2 ago. 2012

ALDOVÍNALU


Güei vamos tocar una actividá curtia que tien grandes dosis de motivación: vamos aldovinar animales faciendo 20 preguntes de Sí o Non. Pa ello vamos trabayar estes perífrasis verbales:

-          Ser a + infinitivu

-          Tener (de) + infinitivu

-          Dexar de + infinitivu

De mano taría vien que-yos punxeres na pizarra exemplos de les perífrasis verbales en preguntes:

¿Yes a xubir a un árbol?
¿Tienes de comer pela tarde?
¿Dexes de dormir al oyer peligru?

En cuantes les garren bien tienen de xuntase en grupos y preparar bateríes de preguntes pal xuegu. Tu deberíes de pasar por cada grupu y dir corrixendo los posibles fallos. Entama’l xuegu nel que nun taría mal que los grupos copiaren les preguntes que faen los otros p’asina guardales pa otra ocasión. Sortéase un grupu que sal y escueye un animal pa que los otros seyan a acertalu. Depués de la rempuesta de Si o Non, el grupu que fizo la pregunta tien turnu de rempuesta. Si depués de venti preguntes nun se ye a contestar, el puntu d’acertar l'animal queda pal grupu que lo propunxo. Si dalgún lu acierta, el puntu va pa esi grupu. Gana l’equipu que más puntos tien.

Nin que dicir tien que se puen emplegar otres perífrasis o otros grupos de pallabres. Al gustu del consumidor.

Pa finar, cada neñu tien de facer un animal de los que salieron na clas nuna cuartiya: faen el so dibuxu,  falen del animal emplegando les perífrasis verbales, órniase curioso’l trabayu y pónse na paré col restu. Nin que dicir tien qu’estos trabayos caberos sirven pa evaluar a los rapazos.

Güei fo cenciellu, la próxima quiciabes nun lo seya tanto. Yá veremos. Alón.


.

2 comentarios:

alloriau dijo...

Hola compañeru, convídote a visitar el mio nuevu blogue que voi dir poniendo en marcha pasín a pasu. un saludu candial!

alloriando.blogspot.com.es

Adivín Serafín dijo...

Yá yera hora. Hai della xente a la que se vos echaba de menos. Yá tas nel llistáu d'enllaces. Saludos.