RESTAURACIÓN DEL PARLLAMENTU DE CORDOBELLO

Les prósimes entregues del blog van ser:
23-2 Cordobelleando, con dalgunes fiches d'asturianu.
2-3 Una nueva entrega de la blognovela, que güei llega a les 40 entregues.

El presidente campanió a fartar pero naide nun calló y el ruíu fízose cada vegada más cafiante. Munchos nun se conocíen y otros nun se víen en tiempu, poro que les presentaciones y los saludos asordecíen los intentos d’entamar. Yera la primer vuelta que se xuntaba’l Parllamentu de Cordobello dende que llegaren de fuera los foriatos qu’acabaron cola democracia de sieglos, asina que nun teníen munchu vezu en facelo. Tratábase d’un parllamentu provisional que diba organizar unes eleiciones llibres depués d’esfarrapar el gobiernu de les Families. El Blogpredicador voció pa qu’aselaren ensin ésitu; el secretariu gabinete palmió hasta dexar encarnaes les manes y tener de dir al botiquín; el Conseyeru d’Ariñán mando sentase pa escomencipiar y la xente obedeciólu.


-Señores, esta ye una fecha histórica pa Cordobello –dixo’l Presidente-. Hai muncho que…

-Mala te la mando, ésti pretende dar un discursu. Llevantar les manes los que tán a la escontra –propunxo un voluntariu. Un seutor de parllamentarios asumió la propuesta y fizo que’l Presidente acabare la so predicazaña-. Aprobáu por mayoría.

-Éstes nun son formes. Hai de siguir la normativa –glayó’l blogpredicador.

-¿Qué normativa? ¿Quiciabes seya la que mos impusisteis durante un par de sieglos? –retrucó Mingo.

-¿A lo meyor conoz otra la so señoría? –contestó-y el Blogpredicador.

-Da la casualidá que na mio provincia guárdase copies de tolos llibros qu’había enantes de la invasión foriata –siguió Mingo.

-Na so provincia tán bien. ¿Por qué nun les trai a la capital?

-Na capital tán. Acordies a los llibros, la capital ta en Gamusín, onde yo soi Conseyeru. Pero que digo, ustedes yá lo sabíen, ustedes fueron los que camudaron de llugar la capital.

-Curiáu coles sos pallabres.

-Curiáu coles suyes. ¿Cómo desplica qu’ustedes que representen al cinco por cientu la población tengan cuasi la metada’l parllamentu?

-Tamos meyor preparaos.

-¿Los descendientes d’una banda foraxidos tán meyor preparaos que nós? Nesti par de sieglos escribiéronse llibros a esgaya de toa triba y son la memoria viva de Cordobello. ¿Yá nun fala? Sabémoslo too.

-Delantre les pallabres diches, pido que’l parllamentu seya aconceyáu en Gamusín y que se tresllade darréu la capitalidá –propunxo Xuacu-. La Presidencia tien de ser escoyida agora mesmo d’ente la xente que formamos el parllamentu y los Conseyeros revisaos pa que naide tenga más representación de la que-y correspuenda.

-¿Quién ye usté pa dicir eso? –dixo’l presidente- Usté ye’l fíu d’un chigreru que-y vien grande’l cargu. Abondo ye que los almitiéremos nel gobiernu.

-Soi un ciudadán de Cordobello y ye abondo qu’almita que fale un foriatu.

-¡Guardia, guardia! Pongan a toa esta xente onde tien de tar, na cárcele –ordenó’l Presidente.

-Ustedes yá nun manden na xente de Cordobello –respondió’l xefe la guardia.

-Votemos y destituyamos a toa esta triba de bandoleros –dixo Mingo.

-Siento dici-yos que nós sabemos dalgo que diba frayar la isllalla –dixo’l Presidente-. Sabemos entrar y salir d’ella. Voten y échennos, yá verán les consecuencies.

La votación algamó un setenta por cien pa siguir como taben y un treinta por cien pa tresformar les llinies de gobiernu. El xantaxe foi eficaz y dibuxó como diba ser el parllamentu hasta les primeres eleiciones.