Si mires pal mundiu de los blogs n’asturianu ye asomeyáu al
de la política, la llingua, la música,… d’Asturies: probetayu a esgaya y d’una
tristura descomanao. Nun camudamos nin un rispiu d’un añu a otru, nun tenemos
idega de comuña y pensamos namái nos blogs del nuesu bandu, nun lluchando por
dalgo que diba cambiar el mundiu la llingua, porque pue democratizala y facer d’ella
un mundiu diversu pero amigu. Nun nos visitamos, nin dexamos la nuesa tarxeta
de visita que ye’l comentariu, nin publicitamos conxuntamente’l mundiu blog
ente los falantes… Dengún somos culpables d’ello pero tampoco somos inocentes.
Somos tan desdexaos…
Namái echar una güeyada a los blogs n’otres llingües vese dalgo
distintu y que tendríemos de cavilgar. En gallego hai más de 5000 blogs de faza
distinto: noticies, lliterarios, políticos, deportivos, musicales… Ente ellos hai conceutu de comuña,
coméntense, intercámbiense coses, nun tán aisllaos como nós. En castellán, ai
en castellán, hasta hai un mes tenía un blog lliterariu nel que tenía de 200 a
300 visites y ente 30 y 40 comentarios a una entrada (los comentarios fueron
nos últimos tiempos, enantes taben ente 20 y 30 y enantes ente 10 y 20…).
Decatábeste del cariñu que te teníen, unviábente e-mails, había un blog
coleutivu de tolos microrrelatistes, había quedades,… Nun pido que n’asturianu
seya idénticu, namái que se faiga comuña. Diréis: “Si yera tan guapo, ¿por qué
nun te quedasti ellí? Porqué soi
asturianu y tengo señardá de la mio llingua, de les coses de mio. Fo una
esperiencia perbona pero dalgo me faltaba.
Tán guapos los blogs de política o de llingua, pero fai
falta más, más variao… Ónde tán aquellos blogs lliterarios de Pablo Antón Marín
Estrada, de Berto Cobreros,… Fai falta esperimentar cola llingua, facer que los
asturianos s’avecen a lleer nel ordenador lo que se-y niega nos llibros,
televisiones, radios,… Hai poco tuve la suerte d’entrar nel blog de Skancia y
ver coses afayadices, gocié como un verderón, imaxino qu’hai más esperiencies d’esa
triba pero entá nun les conozo, pero fai falta dexar la tarxeta de visita,
dexar el comentariu, dicir toi equí gallu, sígote y préstame lo que faes. Yá ta
bien de falar l’asturianu del nuesu portal, de lleer el blog del nuesu café, de
namái saludar a los nuesos amigos,… Asturies necesítanos a toos y la xente de
los blogs tenemos de dexar de ser tan parciales..
3 comentarios:
Bona entrada collaciu... lo míu pocu tien de lliteratura, jeje. Pero que sepas que sígote y ties tola razón... los comentarios... son la plizca d'allegría que faíte lluchar con otra entrada a la que-y eches un trabayu grande o al menos a mi cuéstame muncho tiempu.
Un abrazu
Hola Adivín: davezu lleemos a los demás, pero nun mos da por comentar, o andamos permal de tiempu. Sí ye verdá que tamos cada día más esclerotizaos y cada día como comunidá somos una cosa de lo más sectario y gafiento. Cuando son blogs mui políticos, el de mio, p.e., davezu entren los comandos trolleadores, y empiecen llámente "nazi" o coses peores. Yo yá pesllara´l míu , yá históricu, con Blogia, porque llegué va un añu a la conclusión de que la xente de mio país nun tien igua, que nun esiste llibertá de pensamientu, qu´al que piensa llibre y piensa distinto hai que dir a por él. Mandé durante un tiempu esti mundín a tomar vientos (como me paez que ficiste tu tamién), pero volví, yá ves, masque sía pa dar de rabiar. Un abrazu y a siguir.
Gracies Berto Xuan y Carlos polos vuesos comentarios, eso ye lo que fae falta n'asturianu y n'Asturies, xente echada p'alantre capaz de animar a la xente a participàr faciendo blogs porque van tener xente que dé la cara y los anime. Van 48 visites y sigue la cosa p'arriba, la xente tien de dexar la comodidá y entamar a lluchar pol asturianu faciendo comentarios.
Publicar un comentario