PENA MUERTE

El carceleru abre la celda y dexa salir a la comitiva. Entama una xera andariega pela prisión, na que’l carceleru, mentanto xira les llaves, sabe de la so culpabilidá pola forma mirar. Son munchos años trabayando nel corredor la muerte como pa dexar escapar esi detalle. El silenciu acolumbra la marcha’l reu. Asemeyen movese al compás a cada túnel que pasen. Al aportar a la sala na que va facese’l ritu, el carceleru xefe, con menos sentíu que la pega en rau, sabe tamién de la so culpabilidá. L’encargáu del botón, acordies lu mira, reconoz la so sonrisa de psicópata y compadezse del presu. El cura, con voz aforfugante, da-y la so bendición al reu. La muerte llega a rabeseres. El so cuerpu presu cola sele. La so mente presu apena. La so alma de fíu presu llora. La so caxa enllénase colos sos deseyos caberos. El psicópata torna a los sos oficios.

CANTANDO BAXO LA LLUVIA

Llenzu Escritu 4

Entrar nel estudiu fo sentime como una estrella de cine. Namái qu’un oficinista diba arrodiase de figurones de la interpretación. Ordenaría-yos les vides dende les mios cuatro muries: ónde rodaben, con quién, ónde firmaben los sos autógrafos,… Pasé per milenta casi llevantaes con andamios grandonos pa teneles de pie. Acolumbré hangares descomanaos nos que s’escondíen cases, hospitales, chigres,… Hasta que llegué onde m’esperaben los papeles la mio vida. Xusto ellí, nun requexín, un home baillaba de farola en farola bañáu en mangueres de lluvia. Nun abultaben filmalu. Naide nun glayaba: ¡Corten! Pero él nun aparaba de danciar, percorriendo les faroles y vuelta a entamar.


Diez años depués, naide nun desplicaba lo que facía aquel home ellí. Nin xefes, nin obreros, nin guah.es yeren a dicime la razón de tanto baille baxo la lluvia. Punxi pates pa enriba archivos. Repasé a tatás les axendes del estudiu. Baxé onde la esllava’l llugar. Nun atopé denguna desplicación pal fechu. Nin los sindicalistes teníen conocencia de qu’hubiere nenguna protesta d’años.

Unviáronme pa tirar los papelos vieyos. Revisélos enantes. Ellí alcontré una fueya de despidu ensin firmar. Un actor secundariu diba ser echáu pero naide nun s’alcordó de firmalu. Nun aparó de recibir nómines. Nin de dir trabayar. Y muncho menos de baillar.

Ilustrador: Miguel Jiménez

MAREES

Les agues tresllúcense roxes acordies van y vienen les foles. Les foques colen de la playa alloriaes col placton qu’enllena’l so hábitat. Colos sos glayíos espanten a tolos animales de la rodiada. Una ballena gayaspera amíralos incrédula. Sigue’l so camín ensin xirar un migayu. Nota dalgo dolor al par de la so cola. A lo meyor ye dalgún tropiezu con otru animal. El dolor multiplícase. L’agua camuda a roxo rabión. Avara na playa, acongoxada pol dolor. Malpenes-y queda un aliendu de vida. El placton retírase satisfechu en metanes de dalgún referver caníbal.

SENSACIONES

Güei entamo una seición nueva na que voi esnudar sentimientos, corazones, sabores,... Aspero que vos preste.

INVÉNTATE UN CIELU

Invéntate un cielu que me faiga escaecer la murnia qu’arrodia la mio vida; que me faiga besate un vuelta y otra; que la to carne se respingue cola de mio. Invéntate un cielu onde los tos afalagos me sorpriendan en llugares inimaxinables; que vibre xabaz dexándome dir al to sexu; que’l mio amor seya’l to amor. Invéntate un cielu que nun seya un infiernu nel que me somorguies cada día. Invéntame un cielu onde nun me pegues.

LLENZU ESCRITU

PEQUEÑA NECESIDÁ

Equí hai ún que pon que tien físicu melgueru. ¡Mialma que val más creyelo que dir velo: físicu melgueru! Imaxino a esta seición del periódicu titulase “contautos de físicos melgueros” o “contautos melgueros” a seques. ¡Probes sadomasoquistes…! Condenaos por esti rotativu al escaecimientu etenru con un axetivu cenciellu, marcharánse pa onde se faiga anuncies d’esta triba: Culturista, 22 durísima. Póngome a cien sólo de lleelo. Una nun ta avezada a coses tales, nin tando casada. Bueno, de la que taba casada lo que vía nun algamaba los 22. Y lo de culturista, nun asomaba nin como cultureta nes páxines de cultura de El Comercio. ¡Anda qu’ésti…!, abúltase más a un anunciu de vaques: superlecheru. ¿Depués de facelo tomámonos un vasucu recién catao? ¡A que coses ta una obligada! Too pola necesidá que tien una, que nun camienten que ye sólo asuntu d’ellos. Mira: brasileñu, mulatu, polacu, bisexual… La de coyer, nun fai falta tanto nin. Si namái naguo por cubrir una esperienzuca. Si namái que necesito un home col que prauticar los mios instintos de viuda negra.

Ilustrador: Miguel Jiménez

MANADA DE DOS

Sorprendióme la to llamada. Nunca nun lo faes cuando toi na casa’l pueblu. Sonó y sonó’l teléfonu, enraxonándome a fartar. Crecióme’l pelo y los aullidos prendieron les lluces de les cases de la rodiada.


-Nor, entama una partida caza. Los llobos tán de nueves equí.

Garré’l coche y volví pa la ciudá. Adiós a la mio selmana de folgueta depués d’un cansu mes mercando. Nun sé como pude enquivocame de cruce. Paré’l coche y eche correr pel monte. Siempre me llames cuando toi na casa la ciudá. Cuando la xente cuida que ta sonando la televisión. Les llambíes yérenme conocíes. Entamaron esvariar peles mios oreyes. Nun paré, di les zanques hasta’l bosque. Ellí parásteme. Reconocíte. Los nuesos güeyos xuntáronse. Un disparu rompiónos la concentración. ¡Qué duros son los caminos cuando falla l’amor!

ANTÓNIMU BÍBLICU

Amor ye antónimu d'amor.

LLENZU ESCRITU

MIO PADRE

Préstame muncho xugar con mio padre. Mio ma siempres me curia, pero mio pá apaez cuando ye importante. Faceme cosquielles ye lo que más m’enllena. Les mios manes nun son a coyelu, de la que les suyes gárrenme y nun me dexen. Nun soi a parar de rir. Ye’l meyor. Los pocos díes que me trae al cole, mércame cromos, chuches y dalgún qu’otru cómic. Nun hai quien lo gane. Agora ta nuno de los sos viaxes de negociu. Cuando seya mayor, voi dir yo en cuentes d’él, asina sedrá a descansar. Ayeri vi a un paisanu que yera como’l so hermanu ximielgu. ¡Coime! Y la que diba con él, yera neto a usté, profe. Fino. Mio pá ye l’acabóse.

Ilustrador: Miguel Jiménez

COLORÍN COLORÁU

Na fortaleza del ermu nun quedaba naide. La dinamita púnxose na cuevona y nel edificiu. L’españíu oyóse hasta nel otru fortín. Dengún foriatu diba entrar nel futuru per aquel camín. Dos sieglos tuvieren de pasar pa qu’atoparen el furacu y finaren con él. La fiesta diba ser pa nun escaecer. Garraron a les dos prisioneres y colaron p’Ariñán. Elles nun dexaron de falar. Teníen muncho de cuntase.


-Xúrotelo pol miruéndanito pravianito que tuvi a piques de morrer.

-Nun lo duldo. La fortalecita na que me teníen pesllada tampoco yera bromita.

-¡A ver si callen! –glayó-yos Asur fartucu d’ascuchales.

Luzvitular y Felguecuentu nun aparaben nin anque les amordazares. Xuacu y Asur tomaron una decisión cansos del so retolicar hasta fartar. Tornaron de nueves a la fortaleza de ñeve y dexaron un destacamentu con elles. Cada selmana diben camudar la xente, que diben tener dos de descansu.

-Vaya par de fañagüetes. Diben frayanos la celebración.

-Pues si hai más foriatos asina, lo meyor ye perdelos nesi ermu ensin agua nin comida.

-Home, los drechos de los prisioneros…

-A la mierda. Los drechos de los probes llariegos.

Dexámoslos falando. Nós diremos colando seliquino. Quiciabes tornemos ellí dalgún día. ¿Quién sabe?

LA OTRA FORTALEZA

El vienres sedrá'l final de la blognovela, quiciabes vuelva con una nueva entrega.

Xuacu nun aparó nin un rispiu: faló col xefe d’aquella fortaleza; averóse a la prisionera y fue quien a descubrir el so nome; sepio qu’había otra fortaleza dellos kilómetros más pa dientro; aldovinó que na nueva fortaleza preparáben-y una trampa; ascuchó que la tierra na que taba la otra fortaleza yera un ermu; apostó a que la entrada al mundiu de los foriatos taba nella. Depués de too ello, durmió.


Na mañana siguiente unvió correos a Gamusín y Ariñán. Almorzó abondo, a sabiendes que nun diba xintar. Salió con una patrulla pa observar la otra fortaleza. Fue col jeep y acurrucóse nun oasis cerquina la fortaleza. De mano, nun se vía nada. Malpenes baxó’l sol, vió que salíen dellos soldaos cola prisionera. Pela puerta que salieren, notó’l reflexu d’unos prismáticos. Abellugáronse nunes palmeres hasta qu’amiyó la nueche y fueron a colar del llugar.

Dexó’l día nuevo pa descansar. Tropes abondes aportaron de los conceyos más averaos. Supo qu’Amalio, el blogpredicador y el Conseyeru de Talagate morrieren nun ataque de les tropes de la presidencia de Cordobello. Pasaría a la historia como una llocura del Presidente, que veía pantasmes per tolos llaos y unvió les tropes enquivocaes. Asur xugó con él unes partíes al axedrez, cuasi lo único bono que truxeren los foriatos.

Na nueche colaron de nueves al oasis. Montaron nél un campamentu. Al llegar el día, dexaron ver la so bandera. Yera la llariega de Cordobello. Taben dimpuestos a cercalos díes o meses, pero nun diben gastar una bala. Acordies a los cocineros nanos, nun teníen provisiones pa muncho. Los foriatos siempre tan babayos.

A la selmana, una bandera blanca dibuxóse nel ermu.

LLENZU ESCRITU

Güei entama una seición na que'l pintor Miguel Jiménez m'unvía una ilustración y yo escribo la historia, ye dicir, al revés de lo que se fai normalmente. Miguel Jiménez fae la so obra pictórica equí en Xixón y la selmana pasada  foi seleicionada una obra, "Bananas News", nel XLI Certamen d'Arte de L.luarca.

AUSENCIA

Hai yá dos díes que la eche a faltar. Nun me cueye’l teléfonu. Nin me contesta al microlarbi. Nin saca a la so perra a pasiar. Nun hai que dicir lo de dir a trabayar a la oficina. Y anque mato les hores nel nuesu xiringo d’al par de casa, tampoco nun tuvi suerte dala na espera.

Aquellos etenros besos fundidos nos sos llabios de calendariu. Aquelles nueches dexando dir a la mio incontinencia na cama. Tolos díes camentando nella y agora déxame. ¡Anda, la so casera! Ta llimpiando’l cristal de la ventana la sala. Yá dicía yo que tardaba. Mira, pon el cartelu de “S'Alquila”. Voi tomar otru vinu. Mialma que nun va tardar nin tres díes n’alquilalu. Buenu, a esi preciu, nin dos díes. Pa mi que va pagar hasta pa que-ylu ocupen. Dame lo mesmo. Yá tengo ganes de que llegue’l nueu inquilín y tornar otra vuelta a les mesmes. …¡Huum, l’amor, glu-glu-glu, ye…uuuhaaah l’amor!

TALAGATE Y FINAL

El Conseyeru de Talagate nun yera a pescanciar que nun lu convidaren a los Agospiaos. Cuidaba que’l so pesu políticu yera más fondu pero, a lo que se ve, la so presencia nun yera deseyada nin nes fiestes. Quiciabes fora bono que ficiere más rellaciones públiques colos son visitantes ilustres, que los afalare a dir a la so casa, enllenalos d’agasayos, llevalos a los llugares más de moda… La verdá que, si apara un migayín, eso ye lo que fai yá. ¿Cómo yera que nun surtiere afeutu nos sos conciudadanos foriatos? ¿Tendría de facelo tamién colos llariegos de más nome? Picaron a la puerta.


-Pase.

-Señor, el Señor Presidente y el Conseyeru de Bellobello deseyen velu nel cuartu del fume.

-¿Nel cuartu del fume? Si nun lu emplega naide.

-Son les sos órdenes.

Nun hai llei más fata que la de fumar. Facer cuartos p’arrequexar el fumu yera una fatada que naide nun cumple. Y agora, esi par de xostrones mándenlu dir al cuartu’l fumu pa falar. Menos mal que mercó coches p’andar pel palaciu, si tuviere de dir d’un llau a otru diba tardar más de media hora. En dellos segundos va averase onde tán esos pazguatos. Nun yera raro que los llariegos quixeren gobernase ellos, con xente tan alloriada como Amalio y el Blogpredicador. Pero que faen ataos. Corri a desatalos.

-¿Cómo t’atreves a detenenos?

-¿Detenevos?

-Nun vas a los Agospiaos y pa enriba secuéstresnos.

-Nun voi a los Agospiaos porque nun me convidasteis.

Un españíu acabó cola so charra. La muerte de los tres foriatos más fuertes acaba con un réximen de dos sieglos.