LLENZU ESCRITU

RENOMBRANZA

Llegó callandino. Estendió la so toballa. Dexó la so bolsa nel sable. Amiró inalterable a la mar y alendó fondo. Caminó pensatible p’hacia l’agua y metióse. Al salir, un fotógrafu tiró-y unes semeyes. Toos esamináronla. Tumbóse na so toballa y dexóse afalagar pol sol.

Al día siguiente apaecía nel periódicu llocal. Nun yera famosa. Nin malpenes conocida. Nun se nomaba’l so estáu mental. Malpenes se dicía que se bañare vistida. Namái la fotografiaren pol so calzáu. Non pola marca, nin por nun ser acuáticos, o por nun tener muncho tacón. Lo único importante pal fotógrafu yera lo elegante del sable coles güelgues piquiñines y fondes: lo único que la xente de la playa remembraba d’ella al día siguiente.

Ilustración: Miguel Jiménez
 

LLENZU ESCRITU

PROCURU DIVÍN

Naciere pa ser infiel nel matrimoniu. El so home mercó aquel paxarracu pa que la xixilare. Malpenes s’averaba a la casa a la gueta la so muyer, el loru espetába-y les caberes pallabres del amante del día. Yá podía facer arroz con lleche, compota peres o tarta Xixonesa, el mui cuciu quitába-y les perres, llevábala pal pueblu y riñíala.

En dos años, el loru dexare de recitar la retafila a la que mos tenía avezaos. Namái suponía que la muyer camudare d’aptitú y entamare a endrechar. Fízose de misa diario. Peles tardes diba a la sacristía a coser ropa roto y a planchar pa los probes. Entró nes fileres d’adoración nocherniega y, depués de dexar la cena pal so home, colaba pa tan sagráu destín.

En señal de confianza, el maríu desfízose del loru y mercó-y un collar de diamantes. Sicasí, ella entamó a enflacar y a pesllase na casa. El so home entrugó-y:

-¿Qué te pasa cariñín?

Ella callaba y ascuchaba. A lo lloñe oyíase la voz de la lorina’l conventu que-y dicía:

-Si nun torna’l mio lorín del alma, tu nun reces con too dios.

 
Ilustrador: Miguel Jiménez

MENUDANCIES

La llamada fue sero. Na comisaría namái quedaben el reten de nueche. Garré’l teléfonu y la voz sonó callada, como amatagada. Un home llegare al so barriu. Na casa oyíense ruídos raros. Escuchare na radio lo del psicópata na ciudá y yera neto a la descripción d’aquel home. Colgó. Nun dixo nin barrio, nin cai, nin casa.


A la selmana taba de nueves de guardia. El teléfonu sonó machacón. La voz faló repetido. Afirmó que yéremos unos desdexaos, que nun mos esmolecimos nin un rispiu del psicópata. Remembré-y que nun dexare señes poro que taba difícil garralo. Pasóles y colgó.

Entamamos la investigación. Tratábase d’un home de pelo llaciu y castañu. La so cara tresllucía cansanciu. Sicasí, namái se-y vía salir a los enredos peles mañanes y tornar a piesllase na casa. En faciendo’l seguimientu, l’home actuaba neto a los psicópates. Preparamos un mecíu ente la policía llocal y la estatal, pero ensin batelo muncho, nun fueren a empatonase y dir pal suelu. Entramos pel teyáu, el portal y el club nocherniegu. La puerta cayó. L’home salió esposáu. Los gatos nun dexabes de miagar. Pedíen llechi y el so amu nun taba pa dá-yoslo. Cuando montábemos un operativu, dalguién lo pagaba. Con un migayín de suerte l’home namái saldría acusau de pederasta. Anque sólo fuere de gatos, pero pederasta. Menudancies.

Ilustrador: Miguel Jiménez

Llenzu Escritu 6

Mañana entrada 100, 1 añu del blog y descansu hasta ochobre.

JAZZ ACOMPASÁU

Aquel club enllenábase de fumos ilustraos y ritmos acompasaos nun jazz xabaz del sieglu XXI. Toles nueches acoyía al mesmu grupu que desllucía a tolos que se-y poníen per delantre na ciudá. Xubíen al escenariu y sosteníenlu coles sos notes d’almiración. De sópitu, sonaba’l saxo y tolos deos tamborilaben nes sos improvisaes meses. Yera la estrella. Yera l’almiración. Yera jazz.

El llunes estrenóse con ellos un trompeta. Naide nun lu conocía. Yera nuevu na ciudá. La so mocedá solfeaba los ritmos vieyos con arume tribal. Los espectadores dexaron de respirar sonoro y amiraron con medrana al saxofonista, figura’l club. Naide nun s’atreviere a tocar meyor qu’él. Los deos llanzáronse a camudar de metal. El saxofonista, enllenu vanidá, dexó escapar un silenciu qu’enxamas se tocare na ciudá. Dalgún ixuxú dexóse glayar, frayando a la trompeta’l so compás. El saxo acolumbrólu despreciatible, naide nun tocaba una nota ensin avisar. El trompetista camudó de llocal y ciudá. El saxo llucíase pente los babayos del llugar.

Ilustrador: Miguel Jiménez

LLENZU ESCRITU 5

MALTRATOS

Mialma que yes tranquilu. Insúltente, amenácente, rinse de ti, too ye metese contigo, y tu nun respuendes nada. La mio ma nun para dicir que tire esi moñecu felpeyón, que, cola dellos que tengo, namái mira pa ti. Si ella supiere. ¿ Quién me fizo compaña nes paperes, na escarlatina y toles gripes? Tu. Si nun fuere por ti taría tol día nes manes les criaes, como’l mio hermanu, pero ési anda a otres hestories. Anda que nun mos los arma’l mui castrón. Esplotó un petardu na to espalda que me fizo llorar y esgatuña-y la cara. Tovía-y queden marques. Acordies a la mio ma va ser pa siempres. ¿Y qué cuntar de mio pá? Nin mos pon cara. El so silenciu fainos más dañu. Bueno, non. El petardu fo más gordu. Anda qué fairía si nun tuviéremos un plan tu y yo. El mio hermanu sedrá’l primero. Hai que quitalu’l medio enantes recibir la herencia. Van saber quién somos.

Ilustrador: Miguel Jiménez

CANTANDO BAXO LA LLUVIA

Llenzu Escritu 4

Entrar nel estudiu fo sentime como una estrella de cine. Namái qu’un oficinista diba arrodiase de figurones de la interpretación. Ordenaría-yos les vides dende les mios cuatro muries: ónde rodaben, con quién, ónde firmaben los sos autógrafos,… Pasé per milenta casi llevantaes con andamios grandonos pa teneles de pie. Acolumbré hangares descomanaos nos que s’escondíen cases, hospitales, chigres,… Hasta que llegué onde m’esperaben los papeles la mio vida. Xusto ellí, nun requexín, un home baillaba de farola en farola bañáu en mangueres de lluvia. Nun abultaben filmalu. Naide nun glayaba: ¡Corten! Pero él nun aparaba de danciar, percorriendo les faroles y vuelta a entamar.


Diez años depués, naide nun desplicaba lo que facía aquel home ellí. Nin xefes, nin obreros, nin guah.es yeren a dicime la razón de tanto baille baxo la lluvia. Punxi pates pa enriba archivos. Repasé a tatás les axendes del estudiu. Baxé onde la esllava’l llugar. Nun atopé denguna desplicación pal fechu. Nin los sindicalistes teníen conocencia de qu’hubiere nenguna protesta d’años.

Unviáronme pa tirar los papelos vieyos. Revisélos enantes. Ellí alcontré una fueya de despidu ensin firmar. Un actor secundariu diba ser echáu pero naide nun s’alcordó de firmalu. Nun aparó de recibir nómines. Nin de dir trabayar. Y muncho menos de baillar.

Ilustrador: Miguel Jiménez

LLENZU ESCRITU

PEQUEÑA NECESIDÁ

Equí hai ún que pon que tien físicu melgueru. ¡Mialma que val más creyelo que dir velo: físicu melgueru! Imaxino a esta seición del periódicu titulase “contautos de físicos melgueros” o “contautos melgueros” a seques. ¡Probes sadomasoquistes…! Condenaos por esti rotativu al escaecimientu etenru con un axetivu cenciellu, marcharánse pa onde se faiga anuncies d’esta triba: Culturista, 22 durísima. Póngome a cien sólo de lleelo. Una nun ta avezada a coses tales, nin tando casada. Bueno, de la que taba casada lo que vía nun algamaba los 22. Y lo de culturista, nun asomaba nin como cultureta nes páxines de cultura de El Comercio. ¡Anda qu’ésti…!, abúltase más a un anunciu de vaques: superlecheru. ¿Depués de facelo tomámonos un vasucu recién catao? ¡A que coses ta una obligada! Too pola necesidá que tien una, que nun camienten que ye sólo asuntu d’ellos. Mira: brasileñu, mulatu, polacu, bisexual… La de coyer, nun fai falta tanto nin. Si namái naguo por cubrir una esperienzuca. Si namái que necesito un home col que prauticar los mios instintos de viuda negra.

Ilustrador: Miguel Jiménez

LLENZU ESCRITU

MIO PADRE

Préstame muncho xugar con mio padre. Mio ma siempres me curia, pero mio pá apaez cuando ye importante. Faceme cosquielles ye lo que más m’enllena. Les mios manes nun son a coyelu, de la que les suyes gárrenme y nun me dexen. Nun soi a parar de rir. Ye’l meyor. Los pocos díes que me trae al cole, mércame cromos, chuches y dalgún qu’otru cómic. Nun hai quien lo gane. Agora ta nuno de los sos viaxes de negociu. Cuando seya mayor, voi dir yo en cuentes d’él, asina sedrá a descansar. Ayeri vi a un paisanu que yera como’l so hermanu ximielgu. ¡Coime! Y la que diba con él, yera neto a usté, profe. Fino. Mio pá ye l’acabóse.

Ilustrador: Miguel Jiménez

LLENZU ESCRITU

Güei entama una seición na que'l pintor Miguel Jiménez m'unvía una ilustración y yo escribo la historia, ye dicir, al revés de lo que se fai normalmente. Miguel Jiménez fae la so obra pictórica equí en Xixón y la selmana pasada  foi seleicionada una obra, "Bananas News", nel XLI Certamen d'Arte de L.luarca.

AUSENCIA

Hai yá dos díes que la eche a faltar. Nun me cueye’l teléfonu. Nin me contesta al microlarbi. Nin saca a la so perra a pasiar. Nun hai que dicir lo de dir a trabayar a la oficina. Y anque mato les hores nel nuesu xiringo d’al par de casa, tampoco nun tuvi suerte dala na espera.

Aquellos etenros besos fundidos nos sos llabios de calendariu. Aquelles nueches dexando dir a la mio incontinencia na cama. Tolos díes camentando nella y agora déxame. ¡Anda, la so casera! Ta llimpiando’l cristal de la ventana la sala. Yá dicía yo que tardaba. Mira, pon el cartelu de “S'Alquila”. Voi tomar otru vinu. Mialma que nun va tardar nin tres díes n’alquilalu. Buenu, a esi preciu, nin dos díes. Pa mi que va pagar hasta pa que-ylu ocupen. Dame lo mesmo. Yá tengo ganes de que llegue’l nueu inquilín y tornar otra vuelta a les mesmes. …¡Huum, l’amor, glu-glu-glu, ye…uuuhaaah l’amor!