PERDONÁI, LLEGO SERO

Nun hai dulda que toos lleguemos tarde dalguna vez. ¿Razones? Son abondes. Pero agora nun vamos falar d’elles sinón de les otres. Cada rapaz tien de xustificase con escuses que namái seya a pasar pela so cabeza: atopase con un melandru buscando una tienda de gaspies cuadraes, baxar una nave espacial con to madre pa traete la xinta, dolete la cabeza depués d’oyer el pasu de 247 elefantes pela entrada’l colexu, atopate con una manifestación de xabariles pidiendo esllava pola Seguridá Social,…

Nesti casu vamos dir na busca de los siguientes oxetivos:

-Deprender el pallabreru d’un centru interés nel que vamos sofitar les nueses disculpes: animales, familiares,…

-Da-y una repasada a los verbos del pasáu.

-Disculpase y dar escuses.

-Desarrollar la imaxinación.

De mano ta’l que caún atope la so escusa perfeuta. Entamamos por poner nel enceráu toles pallabres que sepan al rodiu del centru interés (imaxinemos que ye los animales): gatu, perru, raitán… Tres d’ello, tienes d’axuntar a la llista’l nome d’otros animales que nun sepan: melandru, tolina, foina,… Pa deprender los nomes podemos xugar a “De L’Habana llegó un barcu cargáu de…”, “Aldovínalu”, y milenta xuegos que faen que repitan ensin cesar los nomes de los animales. Tres d’ello, escueyen ún y pónenlu nunes circunstancies rares pa esi animal. Por exemplu: una tolina que va llavar la ropa a los cantiles d’agua con gas, la raposa que pon una tienda de plumes pa pites, el gatu que va facer l’esame de socorrista na playa de L’Alpargata Afuracada,… Esa va ser la escusa que tienen d’esplicar.

Agora dáse-yos un tiempu pa escribir tola historia. Convién que pases pelos sitios a xixilar cómo lo tan a facer. Ensayen de 5 a 10 minutinos el testu y salen a cuntalu. Nun taría de tou mal que los grabares pa que depués se vieren o oyeren. Tamién taría bien que vieren los resultaos d’otres clases o otros años… Hasta sedría d’interés que s’entamare un intercambiu d’estos materiales con otros colexos.

Yá queda’l ponelu nun foliu per escritu y con dibuxu-os incluyíu-os. Prepárase un mural ya colócase nos pasiellos. Ye bono que se sepa que nesi centru dase asturianu y que les clases son abondo amenes. Allóñate de lo aburríu. El to enfotu tien de tar en poner en práutica la Llingua Asturiana d’una mena que los rapazos l’amen y nun vaigan aburrise. Si abuses de la gramática, nun te van deprender nada y van fuxir de les tos clases.

Y con esto, alón. Hasta la que vien.

 

.

VIAXES IMAXINARIOS

L’aula va tresformase nuna axencia de viaxes onde los llugares a visitar van ser de cuentu: la viesca pela que camina Capiellín Colloráu a casa la güelita, el castiellu del príncipe de Cenicienta, el país de los hobbits, Rivendel y los elfos,… o llugares inventaos polos rapazos que seyan de fábula. Nesta axencia vamos intentar cubrir los oxetivos que vienen darréu:

-Perífrasis DIR + Infinitivu.

-Perífrasis TENER QUE + Infinitivu.

-Perífrasis VENIR A + Infinitivu.

-Pallabreru de llugares: viesca, quintana, castiellu,…

Vamos entamar una esposición de cartelos y dípticos de destinos onde dir el próximu branu de vacaciones. Los llugares qu’hai de publicitar son esos sitios qu’un día lleeron nos cuentos o noveles que tánto-yos prestaron. Acordies a la edá de los rapazos, asina sedrán les propuestes como llugares turísticos.

Enantes d’entamar el llabor, convién que-yos afondes nes perífrasis y nel pallabreru de llugares. Failo como tengas vezu: más gramatical o más creativu.

Pregúnta-yos que llugar de cuentu/novela-yos prestaría visitar. Abre un turnu onde tienen de falar toos y tienen de facelo con llibertá. Tres d’ello, tienen de cuntate que fairíen ellos nos llugares pa tresformalos en zones afayadices pa recibir al turismu.

 

 

Xúntalos en pareyes y agrupa los dos destinos nun paquete turísticu difícil d’escaecer. La primer xera sedrá’l facer el dípticu que puen trabayalu llibremente o pone-y un esquema como’l que vien darréu:

-Ven a conocer __________ y __________. Los llugares de los tos suaños.

-Prestaráte dir visitar tolos sitios que suañasti dalguna vez na vida. ____________________ (nomen los sitios a visitar).

-Tienes que sacar les tos reserves pa_________________________.

-Siempre te prestará____________________.

-Vendrás a vivir_____________________.

-__________________________________.

El dípticu tendrá los dibuxos de los rapazos y espondránse oralmente por parte d’ellos nel aula. Depués convién preparar un requexu nos pasiellos onde tol colexu o institutu seya a conocer los trabayos.

El trabayu complétase con cartelos onde tienen de dibuxar los llugares y resumir nuna fras les razones pa visitalos. Pegaránse al par de los dípticos y faerase visites a los fechos por otres aules. Nun taría mal facer una feria turística a nivel de tol centru, pero eso nun ta na to mano nin la mía, depende de la implicación del centru.

Siguimos dando posibilidaes de comunicación n’asturianu. La clas d’una llingua nun se  fai namái escribiendo y trabayando gramática. Nun sigamos l’exemplu del castellán, la llingua peor dada nes aules d’Asturies. Los rapazos tienen d’emplegar l’asturianu en situaciones de comunicación y per esi llau saldrá la gramática. Empleguemos la imaxinación y les nueses clases d’asturianu nun sedrán olvidaes na vida. Aspero que vos prestare la propuesta de güei. La próxima vez, más. Alón.

.

POLICÍES Y LLADRONES

El xueves, a les 9 la mañana, un garapiellu lladrones xuntáronse ensin querelo na sucursal bancaria de CaxaAmiguina. Nun había perres pa toos. Nun había clientes abondo. La caxa enllenóse de policíes nun periquete. El xefe la sucursal esfregábase les manes.

Como ves, esta selmana l’aula camúdase nuna comisaría. Más que nada pa trabayar:

-Pronomes interrogativos.

-El verbu en pasáu.

-Creatividá nes preguntes y respuestes.

La primer parte l’actividá consiste en facer preguntes pa los policíes que van interrogar a los lladrones. Acordies al nivel, en ti ta l’afondar más o menos nos exercicios de gramática al rodiu los pronomes interrogativos y los tiempos qu’espresen pasao. Cuando los alumnos se sienten a facer les preguntes tienen de dominalos. Separta la clas en grupos de tres (quiciabes ún tien de ser de cuatro): un policía que va de buenu, ún que va de malu y un lladrón. Los tres tienen de facer preguntes buenes y males al lladrón. Preguntes pa que-y faigan un policía o l’otru. Tienes que tar tol tiempu sollerte pa que s’emplegue bien les pallabres y la gramática. Los rapazos nun tienen de decatase que los tas controlando, namái quies ameyorar les sos preguntes.

Agora tienen de rifar los personaxes ente los tres componentes del grupu, anque quiciabes tuviere bien que’l lladrón fuere la persona que más dominare la llingua. Entamen a salir a facer los interrogatorios. Acordies vaigan saliendo los equipos, los lladrones tienen de sacar una bola d’una bolsa (la bolsa tien dos boles de colores distintos: una quier dicir que’l lladrón ye culpable y otra inocente). Los policíes traten de saber la solución coles sos preguntes. Tienen de faceles d’una mena intelixente. Los lladrones si son inocentes tienen de negar toa culpa y si son culpables tamién. Namái hai una cosina que los estrema: los culpables tienen de dicir la verdá en dos preguntes. Tienen de tar atentos. Fina l’interrogatoriu cuando los unvíen al xulgáu si piensen que son culpables o los lliberen si piensen que son inocentes. ¿Acertarán? Tienen d’asperar al final, onde tu dices los resultaos.

Nun taría mal que ficieren la crónica del robu. El Felpeyu Times anda tres la noticia y ellos tienen d’escribila. Ye bona práutica del pasáu y de xuru que-yos va prestar a esgaya.

Collacios, el robu ta sirvíu. Trata de que lo descubran. Vémonos. Alón.

El xueves espublízase otru microrrellatu, yo que tu nun lu perdía. Demientres y non, aconséyote que relleas La Contraseña, ún de los capítulos de la blognovela Cordobello. ¡Qué tovía nun lleiste la blognovela! Vamos collaciu, ¿a qué tas asperando?

.

UNA DE LLIMPIEZA

Esta ye una actividá cenciella y mui prestosa. Al desendolcala vamos trabayar:

-Pallabreru de ropa y partes del cuerpu.

-Emplegu del imperativu.

-Remembrar llistaos.

De mano entámase preparando murales por grupos nos que se llanten les partes del cuerpu y les ropes. Cada grupu escueye el númberu murales que va facer y la so presentación. Al final péguense peles parees de clas.

El maestru tien de tener una riestra d’instruciones escrites nun papel pa que los rapazos les escenifiquen. Por exemplu:

-Llava o llavái la cara.

-Peña o peñái’l pelo.

-Llimpia o llimpiái la dentamen.

-Plancha o planchái los calcetos.

-….

Nun tienen de ser poques pero ensin pasase tampoco. Too dependera del nivel de los rapazos. Con esa llista déxase a los alumnos salir d’ún en ún, escoyer una orden y escenificala. Los otros tienen d’aldovinala. D’esta mena prautiquen los mandaos enantes qu’entame la diversión.

Agora entama’l xuegu. Pue facese individual o n’equipos de dos o tres, depende si quies prauticar el singular o’l plural del imperativu. Van salir dos equipos de cada vez a xugar. Primero díces-y a un equipu dos ordenes que tienen d’escenificar y más tarde díces-ylo al otru. Si lo faen bien o empaten a un fallu pasen los dos equipos. Si los dos fallen les dos órdenes, queden eliminaos dambos. Agora, si pasaron, díces-yos tres ordenes siguíes pa que les faigan. Depués cuatro, cinco,… hasta qu’un equipu tien más fallos que l’otru y queda fuera’l xuegu. Tienen de tener muncha memoria p’alcordase de toles órdenes y la colocación en que se dicen, que ye perimportante. Nun val faceles desordenaes, como al equipu-y pete, eso acabaría eliminándolos. La cosa fina cuando namái un equipu o persona queda-en ensin fallar nunca y gana-en l’aplausu los otros.

Más tarde pues manda-yos que faigan les órdenes en cartesde baraxa col mesmu tamañu en toes. D’esa forma tán siempre preparaes pa cuando queda un ratín ser quien a xugar.

Aspero que vos prestare. Hasta la siguiente, alón.

La selmana que vien va entamase a espublizar microrrellatos en Coses de Cordobello. Faerase tres xueves siguíos pa escomencipiar con fuerza. Depués alternaráse cuentos, microrrellatos y sensaciones tolos xueves que nun haiga descansu.

.

BUSCO HOME CON…

Los homes somos mui daos a tener mascotes. Perros y gatos llévense les de ganar nesto de ser les mascotes más solicitaes. Sicasí, imaxínate que los homes de sópitu convertámonos en mascotes y los nuesos propietarios seyan dalgo pequeñuques: les sacaveres. Nel so periódicu, el Sacavera News, tiense una seición na que se busquen homes desesperádamente. Tenéis de facer la páxina d’anuncios de mascotes del periódicu y pa ello podríen siguise los oxetivos que vienen darréu:

-Emplegu d’axetivos propios de mascotes.

-Emplegu de TIEN DE + INFINITIVU.

-Emplegu de SER A + INFINITIVU.

-Tien d’usase la imaxinación a tutiplén.

Nun sedría malo l’averase a los axetivos propios pa mascotes nun torbolín d’idees. Cada rapazu tien de cuntar como sedría la so mascota ideal y el maestru escribiría tolos axetivos qu’emplegara na pizarra. En finando les sos intervenciones, el maestru tien de completar la rellación d’axetivos con aquellos que xulgue imprescindibles y que falten na llista.

Vamos prauticar oralmente l’usu d’esos axetivos imaxinando que tamos nunos grandes almacenes y la so megafonía ta que lo vierte nun parando d’anunciar. “Güei na nuesa seición de mascotes tenemos una remesa d’homes…candiales, fatos, cariñosos,…” o “Nun escaezan de pasar pela nuesa seición de mascotes onde-yos regalaremos gorros pa los sos homes…intelixentes, babayos, fartones,…” o… Fáense corros d’anunciantes que tien de dicilos de contino y el que pare queda elimináu. Nun se val repetir axetivos, de facelo quédase elimináu tamién.

Agora ábrese la veda d’anuncios. Pue facese individual o por pareyes, acordies el so dominiu na escritura creativa. El maestru, que nin dicir tien que si ye en Secundaria sedría’l profesor, tien de movese peles meses corrixendo los erros que vea y desplicando-yos a los neños cómo ye correutu; tamién tien d’afalagalos a salir del atolladeru nel casu que tean allancaos. L’anunciu podría tener tres partes: una primera que sirva d’introducción, una segunda na que s’emplegue’l TIEN DE y una tercera na que s’use'l SER A. Tamién se-yos pode dexar llibertá total si son rapazos mui creativos.

Pa finar, tienen de facer l’anunciu con bona lletra, en mediu foliu y con dibuxu incluyíu. Toos ellos pegaránse en papel continuu que tien de tar decoráu como la fueya de periódicu Sacavera News. El resultáu final enseñaráse nos pasiellos.

Yá sabéis qu’esto ye una idea y que vós podéis camudar tolo que queráis o ampliar l’actividá. Hasta la próxima, alón.

.

¡QUÉ ANIMAL SOI!

Vamos facer discutinios por grupos nos que vamos trabayar:

-Axetivos pa persones que vamos da-yos a los animales.

-Emplegu de porque, asina que, d’esta miente,…

-Cuidar que…, tener de…., …

-Desplicar y xustificar les tos eleiciones: Cuido que …… y ……. tendríen de vivir xuntos porque….. / …… ye ……., asina que tendría de vivir con…. / …… nun ye mui ….., d’esta miente cuido que tendría de vivir con…. / ….

 

De mano hai qu’atrayelos pa esa idea tan espardida ente los neños de que los animales tienen carauterístiques humanes. Malpenes entamemos, vamos ver como s’empixen y nun  aparen de cuntar casos. El mundiu de los cuentos va ufiertanos abondes posibilidaes: llobos, gochos, xaronques,…. Nun taría del tou mal qu’empecipiemos cuntándo-yos dalguna fábula que los ponga bien.

Depués vamos facer un llistáu na pizarra nel que llantaremos una riestra de nomes d’animales a los qu’axuntaremos axetivos que describan como nos paecen a los homes. Esti llistáu tienen de copialu na so llibreta y bien pudiere emprimar:

Perru: candial, lleal,…

Tolina: llista, xuguetona,…

Curuxa: sabia, intelixente,…

…. a la que pudiere siguir una carrapotada de nomes y axetivos que-yos van facilitar la xera que vien darréu. En grupinos de 3 o 4 van iguar una riestra de frases nes qu’arrexunten a dos tipos d’animales que sedría ideái que vivieren xuntos: Cuido que la curuxa y la oveya tendríen de vivir xuntes porque la curuxa ye intelixente y la oveya simplaya. La curuxa podría aidar a la oveya nes coses que tendría de facer. Amás del llistáu, la pizarra tendría de recoyer les frases tipu que tendríen d’emplegar talamente como se recueye más p’arriba. Tócate a ti escoyer si les pones toes al mesmu tiempu o vas llantándoles d'una nuna y ellos vaigan usándoles acordies les pongas; l’exerciciu sedrá más llibre o más dirixíu escueyas una forma o otra de facelu.

Pa finar, ponse una puesta en común ente los grupos onde caún desplique y xustifique les sos eleiciones. Equí ye onde tienes de poner na pizarra les frases de los rapazos bien puestes y ellos tienen de correxíles en casu de que tengan dalgún fallu. Escueye ente que los demás copien o non les frases de los otros.

Nun taría mal que cada grupu ficiere un mural coles sos frases y s’espusiere nos pasiellos.

Y esta fo l’actividá, espérote na próxima. Alón.

.

ALDOVÍNALU

Güei vamos tocar una actividá curtia que tien grandes dosis de motivación: vamos aldovinar animales faciendo 20 preguntes de Sí o Non. Pa ello vamos trabayar estes perífrasis verbales:

-          Ser a + infinitivu

-          Tener (de) + infinitivu

-          Dexar de + infinitivu

De mano taría vien que-yos punxeres na pizarra exemplos de les perífrasis verbales en preguntes:

¿Yes a xubir a un árbol?

¿Tienes de comer pela tarde?

¿Dexes de dormir al oyer peligru?

En cuantes les garren bien tienen de xuntase en grupos y preparar bateríes de preguntes pal xuegu. Tu deberíes de pasar por cada grupu y dir corrixendo los posibles fallos. Entama’l xuegu nel que nun taría mal que los grupos copiaren les preguntes que faen los otros p’asina guardales pa otra ocasión. Sortéase un grupu que sal y escueye un animal pa que los otros seyan a acertalu. Depués de la rempuesta de Si o Non, el grupu que fizo la pregunta tien turnu de rempuesta. Si depués de venti preguntes nun se ye a contestar, el puntu d’acertar l'animal queda pal grupu que lo propunxo. Si dalgún lu acierta, el puntu va pa esi grupu. Gana l’equipu que más puntos tien.

Nin que dicir tien que se puen emplegar otres perífrasis o otros grupos de pallabres. Al gustu del consumidor.

Pa finar, cada neñu tien de facer un animal de los que salieron na clas nuna cuartiya: faen el so dibuxu,  falen del animal emplegando les perífrasis verbales, órniase curioso’l trabayu y pónse na paré col restu. Nin que dicir tien qu’estos trabayos caberos sirven pa evaluar a los rapazos.

Güei fo cenciellu, la próxima quiciabes nun lo seya tanto. Yá veremos. Alón.

.

SOMOS MARCIANOS

Güei vamos trabayar con Marte, el planeta qu’abrió la imaxinación de xente a esgaya y que nos va ufrir abondu trabayu nel aula. De mano, hai que da-yos a los neños el testu de la Uiquipedia que vien en http://ast.wikipedia.org/wiki/Marte_(planeta) y dexar que lu llean. Tres d’ello entamamos a falar colos rapazos hasta llegar a Percival Lowell y la so teoría, d’ella queremos partir: Marte como planeta vivu. Los oxetivos de toa triba negociaranse colos rapazos acordies a les necesidaes del trabayu y la so duración. Les xeres de vocabulariu, gramática, imaxinación,… diran surdiendo acordies salgan en clas y sirvan pa llevar p’alantre l’actividá. Equí fantasearáse con una riestra de finxos pero pueden ser munchos otros y de triba mui distinto. Vamos facer una simulación, asina qu’abrochaivos los cinchos que vamos salir pa Marte.

De mano, pa que vaigan aterrizando, sepártense en grupos y caún d’ellos tien de facer una parte d’un estudiu al rodiu la natura en Marte: animales, vexetales, clima, relieve,…, cada grupu garrará a suertes la parte que-y toca y a trabayar la simulación. Entámase y fínase tolos díes con una miniasamblea que coordina los trabayos y fae que nun haiga desfases ente ellos. Quiciabes la primera tien de durar gran parte de la clas pa desplica-yos qué ye una simulación y llegar a unos alcuerdos de trabayu pautaos. Pasu ente pasu, la imaxinación tien de inventar tou un mundiu nel planeta roxu y facer realidá lo qu’enantes yera inimaxinable. Tolos aspeutos gramaticales o de vocabulariu trabayaránse d’una mena práutica y acordies vaigan surdiendo. Una vegada finau l’estudiu,  cada grupu presentará’l so trabayu a los otros grupos y pondránse espuestos nun requexu del aula pa que seyan consultaos cuando faiga falta. Tres d’ello, y en coordinación con manuales, prepárense papeles continuos con escenarios marcianos y llantaránse fuera y dientro del aula.

Otru trabayu puede ser el tipu de cases marcianes, onde cada grupu fae’l so prototipu ya inventen aparatos llétricos que faen la vida en Marte más cómoda. Tienen de referver eses cabecines y a los dibuxos acompáñenlos les desplicaciones escrites y depués de pallabra coles sos presentaciones a los otros grupos. En cada requexu la clas tien de llevantase una casa (siempre cola ayuda de Manuales) y el grupu tien d’escenificar cómo ye la vida n’ella. Tienen de preparar los testos, ensayalos y representalos. El nuesu trabayu va ser mui cansu, vamos correxir nel aula los erros qu’haiga y malpenes vamos tener tiempu. Si se ve necesariu, faerase un estudiu gramatical específicu n’ocasiones contaes.

¿Qué medios de tresporte hai? Los que la cabecina seya a ellaborar. Cada grupu prepara ún que tien de servir pa viaxar pel espaciu. Debuxos o trabayos de toa triba (Manuales) servirán pa exemplificar el funcionamientu de cada mediu que tien de ponese per escritu y presentase oralmente na clas. Agora vamos viaxar n’ellos: tenemos de preparar los pasaportes y los billetes de cada vehículu. Vamos escenificar cómo mercamos los billetes, cómo pasamos pol mostrador d’equipaxes, cómo dir a la puerta d’embarque onde tenemos de presentar los pasaportes y los billetes, …

Y asina podíemos trabayar tol mes, trimestre o añu, acordies queramos afondar. Ellos son los que deciden qué facer, poro que ye posible tener tantos resultaos como aules nes que se fae la simulación. La llingua oficial en Marte ye l’asturianu y va emplegase a toes hores, qu’al fin de cuentes ye lo que deseamos.

.

TORNÁRONME EN CONEYU

Nesta actividá va trabayase:

-Presente d’indicativu nes tres conxugaciones.

-Pronomes d’interrogación.

-Alverbios de cantidá.

N’otru sen de coses, trabayaremos la descripción con abondes dosis d’imaxinación y afondaremos na escritura.

Alcuérdeste que nun hai muncho tuvimos una bruxina pequí, pues paez que-y prestó abondo y tornó güei p’armala de nueves. De mano vamos prauticar los verbos en bruxilandia pa ser a sigui-yos la comba. Los conxuros en bruxilandia fáense con una carrapotada verbos dichos en presente. Entámase con ún de la primer conxugación, siguío d’otru de la segunda y depués ún de la tercera. Esta rellación tien de facese con toles persones, de yo a ellos, asina tenemos: entamo, bebo, sigo, garres, güeles, vives, fala, arreciende, tiñe,… Cada rapaz tien de preparar la so cadena de verbos y tien de prauticar a dicilo siguío y a tou meter. Conxúrense unos a otros tornándose en coneyos.

Nesti intre tenemos una clas de coneyos que nos tienen muncho de cuntar y por eso vieno TeleConeyu a grabalos coles sos esperiencies. De mano, vamos grabar espontáneo qué ye lo que sienten como coneyos, ensin dengún tipu preparación y cola so imaxinación. De xuru que los resultaos van ser curiosos a manta.

Tóca-yos preparar el programa de los sábados pela nueche pa TeleConeyu y van ser entrevistes a una carrapotada neños tresformaos en coneyos. Van formar pareyes nes qu’ún sedrá l’entrevistador y l’otru’l coneyu. Enantes d’entamar convién repasar los pronomes d’interrogación y los alverbios de cantidá na pizarra que se van emplegar na entrevista. Tamién se pue repasar los verbos en presente. Tres ello vamos tresnar preguntes que seyan a sirvi-yos de modelu pa la entrevista o pa qu’escueyan ente elles a la hora facela. Escribimos na pizarra les sos idegues o cenciellamente les tuyes si son mui nuevinos.

¿Cuála ye la to apariencia de coneyu?

¿Ónde vives?

¿Qué tamañu tienes?

¿Quién escueye les cenahories na to madriguera?

¿Cómo fales colos otros animales? ...

Dámos-yos agora tiempu a esgaya pa que preparen les entrevistes y dicímos-yos que nes rempuestes tienen d’emplegar alverbios de cantidá siempres que seyan a ello. Nun pares de pasar peles sos meses y correxir tolo que tengan trabayao, desplíca-yos toles duldes y facer que se sientan perbien nel aula. Una vegada preparaes y correxíes les entrevistes convién dexar qu’ensayen en casa y dalgo nel aula. Puen facelo de memoria o col papel cerquina. Grábense les sos intervenciones y depués vense. Tamién se puen ver les d’otres aules o otros años, van sete un material impagable.

Pa finar, tienen d’escribir nuna fueya la so esperiencia como coneyos y poneles nel aula o nel pasillo. Pues facelo con otros animales: xaronques, mures, sanxuaninos, melandros… Cada aula pue facer un animal, o cada pareya,…

Más nada per agora, alón.

.

EL FURACÁN TURULATU

Esta actividá sofítase en dos pegoyos:

-Imperativu plural: garrái, coyéi, dicíi,…

-Singular y plural nos nomes, acordies al grau de dificultá que-yos quieras pidir.

Va lleganos un furacán y Proteición Civil tien de llanzar un comunicáu aconseyando a la xente: Mercái delles piles pa les vueses radios y llinternes, asina como llates de comida. Enllenái dalgunes botelles d’agua potable. Nel furacán, escuchái la radio o la televisión pa mantenevos informaos. Díi a la zona la casa que sea más segura. Agora tienen de grabar el comunicáu, pa ello tienen d’ensayalu dalgunos minutinos y garrar confianza. Alcordáivos que’l furacán ye un migayín turulatu sicasí la llectura tien de facese igual de turulata: dir del final al entamu, como si fuereis camarones.

Preparái una llista de verbos que tengan poco que ver colos furacanes y ponéilos n’imperativu plural. Agora preparái nomes estremaos de los de catástrofes y ponéilos de singular a plural. En pareyes, preparái cartelos d’instrucciones pa un furacán turulatu emplegando los verbos y nomes trabayaos, escoyendo los que más vos peten y queden más llocos. Garrái la estructura del comunicáu y camudái los verbos y nomes, yá veréis que llocura montáis, o inventái vós el comunicáu acordies la capacidá vuesa de trabayar. D’esta vais volver turulatos a los compañeros. Los cartelos resultantes publicitáilos nos pasiellos y podéis grabar los comunicaos pa ponelos n’otres clases o camudalos con otros colexos.

Veis que cenciella. Vémonos na próxima. Alón.

.

DIBUXANDO LA NATURA

L’actividá que plantego güei tien tres pegoyos fundamentales nos que sofitase:

-El pallabreru de la natura: picu, llagu, ríu, cantil, islla…

-Preposiciones de llugar y dalgunes de les sos contraiciones: al rodiu, nel, nuna, enriba, baxo…

-La perífrasis verbal TAR+XERUNDIU: Iyán ta xugando, toi blincando, tan nalando,…


De mano sedría importante qu’estes tres coses fueren trabayaes enantes na clas (cursu anterior, trimestre anterior,…). Pa calentar, convién entamar dalgunes clases anteriores con dictaos onde tu dices la fras y ellos dibúxenla: tamos blincando nel prau, el cuélebre ta esnalando enriba’l picu,… Cada día fáense dos o tres dibuxos cenciellos, ensin complicación, ellos son a meyoralos na casa. Depués pues siguir la clas col tema que se te tratando.

Nuna segunda parte, tu enseñes el dibuxo y ellos tienen d’escribir la fras. De xuru qu’equí hai delles posibilidaes d’escritura, convién mirales toes y ver les que s’adauten al dibuxo. Neto a lo anterior, cada día vense dos o tres dibuxos.

Agora vien el xuegu, ye cenciellu. De mano, tu prepares una riestra de frases asemeyaes a les vistes en pedazos de papel. Separtes la clas en grupos de tres. Un neñu de cada grupu vien al par de la to mesa. Amuéses-yos un papel cola so fras y déxes-yos dos minutinos pa que seyan a pescanciala y decidir cómo dibuxala. Tornen al so grupu y ,ensin falar un rispiu, entamen a dibuxar la fras. El primer grupu qu’aldovine la fras correutamente lleva un puntu. Faese tantes vegaes como papelos tengas preparaos y tantos díes como xuzgues afayadizu. Covién nun pasase nin quedase curtios. Puen facese en díes saltiaos.

Aspero que vos prestare, toi preparando más actividaes y almítense suxerencies o necesidaes. El branu nun va aparar esta seición. Alón.

.

ENTAMANDO CON MAXA

Nestes primeres entregues de Nel Aula vamos rellacionar una carrapotada d’actividaes curties que van sirvir pa que los rapazos garren gustu pola Llingua Asturiana. Emprimamos con una que va llograr que se diviertan a esgaya y que garren soltura, vamos escribir Pócimes de Bruxa.

De mano, vamos escribir na pizarra’l nome de dellos animales: páxaru, gatu, sacavera, culiebra, araña,… Podemos facer un xuego nel que tu escueyes un animal y ellos tienen d’aldovinalu. Naide ye a falar, tienen de facer mimu pa entrugar qu’animal ye y tu solo yes a contestar si o non. D’esta mena, prautícase los animales. Depués, dependiendo del nivel de los rapazos, escribes al par de cada animal los ingredientes que puen incluyise nuna pócima de bruxa, esos ingredientes das-ylos tu o apórtenlos ellos. Sirva d’exemplu los ingredientes que ye aportanos l’araña: telaraña, velenu, pates,…

Los rapazos preparen una fueya con debuyos afayadizos y escriben nella la pócima: Bruxes de mal agüeru, face-y la maxa que vien darréu con: les plumes d’un páxaru mariellu, les garres d’un gatu fechu con mieu, los güeyos d'una sacavera esgañitada,…, llográi, llográi, que la clas nun se dexe amedranar y entame col pie de la fatalidá.

Feches les pócimes, cada día entamaríase la clas con ún de los rapazos diciendo la so pócima y el restu repitiéndola a coru. Nel aula o nos pasiellos fairíase la esposición de toles fueyes y nun taría mal facer un Muséu les Bruxes nos niveles superiores (fairíase col modelu del Muséu la Imaxinación).

.

NEL AULA

EL COLLACIU INVISIBLE

Nel aula d’asturianu cualaquier fecha ye bona pa facer un regalu, anque quiciabes a toos mos prestaría’l regalu de la oficialidá. Dende les navidaes a fin de cursu, pasando per cualaquier día prestosu, xustifica la posibilidá de camudar presentes ente los alumnos. Baxo esti prisma, el collaciu invisible ye un xuegu que se puede entamar nel aula y qu’atopámos na vida diario.

¿Qué vamos regalar?

Caún tien d’iguar en clas un regalu imaxinariu: el so nome, de qué ta fechu, la so apariencia, pa qué sirve, ónde s’emplega…; depués de too ello, tien de dibuxalu y escribir en llimpiu too al rodiu d’él. Yá ta fecho, agora a ver a quién se-y da.

¿A quién se fae´l regalu?

Pue facese de milenta formes, pero nesti casu’l maestru tien de decidir pa que les pareyes casen acordies ún sofite al otru, que nun seya aleatoriu sinón que sirva p’afondar na llingua.

¿Cómo s’entreguen?

Al dibuxu y desplicación fechos enantes, súmase’l nome de la persona a la que se fae’l regalu. Les fueyes pónense toes nuna mesa y caún tien de recoyer la que-y tocó. Depués tien de lleer bien el so regalu n’altu pa toos.

Aldovinar cuál ye’l to collaciu invisible

Pa ser a ello, l’alumnu tien de facer entrugues de si o non a los sos compañeros de clas: ¿el to regalu ta fechu de madera? ¿el to regalu ye mariellu y azul?... Cuando camienta que yá lo sabe, faerá entrugues más particulares a la persona o persones que cuida que son los sos amigos invisibles. El maestru faerá entamar a aldovinar a los alumnos con más soltura pa que los otros seyan a ver cómo ye. Acordies salgan, queden menos posibilidaes y ye más fácil aldovinar. El caberu, como tien el trabayu fechu, tien de face-y entrugues al so collaciu sobre´l llugar onde lu mercó y aldovinalu.

Correxir



Una vegada fechu, toca correxir les faltes qu’haiga nel escritu del to collaciu invisible. Tienes de lleelu con procuru delles vegaes y poner correutamante aquello que cuides que ta mal. El maestru pue llevar p’alantre otres menes de correxir: sorrayar les faltes pa que los neños seyan a correxiles, dicir la triba faltes qu’hai y ellos tienen de correxilo, lleer fras a fras y dicir que-yos paez que ta mal…

Y esto ye too. Pues face-y les añadidures que camientes más correutes pa meyoralu o adautalu al grupu o nivel. Hasta la prósima.

EL FARU D’IYÁN (1)

Vamos ver un videu de la única seria de dibuxos animaos n’asturianu de tola televisión. Cada sesión de dibuxos cunta con dos episodios. Equí va trabayase namái’l primeru, poro que son los 10 minutos primeros los que vamos ver. De mano vamos visionalu en cuatro partes:


-Tira d’entrada.

-Iyán y los sos collacios.

-Cuentu de los barcos.

-Iyán y los sos collacios finando’l capítulu.

De la que lu miren, vamos dir faciendo que respuendan entrugues cencielles que-yos faiga atender a tolo que pasa. Van viéndolu nos cuatro cachos que puen repetise cuantes vegaes se xulguen necesaries, siendo tres les que se prefixen con normalidá.

TIRA D’ENTRADA

-¿Qué animales te paez que son los protagonistes?

Pulpu, amasueles, cangrexu y gaviluetes.

-¿Cómo s’entitula’l capítulu?

Qué se sienta la música.

IYÁN Y LOS SOS COLLACIOS

-¿Qué instrumentos trai la tía Aurina?

Una riestra d’oxetos que nun tienen nada que ver cola música.

-¿A quién nomen direutor de la bandina?

A Antón el cangrexu.

-¿Quién cunta la hestoria?

A Candela, la llámpara qu’alluma’l faru.

CUENTOS DE LOS BARCOS

-¿Cómo se llama’l puertu?

Chalana Feliz.

-¿Qué tipu barcu tienen de dirixir coles lluces?

Tresatlánticu.

-¿Cómo se nomen los barcos qu’apaecen nel capítulu?

Navia (tresatlánticu), Hércules, Llucía, Muselín, Migayina, Males Pulgues, Chisterona y Guerreru. (Hai ún que nun dicen el so nome)

IYÁN Y LOS SOS COLLACIOS FINANDO’L CAPÍTULU

-¿Qué oxetos usen d’instrumentos?

Peñes, vasos, cuyar, tabla llavar y pa facer la guitarra un cubu agua y una fregona.

DEPUÉS DE MIRAR EL VIDEU

Va entamase na clas d’asturianu los conciertos de dellos grupos, pa ello tien d’haber interdisciplinariedá cola de música. Nós fairemos tolo que respeuta a cartelos, entraes y los conciertos. Na otra clas tienen de preparar cancios de Xentiquina con instrumentos fechos por ellos (esi aspeutu trabayaráse en música, asina que nun figura equí).

CARTELOS

Cúntase-yos la idega de facer los conciertos y el trabayu qu’hai que facer enantes. Hai que tener los grupos formaos ente la clas d’asturianu y la de música, faciendo asina un amestáu ente xente bono y non tan bono en dambes clases. Lo primero ye escoyer un nome pa cada grupu. Cada miembru presenta unu y desplica que rellación tien col grupu. Una vegada falao tola xente del grupu, vótase per tola clas y escuéyese’l más afayadizu.

Agora tienen de llograr un eslogan pal grupu y facer los cartelos. L’eslogan tien de facese nun torbolín d’idegues en cada grupu tres lo que cada miembru tien de diseñar un cartelu.

ENTRAES

Cada grupu tien de preparar les sos entraes en cantidá suficiente pal restu la clas. Nelles, amás del nome, figurará tamién l’eslogan. Agora vien la venta. De mano prepárase'l diálogu:

A.-¿Qué deseya?

B.-Apúrrame una entrada pal conciertu de _______________.

A.-Equí tien.

B.-Munches gracies. ¿Cuánto ye?

A.-__________ euros.

B.-Ta bien.

A.-Correutu.

B.-Ta llueu.

A.-Ta llueu.

El maestru entamará l’ensayu del diálogu fras por fras. Diráles canciando y los neños tienen de repetiles. Tres d’ello, xuntaránse por pareyes y escenificaránlu nos dos papelos caún. Depués entamaráse la venta entraes de cada grupu, ún por ún, ensin mecelos. Los neños del grupu sedrán los vendeores y el restu los conpraores.

ACTUACIÓN

Cada grupu tien de presentase y dicir dalgo caún. Depués tienen de tocar el so canciu cola puesta n’escena qu’ellos faigan trabayao. Pue facese más enguedeyáu, acordies a caún, pero l’actividá ye asina de cenciella y prestosa y van trabayar dafechu cola nuesa llingua ensin llibros al usu y clases maxistrales.

RUTINES PAL ENTAMU CLAS

Convién que los rapazos tengan una riestra vezos que-yos faigan escomencipiar la clas de llingua asturiana. Endréchalos nel idioma y nes téuniques a desendolcar nuna asignatura de triba llinguístico ye fundamental. Ehí ye onde tán les rutines. Hailes abondes y de xuru que tú conoces munches. Nel día de güei vamos ver namái que tres, tiempu a esgaya hai a desarrollar más.

EL TIEMPU METEREOLÓXICU

De mano convien llendar el pallabreru de la tema: soleyeru, nublu, orbayu, lluvia, xarriar, borrina, caín, truena, airón,… Acordies al cursu, les pallabres tienen de ser más. Una vegada tomada esa decisión, llega trabayar con ellos los símbolos que les van representar. L’enceráu ye bon sitiu onde asitiar el símbolu del día, pero sedría bono tamién qu’haiga una fueya onde se recueyan tolos díes del trimestre. Tamién ye bono que lu llanten tolos díes na so llibreta, neto a la fecha.

Nun entamu pue falase del tiempu que fai fuera, ye lo primero que los neños ven. De fechu, cuando son piquiñinos ye lo que menos problema-yos da. Namái entrar en clas, dibúxase’l simbolu del tiempu que fae. Pue falase de como tuvo los díes anteriores y como dicen que va tar.

Agora vamos da-y una vuelta tuerca. Cada mes pue ponese’l tiempu que fai nun cuentu que conozan. Cada día’l maestru decide que tiempu interesa qu’haiga o déxalu nes manes d’un de los neños. Agora compárase col que fai fuera, imaxinamos que tán a facer con esi tiempu, compárase colo que somos a facer nós, camúdase’l cuentu acordies tengan un tiempu o otru, cúntase lo que comen con esi tiempu,…

En cuentes d’un cuentu vamos trabayar el qu’hai pero n’otru pueblu o ciudá d’al llau, d’Europa, d’otru continente. Pa ello tenemos n’internet la páxina web http://espanol.weather.com/. Yes a comparar col tiempu nel hemisferiu nonte o sur, n’otru continente, nel pais d’al llau. Tamién s’abre la puerta pa que falemos de costumes, comides, relixones, creyencies vieyes, música,…

Lo que te pete ye posible. Pues dir a otros planetes y ver los partes metereolóxicos fechos polos rapazos; lloverá o faerá sol na mazana la merienda; visitarás la casa Colás y vera el tiempu que fae na alfombra;…

CUENTU RECUENTU

Vamos escribir un cuentu ente toos. De mano hai que facer delles escoyetes: tema, protagonistes, llugares,… Fálase cada parte nun torbolín d’idegues, anótense na pizarra y vótense.

Cada día de clas escribiráse una fras de la historia. Decídese pol neñu que va entamar a escribir la fras y darréu va’l restu n’orden de llista. Tienen de lleer n’alto tolo escrito enantes d’ellos y xuntar la so fras a les d’enantes. Pocoñín a poco va definiéndose’l cuentu y el maestru avisa díes enantes que la historia se tien de terminar. Escríbese nuna fueya y en terminando, caún prepara’l so cuentu: portada, dibuxos ya historia copiada de la pizarra (tamién val que seya elleutrónica).

Pero siempres yes a montar variantes. Cada rapazu trae de casa la so fras davezu, pero pue atopase col maestru canalla que-y fae meter una pallabra obligatoriamente. El canalla dexa que’l neñu meta otres tres pallabres más pa redondear la fras. Ye dicir, el rapazu vien con: “La pistola esmucióse na alcantariella”. Llegues tu y suéltes-y que tien d’incluyir la pallabra “beata”. El rapazu tien d’añadila darréu. Decide dicir: “La beata esmució la pistola na alcantariella”. Como ves, tamién pue cambiar pallabres de sitiu. D’esta mena, la historia garra dello surrealismu que va face-yos gociar.

El canalla ye a obligar al rapazu a camudar dos pallabres de llugar. Asina, la fras anterior:”La pistola esmucióse na alcantariella”, tresfórmase en: “La alcantariella esmucióse na pistola”, llogrando da-y al rellatu un toque de gracia.

El canalla mánda-y al rapaz camudar un nome por un verbu. ¿Cuála ye la situación? “La esmuciosa pistoleóse na alcantariella”. Yá tenemos dos pallabros pa definir y poner dalgún exemplu, poro que la rutina allárgase nel tiempu y pue mecese cola gramática. Lo qu’ensin dulda dala vas llograr ye que la to clas seya divertida y a la vegada deprendan.

LA PISTA

El maestru piensa en dalgo: un animal, una parte la casa, un mueble,… Cada día da-yos una pista y tienen d’intentar aldovinalu. Les pistes tienen de dir de lo xeneral a lo específicu, llogrando asina que les primeres malpenes-yos diga nada y les caberes seyan a dicir una bayura posibilidaes, hasta dar con ello.

¿Qué fácil, eh? Pero si faes un pocoñín de llabor d’investigación y lo que tienen d’aldovinar ye a ellos mesmos. Ye dicir, el tutor o los pas dante pistes de los neños, ensin qu’ellos lo sepian, pa que tu les emplegues na clas. De xuru que ye más prestoso.

Y si agora lo que busques ye’l xuguete que más-yos presta, la comida que nun son nin oyir falar d’ella, la película que más vieron,… De xuru que la cosa gana n’interés.

QUÉ ASOCEDERÍA SI SE DESANICIARE LA MAR

EL MARTES QUE VIEN TARÁ DE NUEVES CON VOS LA BLOGNOVELA DE CORDOBELLO.

A los rapazos hai qu'espolleta-yos la imaxinación pa que d’esta miente seyan a escribir ensin mieu. Dende bien neños, tenemos de trabayar con ellos sacando coses fantástiques de les sos cabeces. Cuando son piquiñinos, la fras col dibuxu lléga-yos, acordies van creciendo, los sos trabayos tamién. Rodari indicónos el camín y nosotros tenemos de desendolcalo. l'afamáu “qué asocedería si…” llévanos a mundios infinitos que de xuru ellos van ser poblar de seres sorprendentes que mos van allucinar.


Propóngovos QUÉ ASOCEDERÍA SI SE DESANICIARE LA MAR. De mano, un torbellín d’idegues pue alleganos a rempuestes interesantes. Fras y dibuxu ye’l primer camín. Ellos escueyen les idegues que más-yos pete y facemos una esposición na entrada la clas. Dalgunes rempuestes pueden ser:

Nel branu tomaríemos el sol en baños turcos.

Los ríos xubiríen al cielu y desembocaríen na lluna.

Fairíense foles de flores qu’escacharíen escontra les muries los praos.

Colos pequeños pararíemos ehí, pero colos medianos y grandonos pue facese una escolleta de la fras más… (según-yos digamos d’entamu: más vieya, más escura, más alloriante, más glamurosa,…). Una vegada sepamos cuála, en grupos, pareyes o individualmente, nel formatu más allegáu a la edá o nivel d’ellos, escríbese una hestoria prestosa que se pue desendolcar en comics o facer ilustraciones. Cada grupu espondrá les de so nun espaciu na entrada y entre toos escoyeráse les más afayaíces. Esta actividá pue facese por cursos, ciclos o colexu.

Tamién se pue facer un diccionariu de pallabres de les redaciones, dándo-yos significaos imaxinarios, con fiches que puen dir xuntándose a otres que se faigan a otros qué asocedería si… que se fueren desendolcando nel colexu.

XUEGOS PA DEPRENDER PALLABRERU

De mano, trabayamos el pallabreru que los rapazos conocen, poro que ponémoslos en grupos y tienen d’escribir nuna fueya cuantes pallabres seyan a alcordase d’elles, nun tiempu de dos minutos. N’acabando, cada grupu pása-y la fueya al de la drecha, que llee lo que punxeren l’otru grupu y añáde-y aquelles que sepian ellos. Síguese dando vueltes polos grupos hasta que la fueya fine nel de partida. El profesor mánda-y a un grupu que las llea y él escribe na pizarra aquelles que ten correutes. Faelo neto n’otros grupos y presénta-yos aquelles pallabres que deseya que deprendan y ellos nun conozan.


Seleiciona aquelles pallabres que xulgue más afayaíces y tienen de facer cartes en cada grupu. Fáese un par por cada pallabra, escribiendo la mesma y debuxándola.

Xuegos:

EL MATRIMONIU VOCAL

Les cartes repártense ente los xugadores y cásense les que seyan iguales. Tres d’ello, entamando pol que menos-y queden, entama a roba-y al de la drecha. Si casa, garra les dos pa si y pronuncia la pallabra, sinón, pon la carta al par de les otres. Tien d’asitiar les cartes pa que-y robe’l de la drecha, y asina hasta qu’ún les case toes y gane.

EL XUEGU LA MAXA

Asítiense toles cartes pámpana abaxo y en fileres. Un rapaz, a suertes, tien de tien de coyer dos cartes. Si tán empareyaes, quédase con elles depués de pronunciar la pallabra y dicir MAXA. Si nun tán, pónense otra vuelta pámpana abaxo y nel mesmu llugar. Fínase cuando queden toles cartes empareyaes y gana’l que más tenga.

EL XUEGU’L BRANU

Esti xuegu faese pa finar el cursu, nesos díes caberos nos que nun sabes que facer con ellos. Emplego’l mesmu fondu que nel xuegu anterior, pa que s’avecen que nesta vida ye perimportante reciclar, que non siempres van tener coses nueves. Hai qu’enseñalos dende pequeños.


Hai tres tipos de casielles:

-Bastiazu: na que los rapazos, si caen nella, queden dos turnos ensin xugar. Remémbrame les dómines d’infancia, nel branu, tabemos caleciendo al sol, na playa, y de sópitu cayía agua a xarrazos, cayía un bastiazu.

-Pareyes d’aiciones: Aiciones qu’apaecen dos veces. Si al tirar, vas a una casiella d’éstes, ties de buscar la pareya y dir a tou meter a ella.

-Pallabres estacionales: Si apaez una pallabra’l branu, quedes onde tas. Si vas a una que nun lu ye, retrocedes dos casielles, onde caigas nun fae falta que lleas lo que trae, da lo mesmo.

Bueno, collacios, a xugar.

DESCRIBIENDO UN PAISAXE

Tenemos seis semeyes parecíes d’unos paisaxes de ríos. Fáense fotocopies acordies al númberu d’alumnos: d’una faese sólo una, otres dos faeranse de dos, …Repártese una a caún de los neños. Tienen de dir pela clas cuntando como son les sos semeyes y ascuchando como son les de los demás. Apunten les que son iguales a les de so, ensin amirales nunca, sólo cola desplicación de los collacios. Neses desplicaciones nun puen emplegar alverbios de llugar y les pallabres ríu, catarata, árbol, biesca o bosque, monte y picu. Si tienen qu’utilizar una d’elles, nun la nomen sinón que faen una desplicación de la mesma. Hai d’avisalos que n’asturianu nun esiste la pallabra montaña. Como se ve, el parecíu ye pergrande ente les semeyes poro que de mano van pensar que son toes igual. Amuésenles unos a otros y al ver la cuestión del parecíu, vuélvense repartir pa facer otra vuelta l'actividá. Agora tienen de detallar más p’aldovinales.

Una vegada arrexuntaes más o menos, tienen de pegar la so semeya na llibreta y tienen describir como lleguen al llugar y dalgo raru que-yos pasare nél. Ún a ún salen y lleen la so hestoria.

VAMOS DEPRENDER PALLABRERU

Aldovinar una pallabra ye dalgo milagrosu, fae que garre un llugar na tiesta y nun lo dexe asina como asina. Emprimamos asitiando na pizarra les pallabres: semeyes, debuxos o pallabres escrites. Depués tenemos de diciles una riestra de vegaes, asina que ye bono qu’acudamos a xuegos sonoros que nun los aburra (si son pallabres d’animales puen nomase col soniu que faen ellos, si ye los colores pue emplegase la música imaxinaria d’esi color,…). Ye la hora d’entamar:


a) En grupos deciden una pallabra. Tú, que yes un adivín recién, vas intentar acertar les pallabres que camentaron los distintos equipos. Convién dicir de mano pallabres que deprendieron hai un tiempu, eso va da-yos muncha risa y va permitite comprobar el so deprendizaxe.

b) Agora vas prauticar la to vena telépata, vas dici-yos mentalmente la pallabra que tu camientes. Ún a ún van intentar aldovinala.

c) Yá ye hora de qu’ellos xueguen solos. Formes grupos y das-yos un diálogu que prautiquen col pallabreru. Por exemplu, si trabayes aiciones que faes en colexu pues facer el siguiente diálogu:

-Voi dir pa clas.

-¿Vas lleer?

-Non, nun voi lleer.

-¿Vas cuntar?

-Sí, voi cuntar.

d) En pareyes, tienen d’aldovinar l’orden nel que colocó’l so collaciu les pallabres. Pa ello, tienen de mano que dicir qué cinco pallabres escueyen pa xugar. Imaxiná-y que son: cascoxu, pita, gochu, páxaru y caballu, nesi orden. L’otru diz el so orden: pita, gochu, cascoxu, páxaru y caballu. Dos taríen bien colocaes, pero tres tovía non. Diríen: cascoxu, paxaru, gochu, pita y caballu. Tres taríen colocaes, pero dos non. Asina hasta aldovinalu.

e) Toca’l dictáu llocu. El maestru diz una fras turulata, diciendo CALDU GORDU en cuentes de la pallabra’l pallabreru. Los neños tienen d’aldovinala y copiala dafechu. La siguiente fras tien de dicila’l neñu qu’acertó l’anterior, y asina hasta’l que maestru diga EL CALDU GORDU TA FERVIO.

f) En gran grupu, tienen de facer la quiniela les pallabres. Primero’l maestru ponles como si fuere partíos de fútbol, enfrentaes al pallabreru estudiáu otru día. Depués pónen-y el 1X2, acordies sepian meyor una, otra o les dos igual. Al día siguiente el maestru saca una quiniela echada a suertes y compruébenla cola d’ellos, si coincide, el maestru tien de facer el xuegu qu’ellos quieran. Hai de procurar facer qu’acierten.