COSES DE CORDOBELLO

MARA

Ello yera una vez una muyer que vivió 437 años y en nengún d’ellos hebio home que s’acercare a ella con gustu. Fo la señora d’aquel conceyu, que recibió’l nome d’ella, y mandó sobre tolo qu’asocediere na so rodiada. Bien de neña, entamó a decatase de les miraes que-y llanzaben los sos súbditos: de llástima unes, d’odiu otres, de sufrimientu les más. Nenguna d’elles naguaba por tar al par d’ella, anque yera la Conseyera más dolce y bona qu’enxamás tuvieren.

Mara quedó ensin pás mui mocina y avezóse a dirixir los sos territorios con xusticia. Naide la contrariaba, por mor de nun alcontrase al llau d’ella. Los sos pies soltaben un arrecendor que golíase delles milles xunto a la so persona. Llevantábase y atopaba la ropa iguada na siella, el bañu tresnáu coles sos sales y les sos colonies, l’almuerzu preparáu na mesa y la llista de xeres del día apegada na puerta. Siguía la xornada coles coses feches pero ensin ver a naide. Cansa, escondióse nun armariu y asperó hasta qu’aportó la mañana. Una doncella púnxose a coyer el so traxe cuando-y salió al camín, entrugó-y la razón d’aquella soledá y díxo-y que nun almitía rempuestes evasives.

-De la que nació, la comadrona dexóla sola na antoxana. Pasaren los gochos pa la so corripa y ún d’ellos entamó a llambe-y los pies , el so golor quedó-y pegáu dende entós.

-¿Y por qué nun lo güelo yo?

-Quedó dende bien neña ensin el sentíu l’olfatu…

Mara coló de la capital, dexando’l Conceyu en manes del so hermanu Xolu. Desiguida´l pueblu la echó a faltar: impuestos grandes, xusticia pa los cabezaleros namái, trabayu a esgaya pa los probes con salarios amenorgaos,… Vivió nuna viesca llonxana, onde naide la viere. Asina pasaron los años, ún tres otru, ensin aparar. Nuevos Conseyeros gobernaron el Conceyu, siguiendo la tradición de Xolu. Ella diba en porriques, comiendo de les frutes que nacíen al par d’ella.

Un día llegó un Cuélebre al so Conceyu. Les perreríes corriéronse per tol territoriu. Fueron entós a la viesca a por corzos pa dá-ylos de comer al gañan. Cazáronlos vivos, como a él-y prestaben. Pasaron la nueche ellí, cuntando hestories del Cuélebre. Mara ascuchólos y decidió lliberar al so pueblu. Metióse pente los corzos y lleváronla nel carru xigante. Al llegar, el cuélebre parólos y entamó a comer los corzos. De la que taba nello, una voz entamó a canciar seliquino. El Cuélebre aparó de comer, una vieya salió y clavó-y nel pescuzu una aguya infestada. L’animal vocingló, movióse d’un llau a otru y pegó una dentellada a Mara, que morrió xunto a él. La xente’l Conceyu alvirtió qu’aquella yera la so Conseyera tovía viva dempués de más de cuatro sieglos. Sintieron la vergoña del que nun sabe da-y la fidelidá al que bien lu trata. Sicasí, hasta muerta-yos fizo bien. En tol Conceyu nacieron dende entós flores que naide nun conocía y qu’enllenaron l’aire de golores que naide nun ye a escaecer.