COSES DE CORDOBELLO

MARA

Ello yera una vez una muyer que vivió 437 años y en nengún d’ellos hebio home que s’acercare a ella con gustu. Fo la señora d’aquel conceyu, que recibió’l nome d’ella, y mandó sobre tolo qu’asocediere na so rodiada. Bien de neña, entamó a decatase de les miraes que-y llanzaben los sos súbditos: de llástima unes, d’odiu otres, de sufrimientu les más. Nenguna d’elles naguaba por tar al par d’ella, anque yera la Conseyera más dolce y bona qu’enxamás tuvieren.

Mara quedó ensin pás mui mocina y avezóse a dirixir los sos territorios con xusticia. Naide la contrariaba, por mor de nun alcontrase al llau d’ella. Los sos pies soltaben un arrecendor que golíase delles milles xunto a la so persona. Llevantábase y atopaba la ropa iguada na siella, el bañu tresnáu coles sos sales y les sos colonies, l’almuerzu preparáu na mesa y la llista de xeres del día apegada na puerta. Siguía la xornada coles coses feches pero ensin ver a naide. Cansa, escondióse nun armariu y asperó hasta qu’aportó la mañana. Una doncella púnxose a coyer el so traxe cuando-y salió al camín, entrugó-y la razón d’aquella soledá y díxo-y que nun almitía rempuestes evasives.

-De la que nació, la comadrona dexóla sola na antoxana. Pasaren los gochos pa la so corripa y ún d’ellos entamó a llambe-y los pies , el so golor quedó-y pegáu dende entós.

-¿Y por qué nun lo güelo yo?

-Quedó dende bien neña ensin el sentíu l’olfatu…

Mara coló de la capital, dexando’l Conceyu en manes del so hermanu Xolu. Desiguida´l pueblu la echó a faltar: impuestos grandes, xusticia pa los cabezaleros namái, trabayu a esgaya pa los probes con salarios amenorgaos,… Vivió nuna viesca llonxana, onde naide la viere. Asina pasaron los años, ún tres otru, ensin aparar. Nuevos Conseyeros gobernaron el Conceyu, siguiendo la tradición de Xolu. Ella diba en porriques, comiendo de les frutes que nacíen al par d’ella.

Un día llegó un Cuélebre al so Conceyu. Les perreríes corriéronse per tol territoriu. Fueron entós a la viesca a por corzos pa dá-ylos de comer al gañan. Cazáronlos vivos, como a él-y prestaben. Pasaron la nueche ellí, cuntando hestories del Cuélebre. Mara ascuchólos y decidió lliberar al so pueblu. Metióse pente los corzos y lleváronla nel carru xigante. Al llegar, el cuélebre parólos y entamó a comer los corzos. De la que taba nello, una voz entamó a canciar seliquino. El Cuélebre aparó de comer, una vieya salió y clavó-y nel pescuzu una aguya infestada. L’animal vocingló, movióse d’un llau a otru y pegó una dentellada a Mara, que morrió xunto a él. La xente’l Conceyu alvirtió qu’aquella yera la so Conseyera tovía viva dempués de más de cuatro sieglos. Sintieron la vergoña del que nun sabe da-y la fidelidá al que bien lu trata. Sicasí, hasta muerta-yos fizo bien. En tol Conceyu nacieron dende entós flores que naide nun conocía y qu’enllenaron l’aire de golores que naide nun ye a escaecer.

COMO PRESTA QUE LES COSES SALGAN BIEN

En Bellobello, la capital, Amalio y el Blogpredicador marmuren callandino la esapaición de los espíes qu’unviaren a Gamusín. Nun sabíen nada d’ellos, nin poles informaciones de la xente que xixilaba tola zona, nin polos teléfonos que teníen, contestaos por llugariegos que xuraben qu’aquellos móviles yeren de so. Picaron a la puerta. Amalio glayó que los dexaren tranquilos. Sonó de nueves los nudiellos na madera d’entrada. Amalio gufó. Nun yeren a tar ensin ellos nin un minutu. Si nun los dexaben pasar, de xuru que tiraben la puerta a dentellaes.


-Señor Presidente, llegonos la señal de socorru que mandaron colos homes…

-Yá tamos. De xuru que dalgún fatu la prendió por enquivocación.

-Señor Presidente, llamélos a los móviles y volviéronme a salir voces de xente xabaz.

-Voi alloriar, voi alloriar. Pa eso pagamos un serviciu secretu que dizse modernu.

Na mar víase un barcu trayer una llancha atada y enllena d’homes con barbes de dellos díes. Los sos estómados taben tan vacíos como les sos miraes. Llagues carnoses henchaben les sos boques. Namái ver la costa, llárimes d’allegre tristura moyaron los sos güeyos.

-¿Tais de vuelta? Mira que sois ariscos, nun mos contestar.

-Nun mos esmolecimos en buscavos nin nada.

-Pa enriba, preparámosvos una cárcele perguapa pa vos.

-Nun digas mentires, que yá tán dellos collacios nella.

-¡Ah! Y buscámosvola en metanes d’unos cantiles.

-Dientro d’unos cantiles, pa ser más aquello.

La humedá torno a les sos cares, neto a que quixeren dir avezándose a la so nueva vivienda.

EL XUEGU’L BRANU

Esti xuegu faese pa finar el cursu, nesos díes caberos nos que nun sabes que facer con ellos. Emplego’l mesmu fondu que nel xuegu anterior, pa que s’avecen que nesta vida ye perimportante reciclar, que non siempres van tener coses nueves. Hai qu’enseñalos dende pequeños.


Hai tres tipos de casielles:

-Bastiazu: na que los rapazos, si caen nella, queden dos turnos ensin xugar. Remémbrame les dómines d’infancia, nel branu, tabemos caleciendo al sol, na playa, y de sópitu cayía agua a xarrazos, cayía un bastiazu.

-Pareyes d’aiciones: Aiciones qu’apaecen dos veces. Si al tirar, vas a una casiella d’éstes, ties de buscar la pareya y dir a tou meter a ella.

-Pallabres estacionales: Si apaez una pallabra’l branu, quedes onde tas. Si vas a una que nun lu ye, retrocedes dos casielles, onde caigas nun fae falta que lleas lo que trae, da lo mesmo.

Bueno, collacios, a xugar.

LA FORTALEZA

Montaron delles tiendes al rodiu la fortaleza. El trabayu fo en comuña, ensin que naide fuere más que naide. El Conseyeru garraba les cuerdes, tiraba d’elles y fincábales en tierra. Coyía les meses y asitiábales dientro la so tienda pa xintar toos xuntos. Ponía nelles les cuyares, teneores y cuchiellos. Cortaba’l pan, metiéndolo en cestos y llevándolo a llau les xarres de bebida. Amiraba a la so xente con güeyos candiales, dimpuestu a morrer con ellos si facía falta. Milio deprendiere-y a trabayar duro, anque siempres lu llamare folgazán. Los sos homes sabíenlu y sentíense arguyosos d’ello.


-¡Xuacu! Tán abriendo les puertes.

-Llegaríen a dalguna decisión.

Pente les muries víase un fumu verde que seliquín diba tresformándose nun gris escuru pa dexar pasu a unos españíos cercanos. Nes tiendes fízose un ruxe-rux, camudando les cuyares poles armes. Los que taben de guardia tiraron granaes pa dientro la fortaleza. La puerta tornó pesllase. Sonó les granaes llanzaes mecíes col ruíu de piedra cayendo. Glayíos de della xente oyíense atapaos pola fortaleza. Xuacu mandó formar de nueves en círculu. Los homes obedecíen les sos órdenes, deseyosos de morrer por él si facía falta. Indicó que prendieren la mecha de la dinamita qu’asitiaren en dellos llugares de la muralla. Furacos descomanaos abriéronse. Pocoñín a poco averáronse a les entraes feches a la fuerza. Entraron disparando. Dientro namái alcontraron manes p’arriba. D'una puerta llegó’l soníu d’una pistola. Los sos güeyos agacháronse. Tiraron la puerta. El cuerpu ensin vida del so xefe enllenó de tristura a toos. La muerte enxamás ye bueno.

COSES DE CORDOBELLO

EMERÓI

Dende bien neña que nun yera a falar. Anque quiciabes seya un migayín incorreutu dicir esto. Namái pronunciaba una pallabra nun intre del día. Acordies cacarexaba’l gallón, de la so boca surdía’l nome’l so Conceyu: Emerói. Depués, más nada. Yera como si nun hubiere neña. Asocedía un día y otru. Cafiante. Ensin que naide fuere evitalu.


Visitáronla tolos científicos de la isllalla. Caún amosó la so sapiencia asoleyando un llibru que desplicare la sida. Tamién lo ficieron los políticos, prometiendo que la diben ascuchar nes más altes instancies. Hasta los santonos-y averaron la so misericordia.

Cumpliendo la mayoría d’edá, la so ma deseyó que fuere normal. Falare o nun falare. Ensin amosar medies tintes. Los mudos nun queríen casar con ella porque dicía dalgo. Los charranes paecíaos poco. La curandera’l pueblu, que vivía al llau d’elles, díxo-y que-y tenía la solución. Dexáronla a soles con ella y a la media hora la neña salió como nueva. Dicía’l nome’l Conceyu a toes hores menos cuando canciaba’l gallón. Naide nun yera a dicir que dende entós fuere una moza callada.

MAPA DE CORDOBELLO

Equí entamamos una seición que va falar de coses de Cordobello. Pa facelo bien, na primer entrega vamos espublizar un mapa nel que tán tolos Conceyos, anguaño mal llamaes provincies. Los que tán en verde son los Conceyos más húmedos, mentanto los otros son más cálidos. ¡Qué vos preste!

¿ÓNDE TOI?

El sol nun lo dexo ver ónde taba. Nun remembró namái qu’un puñetazu en metanes la ñarra y la más cenciella escuridá, ensin nenguna alcordanza, nesi puntu que la tiesta nun ye a suxetase y l’alma deseya escondese nuna fúnebre soledá. Xira a drecha, xira a esquierda, solombres y voces conocíes, moviéndose seliquino anque tuviere quietu. De sópitu, un subalternu llámalu.


-¡Xefe, xefe! Tamos apetiguñaos nuna barca en metanes la mar.

Los güeyos tornen a zarrase, nun ye a fixar la vista, el soníu machácalu y torna’l dolor, como si tuvieren acabantes de da-y un puñetazu.

Ellí taba, col traxebañu nuna playa vacía de xente y xarriando a más nun poder. Alcuentra raro la tela d’aquella prenda, como si fuere de piel de xaronca. Güel a salmones xubiendo pel ríu, fuxendo d’una mar enllena de fueu.

-¡Xefe! Espierte. Estos de Gamusín nun mos dexaron nin agua pa beber.

Tábase meyor nel suañu.

PREMIOS QUE SABEN A GLORIA

Jengibre concedióme dos premios: Genuine Blog y Blog Vip. Cuasi ensin tiempu, por mor de les mios vacaciones, voi agora premiar a los blog más allegaos, que van compartir conmigo dambos premios:

Los cuentos del hada Jengibre, El blog de Canoso, Rayajos en el aire, Desde mi ventana, Esti home allorió, El Xanu'l Caborniu, Solsticiu d'iviernu, Camudando'l camín, Rapiega, El regatu, L'alloriu, Llingua Blog y Lvx Omnia Vincit

Pa finar, el premiu Genuine Blog tien de xuntase a una cita de collecha d'ún, va darréu:

La vida n'asturianu llevate a tolos llugares que t'avere'l to maxín.

Que vos preste.

DULDES NEL CAMÍN

Nun resultó fácil facese con un coche en Gamusín; tol mundiu tenía ún, mas toos paecíen tenelo mercao nenyures. Gabriel el mélicu dexó-yos el de so depués de paga-y cincuenta mil bellos. Atoparon un mapa na guantera con delles cruces bermeyes nos puestos de salú y una verde nel centru la provincia coles pallabres HOMES CULTURA. Abultó-yos bon puntu pel qu’entamar na so búsqueda. Entrugaron pola población que ponía nel mapa y la xente nun sabía d’ella. Un neñu díxo-yos que diba trabayar ellí, si lu llevaben señalába-yos el camín. Cada quince minutos calentábase’l motor y teníen de parar. Nel primer chigre qu’atoparon consiguieron bocadillos y agua. Pasu ente pasu comieron y bebieron tolo que llevaben y nun llegaron a la llocalidá. El neñu subióse n’otru coche nuna d’eses que zarraron los güeyos pa descansar. La carretera diba y venía y ellos cuidaben que circulaben en círculos. El cielu púnxose escuru y xarrió cerca seyes hores. Nun dormíen. Nun falaben. Nun conducíen. Unes lluces marcaron la carretera y ellos siguiéronla. Yera’l camión de la lleche parando hasta nes caseríes más pequeñes o vieyes. Nuna d’eses alcontráronse con un edificiu mozu con una cruz verde que traía escrito HOMES CULTURA.


-Vaya pintina. Pa min que ye’l sitiu qu’andamos buscando.

-Lo meyor ye que vaigas con Rasta y echéis una güeyada.

Cinco minutos. Venti minutos. Cuarenta y cinco minutos. La pareya nun tornaba. El xefe mandó dir a los otros dos. Quedó solu nel coche. Agora’l tiempu trescurría en segundos. Prendió’l coche y fuxó carretera arriba. Al poco, acabóse la gasolina. Nun tenía comida, bebida, gasolina nin moral. Picáron-y na espalda. Sintió un puñetazu na cara. Nun notó más.

La rempuesta fue grande y muncha xente d’Ariñán xuntóse a la llamada del so Conseyeru. Coches, autocares y camiones xuntáronse naquella carretera a la borrina. Xubíen al picu más altu de la provincia, nuna zona que naide nun pisaba nin nes dómines de los fugaos. Xuacu diba na cabecera de tola xente, xunto a Asur. Nun dexaben de falar los dos.

-Nun paez que se decataren de la nuesa presencia. Yera como una fortaleza que se defendía pa dientro, porque pa fuera nun se vía xente.

-A lo meyor taba vacía.

-Fumu sí había, oseya, que dalguién prendió’l fueu.

La borrina dexó ver unes lluces llaterales que señalaben los finxos de la carretera. Diben a trenta, talamente como quedaren ente ellos pa que nun hubiere choques. Al salir de lo blanquecino, vieron les muries de la fortaleza, tan fuertes y xabaces qu'a dalguna xente fízola colar. Xuacu mandó poner los vehículos en círculu. D’un camión salieron dos homes cargaos de dinamita qu’asitiaron na puerta principal. Tando poniendo la mecha, la puerta dexóse abrir. Del interior surdieron homes cargaos de metralletes. Enriba nes muralles oyéronse españíos que se traduxeron n’esplosiones en suelu. Xuacu sacó’l so cetru de Conseyeru. Los españíos pararon y les metralletes metiéronse. Un ruíu fizo notar que pesllaren la puerta. Nun había dulda dala que nel interior yera tiempu consultes.

GRANDES DESCUBRIMIENTOS

Abeyaba de picu a picu, a la gueta d’una entrada d’esi mundiu dende’l que vinieren los foriatos. Xuacu diére-y les instrucciones y él organizare la búsqueda. Conocía aquelles tierres de pe a pa. De rapazu fuxere de los foriatos y tirare pal monte colos fugaos. Nos primeros tiempos nun tuvo descansu, d’un llau a otru, escondiéndose de les partíes. Deprendió cada requexu d’aquella tierra; cada persona que-y fuere a aidar; cada mayada nel que s’abellugar; cada pericuetu onde cuasi naide yera a llegar. Asur sintió aquel suelu como amigu.


Cuidaren que la borrina llendaba la isllalla. Nos díes soleyeros amiraben pa ella y semeyaba la fin d’aquel mundiu. Agora duldaben. Si tien d’haber un furacu pel que la xente pudiere colar, tien de tar nella. N’almorzando partieron pente ella, ataos con sogues pa nun perdese. Nun víen nada. De xemes en cuando sentíen tirones na soga que-yos remembraben qu’otros cuatro viaxaben xunto a ellos. Una hora, dos, dos y media, la voz d’Asur mandó averase los cinco. Sabíen que taben a la par más pol palpu que pola vista. Alcordaron siguir otra media hora y sinón atopaben salida, colar pa onde entraren dirixíos pola brúxula. Al poco, la borrina esfízose. La ñeve enlleno tola tierra.

-Vamos arrodiar per metanes de la ñeve y la borrina. Dexo esta vara indicando ónde salimos.

-¿Pa ónde vamos dir, pal este o pal oeste?

-Pal oeste.

En dellos sitios la ñeve llegó-yos a la cintura, dificultándo-yos la caminada. De sópitu, baxó-yos a los calcaños. Aprovecharon pa xintar. Sacaron les fiambreres. El pan taba arroxáu de dos díes y tovía taba blandiu. Diéron-y con ganes. Tando nello, un fumu xubía de la otra mayada. Dexaron la llacuada y metieron los sobrantes nes mochiles. Mansulinos averáronse a la fumareda. Una murallona dexóse ver. La ñeve cuasi nun se dexaba notar. Una carretera surdía de la borrina y metíase nel cercáu. Lo más raro yera que depués siguía monte p’arriba. Lo meyor yera dir pa la borrina y ver ónde daba la carretera. Amás, teníen órdenes d’avisar en cuantes descubrieren dalgo.

Amalio quedó col Blogpredicador pa falar de les últimes. Los sos espíes nun se movieren un rispiu, aparaos por una burocracia que nun facia más que pidi-yos papelos d’una triba o d’otra. Malpenes sacaben la pata del so cuartel xeneral, llegáben-yos con nueves de dalgún trámite. Si nun fueren tan primarios los llariegos, talamente paecía que tuvieren riéndose d’ellos. La so secretaria avisó-y de la llegada del Blogpredicador.

-Hola Amalio. Aspero que seya d’importancia lo que me tengas de cuntar. Toi enllenu trabayu.

-Si nun te conociere, diría que la que ta enllena ye la to cama.

-¡Yá tamos! Tenéisme fartu con tanta fatada.

-Nun t’enfurruñes. Namái quería dicite que les provincies en manes de los xabaces tán yá enllenes d’esos llibros que tanto buscamos. Pa min que lo meyor ye dexar pa prau l’hotel en Gamusín y dedicanos a otres xeres.

-¿A ti qué te paez? Paezme que nun hai dulda dala.

Amalio convidó al Blogpredicador a cenar nos sos aposentos. Al entrar, el blogpredicador decatóse que taba enllena de criaes llixeres de ropa y de decoración erótica. Nun cambiare nin un migayín la política de Cordobello, tán serio en temes carnales.

DESCRIBIENDO UN PAISAXE

Tenemos seis semeyes parecíes d’unos paisaxes de ríos. Fáense fotocopies acordies al númberu d’alumnos: d’una faese sólo una, otres dos faeranse de dos, …Repártese una a caún de los neños. Tienen de dir pela clas cuntando como son les sos semeyes y ascuchando como son les de los demás. Apunten les que son iguales a les de so, ensin amirales nunca, sólo cola desplicación de los collacios. Neses desplicaciones nun puen emplegar alverbios de llugar y les pallabres ríu, catarata, árbol, biesca o bosque, monte y picu. Si tienen qu’utilizar una d’elles, nun la nomen sinón que faen una desplicación de la mesma. Hai d’avisalos que n’asturianu nun esiste la pallabra montaña. Como se ve, el parecíu ye pergrande ente les semeyes poro que de mano van pensar que son toes igual. Amuésenles unos a otros y al ver la cuestión del parecíu, vuélvense repartir pa facer otra vuelta l'actividá. Agora tienen de detallar más p’aldovinales.

Una vegada arrexuntaes más o menos, tienen de pegar la so semeya na llibreta y tienen describir como lleguen al llugar y dalgo raru que-yos pasare nél. Ún a ún salen y lleen la so hestoria.

VAMOS DEPRENDER PALLABRERU

Aldovinar una pallabra ye dalgo milagrosu, fae que garre un llugar na tiesta y nun lo dexe asina como asina. Emprimamos asitiando na pizarra les pallabres: semeyes, debuxos o pallabres escrites. Depués tenemos de diciles una riestra de vegaes, asina que ye bono qu’acudamos a xuegos sonoros que nun los aburra (si son pallabres d’animales puen nomase col soniu que faen ellos, si ye los colores pue emplegase la música imaxinaria d’esi color,…). Ye la hora d’entamar:


a) En grupos deciden una pallabra. Tú, que yes un adivín recién, vas intentar acertar les pallabres que camentaron los distintos equipos. Convién dicir de mano pallabres que deprendieron hai un tiempu, eso va da-yos muncha risa y va permitite comprobar el so deprendizaxe.

b) Agora vas prauticar la to vena telépata, vas dici-yos mentalmente la pallabra que tu camientes. Ún a ún van intentar aldovinala.

c) Yá ye hora de qu’ellos xueguen solos. Formes grupos y das-yos un diálogu que prautiquen col pallabreru. Por exemplu, si trabayes aiciones que faes en colexu pues facer el siguiente diálogu:

-Voi dir pa clas.

-¿Vas lleer?

-Non, nun voi lleer.

-¿Vas cuntar?

-Sí, voi cuntar.

d) En pareyes, tienen d’aldovinar l’orden nel que colocó’l so collaciu les pallabres. Pa ello, tienen de mano que dicir qué cinco pallabres escueyen pa xugar. Imaxiná-y que son: cascoxu, pita, gochu, páxaru y caballu, nesi orden. L’otru diz el so orden: pita, gochu, cascoxu, páxaru y caballu. Dos taríen bien colocaes, pero tres tovía non. Diríen: cascoxu, paxaru, gochu, pita y caballu. Tres taríen colocaes, pero dos non. Asina hasta aldovinalu.

e) Toca’l dictáu llocu. El maestru diz una fras turulata, diciendo CALDU GORDU en cuentes de la pallabra’l pallabreru. Los neños tienen d’aldovinala y copiala dafechu. La siguiente fras tien de dicila’l neñu qu’acertó l’anterior, y asina hasta’l que maestru diga EL CALDU GORDU TA FERVIO.

f) En gran grupu, tienen de facer la quiniela les pallabres. Primero’l maestru ponles como si fuere partíos de fútbol, enfrentaes al pallabreru estudiáu otru día. Depués pónen-y el 1X2, acordies sepian meyor una, otra o les dos igual. Al día siguiente el maestru saca una quiniela echada a suertes y compruébenla cola d’ellos, si coincide, el maestru tien de facer el xuegu qu’ellos quieran. Hai de procurar facer qu’acierten.