RENSÍA

Había dellos díes que los traslladaron a los barracones y entá nun yeren a adautase a la nueva situación. Alcuérdense de les sos cases llevantaes na meyor zona d’Ariñán, colos sos xardinos asemeyando a los de la xente de Bellobello, anque un migayín más pequeños, les sos antoxanes col mobiliariu al estilu de les provincies de costa, col catamarán llantáo xunto a la puerta principal, y l’edificiu asemeyando la estuctura de les mansiones de los artistes, colos escusaos a cada dos puertes y col griferíu d’oru. Imaxinaron qu’aquella vida diba dura-yos pa siempres, que nacieren pa ello, que naide nun diba ser a quitá-yosla, y de sutruque llegó aquel aldeanu y esmigayó-yoslo too delantre los güeyos, dexándolos más plasmaos que los policíes que fueron a la cárcele, al fin de cuentes ellos teníen dalguna cercanía col llugar. Nun diben quedase asina, si’l nuevu Conseyeru imaxinaba que diba tratar con xente vulgar enquivócase muncho. El nuevu presidente yera de la triba d’ellos y nun diba dexar a un pioyosu como él facer xirigoncia de persones d’altor. Naquel intre llegó Xeromu col aliendu perdíu y la cara fecha una llaceria.


-La carta yá ta unviada al presidente. Nun hai llugar nel mundiu que’l Conseyeru seya a escondese.

-La nuesa victoria ye cantada.

Les botelles de xampán dexáronse abrir con glayíos d’allegría y abrazos d’un compañerismu forzáu poles circunstancies. Nun llega a la selmana que toos taben echándose zancaníes pa ser a medrar nel gobiernu d’Ariñán y agora respondíen toos xuntos como si fueren collacíos inseparables.

-Que’l reconcomiu del Conseyeru mos upe a la eternidá –brindó Xeromu-. Bebamos hasta cayer nel suañu la felicidá.

En correos de Bellobello teníen trabayu a fartar. De les provincies llegaba más corréu que nos caberos cinco años. La esbilla dexábalos derrangaos. Por órdenes presidenciales direutes, nun-yos pasaben dengún corréu que nun fuere oficial, sicasí, los emplegaos teníen de meter en bolses toles cartes que nun cumpleren esta norma y sacales a unos camiononos que los llevaben a les afueres pa quemar.

Curtia felicidá la de la xente d’Ariñán. La so carta nun diba llegar al so destín. El Presidente nun s’enteraría de lo asocedío y el Conseyeru nun diba sofrir la rensía que sentíen por él les persones de valir d’Ariñán.

A lo meyor les cartes de provincies recoyíen más quexes como la de los homes y muyeres desheredaos d’Ariñán. A lo meyor, como ellos, suicidáronse en grupu p’amosar la so rensía. La so probetaya rensía que nun llograba’l so oxetivu final.

CORDOBELLEANDO

     CORDOBELLEANDO ANDO    


A.- Rensía:

rensía, la: sust. Sentimientu de malquerencia contra daquién por daqué malo que dixo o fixo. Tovía-y guarda rensía.

Agora amira estes aiciones y di si son o non rensía:

1.- Nega-y el saludu a dalguién.

2.- Atópeste con amigos comunes y cúntes-yos la hestoria con dalgunos adornos.

3.- Vas de copes con una persona.

4.- Cruces de cai cuando t’atopes con él.

5.- Guárdes-y el sitiu na cola del cine porque va llegar tatde.

B.- Dalgo de la casa:

Nel testu apaez: “Alcuérdense de les sos cases llevantaes na meyor zona d’Ariñán, colos sos xardinos asemeyando a los de la xente de Bellobello, anque un migayín más pequeños, les sos antoxanes col mobiliariu al estilu de les provincies de costa, col catamarán llantáo xunto a la puerta principal, y l’edificiu asemeyando la estuctura de les mansiones de los artistes, colos escusaos a cada dos puertes y col griferíu d’oru.”

Vamos buscar nel diccionariu l’Academia de la Llingua Asturiana dos pallabres:

antoxana, l’(a): sust. Terrén que ta delantre o alredor de la casa.

escusáu, l’: sust. Recipiente que ta fixu en suelu y que s’usa pa mexar, pa cagar. 2 Cuartu onde ta’l recipiente que s’emplega pa cagar, pa mexar.

Agora vamos meter nestes oraciones les pallabres XARDÍN, ANTOXANA y ESCUSÁU:

1.- Taba na puerta del ________________ faciendo biecos.

2.- Salió a l’________________ pa recibilos.

3.- Naide nun entra nel chigre porque nun tien ________________.

4.- ¿Llegaron yá les semilles pal __________________?

5.- Xugaben toles mañanes nel _________________ d’enfrente so casa.

6.- El día la fiesta saquen la mesa pa l’_____________________.

biecu, el: sust. Movimientu que se fai cola boca, colos güeyos pa espresar dolor, contentu, pa facer una gracia.

     CORDOBELLEANDO GRAMÁTICA BLANDIO    

A.- Apostrofando "DE":

Apostrófase d’ cuando-y sigue pallabra que comience per vocal o h muda. Exemplos:

Él yera d’Ariñán.

La filoxa yera d’un home mozu.

El vino yera d’hasta hai diez años.

El Presidente de Cordobello taba nel palaciu d’iviernu.

Agora apostrofa de nes oraciones que vienen darréu:

1.- Xuacu nun alvirtió que los llibros yeren de abaxo.

2.- Sueñar con sacar de Urbies a Xana yera inimaxinable.

3.- Taben vixilando la cueva de osu.

4.- Yera cuerda de hamaca cola que ficieron los nuedos.

5.- Ficieron una cama de ébano.

6.- Nun yera una muyer de ilesia.

     CORREICIÓN DE LOS EXERCICIOS DE LA SELMANA PASADA    

CORDOBELLEANDO ANDO

B.- Mensaxe enmazcaráu:

L’espeyu escuende la imaxen del Conseyeru.

CORDOBELLEANDO GRAMÁTICA BLANDIO

A.- Apostrofando “PA”:

Apostrofa agora PA nestes oraciones:

1.- p’allalantrones 2.- p’harmonizar 3.- p’averar 4.- p’acabar 5.- p’hacia

EL NUEVU CONSEYERU

-Esto ye lo de siempres. Cuándo se-yos acabará’l cuentu a estos de Bellobello.


-Si nun fuere por ellos, robaríamos meyor.

-Home, quedaríanos más tayada. Ellos roben a lo grande.

-Señores, el nuevu Conseyeru.

El silenciu fízose ente los cargos d’Ariñán. Naquella sala xuntárase lo más granible de tola sociedá de mandu d’aquella provincia minera. Los requilorios escaecíen interesaos a tola xipla que tuvieren enantes de qu’entrare’l cabezaleru mayor de la zona. Toos asperen cansos el discursu de l’autoridá, a sabiendes que malpenes lo finare diba marchar pa la so villa na capital. La hestoria amosare a les clares qu’a los Conseyeros nun-yos importaba un res la so provincia, sólo deseyaben la so representación pa xustificar el so votu nel gobiernu de Cordobello. Ellos yeren los que dirixíen la vida n’Ariñán una vegada que’l Conseyeru colare col so votu.

-Señores. De xuru que tán asperando les mios pallabres pa que darréu cole pa Bellobello. Nun-yos va resultar nesti casu. Yo vini pa quedame. Namái que diré pa la capital dos díes al mes a votar n’interés d’Ariñán y non nel míu o nel suyu. Acabóse les dómines onde ustedes caciplaben tolo qu’asocedía nesta provincia. Acabóse les dómines onde ustedes mandaben sol pueblu con mano de fierru. Ye más, acabóse les dómines onde ustedes dirixíen esta provincia. Tán ustedes rebaxaos del mandu, dende agora son ustedes del serviciu llimpieza d’Ariñán.

El burbús sintióse per tola sala. Nun taben dispuestos a dexase pisar pola xente que viniere de Bellobello. Les miraes empobináronse al capitán de policía que dirixía tola seguridá de la provincia. Ésti saco’l xiblatu y pitó con fuerza pa qu’entrare nel cuartu tola so guardia de palaciu. Les cares punxeron xestu de seguridá. Ónde diba aquel pinín a fadialos na so propia casa. Les puertes abriéronse. L’exércitu entró coles armes preparaes pa disparar. L’altanería d’aquellos homes camudó en mieu. Toos se miraron coles oreyes gaches. El Conseyeru faló de nueves.

-Cuido que fale claro. Agora-yos dirán onde tán les sos nueves cases. Bueno, cases non. Ustedes llamábenles barracones pa pioyosos. Avécense a les sos nueves mascotes. Son más cercanes que los perros.

-Nun vamos vivir nesos furacos. Somos la xente más poderoso d’Ariñán y protestaremos al presidente.

-A ver si ye a salir alantre ensin les nueses perres.

-¡Ah! Escaecióseme dicir que les sos cuentes y caxes de seguridá nos bancos tán acabantes de ser requisaes pol gobiernu llegal d’Ariñán. Mira qu’olvidáseme esi detalle. Nun sé onde tengo la cabeza.

L’exércitu sacólos de cuartu a culatazu que te crió, talamente como ellos mandaben tratar a los pioyosos. Taben yá nes escaleres cuando s’oyó la voz del Conseyeru.

-El xefe policía que nun cole.

Toos lu amiraron con cara sospecha. Cavilgaron si sedría’l xudes que los vendiere a aquel castrón. Él rióse. Güeyólos con cara rapiega y xiró de nueves pal salón gubernamental.

-Señor xefe policía, usté nun ta rebaxáu del serviciu.

-Nun va tener una protesta de min. Allégrome de tar al so serviciu.

-Y de tola sociedá d’Ariñán.

-Al serviciu de los qu’usté deseye.

-Usté y los sos homes van entrar na cárcele d’Ariñan…

-Sí señor. Lo qu’usté diga.

-Y van quedar de por vida ellí. Fueron munches les qu’armaron nesta tierra y pola so seguridá vamos tenelos zarraos de por vida. ¿Al nun ser que deseyen ser entregaos al pueblu? Hai una muyer que violaron y que-y prestaría muncho alministrá-yos xusticia –acabó de dicir Xuacu.

     CORDOBELLEANDO    

     CORDOBELLEANDO ANDO    

A.- Aldivínalo:

Ye cenciello. Vamos usar la seición comentarios pa qu’entruguéis al rodio d’un oxetu, persona o animal de Cordobello. Pa ser la primer vez, voi dicivos que lu hai en toles ciudaes. Entrugai, entrugai, que yo namái vos puedo responder si o non. Ánimo y p’alantre, si participáis va durar delles selmanes.

B.- Mensaxe enmazcaráu:

L’_sp_y_    _sc_ _nd_    l_    _m_x_n    d_l    C_ns_y_r_

Da-y a la tiesta y saca la frase.

     CORDOBELLEANDO GRAMATICA BLANDIO    

A.- Apostrofando “PA”:

Apostrófase p’ cuando-y sigue pallabra qu’entame per a o per ha. Exemplos:

Empobina p’Ariñán.

Vas p’hacia chigre de Milio.

Nun ye p’alvartilu de la mareona.

Apostrofa agora PA nestes oraciones:

1.- Garró y tiró pa allalantrones.

2.- Xuacu nun fizo nin un rispiu pa harmonizar col xefe policía.

3.- Xana nun coyó l’abrigu pa averar al neñu afuera.

4.- Llegó en puntu pa acabar la folixa.

5.- Va llover pa hacia la tarde.

     LES SOLUCIONES DEL 5-1 Y DEL 12-1    

5-1

CORDOBELLEANDO COLA LLECTURA

Xunta la pallabra cola so definición:

F-1, C-2, E-3, B-4, G-5, A-6 y E-7

CORDOBELLEANDO COLA GRAMÁTICA


APOSTROFACIÓN DE “EL”


Apostrofa p’alantre:

1.- l’aire, 2.- l’ave, 3.- al horru, 4.- l’esguil, 5.- l’arroz

Agora apostrofa p’alantre o p’atrás según seya:

1.- l’autobús l’últimu, 2.- xintó’l fégadu, 3.- l’engañu, 4.- l’últimu, l’home, 5.- l’edificiu

CONTRACIONES DE “EN” Y LOS ARTÍCULOS DETERMINAOS

1.- Na casa, 2.- nel solláu, 3.- nos xardinos, 4.- na folixa, nel convite, nos dos sitios, 5.-nes cestes



12-1


CORDOBELLEANDO ANDO

A.- Mensaxe enmazcaráu:

Nesti episodio nun salió Milio

B.- Vamos cuntar mentires:

-¿Cómo te llames?

-Llámome Xuacu.

-¿Cuántos años ties?

-Tengo ventidós años.

-¿Cuántes vegaes comes al día?

-Tres.

-¿Cuántes vegaes sales a la selmana?

-Dos.

-¿Qué faes los domingos pela mañana?

-Dormir.

-¿Ónde vas el vienres pela nueche?

-Al chigre a trabayar.

-¿Cuantes hores ves la televisión nel día?

-Seyes.

-¿Nun te paecen munches?

-Nel chigre non.

-¿Qué ye lo que nun te presta facer?

-Dir a misa.

CORDOBELLEANDO GRAMATICA BLANDIO


A.- Apostrofando “LA”:


Apostrofa agora LA nestes oraciones:

1.- L’habitación, 2.- l’apertura, 3.- L’arrastradura, 4.- l’acoyida, 5.- L’habitante

UNA FÍA N’ARIÑÁN

Otra vuelta diba per aquelles víes p’Ariñán: la primera tuvo de baxase en marcha y nun fue a terminar el viaxe; esta segunda vez cuida que llegara bien al so destín. Daquella fízolu en bona compañía; esta faelu en solitariu. Hai cuasi un añu que nun se separta de los sos collacios del alma pero agora hai dalgo más importante que facer. La imaxen de los sos pás llorando nel so supuestu funeral nun lu abandona nin de día nin de nueche, tien d’informalos de que ta vivu. El cambéu de paisaxe distráxolu bona parte’l viaxe, siendo no cabero onde sacó la botella que-y regalaren los sos cuatro collacios. L’oruxu rellenó’l so viaxe d’una calma que facía hores que nun tenía. Nos caberos tiempos bebía muncho, malpenes yera a finar una botella cuando tenía otra enfriando na fresquera. Ensin decatase d’ello, llegó al so destín tremándo-y el so pie esquierdu y la so mirada zarapicando ente’l restu los pasaxeros. Necesitaba unos vasinos pa ser home, pa ser a llograr l’escaezu de tantes coses que ficiere nos postreros tiempos. Naide yera a imaxinar tola basura que-y mandaren facer en nome de la dignidá y el deber, nun bandu y n’otru, una xente y otra, camentando que yeren distintos cuando yeren tán asemeyaos.


Fuera’l tren, l’aire trúxo-y alcordanza de les dómines en que se sentaba fuera’l chigre colos sos pás y dalgunos de los veceros a falar nes nueches de seronda. Lloñe, aquellos recuerdos taben mui lloñe de la realidá. Meyor diba a una pensión a dormila y yá na nueche presentase nel otru chigre, el qu’enxamás nun diba a face-y escaecer l’otru, cenar y presentase a los sos pás como’l fíu que coló de les sos vides y tornaba de nueves.

Ariñán escondía la folixa que corríen los mineros, diferente de l'abondosa de Bellobello, pero grandona na allegría y l’alcohol. Xuacu nun se sintió raru. Onde tuviere una botella, taría un collaciu. Llegó a cenar colos güeyos roxos y tatexando.

-Dame una cena. ¿Tu qué yes nueva?

-El nuevu yeslo tu -Xuacu remiróla. La neña taba pa sirvir yogur-. ¿Ónde tán los dueños?

-Trabayando na cocina. Dalguién tien de preparar les coses.

-Di-yos que salgan.

-Home, agora mesmo. Nun tienen otra cosa que facer.

-Xana, dexa de falar y atiendi al señor.

-Dende cuándo me llames d'usté, mama.

-Xuaquín, fíu míu. ¿Pero pense tabes muerto? Ficímoste hasta un funeral.

-Eso ye llargo de cuntar asina que ye meyor facelo con pá delantre.

-Home, mira, pa más sorpreses, ésta ye Xana, la ma de la to fía. ¿Ónde se metió?

-Nun sé, pero paezme que tien razones pa desapaecer.

La nueche ta frío. Nun fue a coyer ropa d’abrigu. Menos mal que garró la manta pa la neña. La so suerte cambiare de nueves. Tendría de buscar un llugar onde pasar la nueche. Tres homes atayáronla colos sos pensamientos y entamaron a face-y biecos, a toca-y el pechu, a mete-y les manes pente les piernes; ún d’ellos quitó-y la neña del cuellu. Nun pudo dir a la policía, ellos diben facer lo mesmo qu’aquel castrón. Glayó y ellos intentáron-y tapar la boca. Aquel castrón viniere a vivir a casa cola so ma. Les seyes manes desvistiéronla con dolor. Nun lu asperaba, garróla a traición. Reñeron por quien diba ser el primero. So ma violo too y nun dixo nada. Ella intentó fuxir pero ellos paráronla a pataes. Lo único bueno d’aquel día fue la so fía.

     CORDOBELLEANDO    

     CORDOBELLEANDO ANDO    

Ésta va ser una parte onde vamos poner en práutica la llingua con xuegos y otres cosines afayaíces. Entamemos.

A.- Mensaxe enmazcaráu:

Darréu vamos enmazcarar un mensaxe que tienes de descubrir:

N__st__   __p__s__d__ __   n__n    s__l__ __    M__l__ __
Como ves, dalgunes lletres fueron sustituyíes por rayes. Adivínales y descubre’l mensaxe.

B.- Vamos cuntar mentires:

Agora vamos poner una conversación que, talamente como apaez, asemeya ser una mentira. Si yes a ordenar correutamente les rempuestes, la conversación va garrando sentíu.

-¿Cómo te llames?

-Nel chigre non.

-¿Cuántos años ties?

-Seyes.

-¿Cuántes vegaes comes al día?

-Dos.

-¿Cuántes vegaes sales a la selmana?

-Llámome Xuacu.

-¿Qué faes los domingos pela mañana?

-Dir a misa.

-¿Ónde vas el vienres pela nueche?

-Dormir.

-¿Cuantes hores ves la televisión nel día?

-Tres.

-¿Nun te paecen munches?

-Tengo ventidós años.

-¿Qué ye lo que nun te presta facer?

-Al chigre a trabayar.

     CORDOBELLEANDO GRAMÁTICA BLANDIO    

A.- Apostrofando LA:

Apostrófase l’ namái si-y sigue pallabra qu’entame per a o ha:

L’abeya fai’l miel.

Xuacu garró l’hacha pa dir buscar a Xana.

Apostrofa agora LA nestes oraciones:

1.- La habitación de la neña ta vacía.

2.- Nun ficieron la apertura del chigre hasta les seyes.

3.- La arrastradura de Xana per parte los violadores dexó-y delles mancadures.

4.- Xuacu asperaba que la acoyida de los sos pás fuere grande.

5.- La habitante d’Ariñán nun dexaba de dicilo nel tren.

L’ESPAÑÍU CABERU

Una hora, nin más nin menos. Cuando paecía que finare, entamaba de nueves. Nes ventanes del palaciu gobiernu colaben les cares acordies llegaben a buscalos les sos limusines. Fuxíen como raposes pa les sos capitales de provincia, dexando a soles al presidente y al so xefe gabinete. A los cincuenta y cinco minutos malpenes quedaben la pareyina con Tinito’l Fartón. Nel so teletipu lleíase una nueva que los dexó ablayaos. Tolos bancos de la capital ya ilesies de postín saltaren pelos aires quedando namái que furacos nel so llugar, furacos qu’enllenaben los sos carteres de probeza y llograba esfarrapar a tola xente que llegare de fuera Cordobello hai más de dos sieglos.


Baxaron les escaleres nos españíos grandonos, abultaba que diba cayer tola capital y que los ataparía ente los escombrios pa siempres. Tinito dixo:


-El deber me manda. Voi colos mios homitos a investigar lo asocedío.


-Nun fai falta que se xustifique. Na carita vése-y que va onde Luzvitular –diz-y el presidente.


-Ta mui enquivocáu. La ciudá ye la que más m’esmolez.


-Entós venga con nós, na prisión de xuru que tan los culpablitos.


-Va ser que non, pero voi dir con vos.

Ánxel nun dexó de mirar pa la so roxa. Dende qu’españare’l tren y ella los salvare minutinos enantes, nun se separtó d’ella. Tampoco l’amigu Xuacu los dexare a los dos, nin Mingo y Colás, que nun s’alcordaben de los sos nomes nin del so pasáu porque’l tren esmigayárase segundinos depués d’abandonalu y dexólos un migayín fatos. A lo meyor nin t’alcuerdes d’ellos, si ye esti’l casu nun t’esmolezas que les sos nueves aventures van facer que lo faigas.


Alcontrábense nes puertes de la cárcele de Cordobello asperando una visita perimportante que se xuntare a los conseyeros, que fueren llegando ún a ún, y la oposición política. Ascuchaben la radio de la qu’entraba l’auto del Presidente de la República Familiar de Cordobello. Namái facelo, pesllaron les puertes y dieron coles pates en culu p’hacia l’autocar que los diba llevar lloñe d’ellí. N’arrancando a tou meter y dexando tres d’ellos tres cais, dieron nel dispositivu y la cárcele emprimó a esfacese en metanes d’un ruíu ablucante. Lladriyu a lladriyu cayó l’edificiu nuna esplosión histórica que diba camudar la vida de la xente d’aquella isllalla. Entós, una riestra de fueos artificiales surdieron de dellos puntos la ciudá y les campanes de les ilesies autóctones llanzaron los sos sones a l’aire, enllenándose de xente que baillaba y canciaba per toles cais de la capital. Vamos dexalos cola allegría del día que yá la política encargaráse de desilusionar y corromper tolo que toca y fairá que la llucha nun fine onde paez.

     CORDOBELLEANDO    

LES SOLUCIONES LA SELMANA PASADA

CORDOBELLEANDO COLA LLECTURA

Gueta nel testu les siguientes pallabres:

Tu mesmu pues iguar esti exerciciu.

Agora xúntales a les sos definiciones:

1.- folixa 2.- iguar 3.- trebeyar 4.- ruxerrux 5.- xuxuriar 6.- lladriyos

Pon n’orden les pallabres de les siguientes oraciones:

1.- Tol mundiu xiró la cabeza y nun dexó de xuxuriar.


2.- Tinito entamó a glayame en cuantes-y dixi lo del telegrama.


3.- El trámite de Tinito taba nes sábanes de Luzvitular.


4.- Prestaría-yos cuntar colos informes de Tinito.

CORDOBELLEANDO COLA GRAMÁTICA

A.- ENTAMAR A + INFINITIVU

Fai oraciones qu’espresen lo que vien darréu:

1.- Amalio entama a dir monte abaxo.


2.- Luzvitular y Tinito entamen a salir xuntos.


3.- El blogpredicador y yo entamamos a discutir.


4.- La condesa de Felguecuentu entama a pidir pa los probes de les grandes families.

B.- APOSTROFANDO “EL” P’ATRÁS

Fai los apóstrofos p’atrás de “el”:

1.- garró’l papel, dientro’l sobre 2.- asperare’l xueves 3.- aceuta’l gobiernu 4.- da’l ramu, xente’l llugar 5.- dirixó’l so ramu

CORDOBELLEANDO COLA LLECTURA

Xunta la pallabra cola so definición:

A.- fuxir B.- ablayáu C.- esfarrapar D.- españíu E.- esmigayar F.- emprimar G.- camudar


1.- Entamar, empezar.


2.- Desfacer daqué de manera que quede como farrapes.


3.- Desfacer en migayes o en cachos pequeños.


4.- Decayíu, perdida fuercia, intensidá, salú.


5.- Cambiar, agarrar o facer agarrar les carauterístiques d’una direición, d’una cualidá, d’un estáu nuevu.


6.- Salir d’un sitiu onde se taba trancáu.


7.- Arreventáu, rotu o arregalláu de golpe, pola presión.


Sirva d’exemplu: A-6


CORDOBELLEANDO COLA GRAMÁTICA

APOSTROFACIÓN DE “EL”

Cuando “el” va precedíu de pallabra qu’acaba per vocal, y al mesmu tiempu siguíu de pallabra qu’entama tamién per vocal o h+vocal, apostrófase esta última.


Nel testu tenemos estos exemplos:


Tampoco l’amigu Xuacu


de la qu’entraba l’auto del Presidente


a l’aire

Apostrofa p’alantre:

1.- Sentía el aire na cara.
2.- Ye el ave más xabaz.
3.- Xuacu xubió a el horru.
4.- Mingo nun dexa el esguil solu.
5.- Colás come el arroz con paliyos.


xabaz: ax. De maneres tosques y poco sociables.


esguil, l’: sust. Mamíferu royedor del xéneru Sciurus de pelo roxo y rabu llargu y peludu, qu’esguila pelos árboles.

Agora apostrofa p’alantre o p’atrás según seya:

1.- Ánxel garró el autobús el últimu.


2.- La roxa xintó el fégadu con cebolla.


3.- El Presidente nun alvirtió el engañu que-y ficieren.


4.- El últimu en llegar fue el home de la dinamita.


5.- Ánxel y la roxa miraron el edificiu saltar pelos aires.

CONTRACIONES DE “EN” Y LOS ARTÍCULOS DETERMINAOS:

EN + EL = NEL


EN + LA = NA


EN + LOS = NOS


EN + LES = NES


Nel testu tenemos:


Nes ventanes del palaciu gobiernu colaben les cares acordies llegaben a buscalos les sos limusines.


Nel so teletipu lleíase una nueva que los dexó ablayaos.


Tolos bancos de la capital ya ilesies de postín saltaren pelos aires quedando namái que furacos nel so llugar…


Baxaron les escaleres nos españíos grandonos, abultaba que diba cayer tola capital y que los ataparía ente los escombrios pa siempres.


-Nun fai falta que se xustifique. Na carita vése-y que va onde Luzvitular –diz-y el presidente.

Contrae “en” colos artículos:

1.- En la casa nun taba naide y marchó pal parque a celebralo.


2.- Alcontrólu en el solláu.


3.- Taben en los xardinos de les ruines del Palaciu de Gobiernu.


4.- Buscólos en la folixa del centru y en el convite de les afueres, pero nun taben en los dos sitios.


5.- Xuacu garró en les cestes della fruta.

     (Tán emplegaos los enunciaos de la Gramática de l’Academia de la Llingua Asturiana)    

TIEMPOS P’APRETASE’L CINCHU

LA SELMANA DEL MARTES 29 D'AVIENTU NUN SE VA ASOLEYAR EL NÚMBERU DE CORDOBELLO PORQUE TAREMOS FOLGANDO LOS PERSONAXES Y EL AUTOR

-Tinito entamó a glayame en cuantes-y dixi lo del telegrama. Dixo que nun fizo más que visitar casites namái que salto l’alarma -informó-yos Calros al colgar el teléfonu-. Diz que vien p’acá en terminando unos trámites.


-Abultóme raro que fuere Tinito. Corruptito sí, como toos, pero fielito –dixo’l presidente-. Meyor que miremos que midíes vamos tomar pa iguar esta crisis.

-Como xefe gabinete tengo d’informa-yos que les arques del gobiernito taben nel suétanito mui escondíes, sicasí, los lladronitos dieron con elles.

-Eso ye un golpito dende dientro –aseguro’l Conseyeru de Bellobello- que tien tola pinta de tar fechu pola oposición na cárcele.

-Lo meyor ye asperar por Tinito –dixo’l presidente.

Na sala de xuntes, improvisada nel chigre d’al llau al palaciu del gobiernu, fízose un ruxerrux alloriante que nun paró hasta que’l Presidente-yos dio descansu. Ente ellos entamó a falase de los tiempos vieyos nos que les xuntes convocábense solo una vegada al añu, xusto pa finalu y charrábase que facer col premiu de la llotería navidá que cayía siempre nos miembros del gobiernu. Asina que nun tán avezaos a xuntase tanto caberamente y les sos tiestes tan canses de tanto pensar.

El trámite de Tinito taba nes sábanes de Luzvitular, que taba tan atristayada pol atracu que’l policía nun fue a dici-y que non al so pidíu de mimos. La so cama na antoxana yera lo único que nun robaren, bueno y los lladriyos, poro que sirvió pa que trebeyaren ansiosos una vegada y otra ensin dexar un minutu al descansu. El fumu’l pitu nun fue a finar con la folixa que traíen los dos. Tinito fue quien a esaminar el cuerpu’l delitu a gustu.

-Entamaría a trebeyar de nueves contigo otra vegada, pero esos pesaos del gobiernito quieren veme.

-Lo de la nueche fueron migayes al llau tuyu. Nun coles mui lloñe, nun vaiga ser qu’una pelandrusquita te garre pel camínito.

-Tuve en camites abondes, pero nenguna col to fueu.

-Abondes son abondo poco pa los qu’entraron na mio camita y nengún fue quien a averase a los tos polvitos.

-Marcho, que sinón van facelo los llectoritos.

Nel chigre d’al par del Palaciu de Gobiernu dexaron el gallaríu y entamaron a discutir al rodiu de la crisis que diba surdir tres los robos. Prestaría-yos cuntar colos informes de Tinito, pero los trámites diben pa más llargu de lo que pensaben. Entamó a dirixise a los presentes el xefe gabinete.

-Nun hai dulda que tenemos de finar cola subvencionita al pagu del impuestu de luxito de sillites de ruedecites, bastoncitos, prótesis en xeneral,…

-Nun t’escaezas del panecito y l’agüita de los paraditos. Los mui carecites tienen doble subvención, una por nun trabayar y otra pola faltita de salú –interrumpiólu’l Conseyeru de Talagate, la provincia más turística de tou Cordobello.

-Home, Tinito. Yá yera hora –dixo’l presidente.

Tol mundiu xiró la cabeza y nun dexó de xuxuriar. Tinito saludó a los presentes y remembró-yos lo guapu que ye nun dar perres pa la policía y asperar que trabayen como si fueren cien vegaes más. Un españíu fizo’l silenciu. Toos corrieron pa les ventanes. Otros españíos surdieron de diferentes zones de la ciudá. Aquello yera l’acabose.

   CORDOBELLEANDO  

LES SOLUCIONES LA SELMANA PASADA

Agora escribe nos puntos la perífrasis verbal:

1.- vas garrar 2.- va investigar 3.- van colar 4.- va llegar

Intenta dicir na perífrasis verbal lo que vien darréu:

1.- Mañana vamos tar nel teatru.

2.- Ella va llegar a casa pela nueche.

3.- El neñu va garrar el tren pa colar al pueblu la güela.

4.- Nosotros vamos xintar nel chigre siempre.

Agora pon NON o NUN según seya’l casu:

-Non, nun -non -nun -nun -non, nun

Apostrofa nos casos que seya necesariu:

-L’osu, l’animal -L’historiador -l’home -l’añu

CORDOBELLEANDO COLA LLECTURA

Gueta nel testu les siguientes pallabres:

Ruxerrux     xuxuriar     lladriyos     iguar     trebeyar     folixa

Agora xúntales a les sos definiciones:

1.- Aición y efeutu de pasalo bien.

2.- Poner en condiciones bones pa un oxetivu.

3.- Enredar, entretenese moviéndose, corriendo, blincando.

4.- Cosa que ruxe o fai ruíu de contino.

5.- Emitir un ruíu sele y carauterísticu al falar ensin voz.

6.- Pieces de barru cocío de forma prismática, que s’empleguen pa facer paredes, muries.

Pon n’orden les pallabres de les siguientes oraciones:

1.- Tol y cabeza dexó xiró la xuxuriar nun de mundiu.

2.- Tinito a telegrama en dixi lo cuantes-y entamó del glayame.

3.- Luzvitular taba trámite sábanes de de nes Tinito El.

4.- Tinito colos Prestaría-yos informes cuntar de.

CORDOBELLEANDO COLA GRAMÁTICA

A.- ENTAMAR A + INFINITIVU

Perífrasis incoativa. Espresa l’empiezu d’una aición.

Na blognovela tenémosla en:

Tinito entamó a glayame en cuantes-y dixi lo del telegrama.

Ente ellos entamó a falase de los tiempos vieyos nos que les xuntes convocábense solo una vegada al añu, …

Entamaría a trebeyar de nueves contigo otra vegada, pero esos pesaos del gobiernito quieren veme.

…entamaron a discutir al rodiu de la crisis que diba surdir tres los robos.

Entamó a dirixise a los presentes el xefe gabinete.

Fai oraciones qu’espresen lo que vien darréu:

1.- Amalio va escomencipiar a dir monte abaxo.

2.- Luzvitular y Tinito van emprimar a salir xuntos.

3.- El blogpredicador y yo vamos empezar un discutiniu.

4.- La condesa de Felguecuentu va escomenzar a pidir pa los probes de les grandes families.

B.- APOSTROFANDO “EL” P’ATRÁS

Apostrófase ’l cuando va precedíu de pallabra qu’acaba en vocal, y siguíu por pallabra qu’entama per consonante.

Na blognovela apaez:

dixo’l presidente

aseguro’l Conseyeru de Bellobello

El fumu’l pitu nun fue a finar con la folixa que traíen los dos.

Tinito fue quien a esaminar el cuerpu’l delitu a gustu.

…interrumpiólu’l Conseyeru de Talagate, la provincia más turística de tou Cordobello.

Un españíu fizo’l silenciu.

Fai los apóstrofos p’atrás de “el”:

1.- Milio garró el papel, metiólu dientro el sobre y unviólu al fíu.

2.- El blogpredicador díxo-y que lu asperare el xueves pela tarde.

3.- En Cordobello tola xente aborixen nun aceuta el gobiernu de los foriatos.

4.- Nun da el ramu a la xente el llugar porque tien de dir a persones de más aquello.

5.- Luzvitular dirixó el so ramu a les sos amigues.

TINITO’L FARTONITO

-Nun t’esmolezas. De xuru que nun van dir lloñe los lladroncitos.


-Mira, Calros, nun soi a aguantate más. Cola darréu d’equí si nun quies morrer afogáu.

-Cariñito, tate tranquilita, nun te pongas nerviosita.

-En tres horites que llevamos asperando, conózote meyor qu’a los otros seis anteriores. Llévote quince añitos y nun tas conmigo más que pa medrar. Nun sedría rarito que tuvieres una amiguita como los otros.

-Yo nun te robe, mio amorcito. Toi p’aidate.

-Voi cuntar hasta cinco y depués voi glayar como si tuvieren matándome. Sal pitando si nun quies quedar sordu.

Nun se-y via per delantre malpenes ella llegó al tres. Sentóse de nueves na cama y lloró una y otra vuelta, como si fuere una neña. Anque tuviere muncho nel bancu, na casa atopábase lo más valioso. Nun atalanta como la policía taba tardando tanto. De sópito, picaron al timbre, que nun lu robaron porque taba’l llau de la cama que llantaren na antoxana.

-Buenes, señora. Soi l’inspeutor Tinito de la policía metropolitana.

Lo que-y faltaba, Tinito’l Fartonito diba llevar el so casu. Si atopaba a los lladrones diba pone-y un cazu que nun diba garrar ún de los bancos onde ella guardaba’l so caudal. Dalgunos dicíen qu’iguaba él los robos pa depués llevase’l dineru llimpio.

-Non, nun fai falta que me cunte nada. Ye’l mesmu robu de les otres diecinueve casites.

-¿Ta diciendo que robaron nes venti casites de les grandes familites de Cordobello?

-La mesma nueche y a la mesma hora. Ta viniendo la policía de les provincites de la rodiadita.



Les puertes del palaciu de Gobiernu de Cordobello taben pesllaes. Los Conseyeros y el Presidente amiraben toos alloriaos que llegare la secretaria de presidencia coles llaves del llugar. El domingu nun quedaba naide ellí, nin los guardes xuraos que marchaben de fin de selmana anque-yos tocare guardia.

-¿Quier picar un bugrito señor presidente? Malpenes fui a garrar una docenita d’ellos de la que salía.

-Home, nun-y voi dicir que non.

-Garre usté tamién dalgún oriciito.

-¿Nun sedrá muncho?

-¡Qué va ser! Depués tien de prebar dalgo d’esti arrocito con llechita.

Les cinco hores fuxeron rápides. La secretaria tenía la llacuada del domingu y nun baxaba de les cuatro hores, amás de la que-y llevaba fregar la cacía. Sacó les llaves y despeslló la entrada principal. Los xerifontes entraron pa la so xunta d’urxencia. La non mirada al llugar llevólos al despachu onde s’arrepanchingaben una vegada cada cinco años. Nun había nada. Nun quedaben nin los enchufes. Salieron y güeyaron tolos requexos. Nun dexaren nin la moqueta. Diben xuntase polos robos a les venti families importantes de la isllalla y de resultes que-yos arrampuñaren tol palaciu gobiernu.

-¿Hai dalguién? Traigo telegrama urxente.

L’home de correos apurrió-y el papel al Presidente. Abriólu nun tris y lleólu. Dába-y les gracies por tolos bienes y dicía-y que-y amurniaba dexalos, que tenía de marchar. Firmaba Tinito’l Fartonito.

CORDOBELLEANDO

Esta seición qu’entama güei va intentar que seya un llugar onde se deprienda dalgo d’Asturianu. Pocoñín a poco tresformaráse acordies se ponga en prautica. La to opinión tamién ye importante, toa triba de necesidaes, de duldes, d'idegues son de munchu interés, fáemelo llegar colos toos comentarios.
Les soluciones la selmana que vien.

DIR+INFINITIVU

Ye una perífrasis verbal qu’espresa aición futura. Nel testu atopámonos con:

“Lo que-y faltaba, Tinito’l Fartonito diba llevar el so casu. Si atopaba a los lladrones diba pone-y un cazu que nun diba garrar ún de los bancos onde ella guardaba’l so caudal.”

Más exemplos son:

La Condesa de Felguecuentu va mercar el vistíu pa la fiesta.

Luzvitular y Calros enxamás nun van casase por mor de la fidelidá.

Agora escribe nos puntos la perífrasis verbal:

1.- Tu nun ………………………... l’autobús si nun te das aballu. (garrar)

2.- Tinito’l Fartonito ………………………………el casu pal gobiernu. (investigar)

3.- La Condesa de Felguecuentu y Amalio ………………………………. Pal sur de la isllalla de vacaciones. (colar)

4.- Anque nun lu veáis, ……………………………….. mañana. (llegar)

(Alcordáivos que’l verbu dir en presente ye: Voi, vas, va, vamos, vais, van)

Intenta dicir na perífrasis verbal lo que vien darréu:

-Que mañana taréis nel teatru.

-Ella llegará a casa pela nueche.

-El neñu garrará’l tren pa colar al pueblu la güela.

-Nosotros xintaremos nel chigre siempre.

NON Y NUN

La negación esprésase per aciu de los alverbios non y nun. El so emplegu faese acordies con estes normes:


-NUN emplégase cuando acompaña verbu o pronome átonu que d’él dependa.


-NON úsase col restu los casos: a) acompañando a elementos non verbales; b) enantes de pausa.


Nel testu atopámonos con:

-Non, nun fai falta que me cunte nada. Ye’l mesmu robu de les otres diecinueve casites.

-Home, nun-y voi dicir que non.

La non mirada al llugar llevólos al despachu onde s’arrepanchingaben una vegada cada cinco años. Nun había nada. Nun quedaben nin los enchufes. Salieron y güeyaron tolos requexos. Nun dexaren nin la moqueta.

(Apaecen más, pero nun los vamos sacar toos)

Agora pon NON o NUN según seya’l casu:

-………, ……… voi dir a la policía a cunta-yos lo que vi.

-“Nucleares, ………….. gracies” glayaben peles casi de Bellobello.

-Ella ………… s’averó a la casa de Luzvitular.

-…….. me digas más, atopásteti con Tinito y tuvisti de convidalu.

-Aplaudieron la ……. agresión a los probes de Cordobello si ………. yera dafechu necesario.

APOSTROFAR “EL” P’ALANTRE

Apostrófase l’ cuando va siguíu de pallabra qu’entame por vocal o h muda.


Nel testu apaez:

-Buenes, señora. Soi l’inspeutor Tinito de la policía metropolitana.

L’home de correos apurrió-y el papel al Presidente.

Apostrofa nos casos que seya necesariu:

-El osu ye el animal simbólicu de les montañes de Cordobello.

-El historiador Caciplacuentos recibió una medalla pela Universidá de Bellobello.

-Non, nun ye verdá que el home seya'l ser más intelixente de la creación, en Cordobello ta’l gamusín.

-Nun basta con dir el domingu a misa, hai que mortificase tamién el añu que fine en 9 y dir a la mar de Cordobello a nalar en busca'l pexe Rufufú.

(Tán emplegaos los enunciaos de la Gramática de l’Academia de la Llingua Asturiana)

SEYES MESES DEPUÉS

LA SELMANA QUE VIEN NUN SE VA ASOLEYAR CORDOBELLO POR AQUELLO QUE DE XEMES EN CUANDO HAI QUE FOLGAR. VÉMONOS ENTÓS EL QUINCE. GRACIES POR TAR EHÍ.

ENANTES D’ENTAMAR EL CAPÍTULU, DICIVOS QUE TAMOS ASPERANDO POLOS VUESOS COMENTARIOS. SÉ VALIENTE, ESCUEYE SER UNA LES PERSONES DE CORDOBELLO Y CRITICA A LOS PERSONAXES D'ESTA BLOGNOVELA. COMENTA QUE FAEN, ONDE LO FAEN, COMO LO FAEN... NAIDE NUN TE VA COMER, NUN VAN CONOCER EL TO NOME, SOLO'L NOMATU QU'EMPLEGUES. ¡AH! ENTAMAMOS A ESCOYER QU’ANIMAL SE COME EN NAVIDAES EN CORDOBELLO, DÍNOSLO XUNTO AL TO COMENTARIU.

Cuando un narrador escribe “Seyes meses depués”, el llector cavilga que les coses camudaron muncho, que los personaxes fueron quien a dar una vuelta al mundiu y tornar, pero en Cordobello malpenes nun pasa nada. Bueno, eso de nada. Luzvitular empareyóse de nueves col nuevu xefe gabinete y vio como la ilesia anulaba’l so casoriu anterior. Si lo vemos más seles, nun ya tampoco la primer vez sinón la sesta qu'anula’l matrimoniu. Ta tan gayolera que nun-y fadia que dalgunes llinguateres la llamen “Luz vi al titular”. Tolos díes ye una muyer feliz que percuerre toles tiendes de postín mercando tolo que los güeyos seya alcanzar y con dos carteres dispuestes a pagar: la del xefe gabinete y la de so. Cola d’ella va sacar el dineru pa un vistíu que llucirá güei na fiesta que da pa que la xente sepa que Calros, l’actual xefe gabinete, pidióla en matrimoniu y ella contestó-y que sí. Trai munchu trabayu'l preparar un convite asina, lleva dos selmanes mercando vistíos a cuál más caru y tovía nun-y prestó del too nengún. Y depués de les xintes tener de despachar col organizador de fiestes de la jet de Cordobello, Giulianno Zorrampliu, que-y fai ver menús, nomes de convidaos, flores,…, nun ye raro que depués de cada xunta tengan de chucase xuntos pa nun estresar. Naide nun sabe la vida tan cafiante que lleva la xente rico.

El coche avérase al so palaciu. Calros sal d’él y empobínase pa l’antoxana onde ella lu aspera. La botella xampán frío dexa salir les burbuyes y enllena les copes. El camareru ye despidíu y ellos beben ensin amiralu. Nunos minutinos tarán nel Club de Bagamón, onde celebrarán la fiesta. O eso camienta él. Ella faló con Giulianno pa que ficiere como les otres vegaes, disculpalos colos convidaos y facer la fiesta ensin ellos.

-¡Cómo vamos facer eso! Tán convidaes les venti familites más poderosites de Cordobello. Ye una fiestita namái que con ellos.

-Calros, yo soi de les venti familites más poderosites de Cordobello. Vas contámelo.

-Nun van ser a perdonanos. Les venti familites más poderosites de Cordobello son lo más escoyíu de la isllalla. Por nun tar, nun tán nin los conseyeritos nin el presidentito.

-Calros, asela un migayito. Ye la sesta vegada que-yos faigo esto, ye más, toles familites faen lo mesmo. Nun seyas babayito.

El vistíu nun dura nin un minutín nel cuerpu de Luzvitular. Elixó’l meyor pa les circunstancies, la cremallera va per delantre y d’arriba abaxo. Los llabios xúntense. La so piel esconsona. Al par d’ellos hai una cama tresformada en sofá por mor d’una fola coxinos. Él nun ta preparáu. El xaqué quítenlu rápido. La corbata y la camisa dexen pasar el tiempu. Los pantalones endólquense ente brazos y piernes, anque garren dalgo d’aliendu ente besu y besu. El calzonciellu y los calcetos cayeron pente les sábanes. Nengún home que quixere entrar nes venti families más poderoses de Cordobello llega virxen al matrimoniu, nin l'obispu que los casa.

Intenta prender el pitu. Ella gárra-ylu y llánzalu fuera la cama. Nun-y gusta que-y afumen na cama. Él garra la copa xampán pa finala. Ella gárralu a él y llánza-y la llingua hasta’l gargüelu. Él agradez nun tener cenao.

-Depués d’esta nochita yá tas almitíu nos venti. Bono, non, depués que firmes les renuncites a tolo mío.

-Cariñito, eso ye pocu romántiquitu.

-Tampoco ye romántiquitu golete los piesitos y acabo facelo.

Namái dicilo, corri pa la entrada’l palaciu y pica. Remembra que nun hai naide, que dexó la nueche llibre al serviciu. Da coles pates en culu hasta la puerta per onde entres los criaos. Unos segundinos depués.

-Robaron tola casita. Nun dexaron nin les bombillites.

-Home, toa non. Dexaron los lladriyos.

L’ALBERGUE’L SEÑORITU

Les ropes nun-y presten, mírenlu de regüeyu y marmuren ente ellos de la que pasa, asina que tien de buscar per dalgún llau les afayadices pa un pidigüeñu. Nun ye creyer que cueste tanto’l facese con ropa esfilachao y puerco, lleva dalgunos de los barrios más probes y ningún quier camuda-y nin los calcetos. Naide nun quier acabar vistío como un señoritingo nun teniendo trabayu que-y avere la comida. Ehí ta l’albergue. Tovía ye ceo p’atopar xente. Pregunta pol que dirixe’l cotarru. Respónden-y que tien de venir pela nueche. El cuartu queda namái con él. Los farrapos tán dientro les caxes. Hai cartelos d’homes, muyeres, neños… Garra una caxa pa homes. Revuelve hasta topar más o menos de la so talla. Escóndelos na bolsa mano que pudo coyer de casa. Sal corriendo del edificiu. Na cai nun hai naide. Nos baxos nun hai naide. Na so esperanza nun hai naide.

Luzvitular, la so muyer, cacipla pel palaciu poniendo les coses al so gustu. Esti floreru verde ta meyor naquella mesa. Esa figurina tan prestosa ta meyor naquel secreter. Los nervios tan meyor n'otru ser. Nun se siente picar a la puerta. A ella nun-y presten los paisanos que nun tienen puntualidá. Guapo ye pero fálta-y la chapeta, y la chapeta hai cuantayá que la cosiere a un reló.

-Señora. Al teléfonu -acápiala la criada.

-¿Quién ye? –pregunta ella pel teléfonu.

-Mira, ye que voi tardar un migayito–contésta-y una voz d’home.

-Entós quédate onde tas, que pa llegar tardito ya taba’l mio homito.

Les llárimes esvarien peles sos mexelles. Dende que marchare Amalio nun hubo home que la contentare. Pa ella que-y facía falta dalguién al que pone-y los cuernos. Na so cabeza entamó a abeyar la idega d’atopar dalguién que la llevare al altar. Lo primero que tenía de facer ye llograr la nulidá del casoriu con Amalio.

La nueche enllena l’albergue de xente pidigüeñu que fina la so xornada de buscar pelos requexos dalgo que llevase a la boca. El cabezaleru del llocal llegare al mesmu, prendiendo la lluz del so despachu y arrexuntándose los probes con problemes na so puerta. Amalio entra col so nuevu traxe d’Emilio Pidigüiñuchi. Les miraes nun choquen con la de so, la cosa ta tranquilino y la ropa fizo’l so efeutu. De sópitu, un argayu persones vase pa les meses, la hora la cena nun aspera. Amalio tien de dir a lo fonderu’l llugar p'atopar un llugar onde sentar.

-Señor, aspere un migayín que salga’l direutor y faigamos la oración.

-Perdón. Soi nuevu nesti albergue.

-Nesti y n’otros de la ciudá –informa’l blogpredicador al so siguidor-. Esti home ye d’otra parroquia y sedría de mal gustu que nun-y ufierte sitiu na mio mesa.

Dos de los sos homes garren a Amalio pelos brazos y métenlu nel despachu. El blogpredicador reza la oración davezu y fala cola xente como tolos díes. Amalio nun ye a creyer lo qu’asocede. Aquel que nun tiempu taba baxo’l so gobiernu alcuéntrase agora per enriba d’él. Nun podía fuxir, nin glayar socorru y nin siquier engarrase colos sos contrincantes, en cualquier situación saldría mal paráu. Asperar. Asperar que’l blogpredicador acabare col bañu mases pidigüeñes que se taba dando.

-El mio bon xefe de gabinete, o ye meyor dicir l’antiguu xefe –rióse seliquino y siguió col requiloriu-. Equí ta l’home qu’esfarrapó’l mio futuru…


-Nun escaezas qu’esfarraparon el mio tamién. Amás, fueron elles les que nos lo esfarraparon a los dos.


-Si nun apaecieres faciendo virgayaes nesa blognovela, otru gallu cantaría.


-Gallu, pero non pitu.


-Home, pa enriba graciosu. Da-y una cuelma que nun seya a escaecela na vida.

Amalio nun apara de glayar. Los homes sácanlu pela puerta d’atrás. En llegando al basureru, entamen arremanga-y per tolos llaos. Yá nun-y sal nin un gorgutu pela garganta. La borrina surde pasu ente pasu. El silenciu faese. Negro. Silenciu negro.

Nun seyas vagonzón, escueye ser una les persones de Cordobello y critica a los personaxes d'esta blognovela. Comenta que faen, onde lo faen, como lo faen... Naide nun te va comer, nun van conocer el to nome, solo'l nomatu qu'emplegas.

NUN M'APETEZ GARRALU

Suéna-y el móvil. Hai yá díes que paez nun esistir pa la xente qu’enantes-y taba llamando un día sí y otru tamién. Nun-y apetez garralu. Si ye urxente, quien seya tien tiempu pa marcar otra vegada’l númberu. Cafiantes. Cuando yes dalguién, tán allampiando porque-yos vaigas a les sos fiestes, porque los nomes anque fuere en suaños, porque tes con ellos un minutín de la to vida. Agora nun te conviden, nin te nomen, nin tán a mas de doscientos quilómetros de ti. La vida ye asina de castrona. Un día yes la de dios y al otru nun yes naide. Y ónde va dormir güei. Nel albergue d’ayeri malpenes lu dexaron pegar un güeyu cuando yá tenía de tener l’otru xixilando. La ropa que lleva ye mui nuevo. Aquellos pioyosos naguaben por desvistilu y quita-y tolo de valor que tuviere. Si supieren que nun-y dexaren cuasi l’aire que respira. Vaya. Suena otra vuelta. Va ser dalguién que daveres quier falar con él. Nun conoz el númberu. Asina too, va garralu.


-¿Quién ye?

-Amalio, suenes un migayín tristayu.

-¡Foina! Depués que me dexareis la mio muyer y tu con una mano pa en delantre y otra pa en detrás.

-Home, nun me digas qu’un xefe de gabinete nun tien pa un café.

-Sí, sí. Xefe de gabinete, xefe de gabinete. Nun tuvieron tiempu pa echame.

-Meyor, agora tíes tol tiempu del mundu.

-Sacavera –y cuelga.

Más cerca de lo qu’imaxina, tien al xostrón del blogpredicador. A diferencia d’él, nun lu echaron los sos xefes, los obispos. Sedría mal visto pola xerarquía si faen públicu tolo asocedío. Lo meyor ye destinalu nes afueres de la ciudá, pa que nun fale, y escaecelu. La ilesia nun estrema caridá y abandonu cuando se fala del so futuru económicu y social, anque la parte de les perres seya más importante.

Busca na memoria del móvil el númberu de la Condesa de Felguecuentu. Lleva dos díes intentando falar con ella. Como les otres vegaes, el móvil suena pero naide lu garra. Nun hai muncho yera ella la que lu llamaba a toles hores del día, fueren hores de cama o de vixilia, de soledá o de compaña. Vuelve de nueves a marcar el númberu. Descuelguen.

-¡Yá ta bien! Déxame tranquila.

-Nun cuelgues. En dos minutinos cuéntote pa que te llame.

-Perdisti mediu.

-Nun soi vivir ensin ti. Nun soi a tar tan lloñe de ti.

-Sí, home sí. Acabes de dicir una verdá como un santu. Nun pues tar lloñe mi, nun barriu de pidigüeños, onde nun hai folixes nin comida de primera.

-Eso nun ye verdá.

-Nin lo ye tolos neños colos que tuvisti. Nun te voi dar nin el minutu.

La comunicación córtase. El blogpredicador llama de nueves. Contésta-y.

-Toi col neñu que ta agora nel to puestu, porque malpenes tien venti años y ta buenísimo. Asina que déxanos tranquilos –diz-y colgando. El nun torna marcar.

Nel despachu de presidencia atópase como siempres la secretaria del presidente. Si dalguién quier charrar col cabezaleru del país, lo más seguru ye que s’atope cola so secretaria trabayando y trabayando hores y hores, díes y díes, selmanes y selmanes, meses y meses, años y años. El so e-mail dibúxase como la única forma de ponese en contautu col so xefe, qu’enxamás s’alcontrará nel so despachu al nun ser que seya una urxencia o dalgún convite. Suena’l teléfonu.

-Llarina, buenes. Va unviar un despachu urxente al blog nel que se-y diga que ta prohibíu asoleyar les opiniones de los personaxes qu’apaezan na so hestoria. El señor obispu va encargase de quefaiga comentarios.

-Aspere un migayín, tengo de garrar papel.

-¡Un migayito! Díxi-y qu’ente la xente fino dizse migayito. Los diminutivos son en –ito y –ita. Los que vinimos del otru llau del cordal nun emplegamos –ino y –ina porque ye mui aldeganu.

-Yo nun vini del otru llau del cordal.

-Pero trabaya pa uno.

Llarina piensa que los que son orixinarios de Cordobello yá tán un migayín cansos d’oyir fataes de los que n’otres dómines taben al otru llau del cordal. Amás, son los únicos que trabayen. Prende un pitu y entama a fumalu mientres dexa tolos mandaos pa depués.

DESPIDÍES (Non la nuesa, claro)

Tuxa nun dexa de mirar pal reló. Hai yá diez minutucos que tán avisando que los pasaxeros tienen d’embarcar nel avión. El so xefe de gabinete nun vien, asperó que lo ficiere raspiando la hora y, como nun lo fizo, enanchó’l tiempu por aquello de lo malo que ta aparcar nel aeropuertu. Enfila pa la puerta númberu nueve, camín d’aquel branu de doce meses nel que se diba somorguiar na costa sur de la isllalla, apúrre-y la tarxeta d’embarque a l’azafata y entra na zona de primera. El so asientu ye’l 7C, polo que tien de pedi-y pasu al home que ta sentáu al so llau.


-Por favor, sedría tan aquello de dexame pasar al mio asientu.

-Home, Tuxa. Ta bien que trabayes al par mio, pero nun fai falta que seyas tan fina.

Los güeyos cayeron n’hipnosis. Sabe la colonia qu’usa, el despachu nel que ta, la xente colo que se xunta, les marques de ropa y calzáu qu’emplega, tolo inimaxinable qu’una aveza a conocer d’un bombóm, pero nun sabe’l so nome. Va ser que ye fata. Va pa cuatro años que ta cerquina d’él y refresca cada vegada que lu ve, por embargo nun parare a enterase del so nome.

-Nun me digas que nun me conoces. Soi Xandro, el del despachu del presidente.

-Como nun te diba conocer.

-Vas tamién de vacaciones.

-Va ser que sí, anque les míes de xuru que son más llargues que les tuyes.

-¿Tas segura?

L’avión despegó. Non mui lloñe d’ellí alcuéntrase'l palaciu del so vieyu amante Amalio de la Esllava Fecho, qu’intenta convencer a la so muyer de que ye l’amor de la so vida. Ella amira una revista na que sal nuna fiesta de sociedá a la qu’él nun fue por tar cola so amante. Él fala, ella calla. Él razona, ella aporfia en silenciu. Él alvierte qu’ella nun lu ascucha, ella ta pensando nel menú de mañana pa los cocineros.

-Luzvitular, créasme o non, enxamás nun quise a nenguna más qu’a ti. Yes la muyer qu’enxamás nun voi escaecer.

-Toi fartuca de tanta cursilada. Nun sedrá a pescanciar que tengo celebru.

-Luzvitular, nun esfaigas el mio corazón. Nun esmigayes los mios sentimientos pa contigo.

-Valió, poeta frustráu. Agora vas coyer les tos coses y vas colar pa nun volver. Yá iguaremos el divorciu y eses coses, de mano déxame tranquila.

-Asina qu’eses tenemos. Pues nun vas llograr nada de min.

-Les xoyes, el palaciu con tolo que ta dientro y les perres de la mio familia, ¿paezte poco?

-Yá falaremos.

Amalio sal del palaciu y dirixe los sos pasos pa la cai central, onde tán tolos bancos. El so xestu ye d’esboroñar a tol que se-y punxere per delantre. Una per una percorri toles sucursales. En toes-y dicen que la so secretaria fuere’l día anterior a pesllar la cuenta. Que llevaba un papel cola so firma. Que fuere too llegal. Nún d’ellos cunten-y qu’abrió una cuenta al nome d’ella. Amalio nun fala. Amalio nun amira. Amalio ta arruináu.

UNA MAÑANA NA CAMA

El ruíu la cama nun dexa oyer el timbre la puerta que ruxe y ruxe una vuelta y otra de la que’l xefe de gabinete y la so secretaria nun paren de trebeyar. Cuando sal la chirlotada entama a sonar golpes na madera que faen blincar a la pareya hasta cayer en suelu. Él garra’l pantalón y xúbelo peles piernes de la que se decata qu’ella va pa la entrada esnuda.


-Pon polo menos la bata.

-Voi namás ver quien ye pela ventana.

Arremella los güeyos. Amira pal xefe de gabinete y diz-y:

-Ye’l blogpredicador.

El xardín ta llento pela xelada. Los sos pies nun se decaten d’ello. La so secretaria dexa sonar la so voz mentanto’l blogpredicador nun dexa de vocinglar y facer dalguna estiella. Arranca’l coche a mediu vistir. El blogpredicador cuerre pal soníu pero llega cuando namái queda’l fumu. La secretaria abre la puerta principal. El blogpredicador cuerre de nueves pa ella. La secretaria va pesllar. El blogpredicador llega pa pone-y el pie.

-Nin se-y ocurra. Nun pieslle o entamo a glayar en metanes de la cai pa s’entere tol vecindariu.

-Nun lu vi. Diba duchame.

-¿Quién taba con usté? El xefe de departamentu, ¿eh?

-Ta llocu. Taba sola.

-Venía a buscar al so xefe p’avisalu de dalgo importante.

-Que la xente la oposición nun diba trabayar nos praos. Yá lo sabíemos…sabía.

-¡Qué diz usté! ¡Ta lloca! Diba dici-yos qu'o daben más subvención a la ilesia o colábemos de Cordobello. Como lo oye. Picos p’arriba y a la tierra d’onde vinimos.

-Cuando vaiga trabayar yá-ylo cuntare. Usté perdone.

Diz de la que pieslla la puerta. El teléfonu entama sonar. La secretaria gárralu.

-Nun ta. Porque tola xente camienta que ta equí.

-Mira, guapa. Soi´l presidente y esto ye urxente.

-El señor xefe de gabinete nun ta equí. Namái duchame aspero falar con él.

-Díga-y que plan de la oposición salió bien. Demasiáu bien, diría yo.

-Asina-ylo diré.

Malpenes lo cuelga y entama sonar. El xestu ye’l de deseyar qu’esapaeciere, que nun volviere cafiala, que marchare de la casa pela ventana.

-¿Quién ye?

-Soi yo, cariñín. Vine pa la oficina.

-El meyor sitiu onde podíes tar. Namái que falten per mar pa facer un desembarco na mio casa preguntando por ti. Por mar y aire yá los ficieron.

-Probina ella. Eso vamos tener d’igualo.

-Sí, marchando unos díes de vacaciones cola to tarxeta Visa oru na que soi firma autorizada. Manguán. Cobarde….

-Nun me faigas eso, amor. ¿Vas obligame a cortate la Visa?

-Hai yá tiempu que cambié la to firma. Por seguridá, yá m’entiendes.

-Castrona…