LA INSPIRACIÓN DE GATE

DIR AL GLOSARIU PA CONSULTAR PALLABRES DE CORDOBELLO

Prudente enxamás nun se conformare col so destín de foriatu. Malpenes de neñu enfotóse en llograr superar a los llariegos nel so campu del saber: lliteratura, música, ciencies, matemátiques, filosofía… Tendríalo too bien fácil como rapaz de les Grandes Families si tirare pel camín reutu: el d’una relixón fuerte, un exércitu bien armáu o una ideoloxía superior onde alcontrar el so futuru y dar de zucar a la so familia, pero él escoyó’l torcíu. Suañaba con ser el futuru de les nueves xeneraciones foriates que sedríen más llistes, más cultes, más autosuficientes… Prudente buscó y buscó ente los llibros llariegos dalgún furacu que se-yos escapare y pudiere colase. Gastó’l tiempu a lo fato: en cuentes de preparase en dalguna les ciencies y tirar p’alantre con ella, tentó’l camín más curtiu y fácil, llograr una trampa que nun fuere a notase.

Al facer el Viaxe Caberu cola so Alma Maestra, Prudente dedicó tol tiempu a pasar pelos llugares onde los llariegos llograren dalgunos de los sos triunfos más brillante. Estudiaba’l fechu, falaba colos sos protagonistes, enrabietábase pelos sos adientros, gufaba día y nueche y ascuchaba como la so Alma Maestra dicía qu’aquello yera contrariu al Alma Eterna. Pensó entós en crear una nueva ciencia que llevó por nome Aristoclásica, que trataba del camín de meyoranza na raza superior de les Grandes Families. L’interés nel nuevu descubrimientu científicu nun-yos interesó nin a los pioyos que se-y pegaben pola so acuafobia.

Fo na so dómina d’home d’estáu onde atopó más tiempu pa la so búsqueda de la lluz. Toles mañanes, tardes y nueches rezaba al Alma Eterna pa que ficiere’l milagru más xustu de la historia foriata: convertilu nun afamáu científicu o un reconocíu home de lletres. Al ver que’l rezu nun yera a esgaya, entamó a dir a cultos sagraos, exercicios d’almes y llantase cilicios per tol cuerpu.

 

La cosa entamó a endrechase cuando nomaron a so padre Conseyeru de la provincia de Gate. Prudente pensó qu’aquello yera una señal inequívoca que l’Alma Eterna-y unviaba pa indica-y Gate como’l camín a la sabiduría. Llanzóse como un llocu a mirar tolos llibros de la provincia en busca del llugar onde diba asoceder la gran revelación. Dexó la so vida beata en manes de la culta: los sos güeyos tornáronse roxos de les pastielles pal cansanciu; dormía namái que diez hores al día los tres díes de la selmana que trabayaba les dos hores estipulaes; dibuxó un mapa de la provincia grandono p’asitiar fechos d’interés que lu orientaren; remembraba un nome más d’un minutu pa ser a escribilu nel mapa y contemplalu con gayola; reduxo la so alimentación a cinco comíes al día pa ganar tiempu pa xugar al padel; escaeció’l llibru en que taben munches de les oraciones que rezaba por mor de les pastielles y otros brebaxes… Hasta que llogró’l so oxetivu: nun llibrín piquiñucu, de lletra encoyío, alcontró la gran obra lliteraria llariega de tolos tiempos. El so autor, Poldo de Banzo, naciere nun pueblín del monte más pindiu y xabaz de Gate. Escribiere la poesía más llírica de les dómines del entamu la memoria. Fo recoyida per toles antoloxíes que se ficieren de la lliteratura clásica.

L’Alma Eterna a la fin ascuchó les sos súpliques. La so mente taba preparada pa la misión de la so vida. Prudente pasó como un torbolín pela capital de la isllalla, Bellobello. Miró en toles biblioteques capitalines los llibros nos qu’apaecía Poldo deBanzo nomáu. Tomó nota d’ellos  na so axenda y estrozó tolos exemplares. Unvió cartes a toles biblioteques de provincies con una llista de llibros herexes que teníen de ser quemaos. Retiró tolos testos escolares, recopilaciones  de formiguines y demás obres molestones. Nos muérganos de comunicación apaeció la noticia de la gran broma: dalgún graciosu dedicóse a inventar la vida y milagros de Poldo de Banzo, un allucináu que xuntare dalgunes lletres fates. Metió en centros siquiátricos a tou eruditu que cafiare col so saber escomanáu. Y depués de munches xeres más, tornó pa Gate y xubió pal que fuere’l pueblu de Poldo.

 

Prudente enxamás nun viere pueblu más desastráu. Mandó garrar a los sos habitantes, llevalos pal pericuetu más alloñáu que se conocieré y construyir ellí un palaciu nel que diba escribir la obra de la so vida.

Costó-y abondo copiar con buena lletra los poemes d’aquel homucu que viviere naquella tierra de berriacos. Ente  boquiada y boquiada baxaba a Talagate, provincia turística de folixa asegurada. De paso, xubía dalgún viciu que fuere a da-y dalguna gracia a lletres tan amaneraes. N’acabando de copialos, mandó a una secretaria que lu pasare a máquina y lu unviare a la editorial de más renome ente los foriatos. El llibru salió espublizáu pero namái se movieron los exemplares que fueron regalaos. Nin los críticos más foínes quixeron manchar el so nome escribiendo dalgún agasayu a aquel piltrafu. Yera lliteratura mugoriento, que taría bien si s’escribiere nes dómines del entamu la memoria pero non nun llibru d’aquella época. Dalgún llego dicir que nun lu escribía nin un neñu.

 

Prudente vio’l futuru: l’Alma Eterna pidió-y que recoyere perres pa facer la mansión del fervor.

 

El xueves 6 de xunu torna'l cuartu capítilu de la blognovela de Cordobello. Asperamos que nun la pierdas: ye de baldre y nun ye verdá que lo de baldre seya malo. P'abrir boca, vamos cuntate más coses de la isllalla:

Les Grandes Families van alternándose nel poder, poro qu’hai un tiempu en que gobiernen y otro nel que tán na oposición. Cada vegada que la oposición entama una engarrada cola familia nel poder, gánenla, entamen una opodemocracia y ellos mesmos faen que fine nuna familiarquía col so grupu gobernando. El que siempre pierde y muerre na guerra cafiante ye’l pueblu de Cordobello, que ve como la so tierra s’esfarrapa.

 

LES AYALGUES DE NARCA

DIR AL GLOSARIU PA CONSULTAR PALLABRES DE CORDOBELLO

 

Malva llamaba de contino pel móvil a les sos amigues. Quería saber toles caxigalines que tuvieren que ver cola Fiesta del Agospiáu d’aquel añu. Por fin diba a participar nuna y nun-y prestaba que dalgo quedare abiertu a la improvisación. Al fin de cuentes, yera una de les componente de les Grandes Families qu’al cumplir los dieciséis años principiaba la so andadura na alta sociedá. Como bona primeriza, tenía d’estrenase en tolos actos y fiestes que se celebraben aquel añu. Les prieses ficiéron-y marcar cuatro veces el númberu de la so meyor amiga, Flor, pa face-y una consulta de vida o muerte.

-Holita Florita, soi yo de nueves. Enantes escaecióseme preguntate si les recién cumplíes podíemos llevar xoyites al Agospiamientu.

-Nun lo sé nin m’importa. Soi una mocita de dieciséis años y naide me va quitar la satisfaicionita de dir cola gargantiyita cola que mio tataratataragüela entró en Cordobello.

Tres de delles rises, dalgunes fataes y dellos chuchos pa despedise, colgaron los móviles y Malva corrió pa onde taba so padre.

-¡Uuuuuuuiiiiii, papuchito! ¿Ónde ta la personita a la que más quiero?

-¿Qué quies y cuánto va costar?

-¡Qué mal pensáu yes! Si namái ye una caxigalinita de nada. Toles mios amiguites van llevar xoyites a fartar y Flor va poner una gargantiyita de gran valir. Por embargu, yo nun voi llevar alhaxita denguna qu’honre a la mio familia. Anda papuchito, di que sí a la to niñita.

Rutenio nun-y podía negar nada a la so fía. Al día siguiente diba colar pa Narca, el conceyu del que yera Conseyeru, y ellí sedría a buscar dalgo espectacular. Yera abonda casualidá que’l pidíu de la so fía coincidiere col únicu viaxe a Narca que facía tolos años.

 

 

-¡Bonos díes, señor Rutenio! ¿Tuvo usté un bon viaxe?

-Perfeutu Loi. Venir n’Helicópteritu fo la meyor ideguita que pude tener. Les carreterites pa Narca son antediluvianes y fae que l’aperturita de la Ca Conceyu poles fiestecites seya un engorriu que tolos años tengo que sufrir. ¡Mira que fae falta que venga yo periquí!  ¿Pa qué ta usté entós?

-Señor Rutenio, préstanos abondo tenelu pequí. Ye más, prestaríanos que viviere cola so familia nel Conceyu. Pa dalgo ye’l so Conseyeru.

-Nun me faiga rir, Loi. Narca ta bien pa usté, que ye un namoradito de los piquitos y les cabrites. La mio familita y yo tamos fechos pa llugaritos más estimulantes. Falando de la mio familita, la mio fiíta cumplió los dieciséis añitos y va dir per primera vez a la Fiestecita de los Agospiaos. De resultes que se-y metió na cholita el dir coles meyores xoyites de toles convidadites. Tien de sacame d’esti xareítu.

-Ta usté nel llugar afayadizu. En Narca ta l’antiguu palaciu de branu de los cabezaleros del Cordobello d’enantes del Entamu de la Memoria. Nesi palaciu ta la coleición completa de toles ayalgues que llucieron los homes y muyeres que tuvieron dalguna vez agospiaos ente los sos muros. Ente tola carrapotada de xoyes, de xuru qu’atopamos dalguna pa la so fía.

-Veras, nun ye tan fácil. La so amiguita Florita va llevar una gargantiyita de la so tataratataragüela y ella nun quier ser menos y quier llevar una gargantiyita meyor. Vamos, aquella que llevaron toles muyercites de los Xefitos Supremos.

-Esa non, polo que más quiera. Ye la de la maldición.

-Yá tamos coles sos fatadites. Eso son coses de llarieguitos. Usté ye un foriatito que nun tien de creer en supersticionites de tan baxita estopita. Tanto piquito va senta-y mal a usté. Tien de venir a la capital más de xemes en cuando. Sin nun la quier trayer usté, mánde-ylo a quien más rabia-y dé. Mañana tien de viaxar la dichosa gargantiyita nel helicópteritu conmigo.

 

 

Malva entró nel palaciu del agospiamientu cola cabeza más alta de lo normal. Toles compañeres llanzaron gritinos d’almiración p’hacia la so gargantiya de diamantes. ¡Pero qué diamantes! Enxamás vieren unos diamantes con aquellos matices de colores vivos. Los rapazos averábense a ella hipnotizaos pol valir d’aquella xoya. Nengún quería perder la oportunidá de ganar dellos puestos nel ranking de futuros homes de la moza que poseyía la xoya más valiosa de toles Grandes Families.

-Paezme que güei nun voi tener nin un baillecito llibre, papuchito del mio coralito de diamante. Nun pudiste escoyer meyor la xoyita que me dibes regalar.

-Nun ye un regalu, fiíta de la mio almita. Al finar el baillecito tenemos de tornala a Narca.

-Nun seyas repunantito, papuchito. A esos xabacitos pues dici-yos que la perdiste. Eso, o nun te falo na mio vida.

La orquesta entamó a tocar y Malva enprimó a escoyer los sos pretendientes. Fízolo ente aquellos que más aquello teníen na alta sociedá foriata. Baillo y baillo. Faló y faló. Dexóse agasayar por tolos pantalones de la fiesta. Hasta los de Suncia la lesbiana tuvieron interés na so cotización. De sópitu, l’aire acondicionáu estropióse. Tuvieron de sacar orquesta, bebíes y gafures pal xardín.

-Papuchito, nun sé si aguantaré tanto calorcitito. Si nun fuere que los homecitos de les Grandes Familites fueren tan afalagadoritos.

Malva siguió y siguió baillando. El sudu emprimó a espardese per tol cuerpu. Los diamantes entamaron a amenorgase pasu ente pasu. Más sudu, diamantes más piquiñinos. De mano, Malva nun se decató de lo qu’asocedía. Namái yera a sufrir aquel sudu cafiante correr peles sos carnes.

Tres muncho tiempu, alvirtió que dalgo la primía na garganta, pero pensó que yera la calor. Siguió baillando y namorisquiando a tol que s’averaba a la gargantiya.

El padre glayó axorizáu al ve-y la cara amoratada. Los diamantes claváronse entós nel pescuezu del que chorrió della sangre. El padre trató d’arranca-y los diamantes metiendo los deos pente la so carne. Nun fue a ello. Ún a ún, los deos fuéron-y cayendo nel suelu cortaos por aquelles piedres maldites.

Malva respiró l’últimu aliendu y dexó que la cabeza se separtare del cuerpu. La gargantiya desapaeció. Les Grandes Families retiraron la so presencia nun actu tan vulgar.

L’aire acondicionáu entamó de nueves a funcionar…

.

¿SEDRÁ EN ZILA?

SI DALGÚN TERMINU DE CORDOBELLO T'UFIERTA DULDA, CONSULTA'L GLOSARIU

En llegando los foriatos a Cordobello, muncho fue lo qu’ablucaron con abondes coses que yeren estremaes de la tierra onde veníen. La que más, les sepultures nes que descansaben los muertos. Fueren cementerios grandonos o pequeños, les foxaques siguíen el mesmu patrón. Alcontrábense arrodiaes por carbayos, texos o fayes acordies a la zona onde s’atopaben. Del prau nel que reposaben los restos surdía una vara de madera, orniada a fartar según les formes representatives de la familia y la color favorita del muertu. Xubía al cielu de mena escomanada y acababa nuna circunferencia na que s’alcontraba incrustada una piedra. De día asomeyaba ser una piedra ensin dengún valir, pero de nueche illuminábase como si se tratare d’una llámpara na que xugaren los colores a brotar como flores.

Les Grandes Families allampiaron poseyer aquelles ayalgues que cuidaben teníen más estima que l’oru o la plata. Consultaron colos xoyeros que trabayaben pa ellos dende siempre y llograron qu’ellos ficieren estudios de diseños que lluciríen nun futuru nos sos aristocráticos pescuezos. Los cementerios fueron esfarrapaos dafechu por aquellos artesanos que metieron les piedres nes sos caxes fuertes a l’aspera de ser trabayaes pa les Grandes Families.

La nueche llegó y los xoyeros esapaecieron ensin dexar rastru de les sos persones. Nes caxes fuertes namái alcontraron polvu a esgaya, nun quedando nin una mísere piedra. Nos cementerios víense de nueves les vares coles sos lluces de colores no más cimero.

 

A cada muertu llariegu nuevu apaecía-y una foxaca cola so vara orniada y la so piedra relluciente. Los foriatos nun s’atrevíen nin averase a elles, nun fuere pasa-yos como a aquellos xoyeros qu’enxamás nun volvieron. Sicasí, entamaron una búsqueda ensin fin poniendo tolos conceyos pates p’arriba pa ser a alcontrar aquelles piedres pexigueres. Nun había casa, nin cueva, nin tenada, nin conciencia… ensin remover. Toes menos un conceyu que nin lo pisaron pola so probitú desaxerada.

-¿Sedrá en Zila? –preguntaben dalgunos foriatos cansos de nun atopar l’orixen les piedres.

-¡Non, home non! –contestaben los más echaos p’alantre- Un conceyu que tien namái tres pueblos y quinientos habitantes ye fácil de controlar. Dengún d’ellos se dedica a otra cosa que’l campu. Amás, esos fatos malpenes tienen pa comer ellos

Les duldes esfilacháronse y entamaren de nueves una búsqueda escomanada que los llevó a percorrer tolos llugares yá investigaos y dalgunos nuevos que fueren escaecíos poles mentes más brillantes de los foriatos. La suerte nun camudo nin un rispiu, el brillu mecióse ente’l polvu. Nos cementerios apaecíen nueves piedres pero naide nun yera alcontrar l’orixen de les mesmes.

 

-¿Sedrá en Zila? –aumentaba’l númberu de foriatos que lo preguntaben.

-Nun seyáis fatos, ye un conceyu xabaz en que la so población ta nes llendes col d’Or ensin atrevese a afondar nél –respondíen cada vez menos foriatos, anque sí los más importantes-. El gobiernu estudió dafechu’l conceyu y namái hai abondos animales xabaces.

-Ente ellos los homes que viven nél –añadíen los más lladinos con risuca lladina.

Pa mantener al pueblu foriatu distrayíu, llanzaron a la xente nuna aventura desaxerada nuna especie de conquista del oeste americanu. Tolos que s’averaren a dalgo asomeyáu a una veta de piedres reivindicaben la tierra pa so y el gobiernu rexistrábales como de la so propiedá. Hebio muncha trampa y los foriatos de baxa estopa vieron la ocasión p’apropiase de les finques más riques de los llariegos. Pero naide nun descubrió nin una maldita piedra.

 

-¿Sedrá en Zila? –ruxóse pola mayoría.

-Ta bien, ta bien –la minoría almitió-. Vamos entrar nel conceyu y nun vamos dexar nin un requexu que rexistrar.

Munchos fueron los que sirvieron de comida a los animales naquella Zila xabaz. Malpenes t’alloñabes un migayu pa facer les tos necesidaes de triba variao pa qu’apaeciere los tos güesos separtaos de la carne. Dalgún esplorador dio coles pates en culu fuxendo d’aquelles tierres pero pocos d’ellos atoparon una imaxinada salida. Hai quien dio la razón a la minoría col aquello de tornar a casa. Nin les armes facíen más valientes a los foriatos.

Ente’l tremar y el marmurar de los esploradores oyíase los aullíos d’una llobada. Un valiente propunxo un concursu de tiru al llobu qu’allegrare aquella marcha aforfugada. A los dirixentes abultó-yos afayadiza y que llevantaría l’animu de tanta opinión camudada. Separtóse’l grupu en pelotones qu’arrodiaren calmos a los soníos de la manada. Pasu ente pasu diben cercando los que cada vez s’asomeyáben más a chillíos alloriantes. Delantre de cada pelotón abrióse un llagu qu’arrodiaba un castiellu de piedres negres. Los homes xuntáronse onde más estrechu se facía’l llagu. Xustu naquel llugar, una ponte llevadizo dexaba ver la entrada al castiellu. Emitieron el so últimu parte a la capital pela so radiu ultimu modelu toe escacharrada. Entraron como nun fechizu de dalgún magu, dexando la radio prendío y los homes penetrando nel patiu del castiellu coles armes baxaes y les boques ablucaes. Zarapicaron los unos colos otros mentanto la ponte llavadizo dexo chirriar les sos cadenes. De mano nun s’oyó nada. Silenciu escomanáu.

De sópitu, unos glayíos apavoriantes dexaron oyer el futuru de los foriatos qu’entraren a esplorar Zila. Había quien dicía qu’ellí taben tamién tolos qu’entraron nel conceyu en busca les piedres y se perdieren; qué dengún llogró fuxir d’esi llugar dañible. Los más incrédulos falaben del fogar de los homes llobos, onde los animales cazaben a cuanto humán s’atreviere trespasar el so feudu. Sicasí, los llariegos cuntaben que’l castiellu yera’l de les ánimes encargaes de poner les piedres nos cementerios, qu’atrayeren a dellos foriatos ellí pa que’l restu deprendiere la lleición.¿Cuála ye la to opinión?

 

La nuesa programación sedrá:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.

.

TALA, EL FOGAR DE LOS DISCAPACITAOS

EL GLOSARIU SACARÁTE DE MUNCHES DULDES

Allá una vezona, nos tiempos la Desmemoria, la Lluna y el Sol axuntáronse na isllalla de Cordobello y vivieron una auténtica historia d’amor. Enantes de tornar al universu, dambos amantes tuvieron dos fíos que nomaron como ellos: Tala y Gate, na llingua de los antiguos Lluna y Sol. Tala y Gate esporpollaron al par de los otros conceyos de la isllalla y pasu ente pasu medraron como los más guapos de tou Cordobello. Nacíen xunto a la mar, nuna llanada ablucante; pocoñín a poco, un cuestu diba adueñándose d’ellos; a la fin, llogren formar el cordal más pindiu de cerquina la mar. Hermanos del alma. Hermanaos na vida. Neto’l mesmu destín. Neto los mesmos sentimientos. Caún desendolcó la so xenda de futuru. Caún trazó la esistencia al so gustu. Adulces, caún miraba pal otru de la que caminaben. Y yeren tan distintos los sos andares que yeren iguales.

 

Tala espoxigó con una industria de productos pa discapacitaos. Recibíense a diariu pidíos de tola isllalla y Tala unviába-yos el so saber endolcáu nel so amor candial. De lo artesanu pasóse a lo industrial pero conservando‘l primeru. La so capital, Tagala, convertióse nel llugar más adautáu pa la xente con discapacidá de tou Cordobello. La so costa y el so interior tresformáronse nel centru del turismu pa persones con dalguna necesidá especial. Tolos años, la primer fin de selmana d’ochobre, celebrábase un alcuentru d’hermanamientu de tolos discapacitaos de la isllalla. L’allegría enllenaba un espaciu de necesidá. El modelu de conceyu sirvía pa que los otros avanzaren nel so diseñu.

 

Too diba bien. Too marchaba como nun suañu. Hasta que llegaron ellos, los foriatos. Vieron na costa de Tala y Gate un negociu escomanáu y crearon un nuevu conceyu: Talagate, que na llingua de los antiguos significaba eclipse. Axuntaron tola zona llana de la costa y dexáron-yos la pindia pa Tala y Gate. Na primer llinia de playa entamaron a construyir torres y torres de pisos; diben a allugar a tolos turistes arrascaos que vendríen atrayíos pol cartel d’un turismu pa una clas media foriata. Na segunda llinia de costa llevantaron hoteles coles sos piscines, campos de golf, discoteques, pubs,…, auténtiques ciudaes fortificaes de les que nun teníen de salir si nun-yos petaba; dedicaríenlos a los que naguaben por facer más desembolsu monetariu que l’alpargateru de les torres. Los xalés espardíense na tercer llinia, onde la clas media-alta fardaba del so poder; ellí llevantábense clubs de lo más seleutu no deportivu, no social y no sexual pa que los sos miembros se pensaren lo más fino de la rodiada.

Mentanto y non, vallaron tol conceyu de Talagate pa que naide nun cafiare a los turistes nel so descansu y dexaron a Tala y Gate arrequexaos nos últimos cuestos enantes del cordal. Los sos habitantes entamaron a malvivir nunos barracones fechos namái pa dormir un pocoñín enantes de dir trabayar al complexu turísticu del gran conceyu vecín. Na valla había tres entraes en caún de los conceyos pa que pasaren les carreteres, los trenes y los trabayadores. La xixilancia asomeyábase a la d’una aduana de La Tierra, pero con más policíes y munches más armes desplegaes nella. Too entamó a dir mal. Too marchaba como nuna velea.

Tuvieron de pasar dellos años enantes que dalgunes cases sustituyeren mansulinamente a los barracones. L’artesanía de productos pa discapacitaos tornó a fabricase d’una mena clandestín. La industria pa discapacitaos foriata treslladóse a Bellobello, la capital, y los sos precios xubieron de tala manera que se facíen imposibles pa cualquier llariegu. Los industriales especuladores cuidaben que naide nun yera a face-yos la competencia, pero la so baxa calidá y la tardanza a la hora mandar los encargos facía qu’hasta los foriatos d’alta cuna buscaren los productos artesanales llariegos.

Col tiempu, entamó a falase d’aquellos primeros fines de selmana d’ochobre. Dellos discapacitaos tornaron gociar del requexín de cuestos nel que los foriatos dexaren a Tala. Aconceyábense y trazaben proyeutos a curtiu plazu. Les nueves idees espardiéronse per tola isllalla. Les mentes llibres d’aquellos homes, ataos a la tierra poles atadures de los sos cuerpos, emprimaron a viaxar a Nueva Tagala a suañar xuntos nes vieyes époques. Aquella nueva capital dio-yos abondu aliendu y cuando se decataron taben organizando una marcha pola discapacidá. Coles prieses, alcordaron que fuere pal ochobre siguiente. Cuidaben que’l so oxetivu nun sedría otru que la vieya capital Tagala, llamada polos foriatos Suañu Feliz. Escomencipiaron a charrar en tonu quedo, nun  fuere a oyelos l’enemigu. Proyeutaron el camín de la marcha, amatagáu de les fieres policiales. Escoyeron el llugar onde furar una entrada en Talagate. Suañaron cola mar de Cordobello, pero ensin la llocura de construciones na so costa.

 

Un añu desiguida pasa. Nueva Tagala taba toa engalanada pa la ocasión. Les sos cais, cada día más y más asemeyaes a les vieyes, destilaben ilusiones nel futuru. Nos sos hoteles arrecoyíase xente discapacitao de toles fasteres de Cordobello. El nuevu centru de congresos, construyíu pa la ocasión, dexábase acariñar poles pallabres de llibertá. La policía siguía ensin poder pasar per Tala y Gate ensin pagar por ello, poro que’l Congresu por una Nueva Sienda Discapacitada trescurría nuna felicidá escomanada.

El sábadu llegó y con él l’aniciu de la marcha. Nes cais y carreteres de Tala los sos habitantes españaben n’aplausos cuando pasaben los lluchadores. Sielles de ruedes, bastones afincadores, gafes que nun veíen, coxeres espasmódiques, ortopedies de cuerpos necesitaos,… glayaben y cantaben hasta cuasi llegar a la frontera. Entós fízose un silenciu hasta nel chorriar de les idees. Pasu ente pasu la valla primía la lliberación y había qu’echala abaxo. Pales, alicates, martiellos,… salieron xabaces a frayar la opresión. La vida esmigayábase pente les muries llevantaes pol home ensin razón.

Llograron finar cola verxa y la caminada entamó de nueves. Silenciu. Sele marchar d’un avanzar paráu hai tiempu. Nel otru llau de la valla nun había policía aguardándolos.

Esperanza de que tou nun fuere malu.

Amor a la vida.

El cuestu dio’l testigu a la llanada. Les sorrises trescalaben los llabios del mieu. Pasu firme. Llucha segura. Una arbolada atapaba la carretera.

Manes, brazos, miraes, confiances cruzaes.

La solombra d’aquella viesca aseló'l calor. Nun había dulda. Nun había marcha atrás.

Nin alantre.

Nin al mediu.

Taben arrodiaos. Too yeren uniformes en cuentes d’árboles. Porres qu’azotaben d’aire los cuerpos. Pelotes de goma que zarraben aínda más los güeyos de los policíes, ciegos d’odiu. Tiros cobardes de pistoles ausentes de paz. Y sangre. Muncha sangre vocinglando dolor. Vocinglando desconciertu. Vocinglando desesperación. Sangre esvariando per cuerpos ausentes.

Encarnao.

Llandio.

Firíos perdíos na inxusticia. Presos de l’ausencia de llei pa los probes. Muerte infernal. Aporraos por déspotes que s’abelluguen na razón de la seguridá. De la paz social.

Del poder.

Del nepotismu.

Del amor a la sangre. Al dineru. A la doctrina que los escuende tres d’una fe sorda. Vengativa. Beata.



Silenciu. Silenciu tres la guerra. Tres la llucha. Tres el lloru pola falta de llibertá. De paz.

 

En Cordobello entamóse una güelgona qu’enxamás s’escaecerá. Los foriatos entamaron a tremar. A conocer el mieu qu’asomeyaba tar siempre del llau llariegu. A saber que la llucha nun entamaba namái qu’a esconsonar. A esperezase. A lladrar.

 

 

 

 Esti blog cola de vacaciones. Tanta lluz y tantes llámpares pónenme fritu. Tornare'l 8 de xineru con una nueva parrilla de programación. Hasta entós, alón.

 

¡Ah! Esta vez paez ser que'l virus va mediu coordinase conmigo.

 

 

 

.

LA CUEVONA DE LLAGÚN

¿NUN QUIES VER EL MAPA DE CORDOBELLO? ANDA, ÉCHA-Y UNA GÜEYAÚCA

GLOSARIU PA RESOLVER LES TOS DULDES

Máxicu, esi yera’l vocablu que describía’l llugar del que vos toi a falar y que carrapotaes de xente, veníos dende tolos requexos de Cordobello, visitaben ensin aparar. Alcontrábase nun recuestu, atapáu por árboles del llugar y una fondigonada que lu empozaba ente tanta cuesta arriba que lu arrodiaba. Entrábase a una cueva como otres munches na isllalla, pero ésta taba enllena de runes perantigües que cuntaben histories sobre l’universu y los sos misterios. Quiciabes nun se fuere a saber lo que naquella escritura vieyo se recoyía si nun fuere polos milenta dibuxos que l’acompañaben: naves viaxando pel universu, homes con traxes espaciales estrambólicos, faunes y flores enxamás vistes, llugares que nun s’averaben nin por asomu a lo qu’había na isllalla… Nun teníen conocencia dala de quien pudiere tener fecho aquella maravía de la información (nin lo imaxinaben, nin-yos preocupaba), namái barruntaben que yeren de les dómines d’enantes del entamu la memoria, d’enantes que s’emplegare la escritura en Cordobello. Por embargu, na entrada taba escrito la pallabra LLAGÚN, con lletres como les d’anguañu pero que téunicos, afamaos na búsqueda de la vieyez nos oxetos, dicíen que taben escrites al empar que les runes. Llagún, nadie aldovinaba’l so significáu; nengún yera a falar del llugar onde naciere’l términu; dalgún llocu cuntaba que na isllalla hubiere una lluna que se nomaba asina y qu’esapaeciere ensin que naide fuere alcontrala; la única verdá yera que los más vieyos decidieren llamar d’esa forma al conceyu n’honor a los facedores de tanta riqueza cultural.

Llagún, neto a Ñaña, fueron los conceyos onde más tarde entraron los foriatos. Les sos orografíes emprunes y la so xente xabaz, acordies al gustu los foriatos, ficieron d’ellos los bastiones caberos que cayeren nes manes de los invasores. El despreciu que los conquistadores teníen pa con tolo qu’ufrieren aquellos llariegos, guardaron les sos ayalgues en secretu a lo llargo de munchos años. La cueva nun fo distinto. Tuvieron de pasar dómines enteres enantes que los foriatos fixaren la so cobicia nella. La multitú significaba perres a esgaya y nun podíen dexar de cobrar entraes naquella cueva del pastón de xente. Pesllaron la so entrada, cortaren los árboles que la vixilaben, amurallaron el so contornu y nun gastaron nin un rispiu nel so interior; yera más, nengún de los dirixentes qu’entamaron la esplotación de la cueva se molestó n’entrar dientro d’ella.

Al rodiu la caverna construyeron hoteles, restoranes y llugares de diversión que ficieren de la visita dalgo difícil d’olvidar na mente y nel bolsillu. Trazaron una autovía que coneutare’l centru antropolóxicu cola capital demagóxica. Llevantaron una xigantesca catedral que-yos sirviere pa orar a la riqueza por llegar. Montaron el casinu más escomanal de tola isllalla, qu’aprovechaba’l tirón de la cueva pa esplumar a cuanto viaxeru s’averare y nun fuere pa orar muncho. Ficieron souvenirs espampanantes del esterior modernu de la cueva pa que la xente remembrare’l llugar futurista y non l’anticuáu. Y echaron a tolos llariegos a una distancia prudencial, ensin que s’alloñaren muncho pa tresformase nuna manu obra barato, pero arrequexándolos un migayín pa evitar visites desagradables.

Televisiones, periódicos y radios unviaron a los sos meyores reporteros. Lo más granible de les Grandes Families recibieron la so tarxeta de convite. El gobiernu de Cordobello en plenu averóse al acontecimientu. La inauguración del complexu diba facese por tolo alto. Hebio celebraciones en tolos llocales, hasta na catedral, a lo llargo de díes; viaxeros de toles categoríes llegaron al llugar, al fin de cuentes el dineru nun tenía distinción demientres fuere llegal y se pudiere arrampuñar; los empresarios de la venta fácil esfregáronse les manes malpenes aportaron los primeros visitantes a los qu’engañifar; la probeza d’espíritu curábase con mises y billetes pa pagar lo carnal.

Les autoridaes averáronse a la cueva. Los dirixentes mandaron a los llariegos a los sos puestos. Les autoridaes vieron con abluque la modernidá d’aquella entrada orniada con lluces qu’imitaben les de les naves espaciales. Cruciaron el chocar de manes ente autoridaes y dirixentes. Avanzaron p’hacia la caverna con cara d’homes de mundiu. Los porteros apartáronse mansulinos. La comitiva entró por primer vez nel llugar. Fuera los flashes, aplausos y glayíos de la multitú aselaron. De la cueva salieron tolos trabayadores llariegos dándose a les voces. Dicíen que la comitiva esmigayárase nel aire malpenes llegaren a la primer runa. La policía foriata detúvolos y entró a mirar la que montaren. Segundos, minutos, hasta un cuartu d’hora llegó a pasar ensin que naide  del interior saliere.

Llamaron al exércitu pa que fuere a controlar aquel despropósitu. Miles de soldaos formaron n’antoxana y prenetraron na cueva a les carreres. Unos pocos tornaron vocinglando que’l llugar taba malditu, que los collacios que diben delantre esaniciárense malpenes llegaren a unes formes rares que taben na parede. Dalgún llegó dicir que les formes rares s’illuminaren y tresformaren en lletres. Ún que sabía lleer aseguraba qu’ellí traía: “Bienveníos al aeropuertu interestelar de Cordobello. La so nave saldrá en dellos segundos”.

El complexu quedó ensin foriatos de por siempre. Los llariegos tornaron de nueves a visitar la cueva. Nengún llugareñu entró nes edificaciones feches polos desapaecíos dirixentes, que fueron esmigayándose de poco a poco. La cultura taba lloñe de la cobicia anque la distancia se midiere en centímetros.

Nengún de los llariegos quiso nin quier marchar de Cordobello.

La selmana que vien va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.

.

ESPLORADORES DE LAN

GLOSARIU PA QUE NUN HAIGA DULDES NOS TÉRMINOS DE CORDOBELLO

¿UNA VISITINA'L MAPA DE CORDOBELLU?

En llegando *l’entamu la memoria a la *isllalla, en Lan yá se recoyía como vieyo la pallabra cordobello pa definir a un airón frío que venía del norte y qu’anunciaba l’iviernu. El llugar d’orixen d’esi airón fo la primer búsqueda que ficieron la xente de Lan, pero espetáronsela escontra la cafiante borrina qu’echo p’atrás a munchos d’ellos  y que fizo esapaecer a unos pocos no blanco de la nieve tan apeguñao naquella ausencia de realidá.

Lan, tierra d’esploradores, recueye ente les sos ayalgues el llibru Xeographia onde s’estudia de forma fonda hasta’l caberu requexu de la isllalla. Por mor d’ello, la pallabra cordobello tresformóse d’airón frío del norte na espresión más candial d’amor a la tierra. Amor por Cordobello. Amor polos sos conceyos. Amor pola so xente. Amor pola so cultura. Amor pola so ciencia. Dalgo de lo que los llariegos sienten arguyu a fartar, apegu ensin fin, tenrura descomanada y un serenu llatir.

 

Y llegaron los foriatos a mangoniar la isllalla ensin escrúpulu dalu, frayando l’amor a la tierra de la xente de Lan. La primer llei impuesta nel conceyu obligaba a tolos sos habitantes a nun salir de les llendes de Lan baxo pena de gastar los díes ente rexes. D’esta miente finaben coles sos esploraciones por tola isllalla, cola allegría que regalaben al so paso nos infinitos viaxes y col corazón que daben a tol que-ylu pidía. Zarróse’l so mercáu de domingu que traía l’alma de Cordobello y que se facía na so capital Airón. Yera un mercáu renomáu en caún de los conceyos qu’aportaben les mercancíes más granibles: inventos, cerámica, semilles, histories valoratibles, saberes,… Vendíase ensin monedes, ensin dalgo que camudar a cambiu de lo que se deseyaba, ensin usures; vendíase pol amor a la tierra que los fizo, pol curiáu que ponía cada esplorador n’alcontrar lo que non buscaba, polos aires del norte y el sur que dirixíen la so gueta, pola isllalla que-yos dexaba’l so suelu pa descansar tanta bondá, por caún que los facía y los necesitaba, por Lan.

Treslladaron la parte mortal del mercáu a Bellobello y dexaron, envuelta ente sedes d’alcordanza, la inmortal d’Airón. Punxeron munchu procuru en que nun-yos ficieren competencia deslleal repartiendo per tou Lan milenta guardies que curiaben tolos domingos que los llariegos nun montaren los sos tenderetes y estropiaren el so reinu infinitu de baratixes y coldicia. Sicasí, entamóse una lleenda que falaba del Airón Esplorador, un xinete que cabalgaba na so montura blanca y vistía cola ropa tradicional de Lan, percorriendo llocalidá a llocalidá faciendo anuncia de cuándo y ónde se diba celebrar l’afamáu mercáu. La realidá nun s’estremaba muncho del mitu: una familia unviaba l’avisu del día en que se diba entamar la feria a los conceyos, iguaba tolos enredos qu’había de facer pa preparalo too ya imprentaba les fueyes nes que se daba a conocer a la población l’acontecimientu. Too diba en secretu, too yera poco pa que nun los garrare l’autoridá.  Cada mercáu yera en hora, día y llugar distintos y el trabayu yera abondu abegosu.

 

Diba nun caballu blancu. El so traxe yera’l tradicional. Dirixía los sos pasos al mercáu y llevaba nun bolsu la fueya que lu anunciaba. Deva nun fo a creyelo cuando la paró l’autoridá por dir a más velocidá de la permitida en tracción animal. Yera una de les tantes fataes de los foriatos, tan avezaos a sacar normes de debaxo l’embeligu pa fadiar a los llariegos. Pidiéron-y el carné, sacólu a les carreres del bolsu y cayó-y en suelu la fueya na que se daba anuncia del mercáu. Desiguida salieron de la boca d’un de los axentes de l’autoridá dos pallabres desafortunaes: Airón Esplorador. Emburriáronla pa escontra’l coche policía, llantáron-y les esposes a tou meter y llamaron per radio al cuartelón. Ataron el caballu a la defensa pa nun dexar ellí una prueba fundamental y arrancaron gayoleros pa comisaría.

Los sos compañeros asperáronlos enfilaos talamente como si d’una fiesta foriata se tratare, había que tener en cuenta que non tolos díes se garraba a ún de los delincuentes más buscaos de la isllalla. A la so llegada al cuartelón los aplausos espardíense pente los glayíos de bravu, garraron a la delincuente pa un llau y xubieron nos costazos a los héroes, cuasi los dexen en calzones al arranca-yos trozos de tela que-yos sirvieren de recuerdu. Tres los héroes diba la presa que yera enseñada como si d’un troféu de caza se tratare, teníen de protexela pa que nun la rabuñaren enantes del xuiciu, la xusticia tomábase mui en serio ente los foriatos. Al entrar nes oficines decatábase ún que nun dexaben de sonar los teléfonos pa felicitar a los mandos, qu’asperaben a l’acusada pa facese una semeya con ella y repartila ente la prensa de tola isllalla. Al meter a Deva na celda hebio dalguna dificultá p’alcontrar el piesllu, a lo que se vía dalgún condergáu vasu taba enllenu d’alcohol y los probes oficiales taben ensin sabelo. Una vez llibres de la pesada de Deva entamaron un baille xabaz que prometía una gran entrada, los besos escomencipiaron a mecese colos abrazos, homes y muyeres escaecieron el so sexu y copularon ensin importar onde s’alcontraba l’agua. Al cayer el sol dalgo más lu acompañó, namái quedó espierta una botella de xinebra comprada nel mercáu de Bellobello.

 

Ente los asistentes al mercáu de Lan espardióse la noticia de que garraren a Deva y acusárenla de ser l’Airón Esplorador. Desiguida se concentró la xente na esplanada del conciertu nocherniegu y celebróse un conceyu abiertu nel que s’organizó un viaxe a caballu y col traxe tradicional a les fediondes mazmorres foriates d’Airón.

-Y alcordáivos: Toos somos Deva –glayó tou combativu’l constante revolucionariu al que-y prestaba pensar qu'él yera la única salvación de Deva.

D’ún nún formóse una filera descomanada de xinetes colos sos caballos blancos, marrones, negros,… l’Airón Esplorador enxamás fo desixente cola color del caballu. Namái desentonaba na filera’l constante revolucionariu que montaba en burru y glayaba: “Muerte o llibertá”. Los otros xinetes amirábenlu cansos de los sos mítines tresnochaos y los sos eslóganes rancios. Al atapecer llegaron al so destín. Naide nun vio al constante revolucionariu en sitiu dalu y a naide nun-y importó, yera más, descansaron. Alcontraron a los guardies enfilaos y tiraos pel suelu poro que nun-yos fizo falta entregase como Airones Esploradores. Sacaron semeyes pa colgales en CordoTube, garraron les llaves pa soltar a Deva, ataron con cuerdes los cuerpos esnudos de los foriatos, lleváronlos a un espigón del muelle central, avisaron pa que tuviere pela mañana tola prensa ellí y colaron a festexar que Deva taba llibre.

 

El constante revolucionariu apaeció tarde na fiesta de Deva. Nun se sabe cómo nin quién pero dalguién lu llevó al cuartelón, lu metió nuna celda y lu dexó presu. Los foriatos vieron nél la Deva que perdieren y a la que los dirixentes centrales nun conocíen. Entregáronlu como’l gran deteníu y escaeciéronse de tomar cualquier represalia. A los probes presos del penal de Bellobello nun-yos tornó enxamás la paz.

 

 

 

 

.

RESISTENCIA EN CASTRÓI

VISITA LA ISLLALLA AL TRAVIÉS DEL SO MAPA

Castrói fo’l conceyu escoyío polos foriatos pa montar la primer fábrica d’armes de Cordobello, a la par d’un espampanante polvorín soterrañu onde guardales. Ficiéronla averada a Gamusín, l’antigua capital de la isllalla y sede del gobiernu d’oposición a los foriatos. Queríen d’esta miente cuntar colos arsenales de mayor valir dimpuestos pa llanzar cualquier ataque al enemigu. Elixeron un pueblín nel que se xuntaben tres ríos, dándo-y una posición estratéxica na que la población taba arrodiada d’agua per tolos llaos menos per una vaguada piquiñina onde s’atopaben les puertes de la llocalidá coles sos muralles milenaries. Planificáronlo too como si d’un pantanu se tratare: llevantaron un pueblu nuevu onde tresplantar la población como si trataren de xeranios, sacaron piedra a piedra la puerta y muralles y lleváronles pal palaciu presidencial de Bellobello, arrasaron con toles cases del pueblu menos cola mansión onde se metió’l direutor de la fábrica y la so familia, ficieron barracones pa los trabayadores colos materiales de sobra de mediu Cordobello, llevantaron edificios altos y de muncha apariencia pa la fábrica col aquello que paeciere ser de sieglos venideros, construyeron un fortín de gran seguridá que sustituyere les muralles y la puerta, escoyeron a los llariegos que diben trabayar na fábrica ensin salir del llugar nin pa fumar, punxeron una alambrera qu’arrodiara tol entornu y llantaron una villa de foriatos bien pegadina al fortín pa da-y cobertura a la fautoría.

 

Lano vio como lu separtaben de la so familia, como lu xubíen a un camionón atarraquitáu de rapazos y como enfilaben pa la carretera’l fortín. Cada dómina sustituyíen a los trabayadores vieyos asina como a los muertos de mena natural o accidental. Sabía que-y asperaba: dexar la casa onde deprendió día a día a facer inventos ablucantes cola so familia pa xuntase a nuevos collacios de trabayu naquella cárcele con forma fautoría onde teníen la desgracia de morrer pal futuru. Tolo que cuntaben del fortín y los barracones quedábase pequeño, lo mugoriento mecíase colo ferruñoso y adueñábase d’aquel llugar qu’un día tuvo vida y que la perdió al tresformase n’infiernu. Tocó-y vivir y dormir nel tercer pisu d’una llitera, les poques coses de so metíales nuna taquilla mínima y llograba dalgo d’hixene en duches alloñaes de los ríos. La comida azotábentela nunos cacíos sucios, el tiempu llibre aburríase ente les cucaraches y el sexu deprendíase a ascondelu.

Lano entamó a cunta-yos a los sos collacios histories de los inventos de la so familia y los otros ascuchaben en silenciu y cola sorrisa amatagada. De xemes en cuando yeren a traéi dalguna tuerca, dalgún trozu fierru, dalguna ferramienta,…, y metíen-ylos nunes taquilles esfeches pol tiempu. Lano llogró dalgo de papel y un llápiz colos que dibuxar proyeutos que dalgún día pudieren ser. Toos xixilaben pa cuando veníen les revisiones sorpresa de barracones, nun queríen que dieren colos futuros inventos de Lano.

 

-Entaina nenu, que soi vieyu y nun voi llograr ver el to primer inventu –díxo-y Poldo, el más vieyu la fautoría.

Lano decidióse a la fin, diba facer una robó que fuere a baillar con toos. De primeres nun-ylo cuntó a naide, quería pillalos d’improvistu. Esbilló ente les pieces, garró aquelles que-y diben sirvir y pidió les que-y faltaben. Les duches tresformábense en taller namái cenar y Lano echaba´l tiempu trabayando na nueche, asina que pol día los demás aidábenlu a empixar a los xefes y que’l rapazu fuere a dormir unes horuques.

Pronto tuvo d’echa-y un gabitu un soldador, que pasu ente pasu fo decatándose que taben a montar un robó. El gallaríu d’allegría ascuchóse ente los obreros. Prestába-yos la idea y cruciáronse porres nes qu’apostaben pa que diba sirvir. Escomencipiaron a come-y la oreya a Lano pa que-yos dixere de que diba l’inventu y ganar el premiu. Tanta fo la presión que Lano díxo-yos a la fin que taba a construyir.

La priesa entamó la carrera. Cuasi colocaben la pieza acordies la traíen. Los pechos y la cara dexáron-yla a Clis, l’artista del grupu. La espeutación dexóse sentir. Dengún faltó a la cita. N’acabando coloca-y lo importante, Lano llamó a Poldo pa qu’echare’l primer baille. Prendió la ilusión de fierru y púnxo-yla en posición a Poldo. Entós oyóse:

-Arrecúchate contra min que soi toya.

Los aplausos, los xiblíos y los ixuxús prendieron la nueche. La memoria de los cantares afloxo la espita l’olvidu. Toos gociaron de la robó. Toos-y dieron un baille. Toos menos ún. Nuna ventana atopábase’l fíu’l direutor, mirando agocháu l’espectáculu. Na so cabeza entraron otros planes.

 

Los sábados na tarde-nueche xuntábase na mansión de la fautoría lo más seleutu de la mocedá foriata de la rodiada. El direutor mandó a Lano que preparare la robó pal baille del so fíu. Lano quedó aparráu. Nun yera a creyelo. Aquellos castrones teníen güeyos hasta nos retretes. Malpenes tenía dalgunes hores pa iguar la cosa. Faló colos collacios. Clis iguó una segunda cara con forma gocha que-y camudaba a la robó. Dalgunos preparáron-y una fras nueva. Lano echó l’últimu baille con ella y besóla.

Acompañóla hasta’l salón de la mansión. Un sirviente desixó-y que-y desplicara’l funcionamientu d’aquel cacharru. Lano desplicó-ylo. El sirviente glayó-y pa que se marchare. Lano echó-y la última mirada a la so robó.

 

Fo la sensación de la nueche. Mozos y moces sortiáronsela como llocos. El tocadiscos pinchó hasta’l caberu tema de la casa. El fíu’l direutor reservóse l’últimu baille. De la que danciaba, la cara de gocha fizo la so apaición. Les risotaes y glayíos dexo saber a los trabayadores na parte del baille na que taben. El fíu’l direutor intentó safase d’ella. Fo cuando la robó glayó:

-Arrecuchate contra min que soi una bomba.

La mansión esmigayóse acordies l’españíu s’espardió pente los ríos. La bomba tenía una potencia hasta esi momentu esconocida en Cordobello. Los llariegos enxamás mataren a naide, aquella fo la so primera ocasión pero non la última. El primer ataque de la *resistencia llariega fo tou un ésitu.

 

*Resistencia.- Asina se-y llamó a la xente llariega qu’entamó a sublevase escontra los foriatos. Esta yera la historia del so entamu y quiciabes nun futuru cercanu vos contemos otres.

 

 

.

LOS PININOS DE ÑAÑA

En Cordobello tol mundiu sabía que la xente más simplaya taba en Ñaña: recibíen a toles persones d’una mena candial y nun-yos desixíen nada a cambiu. Y dientro los sos pueblos, Talba yera’l más inxenuu de tou Ñaña. Alcontrábase apegáu a la borrina, no cabero’l conceyu, y yera perdifícil llegar a él dende les otres poblaciones de la rodiada. Los llariegos que lu visitaben quedaben a dormir nes cabañes de los sos habitantes y chucábense en suelu na más esquisita comodidá del monte. Atrayíalos el tratu dulce y lo desprendíos que yeren los talbeses, too yera poco pa los sos convidaos. Nun yera raro que los llariegos visitantes llevaren siempres abondos presentes pa los sos habitantes pa que-yos sirvieren pa endulzar la dura esistenca.

 

Los foriatos tardaron más d’un migayu en dar con ellos. De primeres, la so presencia pasaba desapercibida pal ringorangu que se gastaben aquellos invasores de mediu pelo que cuidaben que too yera poco pa la so esquisitez. Nun teníen nada que los afalare a fixase n’ellos: nin oru qu’enchare les sos arques, nin carbón que los calentare, nin inventos d’interés, nin comida abondosa, nin una costa espampanante onde echase nel sable, too se reducía a un simplayu nin que podíemos tar numberando ensin descansu más d’una hora y que los facía invisibles a los güeyos d’aquellos que deseaben arramplar con tolo que vieren de valir. Los bienes non cuntables nun trayíen dengún provechu pa lo egocéntricos que yeren los foriatos; bueno, si nun cuntamos la envidia, que presupón ser dalgo conxénere a los sos seres escoyíos y temerosos del Alma Eterna.

Depués de tiempu llantaron el so primer gobiernu en Ñaña cola ausencia permanente de la Gran Familia, que se suponía que la dirixía, y los abondosos viaxes del so dilixente Conseyeru. Comprobaron que yeren ciertes les sos sospeches de que yera una zona probetaya dedicada a l’agricultura y la ganadería y que malpenes-yos aportaría dalguna ganancia. L’amabilidá de la so xente nun trespasaba l’arguyu de los sos invasores, nun dexándolos acolumbrar la bona vida que nel fondu podíen llevar en Ñaña, nin les ganancies que-yos podíen aportar los sos valires reales. Sicasí, al llegar el branu decatáronse que’l conceyu s’enllenaba de llariegos que diben a aselar el so aura cósmica, acordies dicíen los del llugar, y dexaben abondos beneficios, siendo Talba ún de los llugares que más xente solicitaba dir, provocando una recatafila de reserves que teníen d’asperar años y años.

Construyeron un balneariu na capital Ñabagú nel qu’entamó a dir tolo más alloriante de la gran sociedá foriata, convirtiéndose depués de Xarca nel so llugar favoritu d’alcuentru. Descubrieron una fonte d’agua milagrosa que nun dexaba de ser el remueye que llevaba’l ríu cuando pasaba per una mina fierru qu’en secretu llevaben los vecinos d’un pueblu cercanu a la capital. Les converses colos ñabaguenses entraron tamién dientro los tratamientos de remocicamientu que tanto los atrayía, aseguraben que les sos voces relaxaben les neurones y quitaben dalgún añu qu’otru na pìel. Los vexetales de Ñaña axuntáronse a la coleición, tresformándose nuna fonte de salú polos sos componentes ecolóxicos y la so riqueza en nutrientes, formando d’esta mena, colos otros dos, un tríu invencible nel llogru d’una llozanía descomanada.

 

L’allugamientu de Talba salvóla de la quema económica y contaminante a lo llargo de dalgunos años, pero los güeyos de les Almes Maestres taben llantaos n’ella y nun la soltaron nin cantando melodíes. Estos santones naguaben por un llugar de retiru espiritual, onde naide los fuere a controlar y se pudieren dedicar a les sos gasayoses misiones: comer carne abondo, compartir la carne col espíritu más mozo y mecer too con bon oruxu de Cordobello. Talba yera’l llugar perfeutu, lloñe de palacios enllenos de xente pudiente que los pudiere censurar, del formigueru que se formaba nos santuarios de Plistói y Rontói que namái los molestaben pidiéndo-yos bendiciones, de la mirada llaína de sacerdotes y monxes avezaos a un fervor enfermizu que nun facía más que controlalos. Nun queríen compartir vivienda colos talbeses como si fueren vulgares llariegos, namái necesitaben el so serviciu como criaos ensin soldada, cuasi como esclavos si nun fuere pol aquello de que nun se dexaben zurdir la badana ensin gorgutar. Nes sos perspeutives alcontrábase’l facer un palaciu al altor de la so santidá, asina que punxeron a trabayar a los obreros más especializaos que teníen de dir y venir tolos díes al pueblu dende les cases más dignes y cercanes qu’había na rodiada.

Pasó dalguna década qu’otra hasta finar la obra y les Almes Maestres de mayor valir celebraron l’actu con un agospiamientu y unos exercicios espirituales de postín. Llevaron a los talbeses a palaciu como criaos pininos que nun sabíen qu’ente les sos obligaciones taba l’atención carnal d’aquellos homones d’alma bullindiega. Lloros, glayíos de probitú, sollutos de placer obligao, aquella xente quebró delantre les órdenes de les Almes Maestres, avezaos como taben a agasayar a los sos visitantes hasta llendes entá nun conocies nun fueron a aguantar tanta satisfaición reprimida. En llegando la nueche fuxeron a les sos cabañes a curar les feríes interiores y esteriores del cuerpu.

Yera una nueche de lluna enllena. Les Almes Maestres dexaron que per aquella xornada nun-yos sirvieren más aquellos panoyos que nun sabíen nin un rispiu de la vida y los sos placeres. Nun tuvieron otra que gociar ente ellos, dexando tatexar sele’l so espíritu corporal. Los agullíos sonaben dientro y fuera de palaciu. Les pisaes de fuera amatagábense pol trescalar de les cibielles de dientro. L’abrir de puertes fuera encontábase col pesllar de corazones dientro. Les garres llanzáronse al aire y penetraron la carne de sabor arreguiláu. Nun hebio tiempu a glayíos. La color xuntóse nun mecigayu encarnáu. La sorpresa nun fo a dexalos pescanciar lo que taba asocediendo. O non asocediendo, solo barruntando, acongoxando la bisarma de la verdá. Silenciu. Non de llegar al gocie final. Non de fumar. Silenciu d’abandonu. De pasu. De muerte.

 

Los cuerpos taben separtaos a dentellaes, talamente como si la saña fuere a da-yos el gocie dafechu, talamente como si les cares tuvieren dibuxaes pola sangre na ausencia dafechu de rasgos reales, de dalgo que dixere ‘aquellos fueron homes’, ‘seres vivos capaces d’acariñar a los de so’, anque esto cabero-yos resultare difícil a aquelles víctimes per segundos, aquelles almes que dexaren clara la so maestría pa despreciar.

Fuere un ataque de llobos nuna lluna enllena que surdiere de la borrina. Sicasí, los inspeutores de los foriatos acusaron a los llariegos de Talba de matar a las Almes Maestres, na nueche de les zarpes asesines, na claridá nocherniega de los homes llobos, de los pininos asesinos. En Ñabagú preparaben les bales de plata p’axusticiar a los talbeses enantes que la lluna tornare coles sos garres afilaes. Enxamás salieren del so pueblu nel monte, enxamás conocieren tierra más p’allá del so valle, y agora obligábenlos a dexala, a vaciar de vida les sos caleyes. Na capital iguaben les últimes dilixencies pa la so execución. Los foriatos salíen de les sos mansiones a contemplar la muerte de cerca. Los llariegos metíense nes cases muertos de dolor y pena. Peles cais pasaron los talbeses colos güeyos zarraos pa ser a remembrar les sos brañes, la so aldega, pa nun escaecer la so inocencia, pa reivindicar lo pininos que yeren, pa olivar la paz del descansu eternu, pa nun dexar pasar el mieu. Enantes de morrer, abrieron la so mirada fondera pa que l’enemigu nun la olvidara na so memoria.

 

Talba taba en silenciu. La llobada agullaba pola ausencia de los sos amigos, de los sos vecinos del otru llau de la borrina. Siempres los defendieron, siempres los sofitaron,  y agora desaparecieron, quiciabes enfurruñaos con ellos por armar aquel espolín en metanes la nueche. Tornarien una vuelta y otra a Talba hasta alcontrar a los sos seres queríos, tendríen paciencia hasta llograr el so perdón, les sos caricies, la so vida.

 

 

* Almes Maestres.-  Yeren la ponte ente los Foriatos y L’Alma Eterna. Nun se casaben, nin facíen dengún ritu, veníen a la tierra como almes de los muertos más consideraos a facilitar el camín a los vivos. Los sos fíos, tenidos poles muyeres de les families a les qu’atendía que nun fueren aristócrates, yá qu’éstes taben llibres d’ello, sedríen les futures Almes Maestres.

 * Borrina.- Nun escaezamos qu’una isllalla tien nel centru d’ella la mar y a los llaos los picos que finen nuna borrina que los llariegos enxamás nun trespasaron y a la que-y tienen dello respetu.

 

.