baillaben, pero nun blincaben; cantaben, pero nun dicíen; celebraben, pero nun convidaben… Faltáben-yos los sos collacios, los sos fiadores del alma, los qu’agasayaben los sos oyíos colos soníos de les xiblato-trompes, los sos cuerpos col mugor que se produz al treslladar los arboles peles biesques camín de los ríos, la so confianza cola amistá regalada pola presencia, cola vida. Yera grande la folixa pero nada en comparanza cola qu’entamaben a la vuelta de los paquidermos.

Hasta vien pasáu’l branu nun organizaben la torna, la folixa con lletres grandones y mui reondes. Llimpiaben hasta lo más blanco, engalanaben hasta les guirlandes, acuriosaben hasta los coxinos d’estrenu eternu, agasayaben hasta los foriatos siempres enfocicaos,… Y ehí tuvo’l gran problema, los foriatos enteráronse de la celebración y quisiéronla namái pa ellos solos. Mandáron-yos finar de facer los últimos arreglos pa la fiesta, diéron-yos órdenes de contruyir palcos onde se sentar pa tar cómodos y señaláron-yos el camín pa salir del prau de la fiesta onde nun taben convidaos. El desconsuelu fo pergrande. Les llárimes nun dexaron d’espresar duelu.

Tornaben los elefantes, colos sos glayíos allegres, llamando a los sos collacios los llariegos pa qu’acudieren al prau de la fiesta. Pasu en pasu resoplaben afinaes les sos xiblato-trompes n’honor a los sos amigos. De sópitu, vieron el so prau valláu p’ellí onde miraren, hasta per onde entraren taben a pesllar con una puerta de madera preparada pal eventu. Arrexuntáronse toos nal praón que con tantu palco quedó en praín, dirixeron los güeyos a aquellos estraños que los arrodiaben, cavilgaron en qué facíen aquellos homones nel so alcuentru colos amigos, decatáronse de que los llariegos nun taben ellí y entamaron a encabritase. Dieron coles pates nos pegoyos de los palcos pidiendo salir del prau. Los foriatos, pensando que yera parte del ceremonial entamaron a aplaudir y llanzar los sos típicos petardos y cohetes de fiesta. Los elefantes, enraxonaos polo que cuidaben que yera un ataque, dexaron de pidir amablemente y golpiaron con tol puxu aquella cárcele de madera. Los sombreros, les sombriyes, los catalexos, los perifoyos,… emprimaron a cayer peles furaques del palcu, los petardos y cohetes dexaron de sonar pa dar paso a los güeyos arreguilaos, les carcaxaes achantaron y tresformáronse en glayíos, la seguranza del fatu viose esmigayada pol miéu’l cobarde,… Los pegoyos afloxaron mansulinos y los palcos esbarrumbáronse como fueya seco. Los foriatos gastaron les poques fuerces que-yos quedaben en llevantase y correr, zarapicando una vuelta y otra más con tolo qu’atopaben pel camín. Los elefantes escorriénronlos a tou meter, garrábenlos coles sos trompes y llanzábenlos al cielu onde se cruciaben unos con otros nun mecigayu de saludos de cortesía; cayíen arrollicones pela llamuerga que se diba formando y espatuxaben como llocos pa llibrase de ser pisaos poles pates xigantes de los paquidermos; volvíen a llevantase toos ufanos pa ser garraos de nueves poles trompes y llanzaos otra vuelta lloñe de la tierra per dalgún tiempu. Los paquidermos nun pararon hasta que nun  salieron de Crosa tolos foriatos pa nun volver enxamás.

Los elefantes, al xirar pa los picos, vieron a los sos collacios los llariegos asperándolos gayoleros con bolses y bolses de cacagüeses. La nueche fo llarga y la tradición cambiante, los llazos d’aquellos llariegos colos elefantes fo de tal grandor qu’en Crosa nun se yera a pensar a ún ensin l’otru. La vida tornó a ser pacetible y les fiestes fueron más frecuentes.

* Borrina.- Nun escaezamos qu’una isllalla tien nel centru d’ella la mar y a los llaos los picos que finen nuna borrina que los llariegos enxamás nun trespasaron y a la que-y tienen dello respetu.

*Llariegos.- Autoctonos de Cordobello, la isllalla onde se desarrollen los nuesos cuentos.

.

SOMOS MARCIANOS

Güei vamos trabayar con Marte, el planeta qu’abrió la imaxinación de xente a esgaya y que nos va ufrir abondu trabayu nel aula. De mano, hai que da-yos a los neños el testu de la Uiquipedia que vien en http://ast.wikipedia.org/wiki/Marte_(planeta) y dexar que lu llean. Tres d’ello entamamos a falar colos rapazos hasta llegar a Percival Lowell y la so teoría, d’ella queremos partir: Marte como planeta vivu. Los oxetivos de toa triba negociaranse colos rapazos acordies a les necesidaes del trabayu y la so duración. Les xeres de vocabulariu, gramática, imaxinación,… diran surdiendo acordies salgan en clas y sirvan pa llevar p’alantre l’actividá. Equí fantasearáse con una riestra de finxos pero pueden ser munchos otros y de triba mui distinto. Vamos facer una simulación, asina qu’abrochaivos los cinchos que vamos salir pa Marte.

De mano, pa que vaigan aterrizando, sepártense en grupos y caún d’ellos tien de facer una parte d’un estudiu al rodiu la natura en Marte: animales, vexetales, clima, relieve,…, cada grupu garrará a suertes la parte que-y toca y a trabayar la simulación. Entámase y fínase tolos díes con una miniasamblea que coordina los trabayos y fae que nun haiga desfases ente ellos. Quiciabes la primera tien de durar gran parte de la clas pa desplica-yos qué ye una simulación y llegar a unos alcuerdos de trabayu pautaos. Pasu ente pasu, la imaxinación tien de inventar tou un mundiu nel planeta roxu y facer realidá lo qu’enantes yera inimaxinable. Tolos aspeutos gramaticales o de vocabulariu trabayaránse d’una mena práutica y acordies vaigan surdiendo. Una vegada finau l’estudiu,  cada grupu presentará’l so trabayu a los otros grupos y pondránse espuestos nun requexu del aula pa que seyan consultaos cuando faiga falta. Tres d’ello, y en coordinación con manuales, prepárense papeles continuos con escenarios marcianos y llantaránse fuera y dientro del aula.

Otru trabayu puede ser el tipu de cases marcianes, onde cada grupu fae’l so prototipu ya inventen aparatos llétricos que faen la vida en Marte más cómoda. Tienen de referver eses cabecines y a los dibuxos acompáñenlos les desplicaciones escrites y depués de pallabra coles sos presentaciones a los otros grupos. En cada requexu la clas tien de llevantase una casa (siempre cola ayuda de Manuales) y el grupu tien d’escenificar cómo ye la vida n’ella. Tienen de preparar los testos, ensayalos y representalos. El nuesu trabayu va ser mui cansu, vamos correxir nel aula los erros qu’haiga y malpenes vamos tener tiempu. Si se ve necesariu, faerase un estudiu gramatical específicu n’ocasiones contaes.

¿Qué medios de tresporte hai? Los que la cabecina seya a ellaborar. Cada grupu prepara ún que tien de servir pa viaxar pel espaciu. Debuxos o trabayos de toa triba (Manuales) servirán pa exemplificar el funcionamientu de cada mediu que tien de ponese per escritu y presentase oralmente na clas. Agora vamos viaxar n’ellos: tenemos de preparar los pasaportes y los billetes de cada vehículu. Vamos escenificar cómo mercamos los billetes, cómo pasamos pol mostrador d’equipaxes, cómo dir a la puerta d’embarque onde tenemos de presentar los pasaportes y los billetes, …

Y asina podíemos trabayar tol mes, trimestre o añu, acordies queramos afondar. Ellos son los que deciden qué facer, poro que ye posible tener tantos resultaos como aules nes que se fae la simulación. La llingua oficial en Marte ye l’asturianu y va emplegase a toes hores, qu’al fin de cuentes ye lo que deseamos.

.

LA CIENCIA DE GANTÁN

ENLLAZA COL MAPA DE CORDOBELLO SI LO QUIES VISITAR

Al llegar los foriatos* camudóme muncho la vida. La investigación en Cordobello* yera equilibrada cola natura, de fondu raigañu na tradición y con munchu procuru de nun fadiar a les persones. Nengún de los plantegamientos fo respetáu polos invasores que ficieron goña de les nueses creyencies y namái amiraron pa les ganancies como únicu camín pa xustificar la esistencia de la Ciencia. Camudaron abondo más que les formes, el físicu tamién lo fexo a estayu. Les valles crecieron y crecieron, enancháronse y enancháronse, siendo mui abegoso penetrar nos nuesos llaboratorios. Los rexistros nes abondoses entraes poles que teníemos de pasar ficiéronse más y más aforfugantes. Pasiquín a pasu tresformóse d’una fabriquina onde se trabayaba nos grandes descubrimientos de la isllalla a una factoría descomanada na que se producía les sos allucinaciones.

Les mañanes dexaron de ser lo meyor del día pa nosotros y tornáronse en dalgo tristayu y cafiante. Teníemos unos xefes que nun estremaben ente un estudiu de bioloxía y ún de televisión, ente una probeta y una pipa pa destilar güisqui. Llegaben cola so arrogancia sebosa y pidíente les xeres más ablucantes nel tiempu más curtiu enxamás nun pensáu, tratábennos como si fuéremos neños d’escuela y tuviéremos falta de tener al maestru tol día enriba nós. Amiraben los nuesos trabayos coles gafes de nun ver, xubiendo y baxando los güeyos acordies diben pasando les fueyes y carraspiando pa meter duldes nes nueses cabeces, siguiendo los vezos del que nun sabe nada. Entamábemos a tar un migayín fartos d’aquella situación na que nun podíemos trabayar nos temes que nos prestaben y por embargu teníemos de sacar alantre les sos babayaes d’última xeneración. Aquella tarde fo la escoyida pa facer l’asamblea de científicos que diba dar un xiru a tou aquel mecigayu y ellos nun taben convidaos.

Al día siguiente fichamos na carrapotada entraes que teníemos de pasar como si tuviéremos adormecíos y malhumoraos. Colamos pa los vestuarios pa nun llevantar sospeches y preparamos ellí los nuesos planes. Arrancharíemos con tolo que nos estrozaren a lo llargo d’años y tornaríemos a los tiempos d’enantes. De mano escoyimos un inventu fácil, entamamos con un “descargador de voltios seleutivu” que fizo que los nuesos xefes se lo pensaren mui muncho a la hora averase a nós. Dirixíase’l maquinón a la parte del cuerpu que deseares nel enemigu, apertabes el botón de disparu y el foriatu sentía como la so cadarma se desestabilizaba, quedándo-y el so organismu xamuscáu pola descarga y la so alma perdida. Yera tan simplaya l’inventu que malpenes tuvimos faciéndo-y axustes una selmana.

Pasamos a dalgo más complicáu y con perspeutives más bultables, “l’empalagador de deseos”. Tuvimos de face-y munchos axustes colo que duró dalgunos mesucos l’esperimentu. Nosotros queríemos qu’a los foriatos-yos refalfiaren toles órdenes que nos daben pero tal fo’l resultáu que tuvimos de llanta-y un mandu onde se recoyeren toles opciones d’aplicación que fueren surdiendo y tuvimos de cambia-y el nome pol de “l’esmoledor en deseos”. Nun facía falta qu’ellos vinieren pa nós, al final apuntábemos col aparatu y los probes foriatos veíen como se-yos esmigayaben los deseos quixeren o non danos una orde. Nin que dicir tien qu’esportamos la idea a otres factoríes de la isllalla.

Güei entamamos col “esaniciador de fatos”. Va ser l’acabóse. Ye tala la gana que tenemos que llegamos toos con más de media hora d’adelantu. Ver entrar a los nuesos fatinos con cara escuchimizaos va prestar a esgaya. Lloñe queden aquelles espresiones de rellambíos, agora fuxen de nós como llagarteses y paecen tenenos mieu. Estos neños deprienden ensiguida. Nun hai dulda dala que ya saben qu’ellos lleven les de perder y que tol tiempu que tuvieren de llistos foriatos fue de prestao. Pero voi callar, yá lleguen y nun me lo quiero perder. Enteraréisvos del resultáu pola prensa. De xuru.

*Foriatos: invasores de fuera la isllalla.

*Cordobello ye una isllalla, un piazu tarrén cola mar nel centru d’él y nel so esterior unos picos pergrandes que finen nuna borrina qu’enxamás fo trespasada por dengún home la isllalla.

.

YO Y TU

Chimenees

qu’arrequexen nes coraes el fumu del camarzu,

que pinguen arguyoses el presumiciu del corazón

y aselen el tendal amorosiegu de la vida.

Alimenten

col so arcu la vieya serondiegu

les pallabres marmullantes de valtar fino,

l’orpín abellugáu de mirada murnia,

de ti,

de mi,

de nueso.

Tu y yo.

Yo y tu.

Xuntos nel molín

de la soledá gociosa.

Chimenees

qu’apalpuñen los amarellentaos cristales del sentir carnal,

qu’esconsonen borrines enfocicaes de rabia rancio

y circulen nuna armónica figura enriba l’aire.

Atayen

los arumes de la mar

blincando de fola en fola,

de deséu en deséu enllenu de lluz,

de ti,

de mi,

de nueso.

Tu y yo.

Yo y tu.

Xuntos nel molín

de la compaña señardosa.

 .

EL MONSTRUU DE FELÓI

ENLLAZA COL MAPA DE CORDOBELLO SI LO QUIES VISITAR

Vien de vieyo la historia que se cunta del monstruu de Felói. Hai quien diz que la so vieyura remóntase a enantes de que naciere nesti mundiu la isllalla. Otros nun lleguen a tanto y aseguren que malpenes Cordobello echo a andar el monstruu apaeció y metióse na tierra al calorín del magma. Hubo d’asperar a los tiempos de Sel y el so Llibru la Vida pa ser a atopar testimoniu escritu d’esti bárbaru, onde apaez tamién el so nome, Alarol, denominación qu’amedranó a los cordobellonenses a lo llargo’l tiempu. Tovía güei remueve les tripes de la xente cuando se-y menta. Sicasí, naide  nun ye a cuntar que lu avistare, que lu viere direutamente, siempres foron otros los que tuvieren la mala o bona suerte d’alcontralu.

Xandro fo un aventureru que se propunxo ser testigu de la presencia de la bestia ya intentar metela nuna xaula nel que llevala al zoolóxicu de la capital Gamusín. La so partida remembraráse nos tiempos: homes, muyeres y neños enllenaron les cais de Fel, la capital de Felói, pa glayar gayasperos la fazaña d’aquel home como si la tuviere finao en cuentes de dir entamala. Xandro llevaba una llista con una recatafila de llugares onde la tradición oral aseguraba l’apaición del Alarol y qu’emplegaría na so búsqueda. Dicía qu’emprimaría pelos paraxes onde se cuntaben más histories del monstruu y finaría por aquellos requexos nos que malpenes se marmuraba la so presencia.

L’aventura fue a siguise per un periódicu de Cordobello al que Xandro-y dio la esclusiva y del que sacaba perres a esgaya como soldada qu’enllenaría los sos bolsos de sabiduría económica. Los llectores fueron testigos d’apavoriantes indagaciones nes que la vida del andariegu tuvo en peligru abondo y na que se golifaba la presencia del Alarol.  Por embargu, los sos posaderos alcontráronse con un Xandro folixeru, que-y prestaba les llacuaes y que nun perdía oportunidá pa xuntase con dalguién del pueblu y esfrutase dambos carnalmente. Desiguida se finó la subvención del gobernín de Cordobello, tornó al so apartamentu del que cuasi nun salió, siguió la vida col dineru de los sos artículos del periódicu que de mano lu diben xubilar y amigóse cola so familia pa que-y truxeren comida. Col tiempu dexó de mandar los escritos al afamáu diariu, d’averar notuques a la so familia colo que necesitaba pa enllenar el bandullu y de visitar la carne que tantu lu perdía. Los vecinos entráron-y nel apartamentu delantre’l mal golor que d’él salía, atopando’l so cuerpu ensin vísceres, colos güeyos tiraos na papelera al llau del periódicu de les esclusives y con un empalmazu descomanáu como yera costume nél. Los funerales duraron tres díes, talamente como se facía colos héroes, nos que lloraron la so partida y remembraron la so valentía. Na muria na que s’escribíen los nomes de los muertos pol Alarol recoyó’l suyu y la tristura espardióse pela isllalla durante díes.

Nun quedría finar esta historia ensin dicir que l’Alarol, talamente como se recueye nel saber popular, nun esistió. Dexémonos de mitos. Cuando l’home entamó a falar de la so persona, l’Alarol viose obligáu a prauticar el mimetismu y tresformase nuna especie d’humán que solo los otros alaroles son a estremar. Dixi bien, alaroles en plural, porque son seres hermafrodites que se reproducen dos vegaes na vida, quedándose estériles el restu’l tiempu. Namái maten por necesidá o por aburrición. Yo maté a Xurde por necesidá, por guardar el secretu del mio hermafroditismu violáu.

.