RENSÍA

Había dellos díes que los traslladaron a los barracones y entá nun yeren a adautase a la nueva situación. Alcuérdense de les sos cases llevantaes na meyor zona d’Ariñán, colos sos xardinos asemeyando a los de la xente de Bellobello, anque un migayín más pequeños, les sos antoxanes col mobiliariu al estilu de les provincies de costa, col catamarán llantáo xunto a la puerta principal, y l’edificiu asemeyando la estuctura de les mansiones de los artistes, colos escusaos a cada dos puertes y col griferíu d’oru. Imaxinaron qu’aquella vida diba dura-yos pa siempres, que nacieren pa ello, que naide nun diba ser a quitá-yosla, y de sutruque llegó aquel aldeanu y esmigayó-yoslo too delantre los güeyos, dexándolos más plasmaos que los policíes que fueron a la cárcele, al fin de cuentes ellos teníen dalguna cercanía col llugar. Nun diben quedase asina, si’l nuevu Conseyeru imaxinaba que diba tratar con xente vulgar enquivócase muncho. El nuevu presidente yera de la triba d’ellos y nun diba dexar a un pioyosu como él facer xirigoncia de persones d’altor. Naquel intre llegó Xeromu col aliendu perdíu y la cara fecha una llaceria.


-La carta yá ta unviada al presidente. Nun hai llugar nel mundiu que’l Conseyeru seya a escondese.

-La nuesa victoria ye cantada.

Les botelles de xampán dexáronse abrir con glayíos d’allegría y abrazos d’un compañerismu forzáu poles circunstancies. Nun llega a la selmana que toos taben echándose zancaníes pa ser a medrar nel gobiernu d’Ariñán y agora respondíen toos xuntos como si fueren collacíos inseparables.

-Que’l reconcomiu del Conseyeru mos upe a la eternidá –brindó Xeromu-. Bebamos hasta cayer nel suañu la felicidá.

En correos de Bellobello teníen trabayu a fartar. De les provincies llegaba más corréu que nos caberos cinco años. La esbilla dexábalos derrangaos. Por órdenes presidenciales direutes, nun-yos pasaben dengún corréu que nun fuere oficial, sicasí, los emplegaos teníen de meter en bolses toles cartes que nun cumpleren esta norma y sacales a unos camiononos que los llevaben a les afueres pa quemar.

Curtia felicidá la de la xente d’Ariñán. La so carta nun diba llegar al so destín. El Presidente nun s’enteraría de lo asocedío y el Conseyeru nun diba sofrir la rensía que sentíen por él les persones de valir d’Ariñán.

A lo meyor les cartes de provincies recoyíen más quexes como la de los homes y muyeres desheredaos d’Ariñán. A lo meyor, como ellos, suicidáronse en grupu p’amosar la so rensía. La so probetaya rensía que nun llograba’l so oxetivu final.