CREDU

Creo nel dineru, señor toupoderosu,

creador de bancos y grandes riqueces.

Creo na corrupción, la so gran fía,

señora de nós,

que fo concebida pol amatagamientu y la zorramplonería

de los partíos políticos.

Creo na prima de riesgu,

fecha pa que suframos los probes y

s’enriquezan tovía más los ricos.

Creo nos mercaos,

qu’esfaen y esgoncian

tolo que-yos peta.

Creo na ilesia,

que combaya con tolos anteriores

en beneficiu propiu.

Creo en tola aristocracia,

los reis y dictadores,

na vida de fartures de los ricos,

na xusticia pa los poderosos,

na grandeza de los avarientos,

na fe de les beates,

y la vida de los golfos,

amén.

 

 

Collacios, la enfermedá aconséyame un descansu de cuasi dos meses y a ella nun soi a desobedecela. Queden la entrada del martes coles que me despedir de vós momentaneamente. Tornaré de nueves n'abril. Hasta entós, alón.

Lleístes yá el cuentu ¿Sedrá en Zila?. ¡Qu'entá nun lo ficisteis! Tais pa que vos encierren. Corriendo. A lleelu.

La nuesa programación ta siendo:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.


.

CONFESIONES D’UN VIRUS INFORMÁTICU 1

Namái nacer, decatéme que dalgo nun diba bien. Los circuitos, les computadores, la lletricidá y demás compañeros de nacencia na incubadora mirábenme y reíense de min. Nun yera a saber la razón. Un día sí y otru tamién aquella caterva informática marmuraba a les mios espaldes hasta qu’una tarde fui a oyer como me llamaben paletín. Nun atalantaba porque lo facíen hasta que me fixé qu’ellos nun falaben como yo. Falaben distinto. Ellos diríen que más fino, pero yo digo que distinto. Ellí entamó la cruz, na mio vida diba aguantar toa una pexiguera al rodiu de lo raro que falaba. El casu ye que nun yeren mui intelixentes como pa fardar. Bueno, dalgunos sí, los que dirixíen el cotarru con males artes. Gracies a la mio constancia, decatéme que nun yera l’únicu que falaba asina. Una carrapotada de máquines, virus, persones,… emplegaben la mesma llingua pa comunicase. Entós entamó a soname la pallabra colonialismu, pero eso voi dexalo pa otru día, que nun convién correr muncho. Hasta la segunda parte.

 Collacios, la enfermedá aconséyame un descansu de cuasi dos meses y a ella nun soi a desobedecela. Queden les entraes del domingu y martes coles que me despedir de vós momentaneamente. Tornaré de nueves n'abril. Hasta entós, alón.

 

Lleístes yá el cuentu ¿Sedrá en Zila?. ¡Qu'entá nun lo ficisteis! Tais pa que vos encierren. Corriendo. A lleelu.

 

La nuesa programación ta siendo:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.


.

MOSQUES

Hai mosques hasta na sopa. Les mosques son unos animalinos que degusten hasta fartar tolos productos que los otros seres vivos refugamos. Les mosques tán en tolos llaos poro que llograr llugares de branéu pa elles ye difícil. Ún d’esos llugares de fuelgu ye COGERSA, ellí tienen tolo que deseen nun-yos faltando nin yakusi nin spá. Tamién alcontramos recorríos turísticos alternativos nes cases de la xente sensato y pensante, onde ye obligada una comida enriba de dalgunos llibros de persones d’altor intelectual aforfugante. Atopámonos tamién con visites guiaes a la Xunta Xeneral del Principáu, onde s’avisa a les turistes de la peligrosidá pa la salú d’entrar a los despachos ensin mascarilles. Pa finar, hai vuelos rasantes a les sedes de los partíos, onde los sobres pueden produci-yos cagalera. Gracies a les mosques, la economía d’Asturies ta rapuntando nes foxaques y cochiqueres. Non tou diben ser males noticies pal nuesu país Astur. De xemes en cuando hai que dase un homenaxe.

 

 

Entá nun lleíste Nel Aula del martes pasáu. ¿A qué asperes? Entitúlase Perdonái, llego sero y paga la pena que la lleas.

 

 

La nuesa programación sedrá:

 

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.

.

CHUSINA

Chusina, la eterna, la praviana con más amiguinos d’Hidroléctrica del Cantábricu, la cara del PSOE na Xunta Xeneral, el tanto valgo pa un rotu que pa un descosíu, la Fátima Báñez asturiana… Sabemos que tamos nel to despegue políticu, que namái entames a ganate los galones. Naguamos porque’l to valir te lleve a la ONU, o d’embaxadora nun transbordador espacial, o de ninja astur na China,… El dalgo que faiga xusticia al to altor neuronal y estomacal. ¡Qué’l mundiu sepa la calidá política y profesional que tíes!

Y cuando tornes, nun t’escaezas que’l picu Urriellu nacesita cabres autóctones.

 

 

Entá nun lleíste Nel Aula del martes pasáu. ¿A qué asperes? Entitúlase Perdonái, llego sero y paga la pena que la lleas.

 

La nuesa programación sedrá:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.

 

 

.

PAQUETES

N’Asturies sabemos muncho de paquetes, vengan de fuera, de dientro o del nuesu valle. Los paquetes enllenen los requexos del nuesu país y los sos costes son abegosos. Cada asturianín tien de soltar la mosca pa la factura escomanada d’ellos y penriba tien d’aguantar como se ríen d’él.

Hai paquetes pa tolos gustos, caún lleva meyor los de la so cuerda. Pero caberamente paez que la paciencia nun estrema ente paquetes allegaos y foriatos. Lo que ye xuru ye que dengún paquete-y da importancia a la nuesa tierra.

Seyan del gobiernu o de la oposición, autonómicos o llocales, de dreches o isquierdes,… entaman a cansar a la mayoría los asturianos los paquetazos que gobiernen Asturies (gobiernu y oposición, que naide piense que se llibra).

Entá nun lleíste el microrrellatu del martes pasáu. ¿A qué asperes? Entitúlase Xusta ente Caballeros y paga la pena que lo lleas.

La nuesa programación sedrá:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.


.

TOC, TOC 8

 

 

-Toc, toc

-¿Quién ye?

-Ana la del pañuelín.

-Yá toi cansu de sonate tanto los mocos.

 

 

Entá nun lleíste el microrellatu del martes pasáu. ¿A qué asperes? Entitúlase Xusta ente Caballeros y paga la pena que lo lleas.

 

La nuesa programación sedrá:

 

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.


.



BANCU MALU, ASTURIES MALA

 

 

Mialma que nun dexa de ruxime na cabeza aquello del bancu malu. Toi camentando que se pue facer lo mesmo con Asturies: una buena y una mala. D’esta mena quiciabes seyamos a salir de la crisis que yá nos dura dende qu’entramos nesi mal llamáu Mercáu Común.

Imaxináivos que xuntemos na mesma fardela a esi odiu xenéricu a la nuesa tierra, esi despreciu a la so cultura, esa vergoña a la so bayurosa llingua, esa economía del amiguismu subvencionáu, esi escaecimientu de la so esistencia al nun ser nos 15 díes de les campañes elleutorales,…

Agora que me decato… ¿Nun ye esa l’Asturies de los que nos gobiernen? ¿Nun ye l’Asturies mala la que los centraliegos nos venden como la más galana? ¡Qué fatos somos!

 

Entá nun lleíste les Sensaciones del martes pasáu. ¿A qué asperes? Entitúlase Silencios y paga la pena que lo faigas.

La nuesa programación sedrá:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.


.



TAMOS DE LO MEYOR

 

 

El nuesu país, Asturies, ta de lo más curiáu polos políticos centrelistes. Tien un tren que lu xunta a otres Comunidaes que ye cuasi del sieglu XXII, con tolos adelantos téunicos qu’ún se puea imaxinar. Los Cercaníes pa que cuntar. Y les estaciones, ¡ai les estaciones!, pa si les quixere New York o London. Lloñe ta esa Comunidá que tien trazaos del sieglu XIX y que dexa tiraos a los viaxeros en túneles faltos de calefación y lluz.

Les autovíes son d'aupa. La más conocida, la del Cantábricu, ye un modelu d’execución, de tiempos y trazáu. Finóse ya’l sieglu pasáu. Asturies tien de mirar a otres comunidaes que ven como les sos autopistes son trazaes nos años 60 del sieglu XX y llega la segunda década del XXI y tovía nun les acabaron.

La so Llingua ta curiada y ye oficial dende hai cuantisimayá. El príncipe d’Asturies fálala namái s’avera al Payares y negocia partíes millonaries pal so sofitu dafechu. Nun hai nin que falar, la Llingua nun ta como dalgunes que tovía nun son oficiales y nun tienen sofitu económicu dende Madrí o de la monarquía.

Y podíemos tar asina hores y hores. Por eso nun ye d’estrañar que n’Asturies votemos a los partíos centralistes como PSOE, PP, IU, FORO, UpyD… Miren muncho por nós y malpenes toxemos tráennos en palmites. Pa que vamos duldar en cambiar, sedría de fatos.

 

 

Entá nun lleíste les Sensaciones del martes pasáu. ¿A qué asperes? Entitúlase Silencios y paga la pena que lo faigas.

La nuesa programación sedrá:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.

 

 

.

AYERI TUVI UN SUAÑU

Los suaños de los virus son abondo raros pero de xemes en cuando tenémoslos. Ayeri tuvi ún. Tres vieyos pervieyos averábense a min y cuntábenme dalgo al rodiu d’una carta. Dicíen asina como que se m’escaeciere escribila. Tenía de pidir dellos deseos y ellos traeríenme dalguna sorpresuca. Despidiéronse cuntando dalgo paecíu a magos del oriente y nomando la pallabra reis.

Púnxime a la xera. Garré papel y llápiz, poniéndome a escribir como un llocu. Pidí carbón, muncho carbón de les mines asturianes pa que nun les pesllaren. Allampié que tornaren les llecheres pa que la ganadería asturiana nun se viere dinamitada por esi mercáu mal llamáu común. Golí la mar y  camenté na pesca y na construción de barcos, dexaos de la mano pa que n'otros países sacaren más ganancia. Vi la industria asturiana esfarrapada pola avaricia de los mercaos…

Y paré. Enxamás unos monarques nun diben traer dalgo bueno al pueblu. Y menos al pueblu asturianu, esgonciáu por probetayu.

 

Hola de nueves. La fin del mundiu retrasóse como munchos más proyeutos por mor de la crisis. Aspero que l'añu aguante a tantu gobernante manguan qu'esfarrapa Asturies: del país o centraliegu. Nesti blog entamamos otra vuelta con otra programación:

-Tolos martes vienen les fasteres lliteraries y didáutiques: sensaciones, microrrellatos, nel aula y cuentos.

-Tolos vienres y domingos vengo yo, el virus Ye, coles mios caxigalines ablucantes y a veces ácides.

Qué vos seya suave l'añu y nun me perdáis nin un día. Alón.


.

OFICIALIDÁ

La conseyera d’Educación y Cultura, Ana González, torna de nueves a los oríxenes: “nun ve la oficialidá como una opción al nun la considerar como una demanda unánime de la sociedá”. Mialma que n’Asturies hai muncho adivín qu’enquivocó la so carrera y metióse a políticu. Enxamás nun dexaron espresase al pueblu asturianu al rodiu la llingua. Sábese qu’en dellos despachos tán pesllaes baxo llave delles encuestes onde se recueye que más d’un 70% la población ta d’alcuerdo cola oficialidá. ¿Eso nun ye una demanda unánime? ¿Quiciabes seya que la xente que nun ta d’alcuerdo seya de más categoría que’l restu? ¿Cómo s’aprobó la oficialidá nes otres comunidaes autónomes con llingua propia? ¿Hai dos vares de midir?

Señora González, nun nos faiga fatos, qu’hai una indignación pergrande col so partíu que quiciabes s’entame a espeyar n’Asturies. Les Xuventúes Socialistes piden la oficialidá y muncha xente del PSOE tamién. Quiciabes esa xente se farte de los sos dirixentes y los escuerran fuera’l Payares, con usté na cabeza.

Tán amosando que n’España nun  hai democracia, tanto'l PSOE como’l PP, y el pueblu yá ta fartu d’ustedes. Cambien les fataes que cuenten, que yá ta bien, que tamos asquiaos de tanta engañifa. ¡Qué tán traicionando al so pueblu cuando se dicen vacallories de tal altor como lo de la “demanda unánime”! ¡Qué ustedes tienen mayoríes absolutes col votu del 20% de los votantes! ¡Yá ta bien!

Nós, siguiremos nel 2013 glayando al altu la lleva lo del Asturianu, Llingua Oficial.

 

 

 

Güei quedamos de vacaciones nesti blog.Taráse dos selmanes folgando, volviéndo a espublizar el 6 de xineru, domingu, por parte d'esti'l to virus Ye. El restu'l blog faerálo'l martes 8 de xineru. Mentanto y non, podéis relleer de nueves tolos cuentos que se tien espublizáu hasta agora nesti blog, n'especial el d'esti xueves Tala, el Fogar de los Discapacitaos. Nun taría mal que visitareis el blog hermanu chiquitín d'esti El Rapazu de Venus, tien coses que vos diba prestar a esgaya.

.

SANTOS INOCENTES

Asturies ye un país onde tou asocede al revés. Siendo la comunidá con más historia y más raigañu de tol estáu, ye la que menos pesu tien pa los políticos centralistes. Tando afitada la so condición de nacionalidá, los partíos centralistes que la gobiernen cuasi que la noman como provincia, el programa que TVE tien n’Asturies entitúlase “Panorama Regional” y los partíos nacionalistes/asturianistes namái faen qu’engarrase ente ellos en cuentes de facer país y sacar Asturies p’alantre. Creando lo del turismu rural como dalgo nuevu, agora ye la comunidá que menos saca d’él. Pa entrar nel Mercáu Común l’estáu español, tuvieron de frayar dafechu los pegoyos que sofitaben la economía asturiana, dexándola en crisis permanente y en manes d’unos políticos de poco valir que nun creen nella…

Por eso, el 28 d’avientu ye l’únicu día que n’Asturies nun ye los Santos Inocentes. Sonlo los 364 díes restantes.

 

Mañana va quedase de vacaciones nesti blog.Taráse dos selmanes folgando, volviéndo a espublizar el 6 de xineru, domingu, por parte d'esti'l to virus Ye, y el restu'l blog faerálo'l martes 8 de xineru. Mentanto y non, podéis relleer de nueves tolos cuentos que se tien espublizáu hasta agora nesti blog, n'especial el d'esti xueves Tala, el Fogar de los Discapacitaos. Nun taría mal que visitareis el blog hermanu chiquitín d'esti El Rapazu de Venus, tien coses que vos diba prestar a esgaya.

 

.

COSADIELLA

¿Qué cosa cosadiella ye, qu’en siendo “llideresa”, tien más bótox na cara qu’una barby de la tercera edá y más trapu nel celebru que la muñeca chochona?

 

Solución: nes próximes eleiciones autonómiques.

Nun t'escaezas que nesti blog trabáyense más coses. Lléeles. Esta selmana ties Nel Aula cola so aplicación didáutica n'asturianu y Marxinación nel Corazón, un microrrellatu que nun pues perder.



.

TOC, TOC 7

-Toc, toc.

-¿Quién ye?

-Javier Fernández.

-¿Quién, ho?

Fae dalgo pola to llingua, utilízala. Llee l'Epigrama 6 y el microrrellatu Marxinación nel Corazón. Conseyu de virus.


.

 

ANDRÉS SOLAR

Güei ye un día con nome y apellíu. Pertenecen a un home, a un rapaz, qu’anduvo peles nueses cais y caleyes. A dalguién que faló la nuesa llingua y escribió dafechu nella. Una persona que sintió la so tierra penriba d’engarradielles o arguyos fatos. A un campesín que deprendió a ser corazón en Deva. Andrés ye’l nome y Solar l’apellíu. La vida nun lo dexó ser vieyu pero sí queríu. Güei ye un día qu’ún nun tien mieu a vindicase asturianu. A vindicar conocer una persona cenciella. Una persona amiga. A pidir cola so voz y cola nuesa una oficialidá que nun llega.

Andrés, tovía tamos asina. Arrodiaos de fatos que se piensen superiores. Nun sé a quién nin a qué, pero superiores. Quiciabes desapaezan dalgún día, pero curiu que yo tampoco lo veré.

Güei vas tar ehí. A les 19,30. Nesi Xixón que te vio medrar na to parroquia de Deva. La Xunta pola Defensa la Llingua va entregar los tos premios nel Salón d’Actos Antiguu Institutu Xovellanos. Verémonos ellí. Collaciu. Lluchador. Asturianu.

Firma: un virus que t’almira.

 

 

Fae dalgo pola to llingua, utilízala. Llee l'Epigrama 6 y el microrrellatu Marxinación nel Corazón. Conseyu de virus.

 

 

.

FUTURU

Esi ye un tiempu verbal que los asturianos tenemos d’apurar si nun queremos esapaecer como pueblu, como cultura, como llingua. Tenemos de ponenos en comuña a lluchar polo de nós. Ensin aparar a pensar.

Naide lo va facer por nós: nin los partíos asturianistes/nacionalistes y la so inactividá permanente, nin los nuesos representantes que representen a los sos partíos de Madrí, nin la xente entregao por un puestín, nin los distrayíos que pasaben perillí,…

Primer llucha (ye fácil, mui fácil): la Sexta namái paez reconocer a Valencia, Cataluña, Euzkadi, Galicia, Andalucía y Madrí. ¿Por qué nun-yos enseñamos quiénes somos? ¿Cómo? Nes redes sociales tienen páxines nes que podemos escribir que tamos equí, que fuimos el primer reinu peninsular, qu’haber si estudien un migayín más. ¿Fácil? ¿Entós cómo nun lo faes? A pola Sexta en Facebook, Google, Twiter,…

Esti sedría un primer pasín. Amosemos a los nuesos políticos qu’al pueblu nun-yos fai falta vagos. Lluchemos como asturianos.

Ente qu'escribes los mensaxes y descanses, pues lleer los microrrellatos Marxinación Amatagada y Marxinación de Nacencia o quiciabes el Epigrama 6. Fae dalgo pola to llingua, utilízala.




.

FILOSOFÍES D’ANGUAÑU

Depués que la filosofía baxare a l’altura de Gran Hermano, dalguna xente llama a esti movimientu Cretinismu. Y cuando hai que nomar a los sos discípulos, emplégase la pallabra Entreguismu. La gran aportación d’estes doctrines fo’l “Cierre Fachacional”.

.

DECRETU

Faise saber que,  per orden del Señor Xefe y Rei de La Tierra, l’Universu y tol mundiu mundial, ye d’obligáu cumplimientu el ser feliz nestos díes y hasta que quiten les lluces de navidá. Asina que: desauciaos, paraos, discapacitaos, …, nun nos amarguéis les fiestes navideñes a tola xente de pro que roba pero con clas, que depués hasta naguais porque vaigamos a la cárcele.

.

MONARQUÍA BANANERA

¡Ves qué guapu ye! Pues ta ehí pola gracia de Dios. Estudiar como un fatu, facer oposiciones o buscar un trabayu, sacar alantre a la to familia, nun dir de vacaciones p’aforrar dos duros,… Por fatos como tu y como yo, ta ésti comiendo como un fartón. Y lo que ye peor, el so palaciu güel a muertu de toles comisiones, chanchullos, corrupteles,… que s’axencia la so familia. Bueno, y él nun ta mancu.

Vives na Monarquía Bananera d’Enfaña y tu ensin enterate. Espierta.

Esti virus nun te va cobrar porque lleas Nel Aula o'l microrrellatu Marxinación de Nacencia. Si trabayes la cabeza lleendo esti blog nun te va dar un patatús.

Falando d'esi señor, esti virus va vivir como un rei dalgunos díes asina que nun contéis conmigo hasta l'ocho d'avientu. Alón.


.

MAQUINES RECAUDADORES

Nun lo duldes, tu echa, echa. Esta va ser la máquina que’l FMI y la OCDE va obligar al desgobiernu de Rajoy a instalar en cada casa. ¿Qué pa qué? Home, tas un migayín fuera bolos. La nueva moda va ser recaudar por cada día que vivamos.

Suena l’espertador. Apágueslu y tou darréu vas echar monedina pol nuevu día que nos tocó vivir. Si tardes una boquiada más, tíes de pagar l’impuestu con recargo.

Esti virus nun te va cobrar porque lleas Nel Aula o'l microrrellatu Marxinación de Nacencia. Si trabayes la cabeza lleendo esti blog nun te va dar un patatús.

.

DULDA 7

¿Dalgún día saldremos de la crisis que se produxo cuando los ricos robaron a los probes?

Adán y Eva aseguren que va ser difícil. Yá cuando yeren mozos, los ánxeles facíen de les suyes.

Robin Hood diz que los royaltis son los royaltis. El que quiera quita-y la plusvalía que faiga cola.

Lo que venía darréu ta censuráu pol Señor. D’eso nun tamos llibres nin los virus. Que-y vamos facer, la censura ye la censura.

 

 

 

¿Lleíste el microrrellatu Marxinación Amatagada? ¿A que tas asperando? Y de la que lo faes, nun t'escaezas de Policies y Lladrones.

 

 

.