SENSACIONES

ESCONTRAMOR

   P
    i
     n
      g
       a
        n
         d
          o

                 gotes

                                 d’
                            a
                              m
                                 o
                                   r

                                                  en metanes del

                                                                                          e
                                                                          r
                                                                            m
                                                                               u.

COSES DE CORDOBELLO

GOLGÓI

Golgói dicíen los neños cuando él pasaba. Golgói esprecetaben los vieyos cuando los miraba. Golgói marmuraba la xente n’edá de guerriar cuando él los señalaba. Más qu’una pallabra, yera’l mieu abandonáu a la so suerte.






Xandru coyó’l ganáu y xubió pal puertu. El bon tiempu indicó-y el camín y él xibló gayoleru la canción del branu. La mayada vinó pa escontra él y l’arume a les flores de la rodiada trúxo-y l’alcordanza de la so soledá. Golgói aspéralu al par de la so cabaña.


-¿Pienses que te vas llibrar de guerriar pa min?


-Onde nun hai mieu nun vengas buscar.


-Yes testerón, rapaz. Diéronme vasallax to pá y to güelu y los dos morrieron con honor. Nun vas ser tu distinto.


-Nun sirvo nin a reis nin a señores de la guerra. Torna per onde viniste –y xirop’atender el ganáu.


Golgói sacó la so espada y mató al rapaz pela espalda. La risa llegó a los pueblos de más cerca. Golgói fue descansar nel castiellu pa depués dir buscar xente pal so exercitu.






Cobarde dicíen los neños cuando él pasaba. Cobarde esprecetaben los vieyos cuando los miraba. Cobarde glayaba la xente n’edá de guerriar, señalándolu col deu la muerte. Más qu’una pallabra, yera’l pueblu cuando se sulevaba.

100 ENTRAES, UN AÑU DE BLOG Y UN DESCANSU

Cola de güei llégase a les 100 entraes nesti blog: 100 entraes n'asturianu, en lliteratura, n'amistá y en llucha. L'asturianu nun ye OFICIAL y eso amuesa que tamos gobernaos por intrasixentes que nun dulden en desfacer Asturies, la so cultura y la so llingua.

Tamién cumple 1 añu esti blog: 1 añu d'esperanza, d'imaxinación, de llingua y de vida. Dientro los gobernantes que tenemos, la nuesa rempuesta ta siendo chiquitina, por nun dicir nula. Caún paez tener la única razón, la única pureza na llucha, la única verdá. Lo que vamos llograr ye que seya la única llingua que desapaeza porque los sos falantes seyan fatos.

Y agora vien el descansu. Esti blog tornará n'ochobre, fecha na que dalguna sorpresuca vos va ablucar, o eso aspero. Mentanto y non, ORBAYU SECO ta ehí pa que lleáis microrrellatos de la que faigo'l parón obligáu pola mio enfermedá.

Y pa dispidime hasta ochobre, voi dexavos con una seición qu'entamó hai pocu. Sensaciones tornará na nueva dómina al blog y aspero que lo faiga pa bien.

PERDÓNAME POR ESISTIR

Perdóname por esistir, por ser, por creyer, por amar, por tar. Perdóname por lluchar por vivir de la que la muerte me faló; cuando tu necesitabes el to mugorientu amor; cuando’l silenciu fue p'afogame. Perdóname por tener l’hombru amigu, el fueu onde m’escalecer, el pan col que m’alimentar. Yá nun tornaré a ti. Viviré. Amaré. Caleyaré. Sedré.

Llenzu Escritu 6

Mañana entrada 100, 1 añu del blog y descansu hasta ochobre.

JAZZ ACOMPASÁU

Aquel club enllenábase de fumos ilustraos y ritmos acompasaos nun jazz xabaz del sieglu XXI. Toles nueches acoyía al mesmu grupu que desllucía a tolos que se-y poníen per delantre na ciudá. Xubíen al escenariu y sosteníenlu coles sos notes d’almiración. De sópitu, sonaba’l saxo y tolos deos tamborilaben nes sos improvisaes meses. Yera la estrella. Yera l’almiración. Yera jazz.

El llunes estrenóse con ellos un trompeta. Naide nun lu conocía. Yera nuevu na ciudá. La so mocedá solfeaba los ritmos vieyos con arume tribal. Los espectadores dexaron de respirar sonoro y amiraron con medrana al saxofonista, figura’l club. Naide nun s’atreviere a tocar meyor qu’él. Los deos llanzáronse a camudar de metal. El saxofonista, enllenu vanidá, dexó escapar un silenciu qu’enxamas se tocare na ciudá. Dalgún ixuxú dexóse glayar, frayando a la trompeta’l so compás. El saxo acolumbrólu despreciatible, naide nun tocaba una nota ensin avisar. El trompetista camudó de llocal y ciudá. El saxo llucíase pente los babayos del llugar.

Ilustrador: Miguel Jiménez

ASESINATU N'ALMACENES STREET (3)

-Nun me digas que nun mos cayó del cielu. De mano nun camenté en tolo que mos vieno enriba. Xuncia y yo, en cuantes oyímos antroxar pela zona, xuntámonos a ellos. Enfilábemonos a cacharros. Díbemos cenar día tres día na Selmana Negra, en El Fifi, un mesón que por casualidá s’asitiaba al par de los chiringuitos que más nos prestaben, como tu bien sabes. Al tercer día, decatámonos que la so comida dexaba muncho que deseyar. ¡Qué raro! ¿eh?. El llunes llevantámonos, como dixeres, con una esforia que nun l’aparábemos nin con llavatives. Pela nueche anduvimos mansulinos a ferviatos y la mio muyer foi cocinar dalgo seliquino que mos tranquilizare, too diba bien. Díxe-y que yo xubía darréu y quedéme a beber dos cacharros nel Chafariz. L’agua santo nun ha de falta-y al católicu, sinón muerre. Ellí m’axunté a ti.

- Aquel día atopélos entrando pela puerta, yeren dos homes un migayín raros, y al día siguiente tol mundiu falaba del robu del quinto. Entós alcontrélos na sidrería les otres tardes, talamente paecía que taben faciendo tiempu hasta’l golpe que diben dar na nueche La idea aportó darréu a la mio tiesta. Desiguida cuntétela a ti. Como quien nun quier la cosa, fale col chigreru de la folixa que llevabeis cada nueche. Charramos que nun teníes mieu nengún a los lladruepos qu’andaben pela zona. Como quien nun quier la cosa, dixi les vueses señes.

-Fo l’acabóse. Tas en too. Los lladruepos nun dexaron d’ascuchate. Fueron robar na nuesa casa y la mio muyer atopólos. Amarráronla y dexáronla ellí. Yo dexéte nel Chafariz y fui pa escontra la mio casa. Tu veníes darréu tres de min. Entré, dexándote la puerta preparada pa que pasares. Dexé que fueres al nueso cuartu, punxeres los guantes y l’afogares. Tu coláste y yo asperé. Llamé a la policía depués d’un ratiquín. Avezaos a lo fácil, desiguida atoparon al par de lladruepos.

-¡Qué alcordances! Cuasi va más de venti años. Yá entós a naide nun-y estrañó que dos amigos se punxeren a vivir xuntos. Pero lo meyor ye que nun falemos más y vaigamos a la cama a facer lo que meyor mos sal.

ASESINATU N’ALMACENES STREET (2)

-Señor inspeutor, nos semos unos lladruepos que malapenes mos llevantamos unes perruques al mes. La nuesa esperiencia nel robu nun llega a dellos años. Siempres actuamos onde hai fiestes. Lo primero que facemos ye picar nos timbres del portal. Si contesten, entós colamos. Si naide nun respuende, entramos cola ganzúa. Xubimos a la casa, encargámonos de nueves de la puerta y garramos tolo de valor del llugar.

-Nesti casu, despesllamos la vivienda nun segundu, señor inspeutor. Na sala nun atopamos nada que pagare la pena llevar. Otra cosa fo’l cuartu d’ellos, taba enllenu d’alhaxes. Xustu cuando teníemos el sacu cuasi enllenu, dalguién entró. Punximos los verdugos. Una muyer allegóse al cuartu y amarrámosla con unes sábanes qu’atopamos y en faciéndolo, colamos.

-Pero, señor inspeutor, xurámos-y polo más sagrao que nos nun la matamos. Ella nun dexaba de facer esparabanes, poro que fuximos dando coles pates en culu. Lo nueso ye sacar cuatro perruques en caúna les cases onde vamos.

-Eso ye lo que cuntáis toos. Al vela, empixásteisvos y matásteisla. Nun fai falta que me cuntéis más fataes. Nel xulgáu ocuparánse de vos.

"ORBAYU SECO" SÚMASE AL ANIVERSARIU

Dientro los microrrellatos de "Orbayu Seco" hai tres que lleven el nome de la mio cai, poro que quiero sacalos nel primer aniversariu d'esti blog como parte d'él.

ASESINATU N’ALMACENES STREET (1)

14 de xunetu de 2008

Inspeutor Ánxel Barredos

Acordies al so maríu, el matrimoniu V.G. atopábense celebrando la Selmana Negra dende’l vienres, aprovechando qu’esti añu’l recintu ferial asitiábase nel so barriu y nun yeren a dormir. Cenaben toles nueches nel mesón El Fifi, poro que’l llunes llevantáronse con esforia. Sicasí, averáronse un migayín, tomando ferviatos en cuentes de cacharros. Ella fo a casa a facer la cena de la qu’él quedó nun café de la zona.

Mentanto esto asocedía, unos lladruepos entraron na casa, supónse p’agarrar tolo de valor que toparen. La policía hai tiempu que se decatare la so presencia en llugares de fiesta. Estudiamos los sos movimientos y la mena d’entrar nes cases. Esta vegada tuvieron de quedar estelaos al ver llegar a la muyer. Sogatiáronla con sábanes y siguieron col so trabayu. Dalgo asocedió, porque enxamás mataren a naide. Sicasí, ella apaeció muerta.

Prindámoslos a les dos selmanes nunes fiestes de barriu. Falaron del robu, por embargu nun llogramos que confesaren l’asesinatu. Con ello, pasámoslos a manes del fiscal.

ASINA ENTAMÓ'L BLOG

Esti ye l'aniciu del blog "Cordobello, un país mui aquello" hai un añu: el 10 d'agostu.

LA ISLLALLA DE CORDOBELLO

Toos oyimos falar d’islles, penínsules y continentes, pero cuasi naide sabe lo que ye una isllalla. De fechu, poca xente asitia nel mapa dalguna d’elles. Non, nun toi falando a lo xo cuando vos cunto esto, paezme que ye abondo serio la tema como pa tomalo a xirigoncia. Voi desplicávoslo darréu. Nel nuesu planeta hai más mares arrodiaos de tierra per toles partes amás del conocíu mar Muertu. Yá sé que vos suena raro, abultarávos que sedrán llagos grandonos en llugar de mares, pero ye tan verdá como que la Lluna ye’l satélite de la Tierra. Si conocemos la otra carauterística de les isllalles de xuru que sedremos a pescancialo. La isllalla tien forma circular y ta cercada por montes que l’atapen de cualaquier mirada esterior. Yá sé qu’anguaño cuntamos colos satélites artificiales que saquen semeyes a tolo que se mueva, pero la isllalla nun apaez en nengún. Diríemos que s’alcuentra n’otra dimensión si nun fuera porque si semos mui bonos montañeros pasamos los sos picos perfeutamente. Anque’l trabayu d’escalada ye abegoso por mor de la ñeve y el xelu que les cubren tol añu. Si llees esti blog, sedrás a deprender un migayín más de les isllalles.

LLENZU ESCRITU 5

MALTRATOS

Mialma que yes tranquilu. Insúltente, amenácente, rinse de ti, too ye metese contigo, y tu nun respuendes nada. La mio ma nun para dicir que tire esi moñecu felpeyón, que, cola dellos que tengo, namái mira pa ti. Si ella supiere. ¿ Quién me fizo compaña nes paperes, na escarlatina y toles gripes? Tu. Si nun fuere por ti taría tol día nes manes les criaes, como’l mio hermanu, pero ési anda a otres hestories. Anda que nun mos los arma’l mui castrón. Esplotó un petardu na to espalda que me fizo llorar y esgatuña-y la cara. Tovía-y queden marques. Acordies a la mio ma va ser pa siempres. ¿Y qué cuntar de mio pá? Nin mos pon cara. El so silenciu fainos más dañu. Bueno, non. El petardu fo más gordu. Anda qué fairía si nun tuviéremos un plan tu y yo. El mio hermanu sedrá’l primero. Hai que quitalu’l medio enantes recibir la herencia. Van saber quién somos.

Ilustrador: Miguel Jiménez

PENA MUERTE

El carceleru abre la celda y dexa salir a la comitiva. Entama una xera andariega pela prisión, na que’l carceleru, mentanto xira les llaves, sabe de la so culpabilidá pola forma mirar. Son munchos años trabayando nel corredor la muerte como pa dexar escapar esi detalle. El silenciu acolumbra la marcha’l reu. Asemeyen movese al compás a cada túnel que pasen. Al aportar a la sala na que va facese’l ritu, el carceleru xefe, con menos sentíu que la pega en rau, sabe tamién de la so culpabilidá. L’encargáu del botón, acordies lu mira, reconoz la so sonrisa de psicópata y compadezse del presu. El cura, con voz aforfugante, da-y la so bendición al reu. La muerte llega a rabeseres. El so cuerpu presu cola sele. La so mente presu apena. La so alma de fíu presu llora. La so caxa enllénase colos sos deseyos caberos. El psicópata torna a los sos oficios.

CANTANDO BAXO LA LLUVIA

Llenzu Escritu 4

Entrar nel estudiu fo sentime como una estrella de cine. Namái qu’un oficinista diba arrodiase de figurones de la interpretación. Ordenaría-yos les vides dende les mios cuatro muries: ónde rodaben, con quién, ónde firmaben los sos autógrafos,… Pasé per milenta casi llevantaes con andamios grandonos pa teneles de pie. Acolumbré hangares descomanaos nos que s’escondíen cases, hospitales, chigres,… Hasta que llegué onde m’esperaben los papeles la mio vida. Xusto ellí, nun requexín, un home baillaba de farola en farola bañáu en mangueres de lluvia. Nun abultaben filmalu. Naide nun glayaba: ¡Corten! Pero él nun aparaba de danciar, percorriendo les faroles y vuelta a entamar.


Diez años depués, naide nun desplicaba lo que facía aquel home ellí. Nin xefes, nin obreros, nin guah.es yeren a dicime la razón de tanto baille baxo la lluvia. Punxi pates pa enriba archivos. Repasé a tatás les axendes del estudiu. Baxé onde la esllava’l llugar. Nun atopé denguna desplicación pal fechu. Nin los sindicalistes teníen conocencia de qu’hubiere nenguna protesta d’años.

Unviáronme pa tirar los papelos vieyos. Revisélos enantes. Ellí alcontré una fueya de despidu ensin firmar. Un actor secundariu diba ser echáu pero naide nun s’alcordó de firmalu. Nun aparó de recibir nómines. Nin de dir trabayar. Y muncho menos de baillar.

Ilustrador: Miguel Jiménez

MAREES

Les agues tresllúcense roxes acordies van y vienen les foles. Les foques colen de la playa alloriaes col placton qu’enllena’l so hábitat. Colos sos glayíos espanten a tolos animales de la rodiada. Una ballena gayaspera amíralos incrédula. Sigue’l so camín ensin xirar un migayu. Nota dalgo dolor al par de la so cola. A lo meyor ye dalgún tropiezu con otru animal. El dolor multiplícase. L’agua camuda a roxo rabión. Avara na playa, acongoxada pol dolor. Malpenes-y queda un aliendu de vida. El placton retírase satisfechu en metanes de dalgún referver caníbal.