TOC, TOC 4

-Toc, toc.

-¿Quién ye?

-El rabu la sarten.

-¡Mialma que son graciosinos estos rapazos de la troika!

.

BUSCO HOME CON…

Los homes somos mui daos a tener mascotes. Perros y gatos llévense les de ganar nesto de ser les mascotes más solicitaes. Sicasí, imaxínate que los homes de sópitu convertámonos en mascotes y los nuesos propietarios seyan dalgo pequeñuques: les sacaveres. Nel so periódicu, el Sacavera News, tiense una seición na que se busquen homes desesperádamente. Tenéis de facer la páxina d’anuncios de mascotes del periódicu y pa ello podríen siguise los oxetivos que vienen darréu:

-Emplegu d’axetivos propios de mascotes.

-Emplegu de TIEN DE + INFINITIVU.

-Emplegu de SER A + INFINITIVU.

-Tien d’usase la imaxinación a tutiplén.

Nun sedría malo l’averase a los axetivos propios pa mascotes nun torbolín d’idees. Cada rapazu tien de cuntar como sedría la so mascota ideal y el maestru escribiría tolos axetivos qu’emplegara na pizarra. En finando les sos intervenciones, el maestru tien de completar la rellación d’axetivos con aquellos que xulgue imprescindibles y que falten na llista.

Vamos prauticar oralmente l’usu d’esos axetivos imaxinando que tamos nunos grandes almacenes y la so megafonía ta que lo vierte nun parando d’anunciar. “Güei na nuesa seición de mascotes tenemos una remesa d’homes…candiales, fatos, cariñosos,…” o “Nun escaezan de pasar pela nuesa seición de mascotes onde-yos regalaremos gorros pa los sos homes…intelixentes, babayos, fartones,…” o… Fáense corros d’anunciantes que tien de dicilos de contino y el que pare queda elimináu. Nun se val repetir axetivos, de facelo quédase elimináu tamién.

Agora ábrese la veda d’anuncios. Pue facese individual o por pareyes, acordies el so dominiu na escritura creativa. El maestru, que nin dicir tien que si ye en Secundaria sedría’l profesor, tien de movese peles meses corrixendo los erros que vea y desplicando-yos a los neños cómo ye correutu; tamién tien d’afalagalos a salir del atolladeru nel casu que tean allancaos. L’anunciu podría tener tres partes: una primera que sirva d’introducción, una segunda na que s’emplegue’l TIEN DE y una tercera na que s’use'l SER A. Tamién se-yos pode dexar llibertá total si son rapazos mui creativos.

Pa finar, tienen de facer l’anunciu con bona lletra, en mediu foliu y con dibuxu incluyíu. Toos ellos pegaránse en papel continuu que tien de tar decoráu como la fueya de periódicu Sacavera News. El resultáu final enseñaráse nos pasiellos.

Yá sabéis qu’esto ye una idea y que vós podéis camudar tolo que queráis o ampliar l’actividá. Hasta la próxima, alón.

.

DULDA 3

¿Por qué una ministra trabayu enxamás nun trabayó? ¿Sedrá que’l trabayar nun dignifica a los políticos?

Esti virus quier date un conseyu: que lleas el Epigrama 3 y el cuentu Los pininos de Ñaña, yá que te van prestar abondo.
.

PREMIOS PRÍNCIPE DE CHUNDACHUNDA

Ye tan guapín. Y va ser rei. Paga la pena que los sos premios seyan daos cola fame de muncha xente. Hai que saber sacrificase pol bien de la monarquía.

¿Crisis? Nun seyáis fatos. Eso ye lo que nos dicen los diaños d'isquierdes. Dixe d'isquierdes y non xente de bien qu'usen el términu socialista en favor la nuesa monarquía.

¡Ai, qué guapín! Por él pueden pasar fame tolos fatos que tan en paru. ¡Qué trabayen! Folgazanes.

¡Ai, santín! ¿Qué tal el to cuñáu? Haber si me paga dalgo de xalé, anda. Ta llueín, guapu.

Remémbrovos qu'esta selmana espublizóse Epigrama 3 y el cuentu Los pininos de Ñaña y que paga la pena que los lleáis. Ye un conseyu que vos fai un virus amigu.
.

LOS PININOS DE ÑAÑA

En Cordobello tol mundiu sabía que la xente más simplaya taba en Ñaña: recibíen a toles persones d’una mena candial y nun-yos desixíen nada a cambiu. Y dientro los sos pueblos, Talba yera’l más inxenuu de tou Ñaña. Alcontrábase apegáu a la borrina, no cabero’l conceyu, y yera perdifícil llegar a él dende les otres poblaciones de la rodiada. Los llariegos que lu visitaben quedaben a dormir nes cabañes de los sos habitantes y chucábense en suelu na más esquisita comodidá del monte. Atrayíalos el tratu dulce y lo desprendíos que yeren los talbeses, too yera poco pa los sos convidaos. Nun yera raro que los llariegos visitantes llevaren siempres abondos presentes pa los sos habitantes pa que-yos sirvieren pa endulzar la dura esistenca.

 

Los foriatos tardaron más d’un migayu en dar con ellos. De primeres, la so presencia pasaba desapercibida pal ringorangu que se gastaben aquellos invasores de mediu pelo que cuidaben que too yera poco pa la so esquisitez. Nun teníen nada que los afalare a fixase n’ellos: nin oru qu’enchare les sos arques, nin carbón que los calentare, nin inventos d’interés, nin comida abondosa, nin una costa espampanante onde echase nel sable, too se reducía a un simplayu nin que podíemos tar numberando ensin descansu más d’una hora y que los facía invisibles a los güeyos d’aquellos que deseaben arramplar con tolo que vieren de valir. Los bienes non cuntables nun trayíen dengún provechu pa lo egocéntricos que yeren los foriatos; bueno, si nun cuntamos la envidia, que presupón ser dalgo conxénere a los sos seres escoyíos y temerosos del Alma Eterna.

Depués de tiempu llantaron el so primer gobiernu en Ñaña cola ausencia permanente de la Gran Familia, que se suponía que la dirixía, y los abondosos viaxes del so dilixente Conseyeru. Comprobaron que yeren ciertes les sos sospeches de que yera una zona probetaya dedicada a l’agricultura y la ganadería y que malpenes-yos aportaría dalguna ganancia. L’amabilidá de la so xente nun trespasaba l’arguyu de los sos invasores, nun dexándolos acolumbrar la bona vida que nel fondu podíen llevar en Ñaña, nin les ganancies que-yos podíen aportar los sos valires reales. Sicasí, al llegar el branu decatáronse que’l conceyu s’enllenaba de llariegos que diben a aselar el so aura cósmica, acordies dicíen los del llugar, y dexaben abondos beneficios, siendo Talba ún de los llugares que más xente solicitaba dir, provocando una recatafila de reserves que teníen d’asperar años y años.

Construyeron un balneariu na capital Ñabagú nel qu’entamó a dir tolo más alloriante de la gran sociedá foriata, convirtiéndose depués de Xarca nel so llugar favoritu d’alcuentru. Descubrieron una fonte d’agua milagrosa que nun dexaba de ser el remueye que llevaba’l ríu cuando pasaba per una mina fierru qu’en secretu llevaben los vecinos d’un pueblu cercanu a la capital. Les converses colos ñabaguenses entraron tamién dientro los tratamientos de remocicamientu que tanto los atrayía, aseguraben que les sos voces relaxaben les neurones y quitaben dalgún añu qu’otru na pìel. Los vexetales de Ñaña axuntáronse a la coleición, tresformándose nuna fonte de salú polos sos componentes ecolóxicos y la so riqueza en nutrientes, formando d’esta mena, colos otros dos, un tríu invencible nel llogru d’una llozanía descomanada.

 

L’allugamientu de Talba salvóla de la quema económica y contaminante a lo llargo de dalgunos años, pero los güeyos de les Almes Maestres taben llantaos n’ella y nun la soltaron nin cantando melodíes. Estos santones naguaben por un llugar de retiru espiritual, onde naide los fuere a controlar y se pudieren dedicar a les sos gasayoses misiones: comer carne abondo, compartir la carne col espíritu más mozo y mecer too con bon oruxu de Cordobello. Talba yera’l llugar perfeutu, lloñe de palacios enllenos de xente pudiente que los pudiere censurar, del formigueru que se formaba nos santuarios de Plistói y Rontói que namái los molestaben pidiéndo-yos bendiciones, de la mirada llaína de sacerdotes y monxes avezaos a un fervor enfermizu que nun facía más que controlalos. Nun queríen compartir vivienda colos talbeses como si fueren vulgares llariegos, namái necesitaben el so serviciu como criaos ensin soldada, cuasi como esclavos si nun fuere pol aquello de que nun se dexaben zurdir la badana ensin gorgutar. Nes sos perspeutives alcontrábase’l facer un palaciu al altor de la so santidá, asina que punxeron a trabayar a los obreros más especializaos que teníen de dir y venir tolos díes al pueblu dende les cases más dignes y cercanes qu’había na rodiada.

Pasó dalguna década qu’otra hasta finar la obra y les Almes Maestres de mayor valir celebraron l’actu con un agospiamientu y unos exercicios espirituales de postín. Llevaron a los talbeses a palaciu como criaos pininos que nun sabíen qu’ente les sos obligaciones taba l’atención carnal d’aquellos homones d’alma bullindiega. Lloros, glayíos de probitú, sollutos de placer obligao, aquella xente quebró delantre les órdenes de les Almes Maestres, avezaos como taben a agasayar a los sos visitantes hasta llendes entá nun conocies nun fueron a aguantar tanta satisfaición reprimida. En llegando la nueche fuxeron a les sos cabañes a curar les feríes interiores y esteriores del cuerpu.

Yera una nueche de lluna enllena. Les Almes Maestres dexaron que per aquella xornada nun-yos sirvieren más aquellos panoyos que nun sabíen nin un rispiu de la vida y los sos placeres. Nun tuvieron otra que gociar ente ellos, dexando tatexar sele’l so espíritu corporal. Los agullíos sonaben dientro y fuera de palaciu. Les pisaes de fuera amatagábense pol trescalar de les cibielles de dientro. L’abrir de puertes fuera encontábase col pesllar de corazones dientro. Les garres llanzáronse al aire y penetraron la carne de sabor arreguiláu. Nun hebio tiempu a glayíos. La color xuntóse nun mecigayu encarnáu. La sorpresa nun fo a dexalos pescanciar lo que taba asocediendo. O non asocediendo, solo barruntando, acongoxando la bisarma de la verdá. Silenciu. Non de llegar al gocie final. Non de fumar. Silenciu d’abandonu. De pasu. De muerte.

 

Los cuerpos taben separtaos a dentellaes, talamente como si la saña fuere a da-yos el gocie dafechu, talamente como si les cares tuvieren dibuxaes pola sangre na ausencia dafechu de rasgos reales, de dalgo que dixere ‘aquellos fueron homes’, ‘seres vivos capaces d’acariñar a los de so’, anque esto cabero-yos resultare difícil a aquelles víctimes per segundos, aquelles almes que dexaren clara la so maestría pa despreciar.

Fuere un ataque de llobos nuna lluna enllena que surdiere de la borrina. Sicasí, los inspeutores de los foriatos acusaron a los llariegos de Talba de matar a las Almes Maestres, na nueche de les zarpes asesines, na claridá nocherniega de los homes llobos, de los pininos asesinos. En Ñabagú preparaben les bales de plata p’axusticiar a los talbeses enantes que la lluna tornare coles sos garres afilaes. Enxamás salieren del so pueblu nel monte, enxamás conocieren tierra más p’allá del so valle, y agora obligábenlos a dexala, a vaciar de vida les sos caleyes. Na capital iguaben les últimes dilixencies pa la so execución. Los foriatos salíen de les sos mansiones a contemplar la muerte de cerca. Los llariegos metíense nes cases muertos de dolor y pena. Peles cais pasaron los talbeses colos güeyos zarraos pa ser a remembrar les sos brañes, la so aldega, pa nun escaecer la so inocencia, pa reivindicar lo pininos que yeren, pa olivar la paz del descansu eternu, pa nun dexar pasar el mieu. Enantes de morrer, abrieron la so mirada fondera pa que l’enemigu nun la olvidara na so memoria.

 

Talba taba en silenciu. La llobada agullaba pola ausencia de los sos amigos, de los sos vecinos del otru llau de la borrina. Siempres los defendieron, siempres los sofitaron,  y agora desaparecieron, quiciabes enfurruñaos con ellos por armar aquel espolín en metanes la nueche. Tornarien una vuelta y otra a Talba hasta alcontrar a los sos seres queríos, tendríen paciencia hasta llograr el so perdón, les sos caricies, la so vida.

 

 

* Almes Maestres.-  Yeren la ponte ente los Foriatos y L’Alma Eterna. Nun se casaben, nin facíen dengún ritu, veníen a la tierra como almes de los muertos más consideraos a facilitar el camín a los vivos. Los sos fíos, tenidos poles muyeres de les families a les qu’atendía que nun fueren aristócrates, yá qu’éstes taben llibres d’ello, sedríen les futures Almes Maestres.

 * Borrina.- Nun escaezamos qu’una isllalla tien nel centru d’ella la mar y a los llaos los picos que finen nuna borrina que los llariegos enxamás nun trespasaron y a la que-y tienen dello respetu.

 

.

ESPILFARRU

¡Mialma que grandes xestores! Aeropuertos ensin vuelos, autopistes ensin coches, trenes ensin xente, edificios ensin usu,…

Equí, n’Asturies, siguimos ensin que finen l’autovía del Cantábricu (vía enllena coches) y la Variante Ferroviaria del Payares (variante fecha nel sieglu XIX y non remocicada dende entós).

Ta visto qu’a España nun-y interesamos.

 

Soi un virus mui finu y alcuérdote qu'esti llunes tiense espublizáu un epigrama que nun te pues perder.

.

EPIGRAMA 3

 

 

 

Facer política ye dalgo asemeyao a xugar al axedrez, siempre se tán enrocando.

.

TAMAÑOS

Nun hai ser más inferior que’l que cuida que ye superior y sinón preguntá-ylo a los del TDTparty.

 

Mañana sedrá llunes 22 d’ochobre de 2012, día nel qu’esti blog entama a espublizase de nueves tolos llunes y xueves, acabóse’l descansu d’Adivín Serafín que torna colos sos cuentos, sensaciones, epigrames y nel aula. Ésti que vos acompañó estos díes, el virus Ye, voi siguir apaeciendo cuando me pete, menos llunes y martes que pa min ye día folgueta. Asina que nun penséis que vos llibráis de min tan facilmente.

.

FRIKISMU

¿Hai dalgo más friki que llama-y friki a una persona?

¿O a un pueblu?

¿Y qué te paez que-y lo llamen a una llingua non oficial (ye dicir, non centralista)?

.

DULDA 2

¿Pue un gobiernu inxustu tener un ministru de xusticia xusto?

.

13

 

Mariano Rajoy.

 

.

 

ESPECIES

Indios.- Especie protexida escaecida pola so alministración.

Palestinos.- Especie que quedría que los israelíes los escaecieren un migayu.

Africanos.- Especie mal nutrida pol egoismu del archiprotexidu primer mundiu.

Chinos.- Especie esplotada polos sos señores feudales que van disfrazaos de colegues trabayadores.

Asturianos.- Especie desprotexida escaecida en dalgún furacu negru polos sos democráticos señores.

.

DULDA 1

¿Por qué la Esquierda Plural ye singular?

.

ANTIVIRUS

-¡Virus Ye, virus Ye! Anda con procuru que ta buscándote l’antivirus Centralista.

-¡Mira como tiemblo! Los antivirus más peligrosos téngolos en casa.

.

TOC, TOC 3

-Toc, toc.

-¿Quién ye?

-Soi’l Bon Gustu que-y vien presentar una quexa.

-Telecincu ye un migayín más p’arriba.

.

EL CASTELLÁN, EL CATALÁN, L’EUZKERA Y EL GALLEGU SON LES LLINGÜES CENTRALISTES DEL ESTÁU ESPAÑOL

La Llingua Asturiana y l’Aragonesa, a lo que paez, son babayes al cuadráu.

.

TÓXICU

Los bancos son les centrales nucleares del sieglu XXI.

.

CONTRARREFORMA EDUCATIVA

Les reformes educatives queden vieyes namái oyir que se van facer. Cauna que se lleva p’alantre yá ta caduca enantes d’espublizala nel BOE. Por eso la OJE llucha por entamar una contrarreforma en toa regla que torne de nueves a llevar a qu’España seya Una, Grande y Llibre. Xúntate a nós y a Wert nel suañu de tou español de pro y faigamos que la educación seya más qu’una mera enseñanza progre. Pola segregación de sexos, pol castigu corporal, pola formación del espítitu nacional, pol rellenu cola llingua española y matemátiques pa que la Merkel nun proteste, nun lo duldes y sofita’l cambiu modernu de la enseñanza: la Contrarreforma.

Amás pola llucha de tola nuesa vida: por cinco hores selmanales de relixón católica, apostólica y romana onde se normalice la caridá impositiva y la pederastia. Col sofitu dafechu de Rouco Varela y el Concordatu.

.

TOC, TOC 2

-Toc, toc

-¿Quién ye?

-La mentira, que-y vien desplicar el so programa.

-Les eleiciones son nes comunidaes vecines, non n’Asturies.

.

SERONDA

 

-Seronda, serondiega, ¿por qué te cae tanta fueya?

-Mira fíu, ye qu’anda too mal. Esti añu, ensin dir más p’allá, tengo qu’almitir hasta les fueyes caducaes de los bancos. Imaxínate como va tar el suelu de ramascaya.

.

TOC, TOC

-¡Toc, toc!

-¿Quién ye?

-La corrupción, que vien robar na to casa.

-¡Mialma que nun anden mal na política!

 

 

.

SHE LOVES YOU, YE, YE, YE

-She loves you, ye, ye, ye, she loves you, ye, ye, ye, -canciaba una vacalloria cuando s’averaba a una casa cites de ringorrangu rexentada pola abeya reina.

Al pasar xunto la puerta l’establecimientu, atopó al so zánganu asperando al embaxador de Taconia que diba presenta-y les sos credenciales. Miróla d’arriba a abaxo y d’isquierda a drecha mentanto-y dicía:

-¿Cómo t’atreves a canciar eso, la realeza namái soportamos la música de los Rolling Stones?

-Plebeya que ye una, ye, ye, ye.

.