27 oct. 2009

EL BLOGPREDICADOR


Hermanos na fe, nun hai muncho que los nuesos ancestros colaron de la so tierra y finaron equí, nesta isllalla prometida. Nun hai que dicir que cuando llegamos nun había más que xente xabaz fozando pente’l cuchu y agora algamamos unos niveles de civilización pergrandes. Si nun fuere por nós, ellos taríen nun nivel de vida malpenes esistente, onde nun conocíen al so creador y dador de vida y nun teníen un gobiernu qu’axuntare a toos nun mesmu enfotu de llucha, l'algamar la riqueza de tola coleutividá tutoriada poles persones más capaces y cucies: los políticos y la ilesia. Ellos namái se tienen d’esmolecer en trabayar, dexando les coses series pa los gobernantes del espíritu y del cuerpu que van camudar los sos servicios en bienes. Nun habiendo dulda nel so progresu, tenemos d’amirar al nuesu futuru.


Cumplimos una parte del nuesu mandáu, llevalos pel camín del sacrificiu pa col nuesu Dios. Da-y al nuesu Dios la collecha de la tierra, que nós recoyeremos nel so nome. Agora hai que facer que los sos bienes se multipliquen, anque seya ufiertando la so vida probe y curtia. P’algamar esto tenemos de tar xuntos, dexar les nueses lluches y actuar como si fuéremos ún pol bien del nuesu Dios. Valió de guerres fates, d’engañifes azorollaes, de metes dixebraes. El nuesu Dios tara con toos nós si entamamos una sincera comunión d’hermandá y ente la xente de bona voluntá. Asperemos que les mios pallabres vos averen a la paz ente los homes de bon bautismu.

3 comentarios:

El Presidente de Cordobello dijo...

Toi dafechu d’alcuerdu col blogpredicador, paezme qu’hai de xubi-yos los impuestos a los manguanes de Cordobello. Non asina col puntu de trabayar al llau d’esos traidores que namái faen que destruyir lo que nós construyimos.

El xefe de la oposición dijo...

El blogpredicador esbarra si aspera que nós mos xuntemos a esos qu’esfarrapen la dignidá del home col so gobiernu. Veo bien que xuban los impuestos pa meyorar les nueses condiciones na cárcele.

Blogopredicador dijo...

Vamos pel bon camín, nuna cosa tán d’alcuerdo. Ye perimportante xubir los impuestos pa meyorar les condiciones de la Ilesia.